E taetae Iesu nakon te teei ae uarereke

Tebetembwa 18–24

2 I-Korinto 8–13

“Te Atua e Tangira te Aomata ae e Waerake Nanona ni Kan Angabwai”

Korean mwiin namakin n tamnei ake a na buokiko n uringa are ko reiakin n tain am kamatebwai ni koroboki aika tabu. Ko na konaa ni koroboki inanon am tieno ni kamatebwai, koroi am taeka i mataniwin am koroboki aika tabu, reiti am taeka inanon am Gospel Library app, ke rawei am iango ni bwaai n rawerawe.

Korei Am Namakin

Tera ae ko na karaoia ngkana ko ongo bwa aia bootaki n taromauri Aika Itiaki n te aono teuana a taonaki n te kainnano? Aio te bwai ae riki ae e kabwarabwara Bauro nakoia Aika Itiaki I-Korinto 2 I-Korinto 8–9. E kantaningaia bwa e na kaumakii nanoia Aika Itiaki mai I-Korinto bwa a na anga tabeua kaubwaia nakoia Aika Itiaki ake a kainnano. Ma iaon te bubuti ibukin te buoka, n ana taeka Bauro e reke te koaua ae nano n taekan te angaanga: “E na angabwai te aomata n ai aron are e karekea nanona iai, n aki rawawata , ao tiaki n ai aron ae tebonaki ba e na anga: ba te Atua E tangira te aomata ae e waerake nanona ni kan angabwai” (2 I-Korinto 9:7). N ara bong, iai aika a Itiaki ni kabuta te aonaaba aika a kainnanoa te ibuobuoki. N tabetai ae e mwaiti ae ti kona ni karaoia nakoia ti na aki mamatam ao n anga ara angabwai n aki mamatam. N aaro tabeua, ara angabwai e kona n ae e bon kaineti ke e nako man te nano. Bwa aekara aekan ara anganano, e kakawaki taraan nanora n ara angabwai. N ara anganano a kaota ara tangira? N tokin te tai, bon te tangira ae e karika te tia angabwai bwa e na kukurei.

te aikaon ibukin te kamatebwai i bon iroum

Iango ibukin te Kamatebwai i bon Iroum ni Koroboki aika Tabu

2 I-Korinto 8:1–15; 9:5–15

I kona n tibwaia ma te kukurei ae iai irou ni kakabwaiaia kainnano ma ake a raarikin.

E rangi ni mwaiti te aomata ae e kainnano ni kabuta te aonaaba. Ti na kanga ni kona ni karaoa te bitaki? Unimwane Jeffrey R. Holland e anga te reirei aio: “Kaubwai ke aki kaubwai, ti riai ni ‘karaoa ae ti kona’ ngkana a kainnano tabemwaang [taraa Mareko 14:6, 8]. … [Te Atua] e na buokiko ao ni kairiiriko inanon aia mwakuri n akoi n aron ana reirei Kristo ngkana ko tangiria ao n tataroakinna ni kakaei kawai ibukin kawakinan te tua are E aki toki n anganganiira” (“Bwa Tiaki Ngaira ni Kabane Taan Bubuti?,” Riaona, Nob. 2014, 41).

Wareka 2 I-Korinto 8:1–15; 9:6–15, korea taekan ana reirei Bauro ake e reireiniira iai ibukin tararuakiia ake a kainnano ao ake a rarikin. Tera ae kaungaa nanom ibukin ana reirei Bauro? Ko na kona ni bubuti te kairiiri bwa tera ae ko kona ni karaoia ni kakabwaia te aomata ae e kainnano. Taraia bwa ko na korei namakin ake ko karekei ao karaoa nanona.

Taraa naba Motiaea 4:16–27; Aramwa 34:27–29; Russell M. Nelson, “The Second Great Commandment,” Riaona, Nob. 2019, 96–100; Henry B. Eyring, “Is Not This the Fast That I Have Chosen?,” Riaona, Meei 2015, 22–25.

2 I-Korinto 11:1–6, 13–15; 13:5–9

“Kam na kataingkami, bwa tao kam mena n te onimaki ke kam aki.”

N te bong aei, n aron ana bong Bauro, iai ake a ukoria ni kararoaira nako “man te raoiroi ao te itiaki are inanon Kristo” (2 I-Korinto 11:3). Ibukin anne, e kakawaki bwa ti na karaoa are e taku Bauro:”Kataingkamai, ba tao kam mena n te onimaki ke kam aki” (2 I-Korinto 13:5). Ko kona ni moana te waaki aei n iangoia bwa tera nanon “te mena n te onimaki.” Ko na kanga n ataia bwa ko mena n te onimaki? Kakaei aanga ake ko riai n tuoiko iai.

