Tebetembwa 11–17

2 I-Korinto 1–7

“Bwa Ti Aonga n Riki bwa Ana Raoiroi te Atua Inanona”

Ngkana ko wareka ana reta Bauro nakoia I-Korinto, korei tabeua ana reirei te euangkerio ake ko kunei ao iangoia bwa ko na kanga ni maiuakini inanon maium.

Korei Am Namakin

N tabetai, te riki bwa te tia kairiiri n te Ekaretia e nanonaki bwa ana taekinaki bwaai tabeua aika a kangaanga. Aio e bon koaua inanon ana bong Bauro ngkai e bon riki n te bong aei. E mataata n te reta mai mwaina mairoun Bauro nakoia I-Korinto aika Itiaki bwa e airi ma kaetakiia ao e karika uruakin aia kantaninga. Inanon te reta are e kinaaki bwa te ka 2 I-Korinto, e kataia ni kabwarabwara bwa tera ae e tia ni kaunga matoan ana taeka: “Ngke e bati rawawatau ma marakin nanou I koroboki nakoimi ma ranimatau aika bati; tiaki ba kam aonga ni karawawataki ma kam aonga n ata tangirakimi ae I kabatia” (2 I-Korinto 2:4). Ngkana ko a tia ni karekea n tokina tabeua kaetakim mairoun te tia kairiiri, e buokiko ataakin a e bon kairaki man ana tangira te Kristo. Ao e ngae ngke inanon keiti akanne ngkana kaetakim e bon aki kairaki man ana tangira Kristo, ma ti kukurei n nooriia tabeman ma aekan te tangira are e namakina Bauro, e na bon beebete aron kaekaan taian waaki ni kaunuun. Ngke Unimwane Jeffrey R. Holland e reirei, “Bwaina te iakoakoi e ngae ngke iai mamaaran rabwataia—am beku ma naake a beku ma ngkoe inanon te Ekaretia ni kairaki irouia taan anganano, aika mwaane ao aine. Ma ti rinanon Natina ae te Rikitemanna, aomata aika aki kororaoi a bane ni mwakuri rinanon te Atua” (“Lord, I Believe,” Riaona, Meei 2013, 94).

Iango ibukin te Kamatebwai i bon Iroum ni Koroboki aika Tabu

2 I-Korinto 1:3–7; 4:6–10, 17–18; 7:4–7

Kataakiu e kona n riki bwa te kakabwaia.

Ibukin bwaai ni kabane ake e rinanona Bauro ni maiuna, e aki kakuba bwa e korei taeka aika a mwaiti n te kantaninga ao kakabwaia man te karawawataaki. Ngkana ko wareka 2 I-Korinto 1:3–7; 4:6–10, 17–18; 7:4–7, iangoa taekan kataakim are a kona n riki bwa te kakabwaia. Ibukin te katooto, ko riai n iangoia bwa e kanga te Atua ni “kabebete [ko] ni kabane rawawa [tam]” bwa kona ni, manga kaokia ni, “kabebetei nanoia ake a rawawata n rawawataia nako” (2 I-Korinto 1:4). Ke ko riai ni katuruturua am taratara iaona bwa e kanga otan Iesu Kristo “e ota” i nanom, riki ngkana ko “karibwaki” man “mwaninga” (2 I-Korinto 4:6, 8).

Taraa naba Motiaea 24:13–17; Henry B. Eyring, “Tested, Proved, and Polished,” Riaona, Nov. 2020, 96–99; Atuun te Euangkerio, “Adversity,” topics.ChurchofJesusChrist.org.

2 I-Korinto 2:5–11

Te kabwarabure bon te kakabwaia are I kona n anga ao ni karekea.

Ti aki ata ae bati n taekan temwaane ae taekin Bauro n 2 I-Korinto 2:5–11—tii are e a tia ni karaoa ae kairua (taraa kiibu 5–6) ao are Bauro e tangiriia aika Itiaki bwa a na kabwara ana bure (taraa kiibu 7–8). Bukin tera n taai tabetai ti bwaka ni “kamatoa [ara] tangira nakoia” nakon are e tangiraki are e a tia ni kauniira? (kibu 8). E kanga tautauakin ara kabwarabure ni kamarakiia tabeman ao bon ngaira? (taraa kiibu 7, 10–11). E kanga tautauakin te kabwarabre n angan “Tatan … ana tai ni burebureiira”? (kibu 11).

Taraa naba Reirei ao Berita aika Tabu 64:9–11.

2 I-Korinto 5:14–21

Rinanon Ana Mwakuri ni Kamaiu Iesu Kristo, I kona n raoiakinai nakon te Atua.

N aron mwaitia aomata, Bauro e ataia bwa tera ae nanonaki n “te aomata ae tiba karikaki nabangkai” (2 I-Korinto 5:17). E nako man arona n bwanikiriniia Kiritian nakon ae te aomata ae aki mamaaku ni kamanoa Kristo. Ngkana ko wareka 2 I-Korinto 5:14–21, iangoi taekan titiraki n aron aikai: Tera nanon te raoiakinaki? Tera ae nanonaki bwa kona raoiakiniko nakon te Atua? Iangoia bwa tera ae e kona ni karaureko mairoun te Atua. Tera ae ko kainanoia ni karaoia bwa e na bon bwanin raoiakinam ma Ngaia? E kanga te Tia Kamaiu ni karaoa anne bwa e na kona n riki?

