“Tebetembwa 4–10. 1 I-Korinto 14–16: ‘Ba Tiaki te Tia Karika te Kiriwe te Atua, ma te Tia Karika te Rau,’” Nakomai, Iriirai—Ibukiia Aomata n Tatabemanii ao Utu: Te Nu Tetemanti 2023 (2022)
“Tebetembwa 4–10. 1 I-Korinto 14–16,” Nakomai, Iriirai—Ibukiia Aomata n Tatabemaniia ao Utu: 2023
Tebetembwa 4–10
1 I-Korinto 14–16
“Tiaki te Tia Karika te Kiriwe te Atua, ma te Tia Karika te Raoi”
Korei am namakin ngkai ko wareka 1 I-Korinto 14–16. Tataroakinna tera ae e reiakiniko te Tamnei, ao butia te Tama are i Karawa ngkana iai ae E tangiria bwa kona reiakin riki.
Korei Am Namakin
Ibukin te Ekaretia ao ana reirei ngkai a bon taraa ni boou i Korinto, e ataaki raoi bwa Aika Itiaki aika kaain Korinto a rinanon te kiriwe. E reireiniia Bauro mai imwaaina aan koaua n te euangkerio: Ba e mate Kristo i bukin ara bure … ao ba e taunaki, ao ba e a manga uti n te kateni bong” (1 I-Korinto 15:3–4). Ma tabeman membwa n te tai ae waekoa ao a moanna n reirei bwa akea manga utia mate” (1 I-Korinto 15:12). A butiaki iroun Bauro bwa a na kaaki i nanoia” koaua ake a reiakinaki iai (1 I-Korinto 15:2). Ngkana ti kaitibo ma iango aika a kamangaongao ibukin koaua n te euangkerio, e tamaroa uringana “ba tiaki te tia karika te kiriwe te Atua, ma te tia karika te raoi” (1 I-Korinto 14:33). Te kakauongo nakoia ana toro te Uea ake a tia n rineaki ao ni taui ni kawakin koaua aika bebete ake a aki toki n anga reirei iaona a kona ni bukiira ni kunea te rau ao “n teimatoa n te onimaki” (1 I-Korinto 16:13).
Iango ibukin te Kamatebwai i bon Iroum ni Koroboki aika Tabu
I kona n ukoukora te bwaintituraoi ibukin te taeka ni burabeti.
Tera te bwaintituraoi ibukin te taeka ni burabeti? Aio bon te konaa ni katautaua kanoan taai aika a na roko? Aio bon tii ibukiia burabeti? Ke e kona temanna ni karekea te bwaintituaraoi aio?
Iangoi titiraki aikai ngkai ko kamatebwaia 1 I-Korinto 14:3, 31, 39–40. Ko kona naba ni wareka Te Kaotioti 19:10 ao “Taeka ni Burabeti, Taetae ni Burabeti” inanon Bwai ni Kairi nakon Koroboki aika Tabu (scriptures.ChurchofJesusChrist.org). Ni boboto iaon baike ko reiakin, ko na kanga ni kabwarabwara nanon te bwaintituraoi ibukin te taeka ni burabeti? Tera ae nanonna Bauro ngke e kaoia kaain Korinto bwa a na“bati n tangira te taetae ni burabeti”? (1 I-Korinto 14:39). Ko na kanga ni butimwaea te kakao aio?
Taraa naba Ioera 2:28–29; Aramwa 17:3; Reirei ao Berita aika Tabu 11:23–28.
E kanga te kabwarabwara ibukiia aine inanon kiibu aikai ni kaineti ni boong aikai?
Inanon ana bong Bauro, iai baika a kantaningaki aika kakaokoro ibukiia aine n iriiri waaki ni bobootaki, n raonaki ma bootaki n te ekaretia. Baikara reirei n 1 I-Korinto 14:34–35 ae nanonaki n ana tai Bauro, a riai ni maatata bwa e aki nanonaki bwa aine aki kona n taetae ao ni kaira te Ekaretia ni boong aikai (taraa Ana Rairairi Iotebwa Timiti, 1 I-Korinto 14:34 [n 1 I-Korinto 14:34, bwaai aika a na taraaki mai i nano b]). E taku Beretitenti Russell M. Nelson nakoia aine n te Ekaretia ni boong aikai: “Ti … kainnanoa korakorami, rairakimi, ami kakoaua, ami konabwai ni kairiiri, wanawanami, ao bwanaami. Abanuean te Atua e bon aki ao e aki kona ni bwanin ngkana akea aine aika a karaoi berita aika a tabu, ao imwiina a kawakini, aine aika a kona n taetae ma te mwaaka ao man ana kariaia te Atua!” (“A Plea to My Sisters,” Riaona, Nobembwa 2015, 96).
Iesu Kristo e karekea te tokanikai i aon te mate.
Mangautin Iesu Kristo e aanaki n te aro ni Kiritian, temanna ae kona n taekinna bwa ngkana akea ao a na bon akea te aro ni Kiritian—ni kabongana ana taeka Bauro, “ao a matebuaka ara reirei, ao e matebuaka naba ami onimaki” (1 I-Korinto 15:14). Ma tabeman Aika Itiaki aika kaain Korinto a reirei bwa a nang “akea manga utia mate” (1 I-Korinto 15:12). Ngkai ko wareka ana kaeka Bauro n 1 I-Korinto 15, karekea am tai n iangoia bwa e kanga maium ni kaokoro ngkana arona bwa ko aki kakoaua te Mangauti (taraa 2 Nibwaai 9:6–19; Aramwa 40:19–23; Reirei ao Berita aika Tabu 93:33–34). E kanga te kibuntaeka “Ngkana e tuai kautaki Kristo, e matebuaka ami onimaki” n ae nanonaki iroum? (te kibu 17).
