Ni Kauringai, iroun Walter Rane

Meei 29–Tuun 4

Mataio 26; Mareko 14; Ioane 13

“Ni Kauringa”

Ngkai ko wareka taekan bwaai aika a riki ake a kabwarabwaraaki ni Mataio 26; Mareko 14; ao Ioane 13, kakaungo nakon namakin ake ko karekei, ai moarara riki namakina ake a kananoa am onimaki iroun Iesu Kristo ao am motinnano Nakoina.

Korei Am Namakin

Te bong are imwaain matena, Iesu e anganiia Ana reirei te bwai are a na ururingnga iai. E “ana te berena, ao e tataro, ao e tabeutaia ao e angania ana reirei, ao e kangai, Anaia, kanna; rabatau aei. Ao e ana te mangko, ao E tataro ni katituaraoi, ao E angania, e kangai, Kam na bane ni moi n aei; ba rarau aei” (Mataio 26:26–28).

Anne e riki e kaniia 2,000 te ririki n nako, n te tabo are angiina mai buakora a na bon aki kona n nooria, n te taetae ae a na kona n ota iai tabeman aomata. Ma ngkai, ni katoa Tabati n ara tabo n taromauri, taan kairiiri n te nakoanibonga ake a tia n anganaki te kariaiakaki ni mwakuri n aran Iesu Kristo, a karaoa are ea tia naba ni karaoia ngkoa. A ana te berena ao te ran, a katituaraoia, ao anganiira n tatabemaniira nako, Ana reirei. Bon te mwakuri ae bebete—e na kona n iai riki te bwai ae bebete, ae na kakawaki riki, nakon kanakin te berena ao nimakin te ran? Ma te berena ao te ran anne a tabu nakoira ibukina bwa a buokiira n Ururingnga. Bon ngaia angara ni kangai, “I bon aki kona ni mwanuokinna”—ma tiaki, “I bon aki kona ni mwaninga baike I a tia ni wareki rongorongoia ae taekan Ana anga reirei ao Maiuna.” Ma, ti kangai, “N na bon aki kona ni mwaninga te bwai are E a tia ni karaoia ibukiu.” “N na bon aki mwaninga aron kamaiuau irouna ngke I tang ni kakaenako buokau.” Ao “N na bon aki kona ni mwaninga Ana motinnano nakoiu ao au motinnano Nakoina—te berita ae tabu are ti a tia ni karaoia.”

Iango ibukin te Kamatebwai i bon Iroum ni Koroboki aika Tabu

Mataio 26:6–13; Mareko 14:3–9

“E roko … ni kabira rabatau i mwain taunakiu.”

Ma te mwakuri n nebonebo ma te nanorinano, te aine are e kabwarabwaraaki inanon kiibu aikai e kaotia bwa e ataia bwa antai Iesu ao tera te bwai ae E karaoia (taraa Mataio 26:12). Bukin tera ngkai a rangi ni uaana ana mwakuri nakon te Tia Kamaiu? (taraa te kibu 13). Tera ae anaaki iai nanom n ana onimaki te aine anne? Iangoia raoi bwa ko na kanga n ira ana katooto.

Taraa naba Ioane 12:1–8.

Mataio 26:20–22; Mareko 14:17–19

“Te Uea, ngai?”

Tera ae ko reiakinna ibukiia reirei man aia titiraki nakon te Uea ni kiibu aikai? Bukin tera n am iango ngkai a titiraki anne? Iangoia ko na kanga n titirakinna te Uea, “Te Uea ngai?”

Taraa naba Dieter F. Uchtdorf, “Te Uea, Ngai?,” Riaona, Nob. 2014, 56–59.

Mataio 26:26–29; Mareko 14:22–25

Te toa bon te tai ni iangoa taekan te Tia Kamaiu.

Ngke e kabwarabwara te toa te Tia Kamaiu nakoia Ana reirei, tera am iango ma am namakin ngkai ko iangoia bwa e na reke naba irouia? Iangoa aei ngkai ko wareka taekan aia taneiai ni Mataio 26:26–29 ao Mareko 14:22–25. Bukin tera n am iango ngkai Iesu e rinea te kawai aio n ururingaki iai? Ko na bae naba n iangoi raoi taneiai aike ko a tia ni karekei n tain te toa. Iai riki te bwai ae ko kona ni karaoia ni karaoa am taneiai bwa e na rangi n tabu ao ni uaana?

Imwiin warekan ao iangoan raoi kiibu aikai, ko na konaa ni korei tabeua bwaai ake ko namakinna bwa ko na ururinga iai te Tia Kamaiu. Ko kona n rinanoi bwaai aikai n are imwiina ngkana ko kana te toa. Ko kona naba ni manga rinanoi n taai tabetai, n te anga are ko na “aki toki n ururingnga,” (Moronaai 4:3).

