Ataein te buraimwari

Karekean Kainnanoia Ataei aika a Uarereke

Ataei a tauraoi ao a ingainga n reiakina te euangkerio ngkana e karaoaki n te aro are a kona n oota iai. Riki ngkana ko reireiniia ataei ake a uarereke riki, iangoa kabonganaan te aekaki ni waaki ni kakukurei are e na buokiia n reirei mai iai.

• Anene. Anene n taromauri ao anene man Aia Boki n Anene Ataei a anga reirei ma te mwaaka. Kabongana te intekiti ibukin atuun te rongorongo mai buki n aia Boki n Anene Ataei ni kakaei anene ake a irekereke ma reirein te euangkerio ake ko anga reirei iaona. Buokiia ataei bwa ana kona n maiuakinii reirei ake a reke man anene ao ni maiuakinna. Te katoto, ko kona n anga titiraki iaon taeka ke kibun te kuna. N raona te anene, ataei a kona ni karaoi mwakuri ake a airi ma te anene ke ti ongora n te anene bwa e tang mai buki ngkai a karaoi waaki ni kakukurei. Ibukin iango riki, taraa mwakoro aika “Using Music to Teach Doctrine” ao “Helping Children Learn ao Remember Primary Songs ao Anene n Taromauri” n te appendix n te boki aio.

• Ongora nako iai ke karaoa kain te karaki. Ataei aika a uarereke a maamate nanoia n te karaki—man booki aika tabu, man maium, karakinan moan rikin te Ekaretia ke rongorongon am utu, ke man Church magazines. Kakaai kawai aika ko na katabeia iai n te karaki. A kona n taui tamnei ke bwaai, koroi tamnein bwaai aika a ongo, karaoa kain te karaki, ke n ibuobuoki n taekina te karaki. Buokiia ataei n ataa koauan te euangkerio inanon karaki ake ko karakini.

• Wareki koroboki aika tabu. Ataei aika a uarereke tao a tuai kona ni wareware raoi, ma ko kona naba ni katabeia bwa a na reirei man koroboki aika tabu. Ko na bae ni kainnanoia ni kabanea aia iango iaon teuana te kibu, mwakoron te kibu, ke te taeka. Ngkai ko wareka te kibu ni kabaibati, ko kona ni kaoiia ataei bwa a na teirake ke n tabeki baia ngkana a ongo te taeka ae onoti ke te kibu are ko tangiria ni kabotoa am iango iaona. A kona naba ni kamatenanoi mwakoro n taeka aika kimototo man koroboki aika a tabu ngkana a kaokiokia tabeua te tai. Ngkai a ongo ana taeka te Atua, a na namakina te Tamnei.

• Ko na rangi ni kakamwakuri. Ibukina bwa ataei a rangi n takaremwaremwa, bairei kawai bwa a na kona ni kakamwakuri—mwaati, kibakiba, tie, kabwaouaia, nakonako, ao mwakuri riki ake a kona ni kairekerekeaki ma te reirei ke karaki ake ko reireiniia . Mwakuri aikai a kona naba n rangi n nakoraoi ngkai kam ikotaki n anene.

• Matakuakin tamnei ke mataku n te witeo. Ngkana ko kaota te tamnei ke te witeo are e irekereke ma te ma reirein te euangkerio ke karaki, anganiia titiraki ake a kona n reiakinna man bwaai ake a noorii. Te katooto, ko kona n titiraki, “Tera ae riki n te tamnei ke te witeo aei? Tera aron am namakin iai?” The Gospel Library app, GospelMedia.ChurchofJesusChrist.org, ao children.ChurchofJesusChrist.org bon taabo aika a raoiroi ibukin kakaean am tamnei ao witeo.

• Buokiia ao kaungaiia ataei bwa ana tibwauaa aia taneiai. Ataei aika a uarereke a kona ni karako mwaitin ae a na tibwauaia n aroia ataei ake a ikawai, ma ngkana ko anganiia kairi aika onoti, a kona n tibwaua aia namakin ao aia taneiai iaon te bwai are a reiakinna.