E rang bongana naba ataakina bwa Bauro e kananona te bwabetito ibukiia maate bwa te kakoaua ibukin koauan te mangauti (taraa 1 I-Korinto 15:29). E kanga te mwakuri n te tembora ao rongorongon te utu ni kakorakora am onimaki n reirein te mangauti?
Taraa naba Reirei ao Berita aika Tabu 138:11–37.
Rabwata ake a tia ni manga kautaki iai kaokoroia ma rabwata aika mamate.
Ko a tia ni mimii bwa aekakira taraan te rabwata ae e a tia ni kautaki? Ni kaineti ma 1 I-Korinto 15:35, tabeman kaain Korinto a miimi n te aekaki ni bwai naba aei. Wareka ana kaeka Bauro inanon kiibu 36–54, ao korei taeka ao kibuntaeka are e kabwarabwara te kaokoro imarenan rabwata aika mamate ao rabwata aika a tia ni kautaki. Ngkai ko karaoia, ko na kona ni kabotaui kiibu 40–42 ma Reirei ao Berita aika Tabu 76:50–112. Tera ae karaoia te kaotioti aei nakon te Burabeti Iotebwa Timiti ni karakaa am atatai? (taraa naba Ana Rairairi Iotebwa Timiti, 1 I-Korinto 15:40 [n 1 I-Korinto 15:40, bwaai aika a na taraaki mai nanoe a]). Bukin tera koaua aikai a kakaawaki iroumi?
Taraa naba Ruka 24:39; Aramwa 11:43–45; Reirei ao Berita aika Tabu 88:14–33.
“Iai te tamaroa teuana ae tamaroan tai” (1 Corinthians 15:41).
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
1 I-Korinto 15:29.Ti reiakinaki man te kibu 29 bwa Kiritian n taai ake ngkoa a karaoi mwakuri ni bwabetio ibukiia maate, n aron ae ti karaoia ni boong aikai. Ti na kanga ni kabwarabwara nakoia tabeman bukin tera ti bwabetitoaki ibukiia ara bakatibu? (taraa “Tera Bwabetito ibukiia Maate?,” [witeo], ChurchofJesusChrist.org). Tera ae ti karaoia n aron te utu ni katauraoi otenanti n te tembora ibukiia ara bakatiku ake a tia ni mate ake a kainnanoi? Ko kona ni kakaei riki bwaai n reirei i aon atuun te rongorongo aei n te Gospel Topics “Bwabetito ibukiia Maate” (topics.ChurchofJesusChrist.org) ao n te FamilySearch.org.
-
1 I-Korinto 15:35–54.Tera bwaai ke tamnei aika ko kona ni kaoti ni buokiia am utu n atai tabeua taeka are e kabonganai Bauro ni kabwarabwara aron kaokoron rabwata aika maamate man rabwata ake a tia ni kautaki? N aron te katoto, ni kaota te kaokoro imarenan te mka ao te aki mka (tarai kiibu 52–54) ko kona ni kaota te kai biti are e a taraa n raaraa ao te kai biti ae tuai raaraa. Ke ko kona ni kabotaua te bwai ae akea korakorana ma te bwai ae rangi korakora (taraa te kibu 43).
-
1 I-Korinto 15:55–57.Te maroro ibukin kiibu aikai e kona n rangi n uaana ngkana am utu a kinaa te aomata are e a tia ni mate. A kona kaain am utu ni kaota aia koaua bwa e kanga Iesu Kristo n anaa kaweteni bukin te mate” (te kibu 56).
-
1 I-Korinto 16:13.Ni buokiia kaain am utu ni kairekerekeia ma te kibu aio, ko kona ni korea tamnein te mironron iaontano ao tuanga kaain te utu bwa e na “teimatoa n tei” inanona ma e na kaini matana teuanne ke neienne. Ngkanne a kona tabeman ni kataia ni kebutua ke ni katika teuanne ke neienne man te mironron. Tera te kaokoro ae riki ngkana te aomata are inanon te mironron e kaurei matana ni kona ni “mataku”? Tera ae ti kona ni karaoia bwa ti na“tei ni korakora” ngkana ti kaririaki ni karaoi rinerine aika a buakaka? (taraa naba “Stay in the Boat and Hold On!,” [video], ChurchofJesusChrist.org).
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae rineaki: “He Is Risen!,” Anene n Taromaurinambwa. 199.
Kanakoraoan Am Kamatebwai
Taratarai banna ni katooto. Inanon koroboki aika tabu ti kunea te banna are e kaotia bwa e kanga te Uea ni karaoa Ana mwakuri. Tera banna aika ko kunei n 1 I-Korinto 14 are a buokiira ni kamatataira bwa ti na kanga ni kateimatoaira i bon imarenara?
Bukin Tera Kai Ko Tang, © Simon Dewey 2021. Kabonganaki ma te kariaia mairoun Altus Fine Art/www.altusfineart.com