Iesu Kristo

Tebetembwa 11–17

2 I-Korinto 1–7

“Kam na Raoiakinaki ma te Atua”

Moana am katauraoi mani warekan 2 I-Korinto 1–7. Nakomai Iriirai—Ibukiia Aomata n Tatabemaniia ao Utu e kona ni buokiko ni kamatebwaii mwakoro aikai, ao te reirei aei e na anganiko iango ibukin am anga reirei.

te aikaon ibukin te tibwatibwa

Kaunga te Tibwatibwa

Tabeman ataei n am kiraati a tia ni koro reta n te wiiki aei n aron kaain aia utu ana katoto ae tamaroa bwa ana reirei Iesu Kristo(taraa te kanoa n reirei n te wiiki aei n Nakomai, Iriirai—Ibukiia Aomata n Tatabemaniia ao Utu). Ngkana e reke am iango, tuangiia imwain te tai bwa a na tibwaa te reta n te kiraati. Ke tuangiia ataei bwa a na tibwaa te bwai are a reiakinna.

te aikaon ibukin te anga reirei

Reirei te Reirei: Ataei aika a Uarereke Riki

2 I-Korinto 1:3–4

Tamara arei Karawa e anganai te rau, ao I kona ni karau nanoia aomata.

Ko na kanga n anganiia ataei te aki nanokokoraki bwa e na karau nanoia Tamara are i Karawa? Ko na kanga ni buokiia bwa a na kareka te rau?

Waaki ni Kakukurei aika a Kona ni Karaoaki

• Kaota bwaai tabeua nakoia ataei are e na karekea te rau, n aron te burangketi ke te baanteti. Titirakinii ataei bwa tera ae kamweraoia ngkana a nanokawaki ke a maroaa ke inanon aia kanganga. Wareka 2 I-Korinto 1:3–4 ma ataei, ao kabwarabwara bwa te “kangaanga” titebo nanona ma kangaanga aika matoatoa. Tibwaua tabeua kawai ake e karau iai nanora Tamara are i Karawa, ao kaota am koaua bwa E na karau nanoia naba ataei.

• Kaotii tamneia aomata aika bwabetitoaki (taraa Boki n Tamnei n te Euangkerio, nambwa 103–4) ngkae ko wareka 2 I-Korinto 1:4 nakoia ataei. Kabwarabwara bwa ngkana ti bwabetitoaki, ti berita bwa ti na buokiia aomata. Ti na kanga ni karaoa nanon ana reirei Bauro are “buokiia akana a reke n te kangaanga”?

2 I-Korinto 2:7–8, 10

I kona ni kabwarai aia bure tabemwaang.

Rinei mwakuri aikai—ke karioi oin am mwakuri—ni buokiia ataei ni kakorakora te nano ni kabwarai aia bure aomata.

Waaki ni Kakukurei aika a Kona ni Karaoaki

• Kabwarabwara nakoia ataei bwa Bauro e tuangiia kaain te aro i Korinto bwa a na kabwara ana bure te aomata ae te tia bure. Wareka 2 I-Korinto 2:7–8, 10, ao kaoiia ataei bwa ngkana a ongo a na taua bwabwaaia ngkana a ongo taeka aika kabwara bure ao kabwara ana bure.

• Tuangiia ataei bwa a na karaoa kain aroi ni kaeka n taai aikai are ngkana iai ae e aki rau nakoia. Angania te tai bwa a na taekina ae “Kabwara au bure” ao “E bwara am bure.” Ti na kanga ni buokii aomata bwa a na ataia e bure aia bure? Kabwarabwara bwa teuana te kawai bon “kamatoaan am tangira,” ke kaota am tangira nakoiia (2 I-Korinto 2:8).

2 I-Korinto 4:1–2

I kakoaua bwainakin te kokoaua.

E reirei Bauro bwa ana toro Kristo a “bwaina te bwai ae te kokoaua.“ Iangoi kawai ake a kona ni kakorakora nanoia ataei ni kokoaua ni bwaai nako.

Waaki ni Kakukurei aika a Kona ni Karaoaki

• Buokiia ataei n kamatea te botantaeka ae “Ti kakoaua bwa ti riai ni kokoaua” (Taekan te Onimaki 1:13). Korea te botantaeka iaon te beeba are a kona ni katamaroaa ataei ao ni karikia bwa te tauanibai. Tuangiia bwa te kokoua bon taekinan te koaua.

• Tuangiia ataei bwa a na katei baia ngkana a tia n taekina ae koaua ao tuangiia bwa a na karuoi baia ngkana a tia n aki kokoaua. Taekin botantaeka aika uarereke, n aron “Te Bong ae te Taabati” ke “Iai teniua bwairiu.” Kaokioka te waaki ni kakukurei aio, ao tuangiia ataei bwa a na karaoa aei are a taekina te kibuntaeka ae eti ao ae kairua. Bukin tera Tamara are i Karawa e tangiria bwa ti na ataa te koaua?

• Kaota te tamnei “A Visit with Elder Ulisses Soares” (ChurchofJesusChrist.org). Tera ae reiakinna Unimwaane Soares ngke e kairake iaon te kokoaua? Kaungaia ataei bwa a na katauraoi imwain aia bwabetito man karaon te kokoaua.

te aikaon ibukin te anga reirei

Reirei te Reirei: Ataei aika a Ikawai Riki

2 I-Korinto 1:3–4

Tamara arei Karawa e anganai te rau, ao I kona ni karau nanoia aomata.

