« 7–13 nō ’Ātete. Roma 1–6 : ‘Te mana o te Atua ’ia ora te feiā ato’a’ », Mai, pe’e mai—nō te Paraimere : Faufa’a ’Āpī 2023 (2022)
« 7–13 nō ’Ātete. Roma 1–6 », Mai, pe’e mai—nō te Paraimere : 2023
7–13 nō ’Ātete
Roma 1–6
« Te mana o te Atua ’ia ora te feiā ato’a »
E aha te mau muhumuhuraʼa tā ’oe e fāriʼi ’a taiʼo ai ’oe i te Roma 1–6 ? E tauturu teie mau muhumuhuraʼa ia ’oe ʼia māʼiti i te mau manaʼo haʼapiʼiraʼa i muri nei ’aore rā ’ia fa’aineine i tā ’oe iho.
Tītau i te mana’o
E ani i te mau tamariʼi ’ia faʼaʼite mai e aha tā rātou i rave ʼei pāhonoraʼa i te mau aniraʼa tā ’oe i hōroʼa atu ia rātou i roto i te haʼapiʼiraʼa nō te hepetoma i ma’iri aʼenei.
Ha’api’i i te ha’api’ira’a tumu : Te mau tamari’i ’āpī
E fa’a’ite au i tōʼu faʼaroʼo ia Iesu Mesia nā roto i te peʼeraʼa atu iāna.
ʼUa haʼapiʼi Paulo ē, e mana tō te ʼevanelia ’ia fa’atupu i te faʼaoraraʼa o te mau taʼata atoʼa ’o tē ora ma te faʼaroʼo ia Iesu Mesia. Nāhea ’oe e tauturu ai i te mau tamariʼi ’ia faʼaʼite i tō rātou faʼaroʼo ia Iesu Mesia nā roto i te peʼera’a iāna ?
Te mau ’ātivite e au
-
E taiʼo i te Roma 1:17 i te mau tamariʼi, ʼe e tauturu ia rātou ’ia tāmau ʼāʼau i te pereota « te feiā parau-tiʼa i te faʼaroʼo ra, e ora ïa. » E faʼataʼa ’oe nā te tamariʼi tātaʼitahi i te hōʼē tāʼo i roto i te pereota ʼe e ani ia rātou ’ia parau i taua tāʼo ra ’ia toro anaʼe ’oe i te rima i niʼa ia rātou. E fa’ata’a ē, te auraʼa o teie pereota ’oia ho’i, e tiʼa ia tātou ’ia faʼaroʼo ia Iesu Mesia. E ani i te mau tamari’i ē, ’ua ’ite ānei rātou e aha te fa’aro’o. E faʼaʼite i te hōʼē hōhoʼa nō Iesu Mesia ʼe e fa’ata’a atu ē, tē tiʼaturi nei tātou e mea mau ʼoia noa atu ē, ʼaita tātou i ʼite mata iāna. Teie te faʼaroʼo—te tiʼaturiraʼa i te tahi mea noa atu ē ʼaita tātou i ʼite mata atu i te reira.
-
E fa’ata’a atu ē, e faʼaʼite tātou i tō tātou faʼaroʼo ia Iesu Mesia nā roto i te ha’apa’ora’a i tāna parau. E huna nā roto i te piha te mau hōhoʼa o te feia e rave ra i te mau mea tā Iesu i ani ia tātou ʼia rave. E vaiiho i te mau tamariʼi, te tahi i muri i te tahi, ’ia ʼimi ʼe ’ia faʼata’a mai i te mau hōhoʼa. E aha tē nehenehe ia tātou ’ia rave nō te pe’e ia Iesu ?
-
E ani i te hō’ē o te mau tamari’i ’ia tāpō i tōna mata, ’e e arataʼi iāna nā roto i te piha ē tae atu i mua i te hōʼē hōhoʼa nō Iesu. Mai te mea e taimehia, ’a vaiiho i te tahi atu mau tamari’i ’ia nā reira ato’a. E tauturu i te mau tamariʼi ’ia hāro’aro’a ē, e pe’e rātou i te mau haʼapiʼiraʼa a Iesu mai ia rātou i peʼe i tā ’oe arataʼiraʼa.
