“Tebetembwa 18–24. 2 I-Korinto 8–13: ‘Te Atua E Tangira te Aomata ae E Waerake Nanona ni Kan Angabwai,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Tebetembwa 18–24. 2 I-Korinto 8–13,” Nakomai, Iriirai—Ibukin te Moanrinan: 2023
Tebetembwa 18–24
2 I-Korinto 8–13
“Te Atua E Tangira te Aomata ae E Waerake Nanona ni Kan Angabwai”
Taian iango aika a tamaroa ibukin reiakinaia ataei n am kiraati e na roko ngkai ko tataromwaaka ni kamatebwaia 2 I-Korinto 8–13 ma ngaiia n am iango. Iango iaon reirei riki tabeua e kona ni kuneaki inanon te mwakoro aei.
Kaunga te Tibwatibwa
Tekawai teuana ae tamaroa ni kaoaia ataei bwa a na tibwatibwa imarenaia bon kauringaia te bwai are ko kaoiia iai bwa a na karaoia n tain te reirei are mai imwaiina. Tuangiia bwa ana tibwauai aia taneiai.
Reirei te Reirei: Ataei aika a Uarereke Riki
I kukurei n anga nakoia aomata aika kainnano.
E tamaroa n tainako buokaia aomata, ma e korakora riki tamaroan te beku ma te kukurei. Iangoia bwa tera ae e na kaungaia ataei bwa a na kan “angaanga ma nanoia”
Waaki ni Kakukurei aika a Kona ni Karaoaki
-
Kaoiia ataei bwa a na kaokioka taekinan te kibu n taeka “Te Atua E Tangira te Aomata ae E Waerake Nanona ni Kan Angabwai” (2 I-Korinto 9:7). Tera ae nanonaki n “te aomata ae waerake nanona ni kan angabwai”? Kaota tamnein te ubu ae moangare ao te ubu ae nanokawaki, ao titirakiniia ataei bwa e ngaa ae kanga aron te aomata ae e kukurei ni kan angabwai.
-
Uaia n anenea te kuna iaon te ibuobuoki, n aron “When We’re Helping” (Aia Boki n Anene Ataei, 198), ni kamaita aneneakina. N te moan tai, tuangiia ataei bwa a na anene n rangi ni kukurei; imwiina tuangiia bwa a na anenea te kuna anne ma aia namakin ao nanoia ae kaokoro, n aron ae a nanokawaki, a kua, a un, ke a maaku. Kauringiia ataei bwa Tamara are i Karawa e tangiriira bwa ti na buokiia aomata tabeman ma te kukurei. Ngkanne anenea te anene ma te kukurei.
-
Buokiia ataei ni korei tamnein ubu aika a moangare ao aika a mata n un. Tuangiia bwa a na taua ieta aia tamnei ae moangare ngkana a ongo te taeka ae ngare ke ngarengare ngkai a anenea “Smiles” (Aia Boki n Anene Ataei, 267). A kona ni karaoa naba anne ma te tamnei are e mata n un ao n te taeka ae un ke kameme. Kaoiia ataei bwa a na kotea te ubu ae e kukurei ao e ngaa ae e aki. Kabwarabwaraa bwa teuana te kawai ae ko na kukurei ao ni buokiia tabeman bon man te moangare ao ni buokiia aomata tabeman ni ngarengare.
-
Bairea aia waaki ni kakukurei kaain te kiraati ni buoka temanna, n aron te ataei ae e aki roroko n te Moanrinan ke te membwa n te uoote ke kaain rarikira ae e kainanoa buokana. Ko na bae ni baireia bwa ko na kawara te aomata aei ni mweengana, korei taeka n akoi ke korei tamnei, ke karaoa te amwarake ao tibwaia.
-
Kaoiia ataei n tatabemaniia bwa a na bairei mwakuri ni ibuobuoki aika a kakukurei ibukin ana utu teuanne ke neienne. N tain te reirei n te wiiki ae na roko, tuangiia bwa a na tibwaua te bwai ae a karaoia.
Tamara are i Karawa e aki toki ni kaekai ara tataro, ma tiaki n aron are ti kantaningaia.
Te bwai ae rinanona Bauro n te tataro bwa “bwaai ni kateketeke n irikou” a na kanakoaki e reireiniira bwa te Atua n tabetai e kakorakoraira n tain katakira nakon ae e na anai mai iroura.
Waaki ni Kakukurei aika a Kona ni Karaoaki
-
Kaota nakoia ataei te aroka ae kateketeke (ke tamneina teuana). Buokiia bwa a na iangoia bwa aekakira namakinan ae e tiku n nim te kateketeke ni kunim n te tai ae maan. Kakimototoa taekina 2 I-Korinto 12:7–10 ibukiia ataei, kabwarabwaraa bwa “te kateketeke n irikon” Bauro bon te kataaki, te bwai ae matoatoa inanon maiuna. E ngae ngke Bauro e butiia te Atua bwa E na kanakoi kataaki, e aki karaoia te Atua. Irarikina, te Atua e reireina Bauro bwa taian kataaki a kona ni buokiira n reiakina ae ti na nanorinano ao n onimaki Irouna. Imwiina e kona te Atua ni karikiira bwa ti na korakora.
-
Kaota koauana ae Tamara are i Karawa e atai baika a tamaroa ibukira, ao E na anganiira te bwai ae ti kainanoia, e ngae ngke e kaokoro ma are ti taku bwa ti kainanoia. Ko kona naba ni tibwa am taneiai ngke am tataro a kaekaaki n te kawai ke n te tai ae kaokoro ma are ko kantaningaia. Te karaki n aron “The Diabetes Dilemma” (Rao, Tebetembwa 2019, 4–5) ke “Please Bless Ace” (Rao, Nobembwa 2019, 32–33) a kona ni ibuobuoki.
