“Aokati 28– Tebetembwa 3. 1 I-Korinto 8–13: ‘Ao Rabwatan Kristo Ngkami,’” Nakomai, Iriirai—Ibukin te Moanrinan: Te Nu Tetemanti 2023 (2022)
“Aokati 28– Tebetembwa 3. 1 I-Korinto 8–13,” Nakomai, Iriirai—Ibukin te Moanrinan: 2023
Aokati 28–Tebetembwa 3
1 I-Korinto 8–13
“Ao Rabwatan Kristo Ngkami”
Ngkai ko wareka 1 I-Korinto 8–13, kakauongo n ana wirikiriki te Tamnei ae Raoiroi bwa ko na kanga n reireii reirei aika ni mwakoro aikai. Uringnga bwa iango iaon waaki ni kakukurei a kona ni bibitaki bon ibukiia aika a ikawa ao ataei aika uarereke.
Kaunga te Tibwatibwa
Kaoiia ataei bwa a na tibwai bwaai ake a karaoi n tain te bootaki n toa ni iangoa Iesu.
Reirei te Reirei: Ataei aika a Uarereke Riki
Tamara are i Karawa E na buokai ni karaoi rinerine aika eti.
N taai nako e aki bebete rinean te eti, ao Tamara are i Karawa E ataa anne. Ngkana ti butiia, E na bon buokiira ibukina bwa E tangiria bwa ti na tokanikai.
Waaki ni Kakukurei aika a Kona ni Karaoaki
-
Wareka 1 I-Korinto 10:13 nakoia ataei, kaoiia bwa a na ioioa atuiia ngkana a ongo te taeka ae “kariiri” ke “kaririiaki.” Kabwarabwaraa bwa tera nanon te kibu aio iroum.
-
Karakin tabeua rongorongoia aomata ake a nang karaoi aia rinerine ae e bure. Ngkai a tabe n ongoraa ataei, kaoiia bwa a na katea baia ieta ke te kanikinaa n toki iaon te beeba ngkana te aomata are n te karaki e karaoa ana rinerine ae e bure. Tera te rinerine ae e eti? Taekina koauana bwa Tamara are i Karawa E na buokiira n rinea ae eti.
-
Kaota tamnein Iesu, ao anene ma ataei n te anene iaon Iesu, n aron “I’m Trying to Be like Jesus” (Aia Boki n Anene Ataei, 78–79). Marooro iaona bwa e kangaa uringan Iesu ni buokiko ni karaoi rinerine aika tamaroa. Kaotii tamnein bwaai tabeua ake a buokiira ni karaoi rinerine aika a tamaroa, n aroia kaaro ke boki aika tabu. Titirakiniia ataei bwa tera ae e buokiia ni karaoi rinerine aika tamaroa.
Tamara are i Karawa e kakabwaiaai ma bwai n tituaraoi n tamnei.
Tamara are i Karawa e a tia n anganiia Natina ni kabane bwai n tituaraoi n tamnei. Tera bwai n tituaraoi n tamnei ae ko nori irouia ataei ake ko reireiniia?
Waaki ni Kakukurei aika a Kona ni Karaoaki
-
Kaoia ataei bwa a na korea tamnein te bwaintangira ae mamate nanoia iai are a tia ni karekea. Kabwarabwaraa bwa Tamara are i Karawa e anganiira bwaai n tituaraoi ni kakorakoraa ara onimaki ao ni buokiira ni kakabwaiaia aomata tabeman. Tibwaia ma ataei tabeua bwaai n tituaraoi ake a taekinaki n 1 I-Korinto 12:7–11.
-
Korei tabeua taeka nakoia ataei n tatabemaniia, ni kabwarabwarai bwaai n tituaraoi n tamnei are ko a tia n nori iroun teuanne ke neienne (ke ko kona ni kaoiia kaaro bwa a na korei taeka akanne). Karina te koroboki anne n te tinaniku. Kariaia ataei bwa a na kauka te tinaniku, ao buokiia ni wareka aia bwai n tituaraoi n tamnei.
Tamara are i Karawa e a tia n anganiia Natina ni kabane bwai n tituaraoi n tamnei.
I kona n tangiriia tabeman.
Koroboki aika a tabu e reirei bwa te tangira ae kororaoi bon “ana tangira Kristo ae itiaki” (Moronaai 7:47). Ko na kanga ni buokiia ataei ni karikirakea ao ni kaota aekan ana tangira Kristo?
Waaki ni Kakukurei aika a Kona ni Karaoaki
-
Wareka 1 I-Korinto 13:13 ao Moronaai 7:47, ao buokiia ataei ni kaokioka taekinan te kibu n taeka “Te tangira bon ana tangira Kristo ae e itiaki.” Kaota tamnein Iesu ngke e tatangira ao n akoi, ao titirakiniia ataei bwa E kanga ni kaota te tangira nakoia tabeman (taraa Gospel Art Book ni karekea am iango).
-
Anenea te anene iaon tangiraia tabeman, n aron “Jesus Said Love Everyone” ke “Love One Another” (Aia Boki n Anene Ataei, 61,136), ma ataei. Kaota tamneia aomata aika a kakaokoro (n aroia kaaro, taari ao mwaane, tia reirei, ke raraom), ao tuangiia ataei bwa a na kangaa ni buoka te aomata anne. Kaoiia ataei bwa a na iangoa temanna ae a kona ni beku ibukina ao imwiina a korei taeka tabeua ke ni korotamnei ao a angan te aomata anne. Ngkana a kainanoi riki iango bwa a na kanga ni ibuobuoki, kaota te witeo “Pass It On” (ChurchofJesusChrist.org).
Reirei te Reirei: Ataei aika a Ikawai Riki
Tamara are i Karawa E na buokai n totokoa te kaririaki.