’Ia bāpetizo-ana’e-hia, e au ïa mai te rirora’a ’ei ta’ata ’āpī.
Tē faʼaineine nei tā ’oe mau pīahi ’ia bāpetizohia. E aha tā rātou e nehenehe e ha’api’i mai nō ni’a i te bāpetizora’a i roto i te Roma 6 ?
Te mau ’ātivite e au
-
E ani i te mau tamariʼi ’ia tāpiti i te parau i te pereota « Te haere’a e au i te ora ʼāpī » (Roma 6:4). ’A parau i te mau tamari’i e aha te aura’a o te reira nō ’oe. ’Ei hi’ora’a, e mātutu ’oe i te mau ha’amana’ora’a nō ni’a i te mahana ’a bāpetizohia ai ’oe ’e e mea nāhea tō ’oe bāpetizora’a i te tauturura’a ia ‘outou ’ia riro ’ei mea maita’i roa mai ia Iesu Mesia ra te huru. E faʼaʼohipa i te ʼapi ’ātivite nō teie hepetoma nō te haʼapiʼi i te mau tamariʼi ē, e tauturu te bāpetizoraʼa ia tātou ʼia riro ʼei taʼata ʼāpī.
-
Mai te mea ē, ’ua haere a’ena te tahi mau tamari’i i te hō’ē bāpetizora’a, ’a ani ia rātou ’ia fa’a’ite mai i te ’ohipa i tupu nō rātou. ’Aore rā ’a fa’a’ite i te hō’ē hoho’a nō te hō’ē ta’ata e bāpetizohia ra (hi’o Buka hōho’a nō te ’evanelia, N°35, 103–4). E tauturu i te mau tamari’i ’ia hāro’aro’a ē, i te bāpetizora’a e rave tātou i te mau fafaura’a ’ia riro mai ia Iesu ra te huru. E ani ia rātou ’ia pāpa’i hoho’a nō rātou iho te bāpetizohia ra, ’e e fa’a’ite e aha tā rātou e rave nō te fa’aineine nō tō rātou bāpetizora’a.
-
E hīmene ʼe te mau tamariʼi i te hōʼē hīmene nō niʼa i te bāpetizoraʼa, mai te hīmene « Le jour de mon baptême » » (Chants pour les enfants, 53). E aha tā tātou e ha’api’i mai nei nō ni’a i te bāpetizoraʼa nā roto mai i teie hīmene ?
E taipe te bāpetizora’a nō te ha’amatara’a i te hō’ē orara’a ’āpī ʼei pipi nā te Mesia.
Ha’api’i i te ha’api’ira’a tumu : Te mau tamari’i pa’ari a’e
E nehenehe au e faʼaʼite i tōʼu faʼaroʼo ia Iesu Mesia nā roto i te peʼeraʼa iāna.
ʼUa haʼapiʼi Paulo ē, e mana tō te ʼevanelia ’ia ’āfa’i mai i te faʼaoraraʼa i te mau taʼata atoʼa ’o tē ora nā roto i te faʼaroʼo ia Iesu Mesia. Te fa’aro’o ia Iesu Mesia, ’o te parau tumu mātāmua ïa o te ’evanelia. E tura’i te reira ia tātou ’ia haʼapaʼo i te mau faʼaueraʼa. Nāhea ’oe e tauturu ai i te mau tamari’i ’ia hāro’aro’a maitaʼi aʼe i te faʼaroʼo ?
Te mau ’ātivite e au
-
E ani i te mau tamariʼi ’ia ʼimi ia Roma i niʼa i te hōʼē hōhoʼa fenua. E tauturu i te mau tamariʼi ’ia ’ite ē i te mau hepetoma i muri nei, e haʼapiʼi mai rātou i ni’a i te mau rata tā Paulo i pāpa’i i te mau melo o te ʼĒkālesia i terā ’e terā vāhi, ma te haʼamata i tāna rata i tō Roma.
