“Tebetembwa 4–10. 1 I-Korinto 14–16: ‘Bwa Tiaki te Tia Karika te Kiriwe te Atua, ma te Tia Karika te Raoi,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Tebetembwa 4–10. 1 I-Korinto 14–16,” Nakomai, Iriirai—Ibukin te Moanrinan: 2023
Tebetembwa 4–10
1 I-Korinto 14–16
“Bwa Tiaki te Tia Karika te Kiriwe te Atua, ma te Tia Karika te Raoi”
Ngkai ko wareka 1 I-Korinto 14–16, te Tamnei ae Raoiroi e na buokiko n ata te bwai ae ko na reireiniia ataei n am kiraati. Rinanoa te kabwarabwara aei ibukin iango riki tabeua.
Kaunga te Tibwatibwa
Ko na bae ni moana te reirei aei man warekan 1 I-Korinto 14:26 ni kabaibati. Kaotia bwa ngkana ti bane ni ikotaki n te taromauri, ti kona ni kamatataia (ke ni kakorakoraia ao ni buokiia) tabeman ngkana ti tibwaa are ti reiakinna. Tuangiia ataei bwa tera te bwai ae a kona n tibwaia ni kamataata temanna n te kiraati n te bong aei.
Reirei te Reirei: Ataei aika a Uarereke Riki
I kona ni maeka ma Tamara are i Karawa imwiin mateu ibukina bwa Iesu Kristo e a tia ni manga uti.
Ko na kanga n reireiniia ataei bwa ibukin ae e a tia ni manga uti Iesu Kristo ti kona ngaira ni manga maiu?
Waaki ni Kakukurei aika a Kona ni Karaoaki
-
Kaokioka taekinan te kibu n taeka aei ma ataei n ae mwaiti: “Ti na bane ni kamaiuaki iroun Kristo” (1 I-Korinto 15:22). Kaota tamnein te Tia Kamaiu ae mangauti (taraa te kabwarabwara n te wiiki aei inanon Nakomai Iriirai—Ibukia Aomata n Tatabemania ao Utu) ke kaota te witeo “Jesus Is Resurrected” (ChurchofJesusChrist.org). Kabwarabwaraa bwa ti na bon bane ni mate n te bong teuana, ma ibukin Iesu ae e a tia ni mangauti, ti na bane ni manga maiu imwiin matera.
-
Kaota nakoia ataei te kabaraaki, are e tei ibukin rabwatara ae mamate. Ngkai ti maiu, tamneira a mena inanon rabwatara ao rabwatara a kona ni mwainging (karina te kabaraaki). Ngkana ti mate, tamneira e kitana rabwatara ae mamate ao rabwatara aikoa konaa ni mwainging (butaa te kabaraaki ao katikua iaon te taibora ke te kaintekateka bwa e tei ibukin rabwatara n akea te tamnei iai). Ngkana tia mangauti, tamneira a manga okira rabwatara (manga karina te kabaraaki), ao aikoa konaa ni manga maenako. Kariaia ataei temanna imwin temanna ni karina te kabaraaki ao ni manga butia ngkai temanna te ataei e kabwarabwaraa bwa te teraa ae e riki ngkana tia mangauti.
I kona ni bwabetitoaki ibukiia aomata ake a mate.
Ngkai a katauraoi ataei ibukin moan bwabetitoakiia, iangoia bwa ko na kanga ni buokiia ni kariariaa naba te tai are a na bwabetitoaki iai ibukiia maate.
Waaki ni Kakukurei aika a Kona ni Karaoaki
-
Buokiia ataei n iangoi bwaai ake aki kona ni karaoi ibon irouia. Antai ae e buokiia ni karaoi bwaai aikai? Kaota tamnein temanna am bakatibu are e a tia ni mate ma e tuai ni bwabetitoaki. Tuangia ataei rongorongon te aomata anne, ao kabwarabwaraa ae te aomata aio e kainanoa ara ibuobuoki bwa e na bwabetitoaki.
-
Titirakiniia ataei ngkana iai kaain aia utu ae e a tia n nako n te tembora ni karaoa te mwakuri ni bwabetito ibukiia maate. Kaota tamnein te tabo ni bwabetito n te tembora. Titirakiniia ataei ngkana ataia bwa tera te bwai ae karaoaki iai. Kabwarabwaraa bwa inanon te tembora ti kona ni bwabetito ibukiia aomata ake a tia ni mate ao a tuai ni bwabetitoaki. Ngkanne aomata akanne a kona n rineia bwa a na butimwaea te bwabetito.
Tamara are i Karawa e tangirai bwa n na maeka ma Ngaia n te abanuea ae te tiretio.
Ko na kanga n reireiniia ataei taekan aba n uea aika te tiretio, teretirio, ao teretio? A kona waaki ni kakukurei aikai n ibuobuoki.
Waaki ni Kakukurei aika a Kona ni Karaoaki
-
Koreia iaon te burakibooti tiretio, teretirio, ao teretio. Buokiia ataei bwa a na reiakina aron atongan taeka aikai.
-
Kaota tamnein taai, namwakaina, ao te itoi. Kaoiia ataei bwa a na karinanna man ae e korakora otana nakon ae e uarereke otana. Wareka 1 I-Korinto 15:40–41 nakoia ataei (taraa naba ana Rairairi Iotebwa Timiti n kibu 40, footnote a). Kabwarabwaraa bwa taai, namwakaina, ao itoi a tei ibukin abanuea ake ti kona ni maeka iai imwiin manga utira. N te abanuea ae te tiretio, ti kona ni maeka ma Tamara are i Karawa.
