Kristo ao Ana reirei i Ketetemwane

Te Onaroka i Ketetemwane, iroun Derek Hegsted

Tuun 12–18

Ruka 22; Ioane 18

“Akea Au Taeka, ma E Na Tauaki Am Taeka”

N reirei man Ruka 22 ao Ioane 18 ma ataei bon te tai ni buokiia ni kamatoaa aia tangira ibukin Iesu Kristo ao aia onimaki Irouna. Tataromwaaka ni iangoia bwa ko na kanga ni karaoa aei.

te aikaon ibukin te tibwatibwa

Kaunga te Tibwatibwa

Kaoti tamnein te bwai ae e riki inanon mwakoro aikai, n aron Christ in Gethsemane (Gospel Art Book, nambwa 56) ao tamnei inanon Nakomai, Iriirai—Ibukiia Aomata n Tatabemaniia ao Utu. Kaoiia ataei bwa a na taekina te bwai ae e riki n te tamnei.

te aikaon ibukin te anga reirei

Reirei te Reirei: Ataei aika a Uarereke Riki

Ruka 22:39–46

Iesu e korakai ibukiu ibukina bwa E tangirai.

Iangoia bwa kona kanga ni buokiia ataei n namakina ana tangira Iesu ibukiia ngkai ko maroroakina rongorongon korakaina i Ketetemwane.

Waaki ni Kakukurei aika a Kona ni Karaoaki

• Karakina te rongorongo n Ruka 22:39–46 nakoia ataei, tao ni kabonganaa “Mwakoro 51: E Korakai Iesu n te Onaroka i Ketetemwane” (n Karaki man te Nu Tetemanti, 129–32, ke te witeo ae e irekereke ma ngaia iaon ChurchofJesusChrist.org). Kabwarabwaraa bwa Iesu e namakina ni kabane te maraki ao te nanokawaki are a namakinna aomata nako. Titirakiniia ataei bwa tera ae e na karika te aomata bwa e na nanokawaki, maraki, ke n un. Taekina koauana bwa Iesu e kona ni buokiira n namakina ae raoiroi ngkana ti namakina te aro aei.

• Batina tamnein te Tia Kamaiu i Ketetemwane (n aron teuana are n te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu). Ngkana a taua te tamnei ataei, taekina, “E korakai Iesu ibukina bwa E tangira [aran te ataei].” Kaoia ataei bwa a na kaokioka atongan taeka aikai ma ngkoe.

• Anene ma ataei n te anene iaon ana tangira Iesu ibukira, n aron “I Feel My Savior’s Love” (Aia Boki n Anene Ataei, 74–75). Buokiia ni iangoi kawai ake a kona iai n namakina ana tangira Iesu.

Ruka 22:41–43

I kona n tataro ngkana I kainanoa buokau.

Ngke e tataro Iesu i Ketetemwane, e kaoti te anera ni kakorakora. Ko na kanga ni buokiia ataei ake ko reireiniia n ataia bwa a kona naba n tataro nakon Tamara are i Karawa ibuin te korakora?

Waaki ni Kakukurei aika a Kona ni Karaoaki

• Kakimototoa te rongorongo n Ruka 22:41–43 ibukiia ataei. Tibwaua am taneiai ngke ko tataro ibukn buokam ao Tamara are i Karawa e kakorakorako rinanon te Tamnei ae Raoiroi ke man kanakoan temana bwa e na buokiko.

• Iaon taian mwakoro ni beeba, korei tabeua bwaai ake ti na taekin inanon te tataro, n aron “Tamara are i Karawa,” “I karabwako,” “I butiiko,” ao “n aran Iesu Kristo, amen.” Katikui mwakoro ni beeba iaon tano ni kamangaoi, ao buokiia ataei bwa a na kaeti n aroia raoi ngkana ti na taekinii n te tataro. Tera ae ti kona ni kaitaua Tamara are i Karawa iai? Tera riki ae ti kona n taekina Nakoina? Taekina koauana bwa ataei a kona n tataro nakon Tamara are i Karawa n taabo nako ao n taai nako.

Iesu e tataro i Keketemane

Kristo ngke Tataro n te Onaroka i Ketetemwane,, iroun Hermann Clementz

te aikaon ibukin te anga reirei

Reirei te Reirei: Ataei aika a Ikawai Riki

Ruka 22:39–46

I Ketetemwane, Iesu Kristo e katokaa Iaona au bure ao marakiu.

Atakina bwa tera ae e karaoia Iesu i Ketetemwane e kona ni buokiia ataei n raira nanoia man aia bure ao n okira aia Tia Kamaiu ngkana a rinanon te kataaki ae matoatoa.

