Ecce Homo, iroun Antonio Ciseri

Tuun 19–25

Mataio 27; Mareko 15; Ruka 23; Iaone 19

“E A Tia”

Mataio 27; Mareko 15; Ruka 23; ao Ioane 19 n raonaki ma kabwarabwaraan ana kabanea n aoa te Tia Kamaiu n te maiu ae mamate. Ukeria n namakina Ana tangira ibukim ngkai ko kamatebwaia Ana anga karea ao matena.

Korei Am Namakin

Ni katoa te taeka ao te mwakuri, Ie kaota te tangira ae itiaki Iesu Kristo—are e aranna te Abotoro Bauro bwa te tangira ae kororaoi (taraa 1 I-Korinto 13). Akea te tai ae e teretere raoi iai nakon ake kabanean ana tai te Tia Kamaiu n te maiu ae mamate. Ana aaki karongoa ae e rianako n tain kabuakakaana aika a kairua e kaotaki iai bwa E “aki kakai un nanona” (1 I-Korinto 13:5). Ana kariaia n anga ngaia nakon te kataereaki, te kaenaenaaki, ao te tauraki n te kaibangaki – ngke e taua mwakana nakon katoka karawawataakina —e kaotia bwa E “taotaona nanona” ao “e taotaona nanona nakon bwaai ni kabane” (1 I-Korinto 13:4, 7). Ana nanoanga nakon tinana ao Ana nanoanga nakoia naake a tauria iaon te kaibangaki—e ngae ngke inanon karawawatakina ae aki kona ni kabotauaki—e kaotia bwa E “aki ukoukora [Ana] bwai” (1 I-Korinto 13:5). Ni kabanean ana tai iaon te aba, Iesu E karaoa are e a tia ni karaoia rinanon Ana mwakuri n te maiu n rabwata—reireiniira man kaotan ana katooto. Ni koauana te tangira ae kororaoi bon ana tangira Kristo ae itiaki (Moronaai 7:47).

Iango ibukin te Kamatebwai i bon Iroum ni Koroboki aika Tabu

Mataio 27; Mareko 15; Ruka 23; Iaone 19

Kukurein nanon Iesu ni maraki e kaota Ana tangira nakon te Tama ao nakoira ni kabane.

E ngae ngke iai mwaakan te Tia Kamaiu ni kanakomaia “tanga n anera” (Mataio 26:53), E anga nanona ao n rineia ni kaitara motibuakan kataakina, kaenaenakina ae kammaraki, ao marakina n rabwatana ae e kanganga aron iangoana. Bukin tera E karaoia? “Ibukin ana tangira n akoakoi,” e kakoaua Nibwaai, “ao ana taotaonakinnano ae korakora nakoia natiia aomata” (1 Nibwaai 19:9).

“Ao e otinako n uota ana kaibangaki i bon irouna nako… Korokota” (Ioane 19:17).

Ko na kona ni moana kamatebwaian ana kabanea n aoa te Tia Kamaiu man warekan 1 Nibwaai 19:9. Iaara ni Mataio 27; Mareko 15; Ruka 23; ao Iaone 19 ae ko kunei iai kakatotoon tabeua bwaai ake e taekan Nibwaai bwa Iesu e na bon karawawataki?

• “[A] na taraia bwa te bwai ae akea bonganana”

• “A kataerea”

• “A oreia”

• “A bawareia”

Tera rongorongo ae buokiko n namakina ana “tangira n akoi” nakoim? Baikara iango tabeua ao namakin aika a reke iroum ngkai ko wareki rongorongo aikai? Iangoi koreaia ke tibwai ma temanna.

Taraa naba “Jesus Is Condemned before Pilate” and “Jesus Is Scourged and Crucified” (videos), ChurchofJesusChrist.org.

Mataio 27:27–49, 54; Mareko 15:16–32; Ruka 23:11, 35–39; Ioane 19:1–5

Te kaenaena e aki kona ni bita te koaua.

Ngkai e kona moan te kaenaenaaki Iesu rinanon Ana mwakuri ni mitinare, e rikirake ni korakora riki n tain kataereana ao Taurakina n te Kaibangaki. Ma te kaenaena aei e aki kona ni bita te koaua: Iesu bon Natin te Atua. Ngkai ko wareka aron te kamaemaeaki are e rinanona Iesu, iangoa te kakaitara ao te kaenaena are e kaitarai Ana mwakuri ni boong aikai. Tera atatai ake ko karekei ibukin keiakinan te kakaitara? Tera ae anaa nanom n ana taeka teuare mataniwiin are tebubua ni Mataio 27:54?

Mataio 27:46; Mareko 15:34

E rinanon te kammarakaki Iesu Kristo n tii ngaia bwa I aonga n aki rinanona ngai.

