“Tuun 12–18. Ruka 22; Ioane 18: ‘Ma Akea Au Taeka, Ma e na Tauaki Am Taeka,’” Nakomai, Iriirai—Ibukiia Aomata n Tatabemaniia ao Utu: Te Nu Tetemanti 2023 (2022)
“Tuun 12–18. Ruka 22; Ioane 18,” Nakomai, Iriirai–Ibukiia Aomata n Tatabemaniia ao Utu: 2023
Te Buakonikai i Ketetemwane, iroun Derek Hegsted
Tuun 12–18
Ruka 22; Ioane 18
“Tiaki Au Taeka, Ma e na Tauaki Am Taeka”
Anaa am tai ni wareka Ruka 22 ao Ioane 18 n te wiiki aei. Iangoia raoi ao tatarokinna te bwai are ko na warekia. Ni karaoan aei e angan te Tamnei tibwangana ni kaota te koaua inanom ae a koaua koroboki aika tabu.
Korei Am Namakin
Bon iai teniman taan kakoaua n te maiu ae mamate ni karawawatakin Iesu n te Onaroka are Ketetemwane—ao a matu n aki ataa te bwai ae riki. N te onaroka anne ao imwina iaon te kaibangaki e uota iaona bureia, marakiia, karawawatakia aomata nako ake a maiu, e ngae ngke akea ae maiu n te tai anne a ataa te bwai ae riki. Bwaai aika moan te rangi ni kakawaki n te maiu ae akea tokina a waakinako n akea ana kairoro te aonaaba. Ma te Atua te Tama e ataia. E ongo ana bubuti n onnon Natina ae kakaonimaki: “Tamau, ngkana e riai i Roum, ao ko na uota nako te mangko aei mai Rou: ma akea au taeka, ma e na, tauaki am taeka. “Ao e kaoti te anera mai karawa nakoina, ni kakorakora.” (Ruka 22:42–43). Ngkai ti aki mena ikekei ni kakoaua te mwakuri n aki bangaomata ao ni kai anaaki nanom, bon ngaira taan kakoaua ibukin ana Mwakuri ni Kamaiu Iesu Kristo. Ni katoa tai are ti raira nanora iai ao ni karekea kabwaraan ara bure, ni katoa tai ti namakina mwaakan ni kakorakora te Tia Kamaiu, ti kona ni kaotiota koauan te bwai are e riki n te Onaroka are i Ketetemwane.
Iango ibukin te Kamatebwai i bon Iroum ni Koroboki aika Tabu
Ruka 22:31–34, 54–62; Ioane 18:17–27
Te rairaki bon te waaki ae reitinako.
Iangoa ana taneiai Betero ma te Tia Kamaiu—taian kakai ake e noori koauaia ao reirei ake e reiakin. Bukin tera ngkanne ngkai e taetae te Tia Kamaiu nakon Betero, “Ngkana ko a manga rairaki, ao ko na kateimatoaia tarim”? (Ruka 22:32; e kairaki te ikairara). Ngkai ko iangoa raoi aei, e na kona n ibuobuoki iangoa te bwai are e reireia Unimwaane David A. Bednar ibukin te kaokoro imarenan karekean te kakoaua ao te rairaki raoi (taraa “Rairaki nakon te Uea,” Riaona, Nob. 2012, 106–9).
Ngkai ko wareka ana taneiai Betero n Ruka 22:31–34, 54–62 (taraa naba Ioane 18:17–27), iangoa oin rairakim. Ko a tia n namakinna ae ko motinnano raoi, n aron Betero, n “tauraoi n ira [te Tia Kamaiu], nakon te auti ni kaikain, ao nakon te mate”? (Ruka 22:33). Bukin tera ngkai n tabetai a mauna namakin akanne? Iai tibwanga ni katoa bong nakon te kakeaa ke ni kakoaua ibukin te Tia Kamaiu; tera ae ko na karaoia n riki bwa te tia kakoaua Ibukina ni katoa bong? Tera riki reirei aika ko reiakin man ana banna ni katooto Betero?
Ngkai ko reitinako ni wareka te Nu Tetemanti, tarai bwai ni kakoaua ibukin teimatoan rairakin Betero. Atai naba kawai are e butimwaea iai ana mwakuri te Uea n “kateimatoaia tarim” (Ruka 22:32; taraa Makuri 3–4).
Taraa Mareko 14:27–31.
E korakai te Tia Kamaiu ibukiu i Ketetemwane.
E kaoira Beretitenti Russell M. Nelson “kabanea am tai ni kamatebwaia taekan te Tia Kamaiu ao Ana anga karea ni kamaiu” (“Drawing the Power of Jesus Christ into Our Lives,” Riaona, Meei 2017, 40).
Iangoia tera ae ko na karaoia ni butimwaea ana kakao Beretitenti Nelson. Ko kona ni waaki n iangoa raoi karawawatakin te Tia Kamaiu i Ketetemwane, n aron ae kabwarabwaraki inanon kiibu aikai, ao korei namakin ao titiraki ake a roko n am iango.
Ibukin kananoakin riki am kamatebwai ibukin te Tia Kamaiu ao Ana Mwakuri ni Kamaiu, kataia kakaei riki tabeua koroboki aika tabu ibukin kaekaan titiraki n aron aikai:
-
Bukin tera ngkai e riai ana Mwakuri ni Kamaiu te Tia Kamaiu? (Taraa 2 Nibwaai 2:5–10, 17–26; 9:5–26; Aramwa 34:8–16; 42:9–26.)
