“27 noviembre–3 diciembre. 1–3 Jwan; Judas: “Li Dios a’an rahok,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“27 noviembre–3 diciembre. 1–3 Jwan; Judas,” Kim, Taaqehin—Choq’ re li Tzoleb’aal reheb’ li Kok’al: 2023
Li tz’aqal rahok, xb’aan laj Del Parson
27 noviembre–3 diciembre
1–3 jwan; Judas
“Li Dios a’an rahok”
Eb’ lix hu laj Jwan ut laj Judas neke’k’utuk chirix lix rahom ut lix saqen li qaChoxahil Yuwa’. Naq tattzoloq chiru li xamaan a’in, k’oxla k’a’ut naq eb’ li kok’al nakatzoleb’ neke’raj ru lix saqen ut lix rahom li qaChoxahil Yuwa’ sa’ lix yu’ameb’. Chak’oxla roksinkileb’ chixjunil li kok’ k’anjel re li tusleb’ aatin a’in, ut ink’a’ ka’ajwi’ li wankeb’ rub’el li ch’uut nakatzoleb’ laa’at.
Xkanab’ankileb’ chi wotzok
Patz’ reheb’ li kok’al naq te’xwotz chan ru xe’reek’a xrahom li qaChoxahil Yuwa’ ut li Jesus, malaj k’a’ut naq li qaChoxahil Yuwa’ ut li Jesus chanchaneb’ jun li saqen choq’ qe.
Xk’utb’al li tzol’leb’: Kok’al toj ka’ch’ineb’ xyu’am
Xtaaqenkil li Jesukristo naxk’e xsaqenkil lin yu’am.
Laj Jwan kitz’iib’ak chirix li saqen re xk’utb’al lix wanjik li qaChoxahil Yuwa’ ut li Jesus sa’ li qayu’am. K’oxla chan ru taatenq’aheb’ li kok’al chi tzolok chirix li saqen a’an.
Kok’ k’anjel naru chi b’aanumank
-
Patz’ reheb’ li kok’al naq te’xye k’a’aq re ru neke’xk’e saqen. Aatinan rik’ineb’ chirix lix chaab’ilal li saqen, jo’ xtenq’ankileb’ li che’ chi k’iik, qatenq’ankil chi ilok, ut xk’eeb’al qatiqwal. Re te’xtaw ru chan ru naq li Jesus naxk’e saqen qe, naru te’xkutanob’resi jun xjalam-uuch li Jesukristo rik’in jun pook rajlal sut naq te’xye, “Li Dios a’an li saqen” (1 Jwan 1:5). Ch’olob’ xyaalal naq li qaChoxahil Yuwa’ ut li Jesukristo naru neke’xk’e xsaqenkil li qayu’am naq naqayal xtaaqenkil li raatineb’.
-
Patz’ reheb’ li kok’al naq te’xk’eheb’ xhoonal chixchapb’al xjalam-uuch jun li bombiiy malaj kandeel. Naq li junjunq tixchap li jalam-uuch, tenq’a chixk’oxlankil chan ru naru naqak’am lix saqen li Jesukristo sa’ li qayu’am.
Nink’ut lin rahom choq’ re li Dios naq nink’ut lin rahom choq’ reheb’ li was wiitz’in.
Tenq’aheb’ li kok’al chirilb’al chan ru neke’xk’am rib’ li rahom neke’reek’a choq’ re li qaChoxahil Yuwa’ ut li rahom neke’xk’ut choq’ reheb’ li ralal xk’ajol a’an.
Kok’ k’anjel naru chi b’aanumank
-
Yaab’asi 1 Jwan 4:11 choq’ reheb’ li kok’al, ut b’ichahomaq jun li b’ich chirix lix rahom li Dios, maare “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16). Patz’ reheb’ li kok’al naq te’xwotz chan ru neke’xnaw naq neke’rahe’ xb’aan li qaChoxahil Yuwa’. Chirix li junjunq chi sumenk, patz’ reheb’ li kok’al naq te’xq’alu rib’ ut te’xye: “Li Dios a’an rahok ut li Dios nikinixra.”
