“Aokati 7–13. I-Rom 1-6: ‘Bon Mwaakan te Atua ni Karekea Maiun te Aomata ae Onimaki,” Nakomai, Iriirai—Ibukiia Aomata n Tatabemaniia ao Utu: Te Nu Tetemanti 2023 (2022)

“Aokati 7–13. I-Rom 1-6,” Nakomai, Iriirai—Ibukiia Aomata n Tatabemaniia ao Utu: 2023

Tamnei

Bauro ngke e koro reta

Aokati 7–13

I-Rom 1–6

“Bon Mwaakan te Atua ni Karekea Maiun te Aomata ae Onimaki”

Korean mwiin taian wirikiriki a na buokiko n uring baike ko reiakinaki iroun te Tamnei. Iangoia naba ni koreia aron am namakin ibukin wirikiriki aikai.

Korei Am Namakin

Man te tai are e korea ana reta Bauro nakoia kaain te Ekaretia i Rom, are bon kurubu aika kakaokoro ibuakoia Iutaia ao Tientaire, e a tia ana Ekaretia Iesu Kristo n rikirake riaon riki te kurubu ae uarereke ibukiia taan kakoaua mai Kariraia. Tao 20 te ririki n nako imwiin Mangautin te Tia Kamaiu, iai bootaki n taromauri irouia Kiritian aika a kuri katoai taabo nako ike a na kona ni mwamwananga nako iai taian Abotoro—n ikotaki ma Rom, kautuun te tabo ae moan te korakora ana tautaeka. E teimatoa, ni kabotauaki nakon buburan te tautaeka n Rom, e uarereke te Ekaretia ma n taainako e reke n te bwainikirinaki. N te aro anne, tabeman a na bae ni “mama n te euangkerio”—ma, ni koauana, tiaki Bauro. E ataia ao e kakoaua bwa te mwaaka anne e bon koaua, “bwa bon mwaakan te Atua ni karekea maiun te aomata ae onimaki,” are e reke n ana euangkerio Iesu Kristo (I-Rom 1:16).

Tamnei

te aikaon ibukin te kamatebwai i bon iroum

Iango ibukin te Kamatebwai i bon Iroum ni Koroboki aika Tabu

Tera taian Reta, ao a kanga ni barongaaki?

Bon booki n te Nu Tetemanti ae koreaki kanga taian reta irouia mataniwi n te Ekaretia nakoia Aika Itiaki ni mwakoron te aonaaba aika a kakaokoro. Te Abotoro ae Bauro e korei angiin taian retai n te Nu Tetemanti—ni moanaki mairouia I-Rom ao e toki irouia I-Ebera. A barongaaki ana reta man ananauia, ma tii nakoia I-Ebera ae e aki (taraa te Bible Dictionary, “Pauline Epistles”). E ngae ngke Rom te moan reta n te Nu Tetemanti, ma e bon koreaki kanga ngke e nang toki mwanangan Bauro n nako ni mitinare.

I-Rom 1–6

“E na maiu au aomata n te onimaki.”

Nanon taeka akana imwiina a na kona ni buokiko ni matata raoi n te reta are e koreaki nakoia kaain Rom:

Te Tua.Ngke Bauro e korea “te tua,” e kananona ana tua Mote. Te taeka ae “mwakuri” n ana koroboki Bauro e kaineti nakon ara mwakuri mai itinanikura n reitaki ma ana tua Mote. Iangoia e kanga ana tua Mote ao te mwakuri are e kantaningaaki mai iai a kaokoro man “tuan te onimaki” are e kabwarabwaraaki n I-Rom 3:23–31.

Korotobibiaki, e tuai korotobibiaki.N taai ake ngkoa te korotobibiaki bon te kanikina ke kanikinaean ana tua te Atua ae karaoaki ma Aberaam. Bauro e kabongana te taeka ae “korotobibiaki” e kaineti nakoia Iutaia (aomatan te berita ae tabu) ao “tuai korotobibiaki” e kaineti nakoia Tientaire. Iangoia raoi tera taekinaki n I-Rom 2:25–29 bwa tera ae nanonaki raoi n riki bwa ana aomata ni berita te Atua. Ataia bwa te korotobibiaki ai tiaki ngkai te kanikina ibukiia ana aomata ni berita te Atua (taraa Makuri 15:23–29).

Te karaoiroaki, karaoiroa, karaoiroaki.Taeka aikai a kaineti nakon kamaunaan buure, ke katokan, te bure. Ngkana ti karaoiroaki, a kabwaraaki ara bure, ni kaota akea namakinan te bure, ao ni kainaomataaki man te katuaa ae akea tokina ibukin ara bure. Ngkana ko noori taeka aikai, ataia tera are e reiakina taekana Bauro bwa e aonga n reke te karaoiroaki (taraa naba Bwai ni kairi nakon Koroboki aika Tabu, “Justification, Justify,” scriptures.ChurchofJesusChrist.org; D. Todd Christofferson, “Justification and Sanctification,” Ensign, June 2001, 18–25). I Rom, taeka n aron “raoiroi” ao “te raoiroi” a kona n nooraki bwa taeka aika kuri n titebo nanoia ibukin taeka n aika “raoiroi” ao “karaoiroaki.”