Uringnga bwa e a tia n anganai te rau te Atua ao n anganai au iango bwa N na anga te rau nakoia aomata.

Waaki ni Kakukurei aika a Kona ni Karaoaki

• Ngkai ko wareka 2 I-Korinto 1:3–4, tuangiia ataei bwa a na kakauongo nakon kaekan te titiraki ae “Tera ae e na karaoia ibukira te Atua?” Buokiia ataei ni korei kawai ake e anganira te rau te Atua. Kaoiia ataei bwa a na tibwai karakinaia ike a nanokawaki ke raraoma ke marooa ao e buokiia te Atua.

• Kaoiia ataei bwa a na tibwai kawai ake ti kona iai ni kawakina ara berita n te bwabetito (taraa Motiaea 18:9). Angania aia tai n iangoa te aomata are e kainnanoa te rau ao karaoa te babairea bwa a na buoka te aomata anne.

2 I-Korinto 2:5–11

I kona ni kabwarai aia bure tabemwaang.

Tao e na matoatoa kabwaraan aia bure tabemwaang riki ngkana a aki ako nakoira. Ma ataei ake ko reireiniia a na rinanon te tangira, te rau, ao te kukurei ngkana a kabwarai aia bure tabemwaang.

Waaki ni Kakukurei aika a Kona ni Karaoaki

• Tuangiia ataei bwa te aomata i Korinto are e bwaka ao e “karika te karawawata” nakoia kaain te aro (taraa 2 I-Korinto 2:5). Tuangiia ataei bwa a na ukora 2 I-Korinto 2:7–8 ni kakaea nanon Bauro ae a na karaoia kaain te aro.

• Tibwa karakinam ngke ko kabwara ana bure te aomata—ke e kabwaraaki am bure—ao kabwarabwara am namakin. Ke kaota te tamnei ae “The Goal: A Story of Faith, Friendship and Forgiveness” (ChurchofJesusChrist.org). Kaoiia ataei bwa a na tibwaia rongorongoia ni kabwaraan buure.

2 I-Korinto 5:6–7

I “nakonako n te onimaki, tiaki n te taratara.”

Iangoa arom ni kaungai nanaoia ataei ni kawakin ana tua te Atua riki ngkana e na aki baiti reken te kakabwaia are a tangiria.

Waaki ni Kakukurei aika a Kona ni Karaoaki

• Wareka 2 I-Korinto 5:6–7 ao Aramwa 32:21 ma ataei, ao tuangiia bwa a na tarai taeka ma botantaeka ae na ibuobuoki ni kabwarabwara te onimaki. Tuangiia bwa a korei nanoia ao n tibwatibwa imarenaia.

• Kaoa temanna te ataei bwa e na kamaki matana, ao tuangiia ataei ake tabeman bwa a na buokia ni kakaea kawai ke ni karaoa te mwakuri teuana n aron katean te tau ni mwakoron kaai ke te mwananga. E kanga te mwakuri ni kakukurei aei ni buokiia aomata bwa a na “nakonako n te onimaki” inanon te Atua?

• Kaota te tamnei “Reunited by Faith” (ChurchofJesusChrist.org), ao titirakiniia ataei bwa e kanga te kairake n ataei ni mwaane are n te witeo n nakonako ma te onimaki. Tibwaa karakinam ngke ko nakonako n te onimaki, ao ko kaungaia ataei bwa a na tibwai rongorongoia.

2 I-Korinto 7:8–10

Te raraoma ni koaua e kairai nakon te rairanano.

Bon arona namakin te mama ao te bwainrang ngkana ti ooaki ni karaoa te bwai ae kairua. Buokiia ataei ni kaokoro namakin aikai man te raraoma ni koaua, are e kairiira nakon te rairanano.

Waaki ni Kakukurei aika a Kona ni Karaoaki

• Kabwarabwara bwa n 2 I-Korinto 7:8–10, Bauro e taekina ana reta are e koreia nakoia kaain te aro, n kauringia aia bure. Botaki n warekii kiibu aikai. Bukin tera e kukurei Bauro irouia kaain te aro bwa a raraom? Katerea bwa te aeka ni raraoma ae are aranaki bwa te raraom ni koaua.

• Tuangiia ataei bwa a na iango te tai are a karaoa iai te kairua ao a namakinna te maama iai. Kaoiia bwa a na titirakiniia ibon irouia, “Bukin tera e aki raoiroi au namakin?” ao tibwai aia kaeka. Korei aia kaeka n te burakibooti (te katooto, “I maaku bwa N na reke n te kangaanga” ke “I ataia e aki kukurei Tamara are i Karawa” ke “I katanga temanna te ataei”). E ngaa mai buakon kaeka aikai ae taraan te “raraoma ni koaua”? (2 I-Korinto 7:10). Bukin tera te raraoma ni koaua e tamaroa riki nakon tabeianga ake ti namakin ngkana ti kairua?

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa ana tibwaia ma aia utu teuana te waaki ni kakukurei are a karaoia n te kiraati, tao n tain te kainutu.

Kanakoraoan Ara Anga reirei

Kaota te kibu. Rinea te kibu teuana ae bongana, ao katekea n am umwanreirei n te tabo are a na kona n nooria ataei. Tao a kona ataei n rinei kiibu ake a na katekeaki.

iteraniba ibukin te waaki ni kakukurei: I kakoauaa te aro ni kokoaua