“Aokati 28–Tebetembwa 3. 1 I-Korinto 8–13: ‘Rabwatan Kristo Ngkami,’” Nakomai, Iriirai–Ibukiia Aomata n Tatabemaniia ao Utu: Te Nu Tetemanti 2023 (2022)
“Aokati 28–Tebetembwa 3. 1 I-Korinto 8–13“ Nakomai, Iriirai—Ibukiia Aomata n Tatabemaniia ao Utu: 2023
Aokati 28–Tebetembwa 3
1 I-Korinto 8–13
“Rabwatan Kristo Ngkami”
Ngkai ko tataromwaaka ni wareka 1 I-Korinto 8–13, te Tamnei ae Raoiroi e na taetae nakoim n te bwana ae aamarau ao ni bebete (taraa 1 Uea 19:11–12). Korean namakin aikai e na buokiiko ni uringi taian namakin ao iango ake ko karekei inanon am kamatebwai.
Korei Am Namakin
Inanon ana tai Bauro, Korinto bon te tienta ibukin te iokinibwai ae korakora rikirakena ma taan maeka mai iaon ana Embaea Rom. Ma mwaitin kakaokoron katei ao aaro inanon te kaawa ae bubura aio, kaain te Ekaretia i Korinto a ikakorakora ni kawakina te katiteuanaaki, ngaia are Bauro e ukoria ni buokiia ni karekea te katiteuanaaki n aia koaua iroun Kristo. Te katiteuanaaki aio e bon kantaningaaki bwa e na raka riki iaon are te rau n te uaia ni maeka, Bauro e aki tii tuangiia bwa a na karinei aroia aika akakaokoro. Ma, e reireiniia bwa ngkana a kaaina ana Ekaretia Iesu Kristo, ko “bwabetitoaki nakon te rabwata ae ti teuana,” ao mwakorona ni kabane a bon kainanoaki (1 I-Korinto 12:13). Ngkana e bua temanna te membwa, ti tebo e bua te tomanrii, ao te rabwata e mamaara imwina. Ngkana temanna te membwa e rawawata, ti riai ni kabane n namakinna ao karaoa tibwangara ni kabebetea. Inanon te katiteuanaaki aei, te kaokoro aki tii kinaaki ma a nabeaki, bukina bwa n akeaia membwa ma mwaitin ao kakoron aia tarena ao atatai, te rabwata e na memeere. Ngaia tao ko namakinna n taainako ae titebo ae ko namakina te mweengaraoi n te Ekaretia ke n iangoia iroum ngkana ko a kainna ni koaua, ana rongorongo Bauro nakoim bwa te katiteuanaaki bon tiaki te anua ni boraoi. Ko kainnanoia raomi aika Taan onimaki, ao raom aika Taan onimaki a kainanoiko.
Iango ibukin te Kamatebwai i bon Iroum ni Koroboki aika Tabu
Te Atua e karekea te kawai n tokanikai man taian kariiri.
Taneiai n tamnei, riki taian kakai, e aki kamanoira man taian kaririaki are bon “aki kona te aomata n rawa nako iai” (1 I-Korinto 10:13). Anne bon teuana bukina ngke Bauro e korea taekaia kaain Iteraera n ana tai Mote ake a ikakorakora ma kariiri, e ngae ngke a kakoauai kakai aika korakora (taraa Otinako 13:21; 14:13–31). Ngkai ko wareka 1 I-Korinto 10:1–13, tera taian kauring n aia taneiai kaain Iteraera aika taraa ni kaineti nakoim? Tera aekan taian “tokanikai” iaon kariiri ae tia n katauraoi Tamara are i Karawa ni ibukim? (taraa naba Aramwa 13:27–30; 3 Nibwaai 18:18–19).
1 I-Korinto 10:16–17; 11:16–30
Te toa e katiteuanaira ngkai membwa n ana Ekaretia Kristo.
E ngae ngke te toa e irekereke ma te motinnano i bon iroum imarenam ma te Uea, bon te taneiai naba are ko tibwaia ma tabeman. Ti bon anaa n taainako te toa n ikotaki, n aroia kurubu irouia aika Itiaki. Warekia bwa tera ae reirei Bauro n taekan te toa, ao iangoa taekana bwa e kanga te otenanti ae tabu aei ni kona ni buokiia aika “bati” n riki n “teuana” inanon Kristo (1 I-Korinto 10:17). E kanga anaakin te toa ni buokiko n namakina kaanim nakon Kristo ao taan onimaki ake tabeman? A kanga kiibu aikai ni karekea te namakin n taekan te toa ao te kawai are ko tauraoi ibukina?
N ana babaire te Atua, mwaane ao aine a kainanoiia imarenaia.
N 1 I-Korinto 11:4–15, Bauro kairekerekea nakon katei ake ti aki kabonganai ni boong aikai. Ma e ngae n anne, e reireiniia Bauro te koaua ae kakawaki ae akea tokina, ae kuneaki n kibu 11. Tera am iango n nanon te kibu aei, ao bukin tera e kakawaki? Unimwaane David A. Bednar e reirei, “Te mwaane ao te aine a kantaningaaki bwa a na reiakiniia man, kakorakora, kakabwaia, ao ni kabwaniia i bon irouia” (“We Believe in Being Chaste,” Riaona, Meei 2013, 42). E kanga te koaua aei ni kakairi n roota te mare? E na kanga n roota arora ni beku inanon te Ekaretia?
