“Turai 3–9. Mwakuri 1–5: ‘Ane Kam na Riki bwa Taani Kaotioti Ibukiu,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Turai 3–9. Mwakuri 1–5,” Nakomai, Iriirai—Ibukin te Moanrinan: 2023
Bongin te Bentekota, iroun Sidney King
Turai 3–9
Mwakuri 1–5
“Ane Kam na Riki bwa Taani Kaotioti Ibukiu”
Moana am katauraoi man warekan Mwakuri 1–5. Tataro mwaaka bwa ko na atai kainanoia ataei ake ko reireiniia. Nakomai, Iriirai—Ibukiia Aomata n Tatabemaniia ao Utu ao te kamataata n te booki aei e kona naba ni buokiko.
Kaunga te Tibwatibwa
Korea Antai Ngai iaon te burakibooti. Katauraoi tabeua rongorongo iaon Betero ao tuangiia ataei bwa antai rongorongona akanne. Tera riki ae ataia iaon Betero?
Reirei te Reirei: Ataei aika a Uarereke Riki
Iesu Kristo e kaira Ana Ekaretia rinanoia burabeti ao abotoro.
N reiakina bwa e kanga te Tia Kamaiu ni kaira Ana Ekaretia n taai ake ngkoa rinanoia abotoro e kona ni buokiia ataein ni karekea aia koaua iaoia burabeti ao abotoro inanon ara bong.
Waaki ni Kakukurei aika a Kona ni Karaoaki
-
Kaota te tamnei ae bwanin man te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu. Titirakiniia ataei bwa bukin tera ngkai aomata a tararake nako karawa. Kakimototoa te rongorongo are n Mwakuri 1:1–11. (Taraa naba “Mwakoro 55: Abotoro a Kaira te Ekaretia,” inanon Karaki man Te Nu Tetamenti, 145–47, ke te witeo ae irekereke ma aei iaon ChurchofJesusChrist.org.) Kaoa temanna te ataei bwa e na taua ieta tamneia Abotoro aika ngkai. Antai ae e buoka Iesu Kristo ni kaira te Ekaretia ngkai E aki mena iaon te aba?
-
Takakarona te takakaro ae te kaitoatoa ma uoua babati n tamnei iaoia te Moan Beretitentii ao Abotoro ake Tengaun ma Uoman. Ngkana e reke ae titebo te tamnei, tibwa aran te Abotoro ke te Beretitenti ao tabeua rongorongona.
-
Itinanikun tamnein te Beretitenti n te Ekaretia, kanim tamnei aika uarereke ni bwaai ake e reirei iaona, n aron te Tia Kamaiu, bwabetito, ke te tembora. Kariaia ataei n tatabemaniia bwa e na reke aia tai n taraa teuana te tamnei ao e na tuangiia kaain te kiraati, “Te burabeti e reireiniira taekan [rongorongon te bwai are n te tamnei].” Taekina koauana bwa burabeti ao abotoro a reireiniira te bwai ae e tangiriira Iesu bwa ti na ataia ao ni karaoia.
Tamara are i Karawa e kona ni kakabwaiaia aomata tabeman rinanora.
Tera ae ko kona ni karaoia ni buokiia ataei n atai kawai ae a kona iai ni kakabwaiaia naake irarikiia? Buokiia bwa a na reiakinna man aia banna ni katooto Betero ao Ioane ngke a kamarurunga te aomata ae mwauku.
Waaki ni Kakukurei aika a Kona ni Karaoaki
-
Kaoiia ataei bwa a na katea kaina n te mwakuri te bwai are titebo n te karaki inanon Mwakuri 3:1–10, n aron kanakoan baia ni bubuti te mwane ao ni kibakiba ni kukurei. E kanga Tamara are i Karawa ni kakabwaiaa te mwaane are e aki kona n nakonako?
-
Uota te baeki ae iai inanona tamnei ae a kaotii kawai ae ti kona ni karaoi ni kakabwaiai ao ni buokiia tabeman iai. Kariaia ataei bwa e na reke aia tai n rinea te tamnei mai inanon te baeki ao n tibwaia bwa a na kanga ni kakabwaiaia aomata tabeman n te kawai anne.
-
Tuangiia ataei bwa a na tibwaua te tai are ngke a buoka temanna te aomata.
I kona ni bwaina te kokoaua.
Kiritian n taai ake rimoa a tibwai baike iai irouia ni buokiia ibon imarenaia. Naake iai abaia a kabonakoi ao n anga te mwane nakoia Abotoro, are a manga anganiia Aika Itiaki ni kaineti ma kainanoia. Anania ao Tabeire aki kokoaua iaon aia angabwai, n iangoia bwa a kona ni mwamwanaa ana toro te Uea.
Waaki ni Kakukurei aika a Kona ni Karaoaki
-
Buokiia ataei ni karaoa te kaotioti iaon Anania ao Tabeire. Kabwarabwaraa bwa e ngae ngke ti na aki mate ngkana ti taekina te kewe, te karaki aio e kaota kakawakin te nano ni kokoaua iroun Tamara are i Karawa.
-
Bootaki n anenea te kuna n taekan te kokoaua, n aron “I Believe in Being Honest” (Aia Boki n Anene Ataei, 149). Buokiia ataei n ataia bwa karaoan te kokoaua nanona te tataekina te koaua ao n aki anaa te bwai ae ana bwai te aomata temanna.
-
Kabonganai taore aika beeba ni karaoa kain te bwai ae riki ae ngke temanna e karaoa te kokoaua ke te aki kokoaua. Tuangiia ataei bwa a na teirake ngkana te aomata e kaota te kokoaua ke n tekateka iaon tano ngkana te aomata e aki kokoaua. Buokiia ataei ni mataata bwa bukin tera e kakawaki kakaotan te kokoaua.