Ngkai e riki bwa mwakoron am tutuo, ko kona naba n iangoa te kibuntaeka aei “te raoiroi ao te itiaki are inanon Kristo” (2 I-Korinto 11:3). Ko kanga ni kunea te raoiroi ao te itiaki are inanon Kristo ao Ana euangkerio? E kanga am iango “ni kabarekaaki man te raoiroi ao te itiaki [anne]”? Tera taeka n reirei ake ko kunei n 2 I-Korinto 11:1–6, 13–15?

Iangoa naba te reirei aei mairoun Beretitenti Dieter F. Uchtdorf: “Ngkana ko aki toki n iangoia bwa e na aki nakoraoi te euangkerio ibukim, I kaoko bwa ko na tei, taraa maium man te tabo ae rietaata riki, ao ni kabebetea karaoana n riki bwa ana reirei Kristo. Kabanea am iango iaon reirei, tuua, ao karaoakin te euangkerio. I berita bwa e na kairiko te Atua ao ni kakabwaiako ni kawaim nakon te maiu ae kakukurei, ao e na nakoraoi riki te euangkerio ibukim” (“It Works Wonderfully!,” Riaona, Nob. 2015, 22).

2 I-Korinto 12:5–10

E tau ana akoi te Tia Kamaiu ni buokai ni karekea te korakora ni mamaarau.

Ti aki ataia bwa tera “te bwai ni kateketeke n irikon” Bauro, ma bane ni iai ara bwai ni kateketeke are ti kantaningaia bwa e na kanakoa mairoura te Atua. Iangoi oin ami bwai ni kateketeke ngkai kam wareka 2 I-Korinto 12:5–10, ao iaongoia tera ae kam reiakinna ibukin Iesu Kristo inanon kiibu aikai. Tera ae e reireiniira Bauro ni kiibu aikai n taekan taian kakatai ao mamaara? Tera nanona iroum ae te Atua e tau“ana akoi” ibukim?

Taraa naba Motiaea 23:21–24; 24:10–15; Ita 12:27; Moronaai 10:32–33.

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

2 I-Korinto 8–9.Tera ae ti kunea ni mwakoro aikai ae e kaungaira bwa ti na karoko irouia kainnano ao tabemwaang riki aika a kainnanoa te buoka? E na kona n riki te tai aio bwa te tai ae e raoroi ni iangoi babaire ni karaoan ana mwakuri n ibuobuoki te utu ibukin temanna ae e kainanoa te buoka.

2 I-Korinto 9:6–7.Iai kain am utu ae a kinaa temanna are ea kona ni kabwabwaraaki bwa “te aomata ae kukurei nanona ni kan angabwai”? Ti na kanga ni karaoi ara mwakuri nakoia tabemwaang bwa a na kakukurei? A kona kaain te utu ataei ni karaoi baeti ae kangai “Ngai te aomata ae kukurei nanou ni kan angabwai.” Ko kona n anga baeti nakoia kaain am utu n te tai are ko noriia bwa a buokiia i bon imarenaia ma te kukurei.

2 I-Korinto 10:3–7.Ko na kanga n reireiniia am utu taekan ara “buaka” ni kaaitara te buakaka? A na kukurei am utu ni katea te oo ke te nono n taian kaintekateka ao burangketi? E kona ni kaira te maroro bwa ko na kanga ni katikui bwaai aika a kararoaira ma te Atua ao n “[uota] ni kataenikai nano ni kabane ba a na ongo iroun Kristo; ao a tae nangira ni kani karekea kain te aki-ongoeaba ni kabanea, ngkana kam a tia moa n ongeaba.” Baikara ara “bwai ni buaka” n tamnei ake ti kabonganai ni kairii iai ara iango? (taraa I-Ebeto 6:11–18).

2 I-Korinto 11:3.Tera ae a kona ni karaoia kaain am utu ni kabotoi riki nanoia iaon “te raoiroi ao te itiaki are inanon Kristo”?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Give,’ Said the Little Stream,” Aia Boki n Anene Ataei,, 236.

Kanakoraoan Am Kamatebwai

Korei am namakin. E taku Unimwaane Richard G. Scott: “Atatai aika a koreaki raoi mwiia bon atatai aika a tauraoi n tain kainnanoaia. … [Korean mwiin kairiiri n tamnei] e katamaroa waekoan reken te oota” (“Acquiring Spiritual Knowledge,” Ensign, Nov. 1993, 88; taraa naba Reirei n ana Kawai te Tia Kamaiu, 12, 30).

aomata aika kairake a ibuobuoki ni karaoan mwkuri ni karikirake

“E na angabwai te aomata n ai aron are e karekea nanona iai, n aki rawawata , ao tiaki n ai aron ae tebonaki ba e na anga: ba te Atua E tangira te aomata ae e waerake nanona ni kan angabwai” (2 I-Korinto 9:7).