Ko riai naba n iangoia bwa tera ae e nanonaki n te riki bwa “taan raoi ngaira ibukin Kristo” inanon “mwakurian te raoiakinaki” (kiibu 18, 20). Tera am nonoori are ko karekea man ana rongorongo Unimwaane Jeffrey R. Holland “The Ministry of Reconciliation”? (Riaona, Nob. 2018, 77–79).

Taara naba 2 Nibwaai 10:23–25.

2 I-Korinto 7:8–11

Te rawawata are e tangiria te Atua e karika te rairannano.

Kanga ti aki iangoa te nanokawaki bwa te bwai ae tamaroa, ma Bauro e taetae iaon “rawawata are e tangiria te Atua” (2 I-Korinto 7:10) bwa te mwakoro ae kakaawaki n te rairannano. Iangoia bwa tera ae ko reiakinna n taekan te rawawata are e tangiria te Atua man aikai: 2 I-Korinto 7:8–11; Aramwa 36:16–21; Moomon 2:11–15; ao ana rongorongo Titita Michelle D. Craig “Divine Discontent” (Riaona, Nob. 2018, 52–55). Nningai ae ko a tia iai n namakina nanokawakin te Atua, ao tera rootakin maium iai?

Iango ibukin Kamatebwai ni Koroboki aika Tabu n te Utu ao te Bootaki n te Tairiki

2 I-Korinto 3:1–3.Iai ae a tia irouia kaain am utu ni butiia temanna bwa e na korea te reta ni boutoka ibukiia, n aron te bubuti ibukin te mwakuri ke te reirei? Tuangiia bwa a na taetae iaon te taneiai aei. Bauro e reirei bwa maiuiia aika Itiaki bon ai aron reeta ni bubuti ibukin ana euangkerio Iesu Kristo, “ae aki koreaki n te anto, ma e koreaki iroun Tamnein te Atua ae maiu.” Ngkana kam wareka 2 I-Korinto 3:1–3 n ikotaki, marooroakinna bwa e kanga ara katooto n riki bwa kanga ai aron reeta are a kona n “ataaki man warekaki irouia aomata ni kabaneia,” ni kaoti koauan ao kakaawakin te euangkerio. Tao kaain am utu n tatabeman a kona ni korea te reta ke te “reta ae abwabwaki” ni kabwarabwara bwa e kanga kaain te utu teuana n tia n riki bwa te katooto ae tamaroa ibukiia ana reirei Iesu Kristo. A kona ni wareki reeta akanne nakon te utu ao n anganiia kaain te utu are a korea taekana. Bukin tera e rangi ni kakawaki te ota iaon ae maiura bon ana „“reta[reeta] Kristo”?

2 I-Korinto 5:6–7.Tera ae nanonaki n te “nakonako n te onimaki, tiaki man are e nooraki”? Tera ae ti karaoia ni kaotia bwa ti kakoaua iroun te Tia Kamaiu e ngae ngke ti tiaki kona n Nooriia?

2 I-Korinto 5:17.A kona am utu n iangoa ke ni kakaea te katooto ni bwaai man te aba are e rinanon tamaroan te oneaki ao n riki bwa aomata aika tiba karikaki? (taraa te tamnei n tokin te kamataata aei). E kanga ni kona ana euangkerio Iesu Kristo ni bitiira?

2 I-Korinto 6:1–10.Ni kaineti nakon 2 I-Korinto 6:1–10, tera ae nanonaki n te riki bwa “ana minita te Atua”? (kibu 4). Tera bwaai ae riai n iai iroun ana minita te Atua?

2 I-Korinto 6:14–18.Ti na kanga n ira ana reirei Bauro n “otinako mai ibuakoia [taan aki raoiroi], ao ni maenako ma ngaiia,” ngkai kam na tangiriia naba kaain rarikimi?

Ibukin iango aika a mwaiti ibukin reireinaia ataei, taraa kabwarabwara n te wiiki aei n Nakomai, Iriirai—Ibukin te Moanrinan.

Anene aika rineaki: “Help Me, Dear Father,” Aia Boki n Anene Ataei, 99.

Kanakoraoan Ara Anga reirei

Tibwauai reirei man bwaai ni kabootau. Tabeua ana reirei te euangkerio, n aron te Mwakuri ni Kamaiu, a kona ni kangaanga te oota iai. Iangoi kabonganaan taian tamnei ke bwaai are e na kona ni buokiia am utu n ota n te reirei are ko kunea inanon koroboki aika tabu.

Ngkana ti a rairaki nakon ana euangkerio Kristo, oneakira e bon rang kakukurei are Bauro e kabwarabwara bwa kanga ai aron ae “te aomata ae tiba karikaki nabangkai” (2 I-Korinto 5:17).