N tain teuana ana tai ae e rawawata iaon te kaibangaki, Iesu, are e aki toki n onimakina Tamana are i Karawa, e waekoa n namakinna bwa e aki kitanaki. Warekan aio e na kona ni kairiko ni iangoi taai ngke ko a tia n namakina te raurenako ma te Atua. Ko kona ni iangoia bwa e kanga ana anga karea te Tia Kamaiu iaon te kaibangaki ni kona n anganiko te kona n tokanikai iaon te raraoanako anne. N aron ae kakoaua Unimwaane Jeffrey R. Holland, “Ibukina ngkai Iesu e nakonako inanon te kawai ae abwabwaki, man kamaroaa, ti aki kantaningaki bwa tina karaoia. … Katanoataaki mai taubukin Calvary bon te koaua bwa ti aki kona n tiku ni maroa ke n aki buokaki, riki ngkana n tabetai ti kona n namakinna.” (“None Were with Him,” Liahona, May 2009, 88). Iangoia bwa e kanga te Tia Kamaiu ni kona ni buokiko n tokanikai iaon te maroa n am wareware ni wareka nikiran ana rongorongo Unimwane Holland.

Ruka 23:34

Te Tia Kamaiu bon ara banna ni katooto ae kororaoi n te kabwarabure.

E kanga am namakin ngke ko wareka ana taeka te Tia Kamaiu n Ruka 23:34? (taraa te atatai are e katauraoi inanon ana Rairairi Iotebwa Timiti inanon bwaai aika a na taraaki mai inano c). Ni kaineti nakon ana taeka te Tia Kamaiu, e reirei Beretitenti Henry B. Eyring: “Ti riai ni kabwarabure ao n aki karaoa te kairiribai nakoia ake a kauniira. E katea te katoto te Tia Kamaiu mai iaon te kaibangaki. … Ti aki kona n atai nanoia naake a kauniira” (“That We May Be One,” Ensign, May 1998, 68). E kanga te kibu aei ni buokiko ngkana iai am kanganga ni kabwara ana bure te aomata temanna?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 27; Mareko 15; Ruka 23; Ioane 19.Ni buokiia am utu n reiakin bwaai ake a kabwarabwaraaki inanon mwakoro aikai ko konaa n tibwaua mangaiia “Mwakoro 52: The Trials of Jesus” ao “Mwakoro 53: Jesus Is Crucified” (ni Karaki inanon te Nu Tetemanti, 133–38, ke witeo ake iai rekerekeia iaon ChurchofJesusChrist.org). Ke ko kona ni mataku ma ngaiia n tamneii ake a kaoti bwaai aika a riki. “E kabuakakakaaki Iesu imatan Birato” ao “Iesu e kataereaki ao e tauraki iaon te kaibangaki” (ChurchofJesusChrist.org). Ko kona ni kaoia ataei bwa a na manga karakina te karaki n oin aia taeka. A kona kaain te utu n tibwaua aia namakin nakon te Tia Kamaiu ibukin te korakai are e karaoia ibukira.

Mataio 27:11–26; Mareko 15:1–15; Ruka 23:12–25; Ioane 19:1–16.E aera ngkai Birato e anga bwa e na tauraki Iesu n te kaibangaki, e ngae ngke e ataia bwa e aki bure Iesu? Tera reirei ake ti reiakin man ana taneiai Birato n tei ibukin te bwai are ti ataia bwa e eti? E na ibuobuoki ibukiia am utu ni karaoa te kaotioti iaon baike a riki are e na buokiia n tei ibukin te bwai ae eti.

Mataio 27:46; Ruka 23:34, 43, 46; Ioane 19:26–28, 30.Tao ko na kona n anganiia kaain te utu n tabemaniia bwa a na wareka teuana ke e mwaiti riki n taekan te Tia Kamaiu iaon te kaibangaki ake a kuneaki ni kiibu aikai. Tuangiia bwa a na tibwa tera ae a tia n reireiaki man rongorongo aikai n taekan te Tia Kamaiu ao Ana mwakuri.

Mareko 15:39.E kanga mwiin warekan te Tauraki n te Kaibangaki ni kamatoa am kakoaua bwa Iesu bon “Natin te Atua”?

Ioane 19:25–27.Tera reireiara man kiibu aikai n taekan ae ti na kanga n tangiriia ao ni buokiia kaain ara utu?

Ibukin iango aika mwaiti riki ibukiia ataei, taraa te kamataata n te wiiki aei n Nakomai, Iriirai - Ibukin te Moanrinan.

Te anene ae rineaki: “Upon the Cross of Calvary,” Anene n Taromauri, nambwa 184.

Kanakoraoan Ara Anga reirei

Iriira Maiun te Tia Kamaiu. E ibuobuoki kamatebwaian aron ana kawai te Tia Kamaiu n anga reirei—kawai ake E kabonganai ao bwaai ake E taekini. “Mwaakan te Tia Kamaiu n reirei ao ni buokiia tabeman e roko man arona ni maiu ao te aekaki n aomata raa Ngaia. Man am botumwaaka n riki ni maiu n aron Iesu Kristo, kona karekea te konaa n reirei n ai Arona” (Reirei n Ana Kawai te Tia Kamaiu, 13).

Kristo iaon te kaibangaki, iroun Carl Heinrich Bloch