-
E pāpaʼi i te parau nō roto mai i te Roma 1:16 i niʼa i te tāpura ma te mono i te tahi mau tāʼo i te mau ārea pāpaʼi-ʼore-hia. E ani i te mau tamariʼi ’ia ʼimi i roto i te pāpa’iraʼa mo’a ʼe ’ia faʼaʼī i te mau ārea pāpa’i-’ore-hia. E ani i te mau tamari’i ’ia fa’a’ite mai i te aura’a nō rātou « ’Aore ho’i au i ha’amā i te ’evanelia o te Mesia ra ».
-
E ani i te hōʼē tamariʼi ’ia taiʼo pūai mai i te Roma 1:17, ’e e ani i te tahi atu mau tamariʼi ’ia faʼaroʼo i te hōʼē tāʼo e tāpitihia te fa’ahitira’a. E aha te aura’a « ’ia ora te feiā ato’a i faʼaroʼo ra » ? E tauturu i te mau tamariʼi ʼia ʼimi i te hōʼē tātarara’a nō te faʼaroʼo i roto i te hōʼē mātēria tauturu mai te Arata’i nō te mau pāpa’ira’a mo’a, « Faʼaroʼo » (scriptures.ChurchofJesusChrist.org). Nāhea tō tātou orara’a e ta’a ’ē ai mai te mea ’aita tō tātou e faʼaroʼo ia Iesu Mesia ?
-
E faʼaʼite i te mau tamariʼi i te hōʼē rā’au iti ʼe te hōʼē huero, ʼe e ani e nāhea tātou i te tauturu i te hōʼē huero ’ia riro mai ʼei tumu iti. E fa’ata’a ē, ’ia tanu ʼe ’ia pīpī anaʼe tātou i te hōʼē huero, tē faʼaʼite ra ïa tātou ē, ʼe faʼaroʼo tō tātou ē, e tupu te reira. Nāhea tātou i te faʼaʼite ē, e faʼaroʼo tō tātou ia Iesu Mesia ? E feruri i te hīmene nō niʼa i te faʼaroʼo mai te « La foi » (Chants pour les enfants, 50–51), ʼei tufaʼa nō teie ʼātivite.
E hinaʼaro tātou pāʼātoʼa ia Iesu Mesia nō te faʼaʼore i tā tātou ra mau hara.
ʼUa hinaʼaro ’o Paulo ’ia hāro’aro’a tō Roma ē, e tae mai te faʼaoraraʼa nā roto mai ia Iesu Mesia anaʼe ʼe i tōna aroha. E feruri e nāhea ’oe e haʼapiʼi ai i teie parau mau i te mau tamariʼi.
Te mau ’ātivite e au
-
E hōro’a i te tamari’i tāta’itahi i te hō’ē pereota nō roto mai i te Roma 3:23–24, tei pāpa’ihia i ni’a i te hō’ē ’api parau. E ani i te mau tamari’i ’ia fa’anaho i te mau ’api parau mai te au i te fa’anahora’a ti’a ’e ’ia tai’o ’āmui i te mau ’īrava. ’A ani i te mau tamari’i e aha tā rātou i ha’api’i mai nā roto mai i teie mau ’īrava. E fa’ata’a ē, te « aroha » i roto i te ʼīrava 24 ’o te hōroʼa ïa nō te here ʼe te aroha o te Faʼaora, maoti te reira e ti’a ai ia tātou ’ia fāriʼi i te faʼa’oreraʼa o tā tātou mau hara ’e ’ia riro mai ’ei mea maita’i a’e.