• Karaobwai. Ataei a kona ni katea, korotamnei, ke ni karana te bwai are e irekereke ma te karaki ke reirei ake a reiakin. Kaungaiia bwa a na uota te bwai are a karaoi nakon mweengaia ao n tibwaia ma kaain aia utu ni buokiia ataei n uringi bwaai ake a tia n reiakin.

• Irii reirei ake a karaoaki ma te bwai ni kabotau. Te reirei ma bwaai ni kabotau ae bebete e kona ni buokiia ataei ni kaotaia n reirein te euangkerio are e kaangaanga ataakina. Ngkana e kabonganaaki reirei ma bwaai ni kabotau, kakaei kawai n anganiia ataei bwa a na irii. A reiakina ae mwaiti riki man te taneiai are a karaoi nakon are a ti mataku ni karaoana.

• Katea Kain te Karaki. Ngkana a karaoi kataneiai ataei ni baika a kona n riki are a na kona ni kaitarai ni maiuia, a na kona n oota riki bwa a kanga reirein te euangkerio ni uaana nakon maiuia.

• Kaokioki Waaki ni Kakukurei. Ataei aika a uarereke a na kainnanoia n ongoraeakin iango tabeua te tai bwa a aonga n oota iai. Tai maaku ni kaokioki karaki ke waaki ni kakukurei ni katoatai, riki inanon te reirei are ko a tia n reirei iaona. Te katooto, ko kona ni tibwa te karaki man koroboki aika a tabu tabeua te tai ni kawai aika a kakaokoro n tain te anga reirei—man warekan koroboki aika a tabu, kakimototoi n oin am taeka, kaotan te witeo, anganiia ataei bwa a na buoka te karaki, kaoiia bwa a na karaoa nanon te karaki, ao a mwaiti riki. Ngkana te waaki ni kakukurei are e karaoaki n te kiraati e karaoaki naba n te mweenga, okiokirana e na buokiia ataei n reiakin ao n uringnga.

• Kairekerekeko ma tabeman. Ataei a karikirakei aia konabwai n reitaki ao n angin te tai a kukurei n reirei ao n takakaro ma aika roroia. Karekei aia tai bwa a na tibwatibwa, onomwi, ao n reitaki ngkai a reirei.

• Karaoi waaki ni kakukurei aika a kakaokoro. Ataei aika a uarereke n etina e uarereke aia tai ni kakauongo, ao a kakaokoro aron reiakinaia. Kabonganai waaki ni kakukurei aika kakaokoro, ao taratarai kanikina are te ataei e kainnanoa te bitaki ni birin bwaai. Te katooto, ko kona ni kainnanoia ni bibitaki ni katoatai imarenan te kainabwabu ao waaki aika maiureirei.

te tia reirei ao te ataei n te Moanrinan

Mwakoron tibwangam ngkai aia tia reirei ataei—n raonaki ma te anga reirei iaon reirein te euangkerio—bon buokaia ataei n reiakina aroia aika a raraoi inanon te kiraati n te Taromauri. Te katooto, a na kona ni kainnanoia bwa a na reireinaki taekan te ikaruoruo, tibwatibwa, karineaia tabeman, ao a mwaiti riki. Tabeman taan reirei a karaoi tiata ma tibwangaia ataei n tatabemaniia bwa a na karaoi n te kiraati n te kawai ae onoti (n aron are te tataro, tauan tamnei, ke tibwatibwaan beeba). Mwakuri aika a na karaoaki a kona ni bibitaki ni katoa wiiki. Aio e buokiia ataei n onomwi ao ni kabotoa aia iango iaon anua aika a raraoi n te umwanreirei.

Ataei—ataei riki aika a uarereke—n tabetai a rangi ni buokaki riki ni bwaai aika okioki, waaki ake a kaman atai. Ibukina bwa ataei aika a uarereke e uarereke aia tai ni kan ongora ao n tabetai e kaangaanga bwa a na kona ni kakauongo inanon tain te kiraati ni karokoa e bane, e tamaroa riki bwa e na kakaraoaki te bitaki man te waaki ni kakukurei teuana nakon teuana. Te katoto, bwaai aika ko kakaraoi n am kiraati e kona n rin inanona te motirawa ae uarereke ibukin karanakin te tamnei, anenean kuuna, ao a mwaiti riki.