“18–24 diciembre. Li Ralankil: “Jun chaab’il esilal, ut a’an jun xnimal sahil ch’oolej,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“18–24 diciembre. Li Ralankil,” Kim, Taaqehin—Choq’ re li Tzoleb’aal reheb’ li Kok’al: 2023
Ch’ina karneer, xb’aan li xJenedy Paige
18–24 diciembre
Li Ralankil
“Jun chaab’il esilal, ut a’an jun xnimal sahil ch’oolej”
Naru taawoksi li ch’ol a’in re xtenq’ankileb’ li kok’al nakatzoleb’ chixninq’ehinkil lix yo’lajik, lix yu’am, ut lix k’anjel li Kolonel chiruheb’ lix kutankil li Ralankil. Naq yooqat chixkawresinkil aawib’ re k’utuk, wanq a’in sa’ laa k’a’uxl.
Xkanab’ankileb’ chi wotzok
K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xwotz li neke’xnaw chirix lix yo’lajik li Kolonel.
Xk’utb’al li tzol’leb’: Kok’al toj ka’ch’ineb’ xyu’am
Li Jesukristo kik’ulun sa’ ruchich’och’ jo’ jun k’uula’al.
Eb’ li kok’al mas nawulak chiruheb’ li seraq’ chirix lix yo’lajik li Jesukristo. K’a’ruheb’ li tzol’leb’ re li evangelio nakawil laa’at sa’ li seraq’ a’an li nakaweek’a naq tento te’xtaw ru li kok’al?
Kok’ k’anjel naru chi b’aanumank
-
Yaab’asi Lukas 2:1–14 choq’ reheb’ li kok’al, malaj ch’olob’ k’a’ru kik’ulman sa’eb’ li raqal a’an rik’in li na’leb’ wan sa’ “Ch’ol 5: Nayo’la li Jesukristo,” (sa’ Eb’ li Esilal sa’ li Ak’ Chaq’rab’, 13–15, malaj li video sa’ ChurchofJesusChrist.org). Patz’ reheb’ li kok’al naq te’xyiib’eb’ xjalam-uucheb’ li ke’k’ulman ut naq te’roksi re xyeeb’al li seraq’. K’a’ut naq sa qach’ool naq kiyo’la li Jesus?
-
Patz’ reheb’ li kok’al naq te’xye aawe li seraq’ naq eb’ laj q’e ke’xtaaqe li chahim re xtawb’al li Jesus. Wi neke’raj ru naq taajultikamanq li seraq’ reheb’, chi’ilmanq Mateo 2:1–12 malaj “Ch’ol 7: Eb’ aj q’e,” (sa’ Eb’ li Esilal sa’ li Ak’ Chaq’rab’, 18, malaj li video sa’ ChurchofJesusChrist.org). Muq jun xjalam-uuch li Jesus sa’ li tzoleb’aal. Yiib’ xjalam-uuch malaj set jun li chahim ut chap chi kutankil. Patz’ reheb’ li kok’al naq te’xk’oxla naq a’aneb’ laj q’e li neke’k’amok maatan, ut k’ameb’ xb’e sa’ li tzoleb’aal re xtawb’al li Jesus. Tenq’aheb’ li kok’al chixk’oxlankileb’ li maatan naru naqak’e re li Jesus.
-
B’ichaheb’ junjunq reheb’ li b’ich re Ralankil rik’ineb’ li kok’al (chi’ilmanq Eb’ li B’ich, 123–133; B’ichleb’aal choq’ reheb’ li Kok’al, 22–32). Patz’ reheb’ naq te’xwotz jun na’leb’ re li junjunq chi b’ich li neke’xk’oxla naq aajel ru xnawb’al.
Getsemani, xb’aan laj J. Kirk Richards
Sa’ xk’ab’a’ li Jesukristo naru ninwan wi’chik rik’in lin Choxahil Yuwa’ sa’ jun kutan.
Ma neke’xtaw ru li kok’al nakatzoleb’ k’a’ut naq li Jesukristo kichal sa’ li ruchich’och’? K’e aahoonal re xk’oxlankil k’a’ru xb’aanuhom li Kolonel choq’ aawe ut chan ru naru nakatenq’aheb’ li kok’al chixtawb’al ru li xb’aanuhom a’an choq’ reheb’.
Kok’ k’anjel naru chi b’aanumank
-
K’am jun li maatan malaj kaxon chi lanb’il sa’ li tzoleb’aal rik’in jun xjalam-uuch li Jesukristo chi sa’. K’e jun hu chiru li tixye “Jwan 3:16,” ut ye reheb’ li kok’al naq a’an li tenq’ re xnawb’al k’a’ru li maatan. Il Jwan 3:16 rik’ineb’ li kok’al, ut patz’ reheb’ naq te’xq’ehi k’a’ru li maatan toja’ naq te’xte. K’a’ut naq li Dios kixtaqla chaq qe li Ralal?
-
Tenq’aheb’ li kok’al chixchoyb’al li ch’ol aatin a’in: “Li Jesukristo kichal sa’ li ruchich’och’ re .” Chirix a’an k’uteb’ jalam-uuch neke’xk’ul rib’ rik’in lix mayej re xtojb’al rix li maak, lix kamik, ut lix waklijik chi yo’yo li Kolonel (chi’ilmanq Hu reheb’ li Jalam-uuch re li Evangelio, 56–59), ut aatinan chirixