“Turai 24–30. Makuri 16– 21: ‘E Boni Weteira te Atua bwa Ti na Tataekina te Euangkerio,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Turai 24–30. Makuri 16–21,” Nakomai, Iriirai—Ibukin te Moanrinan: 2023
Turai 24–30
Makuri 16– 21
“E Boni Weteira te Atua bwa Ti na Tataekina te Euangkerio”
Imwiin warekan Makuri 16–21, ira ana wirikiriki te Tamnei ao iangoi iango ake n te kabwarabwara ikai ngkai ko katauraoi n reirei. Rinanon ”Karekean Kainnanoia Ataei aika Uarereke” inanon te boki n reirei aei ibukin ibuobuoki tabeua.
Kaunga te Tibwatibwa
Kaoia ataei bwa a na tuangko bwa tera ae ataia iaon te bwai are e rinanona Bauro ngke e tibwa te euangkerio. A kona naba ni marooro iaoia mitinare ake tabeman ake a ataiia ke bon iaon aia taneiai ngke a tibwa te euangkerio ma aomata tabeman.
Reirei te Reirei: Ataei aika a Uarereke Riki
Mitinare a reireiniia aomata taekan Iesu.
A ataia ataei ake ko reireiniia te bwai ae a kakaraoia mitinare? Ko na kanga ni buokiia ataei bwa a na ataia ae a kona n tibwaua te euangkerio ma tabeman?
Waaki ni Kakukurei aika a Kona ni Karaoaki
-
Kaoiia ataei bwa a na karaoa kain Makuri 16:25–34 ngkai ko kakimototoa n taekina rongorongo Bauro ao Tira ngke a tibwa te euangkerio n te karabuuti (taraa naba “Mwakoro 61; Bauro ao Tira n te Karabuuti,” inanon Karaki man te Nu Tetemanti, 158–60, ke te witeo are e irekereke ma ngaia iaon ChurchofJesusChrist.org). Kabwarabwaraa ae mitinare n taai aikai a reireiniia naba aomata taekan Iesu ao ni buokiia n tauraoi ibukin te bwabetito.
-
Karaoa te taeki n araia mitinare ibukiia ataei bwa a na katokaa iaoia, ao buokiia ni korei araia iaon te taeki. Reireiniia ataei mwakoro n taeka aika bebete n taian reirei are a kona n tibwaia ma tabeman, n aron “Ngai natin te Atua.” “E taetae te Atua rinanoia ana burabeiti aika maiu,” ke “Iesu Kristo bon ara Tia Kamaiu.” Kauringiia ataei bwa e aki a nae e na ti iai ara taekin ae iai arara iai ni maitinare bwa ti na tibwa te euangkerio ma temanna.
Koroboki aika tabu a taekina kakoauan Tamara are i Karawa ao Iesu Kristo.
E ngae ngke tabeman ataei ake ko reireiniia a tuai kona ni wareware, ko kona ni buokiia ni karikirakea tangiran koroboki aika tabu ao n noria bwa a na kanga n taekina kakoauaan te Tia Kamaiu.
Waaki ni Kakukurei aika a Kona ni Karaoaki
-
Buoka temanna te ataei ni wareka te kibu n taeka “A …ukeuke n te Baibara n te bong ae koraki” (Makuri 17:11). Kaoiia ataei bwa a na kotei bong nako te wiiki iaon te karenta ngkai a taekinna ni kaokioka te kibu n taeka anne ma ngkoe. Uaia n anenea te kuna are e reirei iaon kakabwaia man warekan koroboki aika tabu, n aron “Search, Ponder, and Pray” (Aia Boki n Anene Ataei, 109).
-
N reireiniia ataei bwa koroboki aika a tabu a taekina kakoauaan Tamara are i Karawa ao Iesu Kristo, buokiia bwa a na nakon te mwakoro ni booki ae tabu, n aron Makuri 17 ke 18, ao kakaea te taeka n aron Atua, Uea, ke Iesu. (Ko na bae ni kaman tia ni mwakenii taeka aikai mai imwaina bwa e aonga ni bebete kuneana irouia ataei.) Ni katoa tai are ataei a kunea te taeka teuana mai ibuakon taeka aikai, kaoiia bwa a na tibwa te bwai are a ataia iaon Tamara are i Karawa ao Iesu Kristo.
Ngai natin te Atua.
Iaon te maunga ae Mars i Areiobako, Bauro e taekin reirei aika bebete iaon aron te Atua, ni irekereke ma koaua ae ngaira bon Natina ao “E aki raroa mai roura n tatabemaniira nako” (Makuri 17:27). Ko na kanga ni buokiia ataei n namakina ae a kaan nakon Tamara are i Karawa?
Waaki ni Kakukurei aika a Kona ni Karaoaki
-
Kaoiia ataei bwa a na kaokioka te kibu n taeka “Ngaira kanoan te Atua” (Makuri 17:29), ao kabwarabwaraa bwa kanoan nanona natin. Kaota ma koaua nakoia ataei, n tatabemaniia, bwa teuanne ke neienne bon natin te Atua. Kaoiia bwa a na tibwaia bwa tera aia namakin iaon Tamara are i Karawa.
-
Kaota tamneia ataei ma aia utu (ngkana e riai, karekea tamneia ataei n am kiraati). Tuangiia ataei bwa a na kotea tamnein te karo n te tamnei. Kamataata bwa ngaira bon naati irouia tinara ao tamara, ao ngaira ni kabane bon naati naba irouia ara karo ake i karawa.
