“6–12 noviembre. Hebreos 7–13: “Lix yuwa’il aj tij re li sahilal chalel,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“6–12 noviembre. Hebreos 7–13,” Kim, Taaqehin—Choq’ re li Tzoleb’aal reheb’ li Kok’al: 2023
Laj Melkisedek narosob’tesi laj Abram, xb’aan laj Walter Rane. Xmaatan aj yiib’ahom re
6–12 noviembre
Hebreos 7–13
“Lix yuwa’il aj tij re li sahilal chalel”
Naq yooqat chixtzolb’al li tusleb’ aatin a’in ut chi k’oxlak chirix, k’eheb’ reetal li na’leb’ te’chalq sa’ laa k’a’uxl choq’ reheb’ li kok’al nakatzoleb’. Li Musiq’ej tatxtenq’a chixtawb’aleb’ li esil choq’ reheb’ a’an sa’ Hebreos 7–13.
Xkanab’ankileb’ chi wotzok
Patz’ reheb’ li kok’al naq te’xwotz li neke’xb’aanu rik’ineb’ lix junkab’al re xtzolb’al li evangelio sa’ kab’l. Patz’ reheb’ naq te’xwotzeb’ lix numsihom jwal nawulak chiruheb’ naq neke’xtzol li evangelio rik’ineb’ lix junkab’al.
Xk’utb’al li tzol’leb’: Kok’al toj ka’ch’ineb’ xyu’am
Li tijonelil naru nokoxtenq’a chi naab’al paay ru.
Hebreos 7:1–6 naru naxk’e laa hoonal re xk’utb’al chiruheb’ li kok’al li rosob’tesihom li tijonelil.
Kok’ k’anjel naru chi b’aanumank
-
Ch’olob’ sa’ junpaat ani chaq laj Abraham, ut chirix a’an oksi Hebreos 7:1–6 re xk’utb’al naq laj Abraham kixtoj lix lajetqil re laj Melkisedek (chi’ilmanq ajwi’ JJS, Genesis 14:36–40). Ch’olob’ naq laj Melkisedek kixk’ul chaq li tijonelil, a’an lix wankilal li Dios, ut naq laj Melkisedek kiroksi re rosob’tesinkil laj Abraham. Maare taawulaq raj chiruheb’ li kok’al xk’utb’esinkil li seraq’ rik’ineb’ kok’ k’a’aq re ru, jo’ jun li koroon ut jun li k’uuleb’aal lajetqil.
-
B’oq jun aj k’amol re li Tijonelil re Aaron ut jun aj k’amol re li Tijonelil re Melkisedek chi wulak sa’ li tzoleb’aal re te’xye reheb’ li kok’al chan ru neke’roksi li tijonelil re rosob’tesinkileb’ li ras riitz’in. Chirix a’an k’ut chiruheb’ li kok’al xjalam-uuch jalan jalanq k’ojob’anb’il k’anjel re li tijonelil (naru nakataweb’ eetalil sa’eb’ li jalam-uuch 103–108 re li Hu reheb’ li Jalam-uuch re li Evangelio. Tenq’aheb’ li kok’al chixk’eeb’al reetal b’ar wan li tijonelil na’ajman ru re xb’aanunkil li junjunq chi k’ojob’anb’il k’anjel, ut chixk’eeb’al li jalam-uuch re laj k’amol re li tijonelil a’an re naq tixchap.
Li paab’aal a’an xpaab’ankil li ink’a’ nokoru chirilb’al.
Us ta ink’a’ nokoru chirilb’al li qaChoxahil Yuwa’ chi moko li Jesukristo, naru naqanimob’resi li qapaab’aal chirixeb’ a’an ut eb’ lix yeechi’ihom, rik’in xtaaqenkil xb’aanuhomeb’ li kristiaan tiikeb’ chi paab’ank sa’ Hebreos 11.
Kok’ k’anjel naru chi b’aanumank
-
K’e chi kutankil jun xjalam-uuch li Jesus. K’eheb’ sa’ li tzoleb’aal k’iila k’a’aq re ru li te’reetali naq li Jesus tz’aqal wan, us ta ink’a’ nokoru chirilb’al (maare jun loq’laj hu, jun xjalam-uuch li xb’een k’utb’esinb’il matk’, ut jun xjalam-uuch li ruchich’och’). Patz’ reheb’ li kok’al naq te’xtaw li k’a’aq re ru a’an, ut chirix a’an ch’olob’ chan ru naq eb’ li k’a’aq re ru a’an nokohe’xtenq’a chixpaab’ankil naq li Jesus yo’yo.
-
K’am jun waal, ut k’e xhoonaleb’ li kok’al chireek’ankil chan ru nawulak li iq’ sa’ xnaq’eb’ ru. K’ut chiruheb’ naq ink’a’ nokoru chirilb’al li iq’, a’b’an nokoru chireek’ankil. Chi jo’kan ajwi’, ink’a’ nokoru chirilb’al li qaChoxahil Yuwa’ chi moko li Jesukristo, a’b’an naru naqeek’a lix rahomeb’ ut naru nawan qapaab’aal chirix naq tz’aqal wankeb’.