Berita ake n te kibu aei a kona n anganiia ataei bon onimakinaia irouia bwa a bon kona n totokoa te kaririaki ma ana ibuobuoki Tamara are i Karawa.
Waaki ni Kakukurei aika a Kona ni Karaoaki
-
Kaoia ataei bwa ana wareka 1 I-Korinto 10:13 ni kaka uoman ao kakimototoa n taekina te kibu aei ni bon oin aia taeka. Tuangiia ataei bwa a na tibwaua aia taneiai ngke Tamaia are i Karawa e a tia ni buokiia n totokoa ke ni kararoaa te kaririaki. Tera ae ti kona ni karaoia ni katan iaon Tamara are i Karawa ngkana tia kataaki?
-
Korei iaon tabeua mwakoro ni beeba kataaki ake a kona ni kaitarai ataei n taai aikai. Kaoiia ataei n tatabemaniia bwa a na rinea te beeba ao n tibwa te bwai are e a tia n anganiira Tamara are i Karawa ni buokiira n totokoi ke ni kararoai kataaki aikai. Iaon iango riki tabeua, uaia ni wareka Aramwa 13:28–29.
N tain te bootaki n toa, I kona ni iangoia bwa I kangaa ni iriira te Tia Kamaiu.
Buokiia ataei ake ko reireiniia n noria bwa te toa bon te tai n “tirotiroa” nanoia ao ni kabooua aia berita n te bwabetito ni beku ibukin te Uea ao ni kawakin Ana tua (1 I-Korinto 11:28).
Waaki ni Kakukurei aika a Kona ni Karaoaki
-
Tuangiia ataei bwa ana wareka 1 I-Korinto 11:28. Tera ae nanonaki n “tirotiroa” nanora imwaiin anaakin te toa? Tuangiia ataei bwa a na iangoia aomata riki tabeman ake a tuoi bwaai, n aroia taokita, bureitiman ni karaba, ke taan rabakau (te katooto, taokita a tuoira ni kakoauaa bwa ti marurung raoi). Ngkana ti anaa te toa, tera ae ti karaoia n tuoi nanora bwa a uara ni maiuakinan ara berita ake ti karaoi n tain te bwabetito?
-
Tuangiia ataei bwa a na koroi ni karinani bwaai ake a kona ni iangoi ngkan a anaa te toa. Kaoiia bwa a na kabonganai baike a korei bwa kauringaia n tuoi nanoia n tain te toa.
1 I-Korinto 12:4, 7–12, 31; 13:1– 8
Iai irou bwai n tituaraoi n tamnei.
E reirei Bauro bwa bwai n tituaraoi n tamnei a “anganaki aomata nako” (1 I-Korinto 12:7). Te reirei ae e kona ni buokiia ataei ni katea namakinaia ae a bongana riki ngkai a kabonganai bwaai n tituaraoi ni kakabwaiaia tabeman.
Waaki ni Kakukurei aika a Kona ni Karaoaki
-
Tuangiia ataei bwa a na korei iaon te burakibooti bwai n tituaraoi n tamnei ake a kunei inanon 1 I-Korinto 12:7–11; 13:2. Kaoia bwa a na kakaei riki bwaintangira ake a taekinaki n Moronaai 10:8–18 ao Reirei ao Berita aika Tabu 46:13–26. Tibwaia ma ngaiia tabeua bwai n tituaraoi n tamnei ake e taekin Unimwaane Marvin J. Ashton: “Te bwai n tituaraoi ni bubuti; te bwai n tituaraoi n te kakauongo; … te bwai n tituaraoi n totokoa te kakauntaeka; … te bwai n tituaraoi n ukoran ae raoiroi; te bwai n tituaraoi n aki motikitaeka: te bwai n tituaraoi n taraakin te Atua ibukin kairara; … te bwai n tituaraoi ibukin tabeakinaia tabeman; … te bwai n tituaraoi n taekina te tataro; te bwai n tituaraoi ibukin kaotan te koaua ae korakora” (“There Are Many Gifts,” Ensign, Nobembwa 1987, 20). Kaoiia ataei bwa a na marooro iaon bwai n tituaraoi ake a nori irouia n tatabemaniia nako.
-
Imwaain te kiraati, titirakiniia aia karo ataei n am kiraati iaon bwaintangira ake a nori irouia natiia, ke bon iangoa bwaintangira ake irouia ataei. Tuangii ataei taekan bwaintangira aikai. Kaoiia ataei bwa a na korea teuana te kawai ae a na kona ni kabonganaa aia bwaintangira ni kakabwaiaa temanna n te wiiki aei.
-
Tibwai waaki aika a kakaokoro ngke aomata a kona ni kabonganai bwai n tituaraoi n 1 I-Korinto 12:7–10. Kaoia ataei bwa a na kinaa te bwai n tituaraoi are e kona ni kabonganaaki inanon waaki aika a kakaokoro akanne.
Kaungaa te Kamatebwai n te Mweenga
Tabekia nakoia ataei bwa a kona ni marooro n te bwai are ko taetae iaona n te kiraati ma aia utu. N aron aei, ko kona ni kaoiia ataei bwa a na tibwaa aia bwai n tituaraoi n tamnei ma aia utu ao n titirakiniia kaain aia utu bwa tera aia bwai n tituaraoi n tamnei.
Kanakoraoan Ara Anga reirei
Karababai kakao ake a karinei inaomata n rinerine. Ngkai ko kaoiia ataei bwa a na karaoa nanon te bwai are a atia n reiakina, iangoi kawai are ko na karinei iai inaomataia. Irarikin are ko anganiia te kakao ae onoti, iangoia bwa kona kaoiia bwa a na bon karaoi bwaai ake a bon taku n ira te bwai are a tia n reiakinna.