Waaki ni Kakukurei aika a Kona ni Karaoaki

• Kaoiia ataei bwa ana wareka Ruka 22:39–46, ni kakaei taeka ke mwakoro n taeka aika a kabwarabwara bwa e kangaa ana namakin Iesu i Ketetemwane. Tera ae e rinanona Iesu ae e karikia bwa E na namakina te aro aio? (taraa Reirei ao Berita aika Tabu 19:16–19). Anganiia ataei aia tai bwa a na tibwa aia namakin iaon Iesu ao Ana anga karea ibukira.

• Kaoiia ataei bwa a na tibwa te tai ngke a nanokawaki ke ni maraki. Titirakiniia ngkana ataa temanna ae e a tia n namakina te aeka n namakin anne. Kaoiia bwa a na wareka Aramwa 7:11–12. Tera ae a reireiniira kiibu aikai iaon Iesu Kristo ao Ana anga karea ibukira?

• Angan temanna te ataei te kai ae e a bwbwaki riki nakon rababan te mataroa n te kiratiruum, ao tuanga teuanne ke neienne bwa e na taua ni kaetia nako eta ao ni kataia n otinako man te mataroa. Kabwarabwaraa bwa te kai e tei ibukin ara bure, are e totokoira n rin n abanuean te Atua. Anaa te kai ni kaotia bwa Iesu e katokaa Iaona ara bure bwa e aonga ni konaa ni kabwaraaki are bure ngkana ti raira nanora.

Ruka 22:39–44

I Kona ni iriira ana banna ni katooto Iesu man ongeabau nakon Tamara are i Karawa.

Iesu e kaota ongeabana nakon te Tama ngke E kangai, “Akea au taeka, ma E na tauaki am taeka” (Ruka 22:42). Ko na kanga ni buokiia ataei bwa a na reireinaki man ana banna ni katooto Iesu?

Waaki ni Kakukurei aika a Kona ni Karaoaki

• Buokiia ataei ni kamatenanoa te kibu n taeka, “Akea au taeka, ma E na tauaki am taeka” (Ruka 22:42) ao maroroakinna bwa tera nanona. Tera ae ti kona ni karaoia n ongeaaba nakon nanon Tamara are i Karawa?

• Buokiia ataei bwa a na kinai tabeua bukina ae n tabetai e matoatoa karaoan te bwai are e tangiria Tamara are i Karawa. Baikara kakabwaia ae ti a tia ni karekei man arora n ongeaba nakon Tamara are i Karawa, e ngae ngke e matoatoa?

Ruka 22:50–51

Iesu e tangiriia Ana kairiribai.

Reiakinan te riki bwa te tia raoi e bon aki bebete, riki ngkana aomata tabeman aki akoi nakoira. E na kanga te rongorongo are n Ruka 22:50–51 ni kakorakoraia ataei ake ko reireiniia bwa a na rangi n akoi n aia waaki ni kabane?

Waaki ni Kakukurei aika a Kona ni Karaoaki

• Kaoiia ataei bwa a na wareka Ruka 22:50–51. Tera ae ti reiakinna iaon Iesu man te karaki aei? Rinanon nako te wiiki, tuangiia tabeman aia karo ataei bwa a na tuangko taai ngke natiia a kaota te akoi, e ngae ngke e rangi ni kangaanga. Tibwai karaki akanne ma kaain te kiraati. (Kauringiia ataei bwa kaotan te akoi tiaki nanona ae a na kariaia tabeman bwa a na kamarakiia; a riai ni marooro ma aia karo ke te ikawai temanna are a onimakinna ngkana iai ae e kamarakiia.)

• Bootaki n anenea te anene iaon te aron n akoi, n aron “Kindness Begins with Me” (Aia Boki n Anene Ataei, 145). Tera ae e reireinira te anene aei iaon taekan te akoi? Ti na kanga ni kaota te aeka n akoi aei nakoia tabeman n ai aron ae karaoia te Tia Kamaiu?

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na tibwai aia koaua iaon te Tia Kamaiu ma aia utu. A kona naba n tuangiia kaain aia utu bwa a na tibwai aia koaua iaon Iesu.

Kanakoraoan Ara Anga reirei

Kaoiia ataei bwa a na tibwa te bwai are a ataia. “Tuangiia [ataei] bwa a na tibwaia ma ngkoe aia iango, namakin, ao aia taneiai ae e irekereke nakon reirei ake ko reirei iaona. Ko na kunea bwa iai aia nonori aika a bebete, itiaki, ao ni korakora” (Reirei n ana Kawai te Tia Kamaiu, 26).

iteraniba ibukin waaki ni kakukurei: I kona n tataro ngkana I kainanoa buokau