O̧kwōj 7–13

Rom 1–16

“Kajoor an Anij n̄an Ļo̧mo̧o̧r”

Ta im̧we ko kwoj būki ilo am̧ riiti Rom 1–6? Im̧we kein remaron̄ jipan̄ eok kālete jān ļōmņak ko n̄an katak ko ak am̧ make kōppopo.

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta eo rekar uwaake ilo jabdewōt kūr kwoj leļo̧k n̄an er ilo katak eo an wiik eo ļo̧k.

Katakin Katak eo: Ajri ro Reddikļo̧k

Rom 1:16–17

Imaron̄ kwaļo̧k aō tōmak ilo Jisōs Kraist n̄an ļoor E.

Paul ekar kwaļo̧k bwe gospel in ewōr ie kajoor n̄an bōk ļo̧mo̧o̧r n̄an aolep ro rej tōmak ilo Jisōs Kraist. Ekōjkan am̧ naaj jipan̄ ajri ro kwaļo̧k aer tōmak ilo Jisōs Kraist n̄an ļoor E?

M̧akūtkūt ko Maron̄ Kōm̧m̧ani

• Riiti Rom 1:17 n̄an ajri ro, im jipan̄ er kakkilōklōke “Wānōk enaaj mour kōn tōmak.” Komaron̄ leļo̧k n̄an ajri ro juon naaan ilo eoon eo im kajjitōk ippāer n̄an ba naan eo n̄e kwo jitōn̄ er. Kōmeļeļeiki bwe eoon in ej meļeļein bwe jej aikuj bōk tōmak ilo Jisōs Kraist. Kajjitōk ippān ajri ro n̄e rejeļā ta in tōmak. Kwaļo̧k juon pijain Jisōs Kraist im kōmeļeļeiki bwe jej tōmak E ej lukkuun m̧ool men̄e jejjan̄in lo E. Tōmak ej—tōmak ilo men eo men̄e jejjan̄in loe.

• Kōmeļeļeike bwe jej kwaļo̧k tōmak ilo Jisōs Kraist n̄an pokake E. Nooj pija ko ipeļaakin ruum̧ eo armej ro rej kōm̧m̧ani ta eo Jisōs ekar ba jen kōm̧m̧ane. Kōtļo̧k an ajri ro bōk koņaer kappukote im kōmeļeļeiki pija ko. Ta eo komaron̄ kōm̧m̧ane n̄an ļoor Jisōs?

• Kajjitōk ippān juon ajri n̄an kiil mejen, im tōl e ipeļakin ruum̧ ļo̧k n̄an pijain Jisōs. N̄e elōn̄ iien, kōtļo̧k bwe ajri ro jet ren limo. Jipan̄ ajri ro meļeļe bwe remaron̄ ļoor katak ko an Jisōs ilo aer ļoor tōl eo am̧.

Rom 6:1–11

Peptaij ej āinwōt erom̧ juon armej ekāāl.

Ajri ro kwoj katakin er rej m̧aanjabpopo n̄an peptaij. Ta eo remaron̄ jeļā kōn peptaij jān Rom 6?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an āliji naan in “Etal ilo mour kāāl” (Rom 6:4). Kwaļo̧k n̄an ajri ro ta meļeļein n̄an kwe. N̄an waanjon̄ak, komaron̄ kwaļo̧k ememļo̧kjeņ ko kōn raan eo kwaar peptaij im kōnono elmen an kar peptaij eo am̧ jipan̄ eok erom̧ eļapļo̧k āinwōt Jisōs Kraist. Kōjerbal peij in m̧akūtkūt eo an wiik in n̄an katakin ajri ro bwe peptaij ej jipan̄ kōj erom̧ armej eo ekāāl.

