“20–26 noviembre. 1 ut 2 Pedro: “K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“20–26 noviembre. 1 ut 2 Pedro,” Kim, Taaqehin—Choq’ re li Tzoleb’aal reheb’ li Kok’al: 2023
Li Kristo najultikan aatin sa’ li ruchich’och’ reheb’ li musiq’ej, xb’aan laj Robert T. Barrett
20–26 noviembre
1 ut 2 Pedro
“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”
Tikib’ xtzolb’al 1 ut 2 Pedro rik’in jun li tij. Chijultiko’q aawe naq lix chaab’ilal xkawresinkil aawib’ re k’utuk taachalq xb’aaneb’ laa numsihom sa’ li tzolok aajunes ut sa’ junkab’al.
Xkanab’ankileb’ chi wotzok
K’e chi kutankil xjalam-uuch laj Pedro re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xye aawe k’a’ru neke’xnaw chirix laj Pedro. Jultika reheb’ naq laj Pedro kiwan jo’ aj jolominel re li Iglees chirix naq li Jesus kiwakli chi yo’yo, ut ch’olob’ naq 1 Pedro ut 2 Pedro, a’aneb’ hu kixtz’iib’a choq’ reheb’ li komon re li Iglees sa’ lix kutankil a’an.
Xk’utb’al li tzol’leb’: Kok’al toj ka’ch’ineb’ xyu’am
Naru nawan xsahil inch’ool sa’eb’ ajwi’ li hoonal ch’a’aj.
K’e reetal chan ru naru nakak’uteb’ li raqal a’an re naq tixtenq’aheb’ li kok’al chixq’ajsinkileb’ rib’ rik’in li Kolonel naq te’wanq xch’a’ajkilal.
Kok’ k’anjel naru chi b’aanumank
-
Tenq’aheb’ li kok’al chixk’oxlankileb’ li ch’a’ajkilal kixnumsi li Kolonel, maare naq eb’ li kristiaan ke’reetz’u ut ke’xse’. Ch’olob’ naq toonume’q sa’eb’ li hoonal ch’a’aj sa’ li qayu’am. Ilomaq 1 Pedro 1:6–7; 3:14, ut wotz jun aanumsihom b’ar wi’ xak’ul jun “xyalb’al rix laa paab’aal” ut li Kolonel xatxtenq’a chi saho’k sa’ aach’ool. Malaj, naru nakawotz lix tij li profeet aj Jose Smith sa’ li tz’alam sa’ Liberty ut lix k’ojob’ankil xch’ool kixk’e li Dios (chi’ilmanq Tzol’leb’ ut Sumwank 121:1–8; 123:17).
Laj Jose Smith sa’ li tz’alam sa’ Liberty, xb’aan laj Greg K. Olsen
-
K’ut jun xjalam-uuch li Kristo ut xkomoneb’ chik li kristiaan (wan naab’aleb’ sa’ Hu reheb’ li Jalam-uuch re li Evangelio; wankeb’ ajwi’ sa’ Kim, Taaqehin—Choq’ reheb’ li komon ut li junkab’al). Patz’ reheb’ li kok’al naq te’xtaw li Jesus sa’ li jalam-uuch. Ch’olob’ xyaalal naq wi too’iloq wan wi’ li Kolonel, a’an naru tooxtenq’a chi saho’k sa’ qach’ool sa’ li qayu’am.
Li qaChoxahil Yuwa’ naraj naq tinwanq jo’ jun eetalil choq’ reheb’ li was wiitz’in.
Laj Pedro kixk’ut naq laa’o “lix tenamit li Dios” ut naq li qachaab’il b’aanuhom naru “xnimankil xloq’al li Dios.”
Kok’ k’anjel naru chi b’aanumank
-
Ch’olob’eb’ li k’a’aq re ru mas neke’ile’ sa’ xyanqeb’ li wankeb’ wi’, malaj k’uteb’ xjalam-uucheb’ li k’a’aq re ru a’an. Qayehaq, jun santil ochoch mas na’ilman sa’ xyanqeb’ ninqi kab’l wankeb’ sa xsutam, malaj jun li tzuul na’ilman sa’ xb’een li ru taq’a. Ch’olob’ naq wi naqapaab’eb’ li taqlahom, noko’ile’ chi us ut wankeb’ li kristiaan li naru neke’ril li qab’aanuhom. Aatinan chirix junjunqeb’ li “chaab’il b’aanuhom” nakawileb’ chixb’aanunkil li kok’al. Ch’olob’ naq eb’ li chaab’il b’aanuhom jo’eb’ a’an “neke’xnima xloq’al li Dios”—xb’aan naq naxtenq’aheb’ li qas qiitz’in chixraab’al li Dios ut chirajb’al k’anjelak chiru.