-
Wotzeb’ xkomoneb’ li seraq’ chirix jun malaj naab’aleb’ chik kristiaan neke’yeeman resil sa’ Hebreos 11:4–32. Naru ajwi’ taataweb’ li seraq’ chirixeb’ li kristiaan a’an sa’ Eb’ li Esilal sa’ li Najter Chaq’rab’. K’a’ru ke’xb’aanu li kristiaan a’an re xk’utb’al naq wankeb’ xpaab’aal chirix li k’a’ru ink’a’ ke’ru chirilb’al? Ye junjunqeb’ li osob’tesihom aak’ulum laa’at sa’ xk’ab’a’ laa paab’aal.
Li qaChoxahil Yuwa’ ut li Jesukristo toohe’xtenq’a ut maajun wa toohe’xtz’eqtaana.
K’a’ru li yale’k-ix maare’ yookeb’ chixnumsinkil li kok’al? Chan ru naru neke’tenq’aak xb’aan li esil sa’ Hebreos 13:5–6?
Kok’ k’anjel naru chi b’aanumank
-
Numsiheb’ junjunq li seraq’ re li Ak’ Chaq’rab’ li ak xtzolomeb’ li kok’al chiru li chihab’ a’in b’ar wi’ li Kolonel kixtenq’aheb’ li ras riitz’in, maare naq kixk’irtesi jun li winq sik (chi’ilmanq Lukas 5:18–26) malaj naq kixk’eheb’ chi wa’ak oob’ mil chi kristiaan (chi’ilmanq Mateo 14:15–21). Tenq’aheb’ li kok’al chixtzolb’al li ch’ol aatin “Li Qaawa’ a’an aj tenq’ahom we” (Hebreos 13:6).
-
Patz’ reheb’ li kok’al naq te’xyiib’ xjalam-uuch jun li hoonal b’ar wi’ jun kristiaan xk’ojob’ xch’ooleb’ naq wankeb’ xxiw. Yaab’asi Hebreos 13:5–6 reheb’, ut ch’olob’ xyaalal naq li qaChoxahil Yuwa’ tooxtenq’a ut maajun wa tooxtz’eqtaana. Tenq’aheb’ li kok’al chixsetb’aleb’ aamej chiru hu chi ninq re tixram ru lix jalam-uucheb’. B’ar wan junjunq reheb’ li k’a’aq re ru li nokoxtenq’a chireek’ankil naq nach’ wanko rik’in li qaChoxahil Yuwa’? Tz’iib’a junjunq reheb’ li k’a’aq re ru a’an chiruheb’ li aamej setb’ileb’.
-
K’ut chiruheb’ li kok’al jun li b’ich chirix lix rahom ut lix tenq’ahom li qaChoxahil Yuwa’ ut li Jesus choq’ qe, maare “At inYuwa’, taak’ut taxaq chiwu” (B’ichleb’aal choq’ reheb’ li Kok’al, 75). Chan ru naru naqanaw naq li qaChoxahil Yuwa’ ut li Jesukristo nach’ wankeb’? Aatinan chirix hoonal naq xaweek’a naq “li Qaawa’ a’an aj tenq’ahom aawe.”
Xk’utb’al li tzol’leb’: Kok’al ak ninqeb’
Eb’ laj jolominel re li Iglees neke’xtaaqe li Kolonel.
Chan ru taawoksiheb’ li raqal a’an re xtenq’ankileb’ li kok’al chixtawb’al ru naq eb’ li b’oqb’ileb’ chi k’anjelak sa’ lix Iglees li Qaawa’ tento tiikaqeb’ chi paab’ank ut tento te’k’anjelaq chiruheb’ li ras riitz’in jo’ li Kolonel?
Kok’ k’anjel naru chi b’aanumank
-
Tenq’aheb’ li kok’al chixyeeb’al k’a’ru neke’xnaw chirixeb’ li wiib’ chi xninqaleb’ ru aj jolominel, laj Abraham ut laj Melkisedek. Naru neke’xtaw xtenq’ankil sa’ Hebreos 7:1–4; Abraham 1:1–2; ut JJS, Genesis 14:25–40. K’a’ru li seeb’al chanchaneb’ re li Kristo ke’wan reheb’ li winq a’an li kitenq’ank reheb’ chiroxloq’inkil li tijonelil?
-
Patz’ reheb’ li kok’al naq te’ril Hebreos 7:1–2 ut te’xsik’eb’ li aatin neke’oksiman re xk’ab’a’inkil laj Melkisedek. Chan ru naq eb’ li k’ab’a’ej a’an neke’xjultika qe li Jesukristo? Tenq’aheb’ chixk’oxlankil chan ru naq li Jesus kiwan jo’ “xreyil li tuqtuukilal.” Patz’ reheb’ naq te’aatinaq chirixeb’ chik aj k’amol re li tijonelil neke’wan jo’ eetalil sa’ xtaaqenkil li Kolonel.