-
Yaab’asi 1 Jwan 4:21 choq’ reheb’ li kok’al. Patz’ reheb’ naq te’aatinaq chirix malaj te’xk’utb’esi jalan jalanq xk’utb’al qarahom choq’ re li qamiiw, maare xk’eeb’al xq’alunkil malaj xyiib’ankil jun li ch’ina utz’u’ujinb’il hu. K’a’ru naxk’e chireek’aheb’ li qamiiw li k’a’aq re ru a’an? K’a’ru nareek’a li qaChoxahil Yuwa’ naq naqab’aanu li chaab’il choq’ reheb’ li qas qiitz’in?
Nink’ut lin rahom choq’ re li Dios naq ninpaab’eb’ lix taqlahom.
Laj Jwan kixk’ut naq “moko aaleb’ ta” lix taqlahom li Dios (1 Jwan 5:3). Xtaaqenkileb’ b’an lix taqlahom li Dios naxk’ut li qarahom choq’ re.
Kok’ k’anjel naru chi b’aanumank
-
Yaab’asi 1 Jwan 5:3, ut patz’ reheb’ li kok’al naq te’ab’inq re te’xk’e reetal k’a’ru naxye li raqal a’an chirix xk’utb’al naq naqara li Dios. Patz’ reheb’ li kok’al naq te’xye yal ta jarub’ li taqlahom te’ruuq chixyeeb’al. Chan ru naqeek’a naq naqapaab’eb’ lix taqlahom li qaChoxahil Yuwa’?
-
Patz’ reheb’ li kok’al naq te’xyiib’ jun jalam-uuch li naxk’ut chan ru naru neke’xk’ut chiru li qaChoxahil Yuwa’ naq neke’xra. Naru neke’xyiib’ jun xjalam-uucheb’ a’an naq yookeb’ chixpaab’ankil jun reheb’ li taqlahom.
-
B’ichahomaq jun li b’ich chirix li ab’ink, maare “Tinsik’ ru li us” (B’ichleb’aal choq’ reheb’ li Kok’al, 82–83). K’a’ru naqeek’a naq noko’ab’in?
Xk’utb’al li tzol’leb’: Kok’al ak ninqeb’
Nink’ut lin rahom choq’ re li Dios naq nink’ut lin rahom choq’ reheb’ li was wiitz’in.
Chan ru taatenq’aheb’ li kok’al chixtawb’al ru naq xraab’al li Dios a’an ajwi’ xraab’aleb’ li wankeb’ chiqasutam, jo’kan ajwi’ li jalaneb’ chiqu laa’o malaj li ch’a’aj xraab’aleb’?
Kok’ k’anjel naru chi b’aanumank
-
Patz’ reheb’ li kok’al naq te’xk’oxla naq jun li kristiaan toj ak’ x’ok chi wulak sa’ li tzoleb’aal malaj sa’ li teep ut toj maa’ani naxnaw ru sa’ li na’ajej a’an. K’a’ raj ru taareek’a li kristiaan a’an? Patz’ re jun li ch’ina al naq tixyaab’asi 1 Jwan 4:7–8. Jo’ naxye li raqal a’an, chan ru tento toowanq rik’in li kristiaan a’an? Wotz resileb’ hoonal chanchaneb’ ajwi’ a’an, malaj patz’ reheb’ li kok’al naq te’xk’oxlaheb’ hoonal b’ar wi’ te’wanq raj xhoonaleb’ re xk’utb’al xrahomeb’.
-
Patz’ reheb’ li kok’al naq te’ril 1 Jwan 4:7–8, 20–21, ut naq te’xtz’iib’a jun li ch’ol aatin li naxk’os ru li neke’xk’oxla naq a’an li na’leb’ mas aajel ru sa’eb’ li raqal a’an. Chirix naq neke’xwotz li xe’xtz’iib’a, wotz jun aanumishom laa’at malaj jun seraq’ reheb’ li hu Amigos malaj Liahona li naxk’am rib’ chi us rik’in li k’utb’il sa’eb’ li raqal a’an (chi’ilmanq, “¡Saluden a Halim!” Liahona, junio 2019, A18–A19). Patz’ reheb’ li kok’al naq te’xwotz lix numsihomeb’ a’an. Chan ru naru naqak’ut li qarahom choq’ reheb’ li wankeb’ qasutam?
Nink’ut lin rahom choq’ re li Dios naq ninpaab’eb’ lix taqlahom.