-
B’aanu li perel re kok’ k’anjel rik’ineb’ li kok’al. Chan ru naq eb’ li kristiaan wankeb’ sa’ li jalam-uuch yookeb’ chixnimankil xloq’al li Dios?
Eb’ li musiq’ej wankeb’ sa’ lix na’ajeb’ li musiq’ej neke’xtzol li evangelio.
Chirix naq kikam, li Jesus xko’o sa’ lix na’ajeb’ li musiq’ej ut kixtaqlaheb’ li musiq’ej li tiikeb’ xch’ool chixtzolb’aleb’ li musiq’ej li ink’a’ ke’xk’ulub’a li evangelio.
Kok’ k’anjel naru chi b’aanumank
-
Aatinan rik’ineb’ li kok’al chirix jun kristiaan nakanaw ru li xkam. Ch’olob’ naq rik’in lix kamikeb’ li kristiaan, lix musiq’eb’ neke’el sa’ lix tib’eleb’ ut neke’xik sa’ lix na’ajeb’ li musiq’ej. Yaab’asi 1 Pedro 3:19 ut ch’olob’ naq chirix naq kikam li Jesus, xko’o chirula’aninkil lix na’ajeb’ li musiq’ej. Aran, kixpatz’ reheb’ li musiq’ej tiikeb’ xch’ool naq te’xk’ut li evangelio chiruheb’ li musiq’ej li maji’ neke’xk’ulub’a li evangelio (chi’ilmanq Tzol’leb’ ut Sumwank 138:30).
-
K’ut jun xjalam-uuch li santil ochoch. Ch’olob’ chiruheb’ li kok’al naq taawulaq tz’aqal xchihab’eb’, te’ruuq chi xik sa’ li santil ochoch ut chi kub’eek xha’ jo’ ruuchileb’ lix xe’toonal li ink’a’ ke’kub’siik xha’ naq wankeb’ sa’ li ruchich’och’. Tenq’aheb’ li kok’al chixtz’aqob’resinkil ru jun resilal li junkab’al (chi’ilmanq jun eetalil sa’ “Hojas de historia familiar para colorear,” ChurchofJesusChrist.org).
Xk’utb’al li tzol’leb’: Kok’al ak ninqeb’
Naru nintaw xsahil inch’ool ut tuqtuukilal sa’eb’ ajwi’ li hoonal ch’a’aj.
Maare naq eb’ li kok’al nakatzoleb’ k’eeb’ileb’ chaq xxutaan malaj neke’xnumsi eetz’uuk xb’aan li neke’xpaab’. Eb’ li raqal a’in naru neke’xtenq’aheb’ chiruheb’ li hoonal a’an.
Kok’ k’anjel naru chi b’aanumank
-
K’os ruheb’ junjunq li seraq’ b’ar wi’ li Jesus kirahob’tesiik, malaj patz’ reheb’ li kok’al naq te’rileb’—chi’ilmanq Mateo 12:9–14 malaj Lukas 22:47–54. Patz’ reheb’ li kok’al ma k’eeb’ileb’ xxutaan malaj eetz’unb’ileb’ xb’aan naq neke’xyu’ami lix k’utum li Jesukristo. K’a’ru xe’reek’a xb’aan a’an? Chirix a’an ilomaq 1 Pedro 3:12–14; 4:13–14, 16, ut patz’ reheb’ li kok’al naq te’xsik’ li kixye laj Pablo chirix xk’ulb’al rahilal “sa’ xk’ab’a’ li tiikilal.” K’a’ut naq naru nawan xsahil qach’ool us ta wankeb’ li kristiaan nokohe’reetz’u xb’aan xb’aanunkil li us?
-
Wotz jun aanumsihom b’ar wi’ xataw xsahil xch’ool malaj tuqtuukilal chiru junaq xyalb’al aawix, malaj wotz chan ru naq li profeet aj Jose Smith kixtaw tuqtuukilal naq kiwan chaq sa’ li tz’alam sa’ Liberty (chi’ilmanq Tzol’leb’ ut Sumwank 121:1–8; 123:17). Chan ru naq naqataw sahil ch’oolejil ut tuqtuukilal rik’in li Kristo sa’eb’ lix yalb’al qix?
Naru naq junelik kawresinb’ilaqin re xwotzb’al li evangelio.