-
Anenea te anene iaon Tamara are i Karawa, n aron “I Know My Father Lives” (Aia Boki n Anene Ataei, 5). Man aia ibuobuoki ataei, korei taeka ke korei tamnei iaon te burakibooti ni bwaai ake ti reiakinii ae a tei ibukin Tamara are i Karawa man te anene.
-
Warekii taeka aikai nakoia ataei man Makuri 17:27: “Ma kanga E aki raroa mai roura n tatabemaniira nako.” Marooro iaona ae n taai tabetai ko a tia n namakina ae e kaan nakoim Tamara are i Karawa, ao kaoiia ataei bwa a na karaoia naba.
Reirei te Reirei: Ataei aika a Ikawai Riki
Makuri 16:14–15, 25–34; 18:7–8, 24–28
I kona n riki bwa te mitinare ngkai.
Ko na kanga ni buokiia ataei n riki n aron Bauro ao ni tibwaia ma tabeman te bwai are a reiakinna iaon te euangkerio?
Waaki ni Kakukurei aika a Kona ni Karaoaki
-
Kaoiia ataei bwa a na wareka Makuri 16:14–15, 25–34; 18:7–8, 24–28 ao koreia bwa antai aomata are Bauro ao Aboro a tibwa te euangkerio ma ngaiia. Imwiina kaoiia bwa a na korei araia aomata are a kona n tibwa te euangkerio ma ngaiia. Kariaia bwa a na karaoa te kaotioti ataei bwa a na kanga n tuangiia aomata taekan Iesu Kristo ke ni kaoiia nakon te taromauri. Ko kona naba ni kaoiia ataei bwa a na korei taeka tabeua ni kaota aia koaua iaon koauan te euangkerio nakoia aomata aikai.
-
Kaoiia mitinare aika a bwanin aia tai, mitinare ake a bane aia tai, ke mitinare n te uoote bwa a na roko nakon te kiraati ao n taekina te bwai are a rinanona n tibwaakin te euangkerio. Kaungaia ataei bwa a na titiraki iaona bwa a na kanga ni tibwa te euangkerio ma tabeman.
Koroboki aika tabu a kaota koauan Iesu Kristo.
Ni kabane burabeti a tataekina kakoauaan Iesu Kristo. Ko na kanga n reireiniia ataei ni kunea Iesu Kristo inanon koroboki aika a tabu, e ngae ngkana e aki taekinaki arana?
Waaki ni Kakukurei aika a Kona ni Karaoaki
-
Buokiia ataei bwa a na wareka Makuri 17:2–4, 10–12; 18:28, ao kaoiia bwa a na kakaea bwa tera ae e taekinaki ni kiibu aikai aika titebo. Ni kaineti ma kiibu aikai, tera te bwai ae e buokiia aomata ni kakoauaa ana euangkerio Iesu Kristo? Kaoia ataei bwa a na tibwaua te karaki ae mamaten nanoia iaon Iesu are a tia n reiakinna man koroboki aika a tabu.
-
Iaon te mwakoro ni beeba, korei kiibu ake a reirei iaon te Tia Kamaiu (ko kona ni kunei tabeua iaon Bwai ni Kairi nakon Koroboki aika Tabu, “Iesu Kristo,” scriptures.ChurchofJesusChrist.org). Karabai beeba ianon te ruu ao kaoiia ataei bwa a na kakaei. Buokiia ataei bwa ana tara te kibu are a kunea, ao tuangiia bwa a na tibwaia imarenaia bwa tera ae e reireia te kibu anne iaon Iesu.
Ngai natin te Atua.
Ko na kanga ni buokiia ataei n uringnga ae ngaiia bon natin te Atua?
Waaki ni Kakukurei aika a Kona ni Karaoaki
-
Kaota nakoia ataei te atiibu, ao kabwarabwaraa bwa n ana bong Bauro, aomata a tataroi atua aika a karaoi man atiibu ao bwaai riki tabeua. Kaoiia ataei bwa a na wareka Makuri 17:27–29. Tera ae ko reiakinna ibukin te Atua man kiibu aikai? Kabwarabwaraa bwa te taeka ae kanoana nanona natina. Titirakiniia ataei bwa e kanga aron aia namakin ngkai a ataia ae ngaiia bon natin te Atua.
-
Tuangiia ataei bwa a na wareka Makuri 17:27. Kaoiia ataei bwa a na korea rongorongon ke ni korotamneia bwa tera kawai ae “tao a na kunea” ke n roko ni kaan riki nakon te Atua. Ningai ae a tia n namakina ae E bon “aki raroa mai [irouia]”?
Kaungaa te Kamatebwai n te Mweenga
Kaungaia ataei bwa a na kakaea ni koroboki aika a tabu n te wiiki aei are e reirei iai iaon Iesu Kristo (aio e kona n riki n tain aia kamatebwai i bon irouia ke ma aia utu ni koroboki aika tabu). Nakon te wiiki ae e na roko, kaoiia bwa a na tibwaua te bwai are a kunei.
Kanakoraoan Ara Anga reirei
Buokiia ataei bwa a na riki bwa taan reiakinaki aika a tamaroa riki. Te kantaninga n am anga reirei nakoia ataei tiaki tii karinakin te koaua irouia. Ko riai naba ni buokiia bwa a na karikirakeia bwa taan ukoukoura te koaua i bon irouia. N aron aei, irarikin are ti tii tuangiia ataei karakinan Bauro ngke e anga reirei i Maungan Mars i Areioboko, ko kona ni bairea aia waaki ni kakukurei, n aron are a tibwauaaki n te kabwarabwara n te reirei aei, are e na buokiia ni kunei koaua inanon karaki ibon irouia.