-
Anganiia ataei te kaobi man waaki ni kakukurei n te wiiki aei te iteraniba are e na karanaki. Ngkai a tabe ni kara, tibwauaia ma ngkaiia am namakin iaon te Tia Kamaiu ao te bwai are E a tia ni karaoia bwa ti aonga ni konaa ni manga maeka ma Tamara are i Karawa.
“Bon iai te tamaroa teuana ae tamaroan taai” (1 I-Korinto 15:41).
Reirei te Reirei: Ataei aika a Ikawai Riki
Bwa ibukin Iesu Kristo ao Mangautina, N na manga kautaki.
A mataata ataei ake ko reireiniia kakawakin Mangautin Iesu Kristo? Iango aikai a kona n ibuobuoki.
Waaki ni Kakukurei aika a Kona ni Karaoaki
-
Tuangiia ataei bwa a na ikaruoruo ni wareki kiibu n 1 I-Korinto 15:12–22, ni kakaea kaekaan te titiraki “Tera ae e na riki ngke arona bwa akea te mangauti?”
-
Kaoiia ataei bwa a na karaoa te kaotioti bwa a kanga ni kabwarabwaraa te mangauti nakon temanna. Buokan te iango, a kona n rinanoa te anenea iaon Mangauti te Tia Kamaiu, n aron “Did Jesus Really Live Again?” (Aia Boki n Anene Ataei,, 64). Noora naba te witeo “Until We Meet Again” (ChurchofJesusChrist.org). Kaota am koaua iaon Mangautin te Kristo.
1 I-Korinto 15:12–13, 20– 22, 29
I kona ni katauraoi n nako nakon te tembora ni karaoa te bwabetito ibukia maate.
Te bwabetito ibukiia maate bon te mwakuri n tangira ae kakimwareirei ibukiia ara bakatibu. Ko na kanga ni buokiia ataei ni katauraoi bwa a na ira buakon te mwakuri aei?
Waaki ni Kakukurei aika a Kona ni Karaoaki
-
Wareka 1 I-Korinto 15:29. Tera baike a kakaraoi Aika Itiaki n ana bong Bauro ae ti kakaraoi naba n te bong aei? Titirakiniia ataei bwa bukin tera ti bwabetito ibukia mate. Ngkana e riai, kabwarabwaraa bwa a mwaiti ara bakatibu aika a aki reke aia tai ni bwabetitoaki ao ni kamatoaaki ngke a maiu. N te tembora, ti kona ni bwabetitoaki ao ni kamatoaaki ibukiia.
-
Tabeua boong imwain te kiraati, kaoa ana karo temanna te ataei bwa e na buoka natina n tauraoi n roko ao n tibwaa ana riki ke ni karakina taekan ana bakatibu. Ko kona naba n tibwaua rongorongoia am bakatibu.
-
Kaoa temanna kaain te bitiobiriki ke te kairake n am uoote bwa e na tibwa tabeua bwaai are a kona ataei ni karaoia ni katauraoi n rin n te tembora. Tuangiia ataei bwa a na kaotii naba aia iango. Kaoiia bwa a na katea aia kouru bwa a na nako n te tembora n te bong teuana.
Imwiin mangautiu, I kona ni maeka n te abanuea ae te tiretio.
N reireiniia kaain I-Korinto iaon rabwata ake ti na karekei n tain te Mangauti, Bauro e taekin tenua aekan mimitong: tiretio, teretirio, ao teretio.
Waaki ni Kakukurei aika a Kona ni Karaoaki
-
Wareka 1 I-Korinto 15:40–41 ao kaoiia ataei bwa a na korea tamnein taai, namwakaina, ao itoi iaon te burakibooti. Tuangiia kaain te kiraati bwa a na kinaa bwa aekakira te rabwata ae e tei n onea mwiin tamnei akanne.
-
Uaia n anenea te anene ae e kaineti ma atuun te reirei aei, n aron “The Lord Gave Me a Temple” (Aia Boki n Anene Ataei, 153). Ke kaota te witeo “Our Eternal Life” (ChurchofJesusChrist.org). Tera ae reireiniira te anene ke te witeo iaon te katauraoi ni maeka ni mimitongin tiretio?
-
Kabwarabwaraa bwa Iotebwa Timiti e karekea te kaotioti are e nora iai abanuea aika tenua are e katotoonga aekakin rabwata ake e kabwarabwarai Bauro. Buokiia ataei ni kakaea n Reirei ao Berita aika Tabu 76:50–53, 70; 76:71–79; 76:81–82 ae kabwarabwarai abanuea aika tenua aikai.
Kaungaa te Kamatebwai n te Mweenga
Kaoiia ataei bwa a na tuangiia aia karo bwa a na tuangiia karakinan temanna aia bakatibu. A kona n tibwaua aia karaki ma kain te kiraati n te wiiki ae e na roko.
Kanakoraoan Ara Anga reirei
Kaungaia ataei bwa a na titiraki. “Kataia n taraa aia titiraki [ataei] bwa te tibwanga, tiaki te kakeru ke te kamangaongao nakon am reirei. … Titiraki akanne a na anganiko iango aika kakaawaki n te bwai are a iangoia ataei, tera aia tabeaianga, ao a na kanga ni kaeka nakon bwaai ake a reiakinii. Buokiia bwa a na ataia ae kaekaan aia titiraki a kona ni kuneaki inanon booki aika tabu ao n aia taeka burabeti aika maiu” (Reirei n ana Kawai te Tia Kamaiu,, 25–26).