Ataein te moanrinan inanon te kiraati

Kabonganan Nakomai, Iriirai—Ibukin te Moanrinan

Katauraoi n Anga Reirei n te Moanrinan

Te kamatebwai i bon iroum ao n te utu n te mweenga e riai n riki bwa te tienta ibukin kamatebwaian te euangkerio. Aio e koaua ibukim ao ibukiia ataei ake ko reireniia. N am katauraoi ibukin am anga reirei, waaki man karekean oin am atatai man koroboki aika tabu. Te kabanea ni kakawaki ni katauraoakim e na riki ngkana ko maiuakina te euangkerio, ukeuke inanon koroboki aika tabu, ao ni karekea ana wirikiriki te Tamnei ae Raoiroi.

Nakomai, Iriirai—Ibukiia Aomata n Tatabemaniia ao Utu bon te bwai ae kakawaki ni mwakoron am kamatebwai ibon iroum ao am katauraoi n anga reirei. E na buokiko ni kananoa mataatam ni kabwarabwaraan taian koaua iaon reirei ake a kuneaki inanon koroboki aika tabu. Nakomai, Iriirai—Ibukin te Moanrinan e na katauraoi waaki aika a na karaoaki iaon karaki man koroboki aika a tabu ake a kaoaki iai ataei n kamatebwai ni mweengaia rinanon te wiiki.

N am tai ni katauraoi, iango ao namakin a na roko nakoim ibukiia ataei ake ko na reireiniia. Ko na karekei naba nonoori bwa a na kanga reirei ake ni koroboki aika tabu ni kakabwaiai maiuia. Ko na kairaki ni kaungai nanoia n reiakinii reirei akanne ngkai a reirei man koroboki aika tabu i bon irouia ao ma aia utu.

te aine ae kamatebwaii koroboki aika tabu

Iango Ibukin te Anga Reirei

N am tai ni katauraoi n anga reirei, ko na kona ni karekei rakan riki kairam mairoun te tamnei man norakin waaki ni kamataata n te anga reirei n te bwai n ibuobuoki aei. Tai iangoi iango aikai bwa kaetieti aika a na iraki ma iangoi bwa iango aika a na karekea oin am iango. Ko kinaia ataei aikai, ao ko na kinaia riki ngkana ko reitaki ma ngaia n te kiraati. Te Uea e kinaia naba, ao E na anganiko kawai aika tamaroa ibukin reiakinaia ao ni kakabwaiaia.

E mwaiti riki bwaai ni kairi aika a tauraoi bwa ko na kabonganai n am katauraoi, n ikotaki ma iango ake n Nakomai, Iriirai—Ibukiia Aomata n Tatabemaniia ao Utu ao ana maekatiin te Ekaretia. Ibukin rongorongon riki bwaai ni kairi aikai ao ake tabeua, taraa “Bwai ni Kairi Riki Tabeua ibukin Reiakinaia Ataei” n te boki aei.

Tabeua Bwaai aika a na Uringaki

• Ni katoa tai are ko kaitibo iai ma ataei, iangoi kawai ake ko na kona ni buokia n namakina ana tangira Tamara are i Karawa ao Iesu Kristo ao ni kinaa mwaakan te Tamnei ae Raoiroi.

• Kaaro ma tiina bon tabeia reiakinakia natiia. Ngkai ngkoe te tia reirei, iai tabem ae kakawaki bwa ko na boutoka, kaunga, ao ni kateitei iaon are e kamatebwaiaki n te mweenga. Uringiia ataei ake aia karo a aki reireiniia te euangkerio ni mweengaia. Kairia ataei ni kabane n taian marooro n te euangkerio, n aki taraia bwa aekakira mweengaia.

• E tamaroa kaokiokan bwaai. Ataei a reiakinii riki koaua n te euangkerio ngkana a kaokiokaki koaua aikai rinanon waaki ni kakukurei aika a kakaokoro. Ngkana ko nooria bwa te mwakuri ni kauring e raoiroi ibukiia ataei, iangoia bwa ko na kaokiokia, riki ngkana ko reireiniia ataei aika a uarereke. Ko kona naba n rinanon te mwakuri ni kauring man te reirei ae nako.

• Tamara are i Karawa e tangiria bwa kona nakoraoi n nakoam ae te tia reirei. E a tia ni katauraoi bwaai n ibuobuoki aika a mwaiti, n ikotaki ma aia bootaki ni kauntira taan reirei. N tain te bootaki aei kam kona n reirei ma tia reirei ake tabeman iaon taian kakaewenako ake kam kaaitarai. Ko kona naba ni maroroakin ao ni maiuakin reirei n aron ana anga reirei Kristo.

• Ngkana ko reireiniia ataei aika a uarereke ao ko kainnanoa riki te ibuobuoki, taraa “Tobwaan Kainnanoia Ataei aika a Uarereke” n te boki aei.

Te boki ni ibuobuoki aio iai inanona kabwarabwaraan reirei ni katoa wiiki inanon te ririki. N Tabati are ngkana akea iai te reirei n te Moanrinan ibukin te maungatabu ni kabuta, ke n iai riki bukina tabeua, a riai n reitinako utu ni wareka Te O Tetemanti n te mweenga ni kaineti ma te tai are e a tia ni baireaki n Nakomai, Iriirai—Ibukiia Aomata n Tatabemaniia ao Utu. Tai raraoma ibukin te reirei are e aki reke taina iroum n anga; anga reirei iaon are e a tia ni baireaki ibukin kanoan te wiiki.