-
Tera ae e rinanona te Tia Kamaiu ngke E karawawataki? (Taraa Itaia 53:3–5; Motiaea 3:7; Aramwa 7:11–13; Reirei ao Berita aika Tabu 19:16–19.)
-
E kanga karawawatakin Iesu n roota maiu? (Taraa Ioane 10:10–11; Ebera 4:14–16; 1 Ioane 1:7; Aramwa 34:31; Moronaai 10:32–33; Dallin H. Oaks, “Kakorakoraaki man ana Mwakuri ni Kamaiu Iesu Kristo,” Riaona, Nob. 2015, 61–64.)
-
Tabeua titiraki aika I karekei:
Ngkai ko reiakina taekan te bwai ae riki i Ketetemwane, e na bae ni kakaongora ataakina bwa Ketetemwane bon te onaoroka ibukin te aroka ae te oriwe ao ni kairaki ma bwain katinakoan bwaan te oriwe ae kabonganaki ibukin te taura ao te amwarake ao ibukin naba te kamarurung (taraa Ruka 10:34). E kanga aron kanakoan bwaan te oriwe n riki bwa kanikinaean te bwai are E karaoia te Tia Kamaiu ibukira i Ketetemwane? Ibukin taian iango tabeua, taraa ana rongorongo Unimwaane D. Todd Christofferson “Abide in My Love” (Riaona, Nob. 2016, 50–51).
Taraa naba Mataio 26:36–46; Mareko 14:32–42.
Te Tia Kamaiu “Tiaki mai aon te aba ueana.”
Ngkai te mataniwi n te tautaeka, Bontio Birato e ataa te mwaaka ao abanuea n te aonaaba aio. Ma Iesu Kristo e taekina te abanuea ae raka riki arona. Ni kaoka rikaaki am ururing iaon te bwai are ko a tia ni warekia ibukin maiun te Tia Kamaiu, tera bwai ni kakoaua ake ko noori ae “tiaki mai iaon te aba ueana”? (Ioane 18:36). Bukin tera e kakaawaki iroura bwa ti na ataa aei? Baikara bwaai aika a raka tarakiia iroum n ana taeka Iesu nakon Birato?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
Ruka 22:31–32.E kanga ana namakin Betero n ataia bwa e tataro Iesu ibukina ao ibukin ana onimaki? Antai ae ti na tataro ibukina, “bwa e na aki toki [aia] onimaki”? (te kibu 32).
-
Ruka 22:39–46.Reiakinan taekan karawawatakin te Tia Kamaiu i Ketetemwane e kona n riki bwa taneiai ae tabu ibukin am utu. Iangoia tera ae ko kona ni karaoia ni karaoa tamnein te nano ni kan taromauri ae rau mani karinerine ngkai ko kamatebwaia Ruka 22:39–46. Ko kona n takakaro ke ni kaai n anenei tabeua kuna aika mamaten nanoia kaain utu man te anene n taromauri ke aia anene ataei ibukin te Tia Kamaiu. Ko kona n tarai mwakuri ni korotamnei ke mataku n te witeo n aron “The Savior Suffers in Gethsemane” (ChurchofJesusChrist.org). Ngkai ko wareki taian kibu, a kona kaain am utu ni tibwauai rongorongo ake a uaana nakoia—tao te rongorongo are e buokiia n namakina ana tangira te Tia Kamaiu (taraa naba Mataio 26:36–46; Mareko 14:32–42). Ko kona ni kaoia bwa a na tibwaua aia koaua ibukin Iesu Kristo ao Ana Mwakuri ni Kamaiu.
-
Ruka 22:42.A kona kaain am utu n tibwaua aia taneiai ngke ataia bwa a kona n taekinna ni kangai, “Ma akea au taeka, ma e na tauaki am taeka.”
-
Ruka 22:50–51; Ioane 18:10–11.Tera ae ti reiakinna iaon taekan te Iesu man kiibu aikai?
Ni karokoa ngkai Karawawatakina, iroun Walter Rane
-
Ioane 18:37–38.Ti na kanga ni kaekaa ana titiraki Birato “Tera te koaua?” (te kibu 38). Ibukin iango tabeua, taraa Ioane 8:32; Reirei ao Berita aika Tabu 84:45; 93:23–28; ao “Oh Say, What Is Truth?,” Anene n Taromauri, nambwa 272.
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “I Stand All Amazed,” Anene n taromauri, nambwa 193.
Kanakoraoan Am Kamatebwai
Kamatebwaia aia taeka burabeti ao abotoro ni boong aika kaitira. Warekia bwa tera aia reirei burabeti ao abotoro are a tia n reireia n taekan te koaua are ko a tia ni kunea inanon koroboki aika tabu. N aron te katoto, n te maungatabu ae ai tibwa ngkainaba n rongorongon te Riaona, ko kona ni kakaea te intekiti ibukin atuun rongorongo ibukin “Te Mwakuri ni Kamaiu” (taraa Reirei n ana Kawai te Tia Kamaiu, 21).
Ma Akea Au Taeka, Ma e na Tauaki Am Taeka, iroun Walter Rane