-
Anene ma ataei n te kuna iaon ana tangira Tamara are i Karawa, n aron “A Child’s Prayer” (Aia Boki n Anene Ataei, 12–13). Titirakiniia ataei bwa tera ae ana taekinna nakon temanna ae e aki ataia bwa Tamara are i Karawa e ongo ao e kaekai tataro. Manga anenea riki te kuna, ao kaotii rain ake a kabwarabwaraa bwa e kanga ana namakin Tamara are i Karawa ibukira.
Reirei te Reirei: Ataei aika a Ikawai Riki
I kukurei n anga nakoia aomata aika kainnano.
Bauro e tangiria ni kaungaia Aika Itiaki bwa a na anga man kaubwaia ni buokiia ake a kainano. Ko na kanga ni kabongana ana taeka ni kaungaia ataeibwa a na buokiia aomata tabeman?
Waaki ni Kakukurei aika a Kona ni Karaoaki
-
Korei taeka man 2 I-Korinto 9:7 iaon te burakibooti, ao kanakoi oin taeka n aki korei. Kaoiia ataei bwa a na ketina te taeka are e bua. Ngkanne tuangiia bwa a na wareka te kibu man koroboki aika a tabu ni karin taeka ake a bua. Tera ae e nanonaki n anga “n aki rarawa, ke tiaki n ai aron ae tebonaki”? Tera ae nanonaki n “te aomata ae waerake nanona ni kan angabwai”?
-
Kaoiia ataei bwa a na buokiko ni kakaei tamnein te Tia Kamaiu ae buokiia tabeman (a rangi ni mwaiti inanon Nakomai, Iriirai—Ibukiia Aomata n Tatabemaniia ao Utu). Titirakiniia bwa tera ae a noria n tamnei aikai are e buokiia n ataia bwa Iesu e buokiia tabeman ma te tangira. Katea aia kouru kaain te kiraati bwa a na kangai eng ngkana kaain am utu ke tabeman aomata a tuangiira bwa ti na beku inanon wiiki aika a na roko, n aron te ibuobuoki n te auti ke tararuakiia tabeman.
-
Buokiia ataei bwa a na katamaroai atibu aika uarereke. Kabwarabwaraa bwa aikai “atibu n ibuobuoki” ae a kona ni uouotia inanon aia buua n te wiiki aei ni buokiia n uringa ni beku ibukiia tabeman ma te kukurei.
-
Uaia n anenea te anene iaon te ibuobuoki, n aron “Fun to Do” (Aia Boki n Anene Ataei, 253). Buokiia ataei n iangoi kiibu aika boou n te anene are e kabwarabwarai kawai aika mwaiti ni beku ibukiia tabeman.
Tamara are i Karawa e aki toki ni kaekai tataro, ma E aki anganai baike I tuatua n taai nako.
Bauro e butiia te Atua bwa e na kanakoi baike e kabwaka iai, ma te Atua e ataia bwa kabwaka aika iroun Bauro e na karikia n nanorinano ao te Atua e na kona ni kakorakoraa.
Waaki ni Kakukurei aika a Kona ni Karaoaki
-
Kaoiia ataei bwa a na kakaea te kaokoro imarenan 2 I-Korinto 12:9–10 ao Ita 12:27. Tera taeka ke kibun n taeka aika okioki? Tera ae e reiakin kiibu aikai? (Ko na bae n tangiria ni kabwarabwaraa bwa Bauro e kabotauii kangaanga ake e rinanoi bwa bwaai ni kateketeke n irikona.) Tera ae e reireina iai Bauro te Atua iaon te kataaki?
-
Kaoiia ataei bwa a na korei ni karinani tabeua kataaki ake a kaitarai aomata inanon maiuiia. Buokiia ni iangoia bwa e na kanga temanna n reiakinaki man kakatai aikai ao ni kakabwaiaaki mai iai.
-
Wareware ma ataei n “The Diabetes Dilemma” (Rao, Tebetembwa 2019, 4–5). Tuangiia ataei bwa a na tibwa te bwai are a rinanona ngke a tataro ibukin te bwai teuana ao aki karekea. Tuangiia bwa a na tibwa te bwai are a reiakina man aia taneiai anne. E na bae n iai naba am taneiai ae ko na tibwaia. Kaota am koaua ae e aki toki Tamara are i Karawa ni kaekai ara tataro n te kawai ao n te tai ae ti na kakabwaiaaki riki iai.
Kaungaa te Kamatebwai n te Mweenga
Kaoia ataei bwa a na riki bwa taan angaanga ma nanoia ni mweengaia n te wiiki aei ao n roko nakon te kiraati n te wiiki ae e na roko n tauraoi n anga aia ribooti bwa a kanga ni buoka temanna ae e kainano.
Kanakoraoan Ara Anga reirei
Katoka te kakeru ma te tangira. “N tabetai te ataei e karaoi waaki ni kakeru ake e na uruana iai aia reirei tabeman n te kiraati. Ngkana e riki aei, bwaina te taotaonannano, tangira, ao n ota ni kakaewenako ake e na kaitarai te ataei. … Ngkana te ataei are e karika te kakeru iai kainnanona ae riai, marooro ma te tia rabakau iaoia ake a mwauku n te uote ke te titeiki ke nakon [disability.ChurchofJesusChrist.org] ni kakaea bwa kona kanga ni karekei kainnanoia n te aro ae tamaroa riki.” (Reirei n ana Kawai te Tia Kamaiu,26).