-
Wotz jun aanumsihom b’ar wi’ xkawob’resiik laa paab’aal chirix li Kolonel sa’ xk’ab’a’ lix k’anjel jun aj k’amol re li tijonelil tiik xch’ool. Tenq’aheb’ li kok’al chixk’oxlankil chan ru naq osob’tesinb’ileb’ xb’aan li tijonelil.
Li qaChoxahil Yuwa’ naxq’ajkamuheb’ li wankeb’ xpaab’aal.
Sa’ Hebreos 11 wan resil naab’aleb’ li kristiaan li ke’osob’tesiik naq ke’k’anjelak rik’in paab’aal. B’ar wankeb’ li seraq’ li mas te’xwaklesi xch’ooleb’ li kok’al nakatzoleb’?
Kok’ k’anjel naru chi b’aanumank
-
Patz’ reheb’ li kok’al naq te’xtz’iib’a li neke’xtzol chirix li paab’aal sa’ Hebreos 11:1–3, 6 chiru li pizarron. K’e reheb’ li junjunq chi kok’al jun k’ab’a’ej nayeeman sa’ Hebreos 11, ut patz’ reheb’ naq te’rileb’ li raqal neke’aatinak chirix li kristiaan a’an. Patz’ reheb’ naq te’xwotz li na’leb’ chirix li kristiaan a’an, re naq lix komoneb’ li kok’al te’xq’ehi ani a’an. Chan ru naq eb’ li kristiaan a’an ke’xk’ut xpaab’aal, ut chan ru ke’q’ajkamuuk xb’aan li qaChoxahil Yuwa’? (Re xtawb’aleb’ xjalam-uucheb’ li kristiaan a’an, chi’ilmanq perel re li Najter Chaq’rab’ sa’ Hu reheb’ li Jalam-uuch re li Evangelio.)
-
Chirix naq neke’rileb’ li raqal chirixeb’ li tiikil kristiaan sa’ Hebreos 11, patz’ reheb’ li kok’al naq te’xtz’iib’a resil jun li kristiaan neke’xnaw ru li xk’ut xpaab’aal. Patz’ re wiib’ oxib’ li kok’al naq te’xwotz sa’ li tzoleb’aal ani xe’xsik’ ru.
Li Qaawa’ naxtijeb’ li ani naxraheb’.
Eb’ li raqal a’an naru naxtenq’aheb’ li kok’al chixtawb’al ru naq neke’tije’ xb’aan li qaChoxahil Yuwa’, eb’ lix na’ xyuwa’, ut xkomoneb’ chik li kristiaan xb’aan naq neke’xraheb’ ut xb’aan naq neke’raj naq te’tzoloq rik’in li ink’a’ us neke’xb’aanu.
Kok’ k’anjel naru chi b’aanumank
-
Ilomaq Hebreos 12:5–11, ut patz’ reheb’ li kok’al naq te’xtaw k’a’ut naq li qaChoxahil Yuwa’ nokoxtij (nokoxq’us malaj nokoxch’iila). Jo’ k’utb’il aran, k’a’ru aj-e naq eb’ li na’b’ej yuwa’b’ej sa’ ruchich’och’ neke’xq’useb’ ajwi’ li ralal xk’ajoleb’? Chan ru naq tento toosumenq rik’in jun q’usuk nab’aanuman rik’in rahok?
-
Wotz resileb’ kristiaan sa’ li loq’laj hu li ke’tije’ xb’aan li Qaawa’ ut ke’xjal xk’a’uxleb’ (chi’ilmanq 1 Nefi 16:25–27; Eter 2:13–15). Chan ru naq chaab’ileb’ eetalil a’an reheb’ li na’leb’ wankeb’ sa’ Hebreos 12:5–11?
-
Chirix rilb’al Hebreos 12:5–11, patz’ reheb’ li kok’al naq te’xtz’iib’a k’a’aq re ru te’xyal xjultikankil naq te’q’use’q xb’aan k’a’ru ink’a’ us xe’xb’aanu.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xtz’iib’a malaj te’xyiib’ xjalam-uuch li xe’xtzol sa’ li tzolok. Waklesiheb’ xch’ool chiroksinkil re xwotzb’al li xe’xtzol rik’ineb’ lix junkab’al.
Xkawresinkil qib’ jo’ aj k’utunel
Oksiheb’ li perel re kok’ k’anjel. Naq eb’ li kok’al yooqeb’ chixk’anjelankileb’ li perel re kok’ k’anjel sa’ li tzoleb’aal, oksi li hoonal re xnumsinkileb’ wi’chik li na’leb’ re li tzolok a’an.