Iesu ngke e taua te teei

Ngkoe aia Tia Reirei Ataei

Ko a tia ni weteaki iroun te Atua bwa ko na ira te kawai are e tangiria te Tia Kamaiu bwa e na reireiniia iai ataei. Ko a tia ni kaokoroaki nakon te wewete aei man te kariaia n Ana nakoanibonga ae tabu. E ngae ngke bon tiaki ngkoe te tia reirei ae mwaatai, ngkana ko maiuna te itiaki, tataro ni katoa bong, ao ni kamatebwaia koroboki aika tabu, Tamara are i Karawa e na anganiko namakinan ao mwakan te Tamnei ae Raoiroi ni buokiko n tokanikai (taraa 2 Nibwaai 33:1).

Koraki ake ko anganaki bwa ko na tararuaiia bon natin Tamara are i Karawa, ao E ataia bwa tera ae a kainnanoia ao e kangaa aron buokaia. Ngkai ko tataromwaaka ko na karekea ana ibuobuoki te Tamnei ae Raoiroi, E na kairiko n am katauraoi ao n am anga reirei. E na kaoti nakoim bwaai ake ko na riai n taekin ao bwaai ake ko riai ni karaoi (taraa 2 Nibwaai 32:5).

Tai taku bwa e aki kona tau ana konabwai te ataei n reiakina te euangkerio. N aro nako inanon maiuia, ataei aika a kakaawaki aikai a teimatoa ni karekei rongorongo, ni katabwanini ao ni kaitiaki n aia iango, ni karaoi ao n tibwai kukune. Aio e bon koaua riki n te euangkerio, irouia ataei aika a tauraoi ao n ingainga n reirei koauana ae bebete. Aia onimaki n bwaain nako te tamnei e bon korakora ao n itiaki, ao te tai teuana ma teuana bon te tai n reirei ae tamaroa. A tatauraoi ni mwakuri iaon te bwai are a reiakinna, riki ngkana otaia e teimatoa n aki bwanin. Aio aron ae ti riai ni bane ni butimwaea iai te euangkerio. N aron are e reirei iai te Tia Kamaiu, “Ba ane aki taua bukin uean te Atua n ai aron te tei ae uarereke ao e bon aki rin iai.” (Ruka 18:17).

Te wewete n riki bwa aia tia reirei ataei bon te onimakinaki ae tabu, ao bon te bwai ae riiriki namakinan ae ko aki kona uotam n taai tabetai. Ma uringa bwa Tamara are i Karawa e weteiko, ao e na bon aki kitaniko. Aio bon ana mwakuri te Uea, ao ngkai kam beku “ma nanomi, marurungimi, ami iango ao korakorami ni kabane” (Reirei ao Berita aika Tabu 4:2), E na karababa riki ami konabwai, bwaintangira, ao tarena, ao ami beku e na kakabwaiai maiuia ataei ake kam reireiniia.