Te Akoi.Te akoi “ae mairoun te Atua … te buoka ke te korakora ae e nako rinanon ana nanoanga ae moan te korakora ao ana tangira Iesu Kristo.” Rinanon te akoi, aomata ni kabane a na manga kautaki ao ni karekea te aki mamate. N raonaki ma anne, “te akoi bon te mwaaka ni kona ni kariaia mwaane ao aine ake a tau ni kamata te maiu ae akea tokina ao te karietaataki imwiin tiaia n anga aia kabane ni konabwai ae moan te tamaroa.” Ti aki karekea te akoi rinanon ara konabwai; ma, bon te akoi are e nganiira te “korakora ao te ibuobuoki ni karaoi mwakuri aika a raraoi are [ngaira] ti na bon aki kona ni karekea” (Bible Dictionary, “Grace”; taraa naba 2 Nibwaai 25:23; Dieter F. Uchtdorf, “The Gift of Grace,” Riaona, Meei 2015, 107–10; Brad Wilcox, “His Grace Is Sufficient,” Riaona, Tebetembwa 2013, 43–45). Ngkai ko wareka I-Rom, korei baike ko reiakin ibukin ana akoi te Tia Kamaiu.

I-Rom 2:17–29

A riai au mwakuri ni kaota ao ni karikirakea rairakiu.

Tabeman Iutaia aika Kiritian ake mena i I-Rom a teimatoa ni kakoaua ma te itiaki bwa katein ao waakin ana tua Mote a uota te kamaiuaki. Aio kanga e na taraa n aki kaineti ngkai ti aki maiu man ana tua Mote. Ma ngkai ko wareka ana koroboki Bauro, ai moarara riki n I-Rom 2:17–29, iangoa oin am konabwai ni maiuakin te euangkerio. Am mwakuri itinaniku, n aron anaakin te toa ke te nanako n te tembora, a kakorakora rairakim ma am onimaki iroun Kristo? (taraa Aramwa 25:15–16). Iai te bwai ae ko riai ni bitia n te aro bwa am mwakuri itinanikum a na kairiko nakon te bitaki n nano?

Taraa naba Dallin H. Oaks, “The Challenge to Become,” Ensign, Nov. 2000, 32–34.

I-Rom 3:10–31; 5

N ana Mwakuri Iesu Kristo, a kona ni kabwaraaki au bure.

Tabeman aomata a na namakina te bwarannano n ana kabwarabwara Bauro ae “akea ae raoiroi, bon akea, temanna” (I-Rom 3:10). Ma iai naba taian rongorongo ibukin te kantaninga ae a reke n I-Rom. Kakaei ni mwakoro 3 ao 5, ao iangoia bukin tera ti na uringnga bwa “a bane ni bure n aki karekea te neboaki mairoun te Atua” (I-Rom 3:23) bon te mwaneka ae kakawaki nakon “te kimwareirei i nanon te kantaninga ” rinanon Iesu Kristo (I-Rom 5:2).

I-Rom 6

Iesu Kristo e kaoai bwa N na “nakonako i nanon te maiu ae boou.”

E reirei Bauro bwa ana euangkerio Iesu Kristo e riai ni bita aron maiura. Tera taian kibuntaeka n I-Rom 6 a kabwarabwara aron iriran te Tia Kamaiu n tia ni buokiko n “nakonako i nanon te maiu ae boou”? (te kibu 4).

Tamnei

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

I-Rom 1:16–17.Ti na kanga ni kaotia bwa ti “tiaki mama n ana euangkerio Kristo”?

I-Rom 3:23–28.Ngkai ko wareki kiibu aikai, ko kona ni maroroakina te kaokoro imarenan “reken” ana akoi te Atua, are ti bon tuai ni kona ni karekei, ao karekeaia, are ti bon riai ni karekei. Nningai te tai ae ti a tia n namakina iai ana akoi te Atua? Ti na kanga ni karekei n ae bwanin riki?

I-Rom 5:3–5.Tera kanganga aika ti a tia rinanoi? A kanga kanganga aikai ni buokiira ni karikirakea te taotaonakinnano, te taneiai, ao te kantaninga?

I-Rom 6:3–6.Tera ae taekina Bauro inanon kiibu aikai ibukin te bwai ni kakairi ae kanikinaean te bwabetito? Tao a kona kaain am utu n ira te bwabetito nakon taai aika a na roko. Ke temanna n am utu e kona n tibwaua te tamnei ke ana ururing man ana bwabetito teuanne ke neienne. E kanga karaoan ao kawakina ara berita n te bwabetito ni buokiira n “nakonako i nanon te maiu nabangkai”?

Te bwabetito bon kanikinaean moanakin te maiu ae boou n aran ana reirei Kristo.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “When I Am Baptized.” Aia Boki n Anene Ataei, 103.

Kanakoraoan Am Kamatebwai

Titiraki titiraki ngkana ko kamatebwai. Ngkana ko kamatebwai koroboki aika a tabu, a kona n roko titiraki n am iango. Iangoi raoi titiraki aikai, ao kakaei kaekaaia. N aron te katoto, n I-Rom 1–6 ko kona ni kakaeai kaekaan te titiraki “Tera te akoi?”