Taraa naba Jean B. Bingham, “United in Accomplishing God’s Work,” Riaona, Meei 2020, 60–63.
Bwaai n tituaraoi n Tamnei a bon anganaki natin Tamara are i Karawa ni kabane bwa ana kabwaia iai.
Rinanin bwaai n tituaraoi n tamnei n 1 I-Korinto 12–13 e bon aki bwanin. Ma bon te tabo ae tamaroa ni moana waakim mai iai ngkai ko na kinai ao n iangoi bwaai n tituaraoi n tamnei are e a tia Tamara are i Karawa n anganiko. Taekan “Spiritual Gifts” inanon Atuun te Euangkerio (topics.ChurchofJesusChrist.org) e na kona ni buokiko n ota raoi ni bwain tangira aikai. Ngkai ko wareka ana riiti Bauro ni bwaai n tituaraoi n tamnei, ko riai n ikoti tabeua ake ko noori irouia tabeman, i bon iroum, ke aomata ake inanon koroboki aika tabu. Ngkana iai am kakabwaia mairoun te Tamanuea, e na kona n taekin tabeua man am bwai n tituaraoi n tamnei. A kanga bwaai n tituaraoi aikai ni buokiko ni kakabwaiaiia tabeman? Iangoia bwa ko na kanga ni ukori “bwaai n tituaraoi aika moa ni kakanato” (1 I-Korinto 12:31).
Taraa naba 1 I-Korintos 14; Moronaai 10:8–21, 30; Reirei ao Berita aika Tabu 46:8–26; Taekan te Onimaki 1:7.
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
1 I-Korinto 9:24–27.Ngkai Bauro e kabotaua te euangkerio ae maiu n ai aron te kabo birimwaaka, ko kona ni karaoa te kabo biri ni kaota ana bointe aei. Kanuanganiia n te baunuea ni kabane ake bane aia kabo biri, ao marooroakinna bwa ni kabane ake a marurung n iriira Iesu Kristo n te maiu aei a na tokanikai ni karekea te kaniwanga ae aki “mka”(1 I-Korinto 9:25; taraa naba 2 Timoteo 4:7–8). Tera ae karaoia te tia kabo biri ni katauraoia ibukin te kabo birimwaaka? Tera ae ti kona ni karaoia ni katauraoira n okira Tamara are i Karawa?
Bauro e kabotaua maiuakinan te euangkerio nakon te kabo birimwaaka.
-
1 I-Korinto 12:1–11.Imwiin warekan kiibu aikai n ikotaki, iangoia n anganiia ni kabane te beeba ma aran kaain te utu temana mai ieta. Tuangiia kaain te utu ni karinani bwaai n tituaraoi n tamnei are a nooria iroun te aomata anne bwa iai irouna. Ko kona ngkanne ni baatini beeba n te kamronron ni karokoa a bane n reke aia tai ni korea taekan bwaai n tituaraoi ibukiia n tatabemaniia kaain te utu.
-
1 I-Korinto 12:3.Bukin tera e riai n iai te Tamnei ae Raoiroi ni karekean te koaua iroun Iesu Kristo? Tera ae ti kona ni karaoia bwa tina kaoa te Tamnei ae Raoiroi ni kakorakorai ara kakoaua Irouna?
-
1 I-Korinto 12:12-27.Ana reirei Bauro iaon te rabwata e kona n riki bwa te anga n ururing mimarooroakina katiteuanaan te utu. Ibukin te katooto, kaain te utu a kona ni kataia ni korea te rabwata ni karaoa ae ti maata ke taninga (taraa kibu 17). Tera ae a katautauaki ni kiibu aikai bwa ti na kanga n akoako n tatabemaniira n aroia kaain te utu?
-
1 I-Korinto 13:4–8.Kabwaranakoan te tangira ae kororaoi iroun Bauro e na anga te kamatenano ae kairaki mai ieta ibukiia am utu. Ko kona ni angania kaain te utu n tatabemaniia bwa ana kamatebwaia te kibuntaeka inanon kiibu 4–8 ao n reireiniia nikiraia kaain te utu bwa tera ae e nanonaki ni kabonganaan kabwaranakoan, katooto, ao taneiai i bon iroum. E kanga te Tia Kamaiu n riki bwa te katooto n anua aikai? Ko kona naba ni karaoi boutita n ikotaki ibukin tatabeua man kibuntaeka aikai ao katekei rinanon nako ami auti. Bwaina te kakauiango!
Ibukin iango riki ibukin te angareirei ibukiia ataei, taraa te kamataata n te wiiki ae n Nakomai, Iriirai—Ibukin te Moanrinan.
Anene aika rineaki: “Love Is Spoken Here,” Aia Boki n Anene Ataei, 190–91.
Kanakoraoan Ara Anga reirei
Kaota te kibu. Rinea te kibu ae ko kunea bwa e uaana, ao katekea n te tabo are a na kona n nooria iai kaain te utu. Kaoia kaain te utu ake tabeman bwa a na kairuoruo n rinea te kibu are e na katekeaki.
“Te bwerena are ti tabeutaia, tiaki bon te buokanibwai n rabwatan Kristo ni kanaki? Bwa ngaira aika ti bati, bon te berena ae ti teuana, ao te rabwata ae ti teuana ” (1 I-Korinto 10:16–17).