• Eļan̄n̄e elōn̄ jabdewōt ajri rekar pād ilo juon iien peptaij, kajjitōk ippāer n̄an kwaļo̧k en̄jake eo aer. Ak kwaļo̧k pijain juon eo ej tin peptaij (lale Gospel Art Book, nos. 35, 103–4). Jipan̄ ajri ro meļeļe bwe ilo peptaij jej kōm̧m̧ani kallim̧ur ko n̄an erom̧ āinwōt Jisōs. Kajjitōk ippāer n̄an jin̄aik pijaier make aer tin peptaij im kwaļo̧k ta eo remaron̄ kōm̧m̧an n̄an kōppopo n̄an ae peptaij.

• Al juon al kōn peptaij, āinwōt “When I Am Baptized” (Children’s Songbook,, 103). Ta ko jej katak kōn peptaij jān al in?

Peptaij ej kōkkaļļein juon mour ekāāl āinwōt juo rikaļooran Kraist.

Katakin Katak eo: Ajri ro Rerūttoļo̧k

Rom 1:16–17

Imaron̄ kwaļo̧k aō tōmak ilo Jisōs Kraist ilo aō ļoor E.

Paul ekar kwaļo̧k bwe gospel in ewōr ie kajoor n̄an bōktok ļo̧mo̧o̧r n̄an aolep ro rej tōmak ilo Jisōs Kraist. Tōmak ilo Jisōs Kraist ej pedped eo jinoin tata ilo gospel eo. Ej ļōn̄aj kōj n̄an pokake kien ko. Ewi wāween am̧ jipan̄ ajri meļeļeļo̧k kōn tōmak?

M̧akūtkūt ko Maron̄ Kōm̧m̧ani

• Kajjitōk ippān ajri eo n̄an kappukote Rom ilo m̧ab eo. Jipan̄ ajri ro meļeļe bwe wiik in tok, renaaj ekkatak jān leta ko Paul ekar je n̄an membōr in Kabun̄ eo ilo jikin ko, jino jān leta eo an n̄an Rom.

• Je naan in jān Rom 1:16 ioon bo̧o̧t eo, bōk jikin naan ko ilo ļain eo ejjeļo̧k kobban. Kajjitōk ippān ajri ro n̄an lale eoon ko im kanni ijoko ejjeļo̧k kobbaer. Kajjitōk ippān ajri ro n̄an kwaļo̧k ta eo “I jab jook kōn gospel eo an Kraist” meļeļein n̄an er.

• Kajjitōk ippān juon ajri n̄an riit aļaaj Rom 1:17, im kajjitōk ippān ajri ro jet n̄an ron̄jake naan ko āliji. Ta meļeļe in “mour kōn tōmak? Jipan̄ ajri ro lo meļeļein tōmak ilo menin ekkatak ko āinwōt Unin Tōl n̄an Jeje ko Rekwojarjar, “Faith” (scriptures.ChurchofJesusChrist.org). Elmen an mour ko ad kar oktak eļan̄n̄e jeban kar tōmak ilo Jisōs Kraist?

• Kwaļo̧k n̄an ajri ro juon menin eddōk ak ine, im kajjitōk elmen ad jipan̄ juon ine bwe en erom̧ juon menin eddōk. Kōmeļeļeiki bwe n̄e jej katōke im wūttidikdiki ine eo, jej kwaļo̧k bw ewōr ad tōmak ke enaaj eddōk. Elmen ad kwaļo̧k ke jej tōmak Jisōs Kraist? Ļōmņak in al juon al kōn tōmak, āinwōt “Faith” (Children’s Songbook, 96), āinwōt m̧ōttanļo̧k m̧akūtkūt in.

Rom 3:23–24

Jej aolep aikuji Jisōs Kraist bwe jān maron̄ bōk jeo̧rļo̧kin jerawiwi ko ad.

Paul ekar kōņaan bwe Rom en meļeļe bwe ļo̧mo̧o̧r ej itok wōt jān Jisōs Kraist im jouj eo An. Kōļmenļo̧kjeņ elmen am maron̄ kwaļo̧k m̧ool n̄an ajri ro kwoj katakin.