Taraa naba Ruka 22:7–39; 3 Nibwaai 18:1–13; Reirei ao Berita aika Tabu 20:76–79; Gospel Topics, “Sacrament,” topics.ChurchofJesusChrist.org; “Always Remember Him” (video), ChurchofJesusChrist.org.

Ioane 13:1–17

Te Tia Kamaiu bon ara banna ni katooto n te nanorinano ni beku ibukiia aomata.

N ana tai Iesu, tebokan waen te aomata bon aia mwakuri tooro, tiaki taan kairiiri. Ma Iesu e tangiriia Ana reirei n iango n ae kaokoro bwa tera ae nanonaki n te kairiiri ao te beku. Tera rongorongo ake ko kunei n ana taeka ao n ana mwakuri te Tia Kamaiu n Ioane 13:1–17? N am katei, tebokan waen temanna tao bon tiaki aron te katei ni karaoa te beku. Ma iangoia tera ae ko na kona ni karaoia n ira ana katooto te Tia Kamaiu man ana mwakuri ae nanorinano.

E taraa naba ni kakukurei ataakin bwaai aike e atai Iesu ao namakin n te tai ae tabu aei ma An reirei (taraa kiibu 1 ao 3). Tera ae ko buokaki iai n taian atatai aikai ibukin te Tia Kamaiu?

Taraa naba Ruka 22:24–27.

Ioane 13:34–35

Au tangira ibukiia aomata bon kanikinaean ae Ngai bon ana reirei Iesu Kristo ni koaua.

Mai imwaaina, e a tia Iesu n anga te tua n “tangira raom n ai aron tangiram i bon iroum” (Mataio 22:39). Ngkai E anga “te tua ae boou.” N am iango tera nanon ae ko na tangiria aomata n aron ae tangiriko Iesu? (taraa Ioane 13:34).

Ko na kona naba n iangoia bwa a kanga tabeman aomata n ataia bwa ngkoe ana reirei Iesu Kristo. Ko na kanga ni kakoaua raoi bwa te tangira e kabwarabwara anuan kateim n aron ae te Kiritian ngkoe?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Mataio 26:26–29; Mareko 14:22–25.Aekakira aron aia taneiai am utu n tain te toa ni katoa wiiki? Warekan taekan te moan toa e kona ni kaungaa te maroro ibukin kakawakin te toa ao aanga ni kanakoraoa am taneiai. Iangoia kaota te tamnei Kabutan te Toa (Gospel Art Book, nambwa. 108) ao tibwai iango ni baike ko na kona ni karaoi mai imwaina, n tain, ao imwin te toa.

Te Toa e buokira ni uringa Iesu Kristo.

Mataio 26:30.Iangoia anenea te anene n taromauri, n aron are a karaoia Iesu ao Ana reirei—tao anenen te toa. E kanga aneneakin te toa n riki bwa te kakabwaia nakon Iesu ao Ana reirei n te tai anne? A kanga anene n taromauri n riki bwa kakabwaia nakoira?

Ioane 13:1–17.Ko na tangiria ni kan kaota te tamnei nakoia am utu ni banen te kamatata aei ngkai ko wareki kiibu aikai. Tera koaua are e anga reirei iaona te Tia Kamaiu man Ana mwakuri? Tera taian rongorongo inanon te tamnei ae a buokira ni kamatataira ni koaua aikai? Tao a kona kaain am utu n tibwauaia bwa a kanga maiuakinan koaua aikai ni uota te kukurei nakoia (taraa Ioane 13:17).

Ioane 13:34–35.Imwin warekan kiibu aikai, kam kona ni kaai ni maroroakinna bwa a kanga tabeman aomata n ataia bwa ngkoe ana reirei Iesu Kristo. E kanga te Tia Kamaiu n tangiriia Ana taan iriria bwa a na kinaaki? Ko kona n tuangiia kaain am utu bwa a na maroroakiniia aomata are n aia tangira ibukiia tabeman e kaotia bwa ngaiia ana reirei Iesu Kristo. Ko kona naba ni maroroakin kawai ni kaota riki iai am tangira n aron ae te utu.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Iesu e a Tia n Uti,” Aia Boki n Anene Ataei, 136.

Kanakoraoan Am Kamatebwai I Bon Iroum

Iangoia raoi. Koroboki aika tabu iai nanoia n te maiu n tamnei ae ti na kona ni kabuai ngkana ti warekia n aki nanonna raoi, ngkai ti na wareki bwaai riki tabeua. Tai rang kabaitiiko ni kabanea ni wareka te mwakoro. Anaa am tai ni karaua n iangoa raoi te bwai are ko warekia.

Te Kabanea ni Kakannato n te Abanuea, iroun J. Kirk Richards