-
E faʼatautau i te hōʼē hōhoʼa i niʼa roa i te hōʼē papa’i ʼaore rā i te tahi atu vāhi e ʼore e rae’ahia e te tamari’i. E vaiiho ia rātou ’ia tāmata i te haru i te reira, ʼe e faʼaau i te reira i te mea tā Paulo i haʼapiʼi i roto i te Roma 3:23. I muri iho e tauturu atu ia rātou ’ia rave mai i te hoho’a. E aha tā te Faʼaora i rave nō tātou tē ʼore e mara’a ia tātou ’ia rave nō tātou iho ? E ani i te mau tamariʼi ’ia faʼaʼite mai i tō rātou manaʼo nō niʼa i te Faʼaora ’ia manaʼo anaʼe rātou i te mea tāna i rave ’e tāna e nehenehe e rave nō te tauturu ia rātou.
’Ia bāpetizo-ana’e-hia, e au ïa mai te rirora’a ’ei ta’ata ’āpī.
ʼUa haʼapiʼi Paulo ē, e taipe te bāpetizoraʼa nō te poheraʼa ʼe te tiʼafaʼahouraʼa o te Mesia. E taipe ato’a te reira nō te fa’ati’ara’ahia ’ia « haere i roto i te ora ’āpī » (Roma 6:4). Tē faʼa’āpī nei tātou i tā tātou fafauraʼa ’ia haere i roto i te ora ʼāpī i te mau taime atoʼa e ʼāmu ai tātou i te ʼōroʼa.
Te mau ’ātivite e au
-
E ani i te hōʼē tamariʼi ’ia tai’o i te Roma 6:3–6. E aha tā Paulo i parau nō te bāpetizoraʼa e au « i te huru o » ?
-
E tāuʼaparau e nāhea te bāpetizoraʼa e riro ai ʼei taipe nō te poheraʼa ʼe te tiʼafaʼahouraʼa. E mea maita’i te fa’a’itera’a i te hō’ē hoho’a nō te bāpetizora’a ’aore rā te fa’a’itera’a i te hō’ē video mai « The Baptism of Jesus [Te bāpetizora’a’a o Iesu] » (ChurchofJesusChrist.org). Nō te aha te poheraʼa ʼe te tiʼafaʼahouraʼa e riro ai ʼei taipe maitaʼi nō te mau mea e tupu mai ’ia bāpetizo-ana’e-hia tātou ?
-
’A tai’o ’āmui i te mau pure o te ’ōro’a (hi’o i Te Ha’api’ira’a Tumu ’e Te Mau Parau Fafau 20:77, 79). ’A fa’aha’amana’o i te mau tamari’i ē, ’ia rave ana’e tātou i te ’ōro’a mo’a, tē fa’a’āpī ra ïa tātou i te fafaura’a ’ia pe’e ia Iesu Mesia tā tātou i rave ’a bāpetizohia ai tātou. Nāhea te ʼōroʼa e tauturu ai ia tātou ’ia « haere i roto i te ora ʼāpī » ?
-
E ani i te mau tamariʼi ’ia pāpa’i hoho’a i te aura’a nō rātou « ’ia haere i roto i te ora ʼāpī. » E nehenehe te mau tamariʼi e faʼatautau i teie mau hoho’a i roto i tō rātou mau piha nō te tauturu ia rātou ’ia haʼamanaʼo i te rave i te mau māʼitiraʼa maitaʼi.
Fa’aitoito i te ha’api’ira’a i te fare
E faʼaitoito i te mau tamariʼi ’ia ani i te mau melo o te ʼutuāfare ’ia faʼaʼite mai ia rātou ’ia rave anaʼe rātou i te tahi ’ohipa ’o tē faʼaʼite i te faʼaroʼo.
Ha’amaita’i i tā tātou ha’api’ira’a
E haʼamau i te tiʼaturiraʼa o te mau tamariʼi. E ha’apopou i te mau tamari’i ’ia ’āmui ana’e mai rātou i roto i te piha ha’apira’a. Teie te hō’ē rāve’a nō te patu i tō rātou ti’aturira’a ē, e nehenehe rātou e ha’api’i mai i te ’evanelia.