Xpaab’ankileb’ li taqlahom moko ch’a’ajaq ta naq naqataweb’ ru li yaal neke’k’utman sa’ 1 Jwan 5:3. Chan ru taatenq’aheb’ li kok’al chirilb’aleb’ li taqlahom jo’ moko iiq ta, jo’ b’an hoonal re xk’utb’al lix rahomeb’ choq’ re li Dios?
Kok’ k’anjel naru chi b’aanumank
-
Patz’ reheb’ li kok’al naq te’xtz’iib’a chiru li pizarron chan ru naru neke’xk’ut chiru li Dios naq neke’xra. Chirix a’an, ilomaq 1 Jwan 2:5–6; 5:2–5 re xtawb’al xkomoneb’ eena’leb’. Chan ru naq xpaab’ankileb’ li taqlahom naxk’ut naq naqara li qaChoxahil Yuwa’?
Naq naqapaab’eb’ lix taqlahom li Dios, nokoxtenq’a chixq’axb’al ru li ruchich’och’.
-
Yaab’asi 1 Jwan 4:17, ut ch’olob’ chiruheb’ li kok’al “naq kawaq qach’ool sa’ xkutankil li raqb’a-aatin” naraj naxye reek’ankil tuqtuukilal naq wanqeb’ chiru li Dios re naq te’raqe’q aatin chirixeb’. K’a’ru naxk’ut li raqal a’an naq tento taqab’aanu re naq kawaq li qach’ool? B’ar wan junjunqeb’ li k’a’aq re ru naru neke’qab’aanu chalen anajwan re naq kawaq qach’ool chiru li Dios?
Naru ninwan chi tiik inpaab’aal us ta nikine’reetz’u li was wiitz’in.
Laa’o lix tzolom li Jesukristo, chi jo’kan naq wankeb’ li toohe’reetz’u xb’aan li qapaab’ahom malaj li qab’aanuhom. Sa’eb’ li raqal a’an wankeb’ li na’leb’ kixk’e laj Judas chirix li wank chi tiik qapaab’aal sa’eb’ li hoonal a’an.
Kok’ k’anjel naru chi b’aanumank
-
Patz’ reheb’ li kok’al naq te’xwotz ma xe’eetz’uuk jun sutaq a’an malaj jalan chik kristiaan xb’aan naq xe’xb’aanu li us. Patz’ reheb’ li kok’al naq te’ril Judas 1:18–22 re xsik’b’al chan ru naru nokowan chi tiik chi paab’ank naq nokohe’reetz’u malaj nokohe’xse’e li kristiaan. Tz’iib’a li te’xtaw chiru li pizarron, ut tz’ilomaq rix chan ru naru neke’taaqeman li na’leb’ a’an.
-
Re xk’osb’al ru lix matk’ laj Lehi (chi’ilmanq 1 Nefi 8:1–35), patz’ reheb’ li kok’al naq te’ril 1 Nefi 8:26–28, 33. K’oxlahomaq chan ru naq eb’ li kristiaan li wankeb’ sa’ li kab’l nim ut paapo xsa’ chanchaneb’ li neke’eetz’un li ki’aatinak wi’ laj Judas. K’a’ru naru naqab’aanu re naq ink’a’ taqak’e qaxik chirab’inkileb’ li neke’eetz’un qe malaj li ink’a’ neke’k’ulub’an re li naqapaab’? (chi’ilmanq 1 Nefi 8:30, 33).
Xb’oqb’aleb’ chi tzolok sa’ kab’l
Waklesiheb’ xch’ool li kok’al chixk’uub’ankil k’a’ru te’xb’aanu re xwotzb’al lix saqeneb’ rik’in lix junkab’aleb’.
Xkawresinkil qib’ jo’ aj k’utunel
Eb’ li kok’al aj ajeb’ ru. Maare wan naq taaweek’a naq lix ajikeb’ ru li kok’al a’anaq jun ramleb’ re te’tzoloq. A’b’anan, naru nakawoksi lix ajikeb’ ru ut xkanab’ankileb’ chixb’aanunkil jun k’utb’esink malaj xjalam-uuch jun li na’leb’ re li evangelio, malaj chixb’ichankil jun li b’ich chirix li evangelio. (Chi’ilmanq Li k’utuk jo’ li Kolonel, 25–26.)