M̧akūtkūt ko Maron̄ Kōm̧m̧ani

• Leļo̧k n̄an kajjojo ajri juon eoon jān Rom 3:23–24, je ioon jidik peba. Kajjitōk ippān ajri ro n̄an likūt naan ko rejim̧we ilo jikier im riiti eoon ko ippān doon. Kajjitōk ippān ajri ro ta eo rej jeļā jān eoon kein. Kōmeļeļeik bwe “jouj” ilo eoon 24 meļeļein bwe menin letok eo an Rilo̧mo̧o̧r kōn iakwe im tiriam̧o, ej kōm̧m̧an bwe en pidodo n̄an kōj n̄an bōk jeo̧rļo̧k in bōd n̄an jerawiwi ko ad n̄an em̧m̧anļo̧k.

• Katotoiki juon pija ilo waaļ eo ak bar juon jikin me ajri ro reban tōpare kōn er make. Kōtļo̧k bwe ren kajjieon̄ in kōttōbare, im keidi menin n̄an ta eo Paul ekar kwaļo̧ke ilo Rom 3:23. Innān jipan̄ er tōpare pija ko. Ta eo Rilo̧mo̧o̧r ekar kōm̧m̧ane n̄an kōj bwe jān jab kōm̧m̧ane n̄an kōj make? Kajjitōk ippān ajri ro n̄an kwaļo̧k elmen aer en̄jake kōn Rilo̧mo̧o̧r n̄e rej ļōmņak kōn ta eo E ekar kōm̧m̧ane im maron̄ jipan̄ er.

Rom 6:1–11

Peptaij ej āinwōt erom̧ juon armej ekāāl.

Paul ekar kwaļo̧k bwe peptaij ej kōkkaļļein mej im Jerkakpeje eo an Kraist. Ej ba kōkkaļļein jerkak n̄an “etal ilo mour ekāāl” (Rom 6:4). Jej kōkāāl ad bujen n̄an etetal ilo mour ekāāl aolep iien n̄e jej bōk kwojkwoj eo.

M̧akūtkūt ko Maron̄ Kōm̧m̧ani

• Kajjitōk bwe juon ajri en riit Rom 6:3–6. Ta eo Paul ekar ba peptaij ej “jekjek in”?

• Kōnono elmen an peptaij kōkkaļļein mej im jerkakpeje. Emaron̄ jipan̄ kwaļo̧k pija in juon peptaij ak juon bitio āinwōt “The Baptism of Jesus” (ChurchofJesusChrist.org). Etke mej im jerkakpeje rej kōkkaļļe ko rem̧m̧an kōn ta eo ej waļo̧k n̄e jej peptaij?

• Riiti jar ko an kwojkwoj eo ilo Katak im Bujen Ko 20:77, 79 Kakeememej ajri ro bwe n̄e jej bōk kwojkwoj eo, jej kōkāāl kallim̧ur eo ad n̄an ļoor Jisōs Kraist me jekar kōm̧m̧ane ke jekar peptaij. Elmen an kwojkwoj eo jipan̄ kōj n̄an “etal ilo mour ekāāl”?

• Kajjitōk ippān ajri ro n̄an jin̄aiki pija ko me rej kwaļo̧k ta meļeļein n̄an er n̄an “etal ilo mour ekāāl”? Ajri ro remaron̄ katotoiki pija kein ilo ruum̧ ko aer n̄an jipan̄ er kakeememej n̄an kōm̧m̧ani kāālet ko rem̧m̧an.

Kōketak Ekkatak ilo M̧weo

Ba bwe ajri ro ren kajjitōk ippān ro uwaan baam̧le eo bwe ren jeļā n̄e rej kōm̧m̧ani men ko me rej kwaļo̧k tōmak.

Kōkōm̧anm̧anļo̧k Ad Katakin

Kalōk lōke eo an ajri ro. Nōbar ajri ro n̄e rej bōk koņaer ilo kūlaaj. En̄in ej juon wāween n̄an kalōk leke eo aer bwe ren maron̄ ekkatak gospel eo.