“Turai 17–23. Makuri 10– 15: ‘E Rikirake Ana Taeka te Atua ao E Kabatiaki,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Turai 17–23. Makuri 10–15,” Nakomai, Iriirai—Ibukin te Moanrinan 2023
Turai 17–23
Makuri 10–15
“E Rikirake Ana Taeka te Atua ao E Kabatiaki”
Kamatebwaia Makuri 10–15 ma te tataromwaka, n iangoia ataei ake n am kiraati. Tera ae ko kunei ni mwakoro aikai are ko namakinna bwa ko na reireia nakoia ataei?
Kaunga te Tibwatibwa
Ni buokiia ataei n tibwaia bwa tera are a reiakinna ao n rinanona, ko kona n tuangiia bwa a na tibwa te bwai ae a karaoia ni kaotia bwa a kakoaua iroun Iesu Kristo.
Reirei te Reirei: Ataei aika a Uarereke Riki
Tamara are i Karawa e tangiriia Natina ni kabane.
Te koaua ae rangi ni kakawaki ae a na mataata iai ataei aika uarereke bwa aomata ni kabane bon natin te Atua ao E tangiriia Natina ni kabane.
Waaki ni Kakukurei aika a Kona ni Karaoaki
-
Kaota tamnein Kristo ao Ataei ni katobibia te Aonaaba (Gosapel Art Book, nambwa 116) ngkai ko wareka Makuri 10:34–35. Kamataata bwa n ana tai Betero tabeman aomata a kakoauaa bwa te kakabwaia n te euangkerio bon tiaki ibukia aomata ni kabane. Ma Betero e reiakinna bwa te Atua e tangiriia ni kabane Natina ao E tangiriia ni kabane bwa a na reiakina te euangkerio.
-
Kaoiia ataei bwa a na korea tamneia. Ngkai a tibwaa aia tamnei, maroroakina te bwai ae ko tangiria iaoia ataei n tatabemaniia. Tibwa am koaua bwa Tamara are i Karawa E tangiriia n tatabemaniia nako ao ni kabane Natina, n aki tabe bwa aekakira teia ke a roko mai iia.
-
Anene ma ataei n te kuna iaon tangirakiia tabeman—te katooto, “I’ll Walk with You” (Aia Boki n Anene Ataei, 140–41). Kaoiia ataei bwa a na tibwauai kawai ake a kona iai ni kaota te akoi nakoia tabeman, n aron are e karaoia Iesu.
-
Kotea temanna imwiin temanna te ataei ao taekina, “Tamara are i Karawa e tangira [te ara].” Anganiia ataei bwa e na reke aia tai ni kotea temanna ao n taekina te taeka aei.
Ngai bon te Kiritian ibukina bwa I kakoaua ao I ira Iesu Kristo.
Ko na kanga ni buokiia ataei n reiakinna bwa tera ae nanonaki n riki bwa te Kiritian?
Waaki ni Kakukurei aika a Kona ni Karaoaki
-
Wareka Makuri 11:26 nakoia ataei, ao kaoiia bwa a na teirake ngkana a ongo te taeka ae Kiritian. Titirakiniia bwa tera n aia iango nanon ae te riki ni Kiritian. Kamataata bwa te aomata are e kakoauaa ao ni iriira Iesu Kristo e bon atongaki bwa te Kiritian, angaia are ngaira bon Kiritian.
-
Anene ma ataei n te anene iaon iriirakin Iesu Kristo, n aron “The Church of Jesus Christ” (Aia Boki n Anene Ataei, 77). Ti na kanga ni kaotia bwa ngaira ti iriira Iesu Kristo ao ngaira kaain Ana Ekaretia? Buokiia ataei n iangoi bwaai aika a kona ni karaoi ni iriira iai Iesu ni mwengaia, n te tabo n reirei, ao n taabo riki tabeua.
Tamara are i Karawa e tangiriira ao e na kaekai ara tataro.
Tamara are i Karawa e ongo ao e kaekai tataro.
Te rongorongo are te anera e kainaomataa Betero man te karabuuti e anga te reirei ae korakora bwa Tamara are i Karawa e kaekai tataro.
Waaki ni Kakukurei aika a Kona ni Karaoaki
-
Kaoiia ataei bwa a na karaoa te kaotioti n rongorongon Betero ngke e kainaomataaki man te karabuuti ni Makuri 12:1–17 ngkai ko kakimototoa ni karakinna. E kanga Tamara are i Karawa ni kaekai aia tataro naake a tataro ibukin Betero?
-
Anenea te anene iaon te tataro—te katooto, “We Bow Our Heads” (Aia Boki n Anene Ataei, 25)—ao kaotii kaina tabeua aika a kona ni kateaki ma taeka ae a kona ni buokiia ataei n reirei iaona bwa a na kangaa n tataro. Kaoiia ataei bwa a na tibwai katotoon bwaai ake a na karabwa iai Tamara are i Karawa ao ni butiia naba iai n te tataro.
-
Kaota tamneia aomata aika a tataro (taraa, te katooto, Gospel Art Book, nambwa 111–12) ngkai ko tibwa am taneiai ngke Tamara are i Karawa e kaeka am tataro.
Reirei te Reirei: Ataei aika a Ikawai Riki
“E bon aki nanonano te Atua n tarakin aroia aomata.”
Ataei ake ko reireiniia a riai ni mataata bwa Tamara are i Karawa E tangiriia Natina ni kabane, n aki tabe bwa aekakira teia ke a roko mai iia ke tera rinerine aika a karaoi.