Eb’ li kok’al nakatzoleb’ te’wanq naab’al lix hoonaleb’ chiru lix yu’ameb’ re xsumenkileb’ xpatz’om li kristiaan chirixeb’ lix paab’aal. K’e reetal k’a’ru naru nakab’aanu re xtenq’ankileb’ “chi wank chi kawresinb’ileb’ re sumenk.”
Kok’ k’anjel naru chi b’aanumank
-
Aatinan chirix jun hoonal b’ar wi’ jun kristiaan xye aawe jun xpatz’om chirix li Iglees, ut ch’olob’ ma xaweek’a naq kawresinb’ilat re xsumenkil. Patz’ reheb’ li kok’al naq te’aatinaq chirix jun hoonal b’ar wi’ jun kristiaan kixye jun patz’om reheb’ chirix li Iglees. Ilomaq 1 Pedro 3:15. Chan ru naru naqataaqe li na’leb’ kixk’e laj Pablo sa’ li raqal a’an?
-
Tenq’aheb’ li kok’al chixk’oxlankil wiib’ oxib’ li patz’om naru neke’xye li kristiaan chirix li Jesus malaj lix Iglees. Kanab’eb’ li kok’al chixch’olob’ankil chan raj ru te’xsumeheb’ li patz’om a’an, re naq “yo’oon wanqeb’ chi junelik.” Wankeb’ li yaal moko ch’a’ajeb’ ta sa’ Eb’ lix Raqalil li Paab’aal li naru neke’roksi li kok’al re xsumenkileb’ li patz’om chirix li Iglees.
Eb’ li musiq’ej wankeb’ sa’ li musiq’ejil tz’alam neke’xtzol li evangelio.
Chirix naq eb’ li tiikeb’ xch’ool neke’kam, neke’xik sa’ lix na’ajeb’ li musiq’ej re te’xk’ut li evangelio chiruheb’ li ani ink’a’ ke’xk’ul li evangelio naq wankeb’ sa’ li ruchich’och’.
Kok’ k’anjel naru chi b’aanumank
-
Yiib’ jun li sirso chiru li pizarron rik’in jun li juch’ sa’ xyi. Tz’iib’a Musiq’ejil hilob’aal na’ajej sa’ jun xjachal li sirso ut Musiq’ejil tz’alam sa’ li jun jachal chik. Patz’ re jun li ch’ina al naq tixyaab’asi 1 Pedro 3:18–20; 4:6 (chi’ilmanq JJS, 1 Pedro 4:6 re rilb’al li kixjal laj Jose Smith). Ch’olob’ naq chirix naq kikam li Jesus, xko’o sa’ li hilob’aal na’ajej. Aran kixye reheb’ li musiq’ej tiikeb’ xch’ool naq te’xk’ut li evangelio chiruheb’ li musiq’ej wankeb’ sa’ li musiq’ejil tz’alam.
-
B’oq lix na’, lix yuwa’, malaj li ras jun reheb’ li kok’al chi aatinak chirix li xik sa’ li santil ochoch ut xk’ulb’al li k’ojob’anb’il k’anjel choq’ re jun reheb’ lix xe’toonal.
-
Patz’ reheb’ li kok’al naq te’xtz’aqob’resi ru jun resilal li junkab’al (chi’ilmanq jun eetalil sa’ “Hojas de historia familiar para colorear,” ChurchofJesusChrist.org).
Xb’oqb’aleb’ chi tzolok sa’ kab’l
B’oqeb’ li kok’al chixwotzb’al li resilal lix junkab’aleb’ rik’ineb’ li komon sa’ lix junkab’aleb’ ut chixpatz’b’al xtenq’ankileb’ re naq te’xk’e xkomoneb’ li k’ab’a’ej.
Xkawresinkil qib’ jo’ aj k’utunel
K’e aach’ool chixtawb’al ru xch’ooleb’ li kok’al nakatzoleb’. Laa’at nakanaweb’ ru li kok’al nakatzoleb’, jo’kan naq jaleb’ ru li na’leb’ re li tusleb’ aatin a’in, wi na’ajman ru, re xb’aanunkil li nak’anjelak choq’ reheb’. Naru nakawoksiheb’ a’ yaal b’ar wan reheb’ li kok’ k’anjel neke’yeeman sa’ li tusleb’ aatin a’in, ut ink’a’ ka’ajwi’ li tz’iib’anb’ileb’ choq’ reheb’ li kok’al li nakatzoleb’. (Chi’ilmanq Li k’utuk jo’ li Kolonel, 7.)