Reirei te Reirei: Ataei aika a Ikawai Riki
Iesu Kristo e kaira Ana Ekaretia rinanoia burabeti ao abotoro.
Ko na kanga ni buokiia ataei ni mataata bwa Ana Ekaretia te Tia Kamaiu ni boong aikai e kairaki irouia burabeti ao abotoro, n aron are n taai ake ngkoa?
Waaki ni Kakukurei aika a Kona ni Karaoaki
-
Koreia iaon te burakibooti E kanga Iesu Kristo ni kaira te Ekaretia ngkai akea Ngaia iaon te aba? Kaoiia ataei bwa a na kakauongo nakon kaeka nakon titiraki ngkai ko wareka ana taeka te Tia Kamaiu nakoia Abotoro inanon Mwakuri 1:8. Buokia ataei ni mataata bwa Iesu e rineia burabeti ao abotoro bwa a na kaira te Ekaretia ni boong aikai, n aron are E karaoia n taai ake ngkoa.
-
Bootaki ni wareka Mwakuri 1:22–26. Kaain te kiraati ni kabane, kaotia bwa e kanga te Abotoro ni weteaki bwa te Abotoro ae boou.
-
Imwaain te tai, tuanga temanna te ataei ao ana karo n reiakina taekan te Abotoro ae e a tibwa weteaki (a kona ni kunei rongorongono iaon te Abotoro n “Quorum of the Twelve Apostles,” ChurchofJesusChrist.org). Kaoa te ataei bwa e na tibwaia bwa tera ae e reiakina ma kaain te kiraati ao, ngkana e riai, tera ae e taekinna te Abotoro iaon weteakina n ana moan taetae n te maungatabu ni kabuta.
Abotoro a kaira te Ekaretia imwiin waeraken Iesu nako karawa.
Te Tamnei ae Raoiroi e kaota koauan te euangkerio i nanou.
Ngkana a reiakinna ataei n ataia bwa e kanga te Tamnei ae Raoiroi n taetae nakoia, a na karekea ana kairiiri te tamnei n ongo ao ni karaoa nanon te bwai are a karekea mai iroun te tamnei.
Waaki ni Kakukurei aika a Kona ni Karaoaki
-
Bootaki ni wareka Mwakuri 2:36–37. E kanga aron namakinana ngkana te Tamnei ae Raoiroi e tuangiira te bwai teuana inanora?
-
Ma kaain te kiraati, karaoa te boutita ma taekana ae Tera ae ti na karaoia? mai ieta. Katea te boutita ni bongin nako te wiiki, ao karinii kawai ake a kona ataei n karaoi n te bwai are a reiakinna n tainan reirei ni wiiki nako.
-
Kaoia ataei bwa ana wareka Mwakuri 2:41–47 ao kakaai bwaai aika a raraoi ake a karaoi aomata imwiin bwabetitoakiia. Tera bwaai aika a tamaroa ae ti kona ni karaoi ni kaotia bwa ti kakaitau ibukin te bwai n tituaraoi te Tamnei ae Raoiroi are ti karekea ngke ti bwabetitoaki?
Tamara are i Karawa e kona ni kakabwaiaia aomata tabeman rinanora.
Ko na kanga n reireiniia ataei bwa a kona ni kakabwaiaia aomata tabeman, e ngae ngke akea aia “tirewa ao koora”? (Mwakuri 3:6). Ko na kanga ni buokiia bwa a na norii taai ae a kona iai n beku ibukin te Atua man buokaia aomata tabeman? (taraa Motiaea 2:17).
Waaki ni Kakukurei aika a Kona ni Karaoaki
-
Tuanga temanna te ataei bwa e na wareka Mwakuri 3:1–10 ngkai ataei ake tabeman a katea kain te karaki anne. (Ibukin buokam, taraa “Mwakoro 56: Betero e Kamaiua te Mwaane,” inanon Karaki man Te Nu Tetamenti, 148–49, ke te witeo ae irekereke ma aei iaon ChurchofJesusChrist.org.) Ko kona naba ni kaota te witeo “Peter and John Heal a Man Crippled Since Birth” (ChurchofJesusChrist.org). E kanga te kakabwaia are e karekea te mwaane aei ni korakora riki nakon te mwane are e bubutii ibukina?
-
Bwaatina te baeki ae kanoana taian tianti. Inanon tauan te baeki irouia ataei, titirakiniia bwa tera ae a kona ni kabooa ma te mwane. Tuangiia ataei bwa tera ae ti na anganiia aomata tabeman ae akea boona te mwane. Kaoiia bwa a na tibwaia bwa a na kanga ni buokiia tabeman n roko ni kaan nakon te Tia Kamaiu—te bwai n tangira ae e aki kainanoa te mwane (Mwakuri 3:6).
Kaungaa te Kamatebwai n te Mweenga
Kaungaia ataei bwa a na bairea teuana te kawai are a kona iai ni beku ibukin Tamara are i Karawa man buokakiia kaain aia utu n te wiiki aei.
Kanakoraoan Ara Anga reirei
Kamatenanoa te kibu. Rinea te mwakoro n taeka man koroboki aika tabu are ko taku bwa e na buokiia ataei n am kiraati, n aron Mwakuri 2:38 ke Mwakuri 3:19, ao buokiia bwa a kamatenanoi kiibu n taeka akanne man koroboki aika a tabu. Bwaai n ibuobuoki aika a nooraki ke katean kain te bwai teuana a kona naba ni buokiia ataei ni katikui kiibu n aia iango.