Waaki ni Kakukurei aika a Kona ni Karaoaki
-
Titirakiniia ataei ngkana a kona n ataia bwa teraa aron temanna ti man taraakiia ke ni ketinna bwa a roko mai iia. Ni kaineti ma Makuri 10:35, e kangaa te Uea n rinea te aomata temanna ae e “tangiraki irouna?
-
Wareka Makuri 10:34–35; 15:6–11 ma ataei. Kabwarabwaraa bwa n ana taai Betero, Iutaia a kakoauaa bwa te Atua e aki butimwaeia aomata ake tiaki Iutaua (aomata aikai a aranaki bwa Tientaire). Ma te Atua e reireina Betero bwa te Atua e tangiriia ni kabane Natina, aika Iutaia ao Tientaire. Uaia n anenea “Ngai Natin te Atua” (Aia Boki n Anene Ataei, 2–3). Kaoia ataei bwa ana onea mwiin araia n tatabemaniia nako ma te taeka n aron I ke ngai.
-
Kaoiia ataei bwa a na tibwa te bwai ae e rangi n okoro iaon temanna riki n te kiraati. Kamataata bwa te taeka ae “E bon aki nanonano te Atua n tarakin aroia aomata” nanona bwa Tamara are i Karawa e tangiriia Natina ni kabane, ao ibukina bwa E tangiriia, E tangiria bwa Natina ni kabane a na ongo ana euangkerio.
Te Kiritian bon te aomata ae e kakoauaa man iriira Iesu Kristo.
Ko na kanga ni buokiia ataei n ataia ae aia taeka ao aia mwakuri e kaota ae ngaiia Kiritian?
Waaki ni Kakukurei aika a Kona ni Karaoaki
-
Kaoiia ataei bwa a na wareka Makuri 11:26; 3 Nibwaai 27:3–8; ao Reirei ao Berita aika Tabu 115:4. Korea Kiritian iaon te burakibooti ao rainiia aan te mwakoro are e taekina “Kristo.” Tuangiia ataei bwa a na tibwaia bwa tera n aia iango nanon ae te riki ni Kiritian.
-
Tuangiia ataei bwa a na tibwai araia kurubu aika a kakaokoro ae a kaaina, n aron aia utu ke te aba. Kaoiia bwa a na kaota bukina bwa e aera ngkai a kakaitau ngkai a riki bwa Kiritian ao a kaina Ana Ekaretia Iesu Kristo Ibukiia Aomata Aika a Itiaki ni Boong aika Kaitira. Ti na kanga ni kaotia nakoia tabeman bwa ngaira Kiritian?
-
Kaotii bwaai aika a kona n noraki ke tamnei ae a tei ibukin koaua aika onoti ibukin ana Ekaretia Iesu Kristo, n aron tamnein manga kaokan te nakoanibonga (taraa Gospel Art Book, nambwa 93–94). Tuanga te ataei temanna bwa e na anaa te bwai ke te tamnei ao ni kabwarabwaraa bwa e kanga n riki bwa te kakabwaia n ara Ekaretia. Kabwarabwaraa bwa ngkai Kiritian ni kabutaa te aonaaba a kaaini aaro aika a kakaokoro, ti kaina te Ekaretia are titebo ma are e kateia Iesu Kristo iaon te aba.
-
Kaota te witeo “True Christianity” (ChurchofJesusChrist.org). Kaoiia ataei bwa a na korea ke ni korotamneia te bwai teuana ae a kona ni karaoia n riki bwa Kiritian ni koaua.
Ngkana I tataro ma te onimaki, Tamara are i Karawa E na kaekaai.
Iangoa te tai teuana ngke Tamara are i Karawa e a tia ni kaeka am tataro. Ko na kanga ni kabonganai taneiai aikai n reireia ataei ae Tamara are i Karawa e na ongo ao ni kaekai aia tataro ni bon oin Ana kawaina ao Ana tai?
Waaki ni Kakukurei aika a Kona ni Karaoaki
-
Kaoiia ataei bwa a na karaoa te kaotioti ni karakin te anera ngke e kainaomata Betero man te karabuuti ngkai temana te ataei e wareka te karaki inanon Makuri 12:1–17.
-
Tuangiia ataeii bwa tera n aia iango ae nanonaki n ae “te tataro e karaoaki n ae korakora” (Makuri 12:5). E kanga ni kaekaki aia tataro aomata? Kaoiia ataei bwa a na tibwaua aia taneiai ngke Tamaia are i Karawa e kaekai aia tataro ke aia tataro aia utu. Ko kona naba n tibwaua am taneiai ngke E kaekaa am tataro. Ko na bae ni kaairia ma am taneiai are e kaekaki iai am tataro n te kawai ae ko aki kantaningaia. Kaota am koaua bwa te Atua e tangiriira ao E na kaekai ara tataro n te kawai ao n te tai ae e tamaroa ibukira.
Kaungaa te Kamatebwai n te Mweenga
Kaoiia ataei bwa a na karaoa te bwai ae e na kauringiia bwa tera ae a reiakina n te bong aei, te kauring bwa a na tataro.
Kanakoraoan Ara Anga reirei
Kaota am koaua bwa iai kakabwaia aika a taekinaki n te berita. Ngkana ko kaoiia ataei bwa a na maiuakina te reirei teuana ae e onoti, tibwauai berita ake e karaoi te Atua nakoia naake a maiuakina te reirei anne. Te katooto, ko kona ni kaota am koaua n te kakabwaia are ko a tia ni karekea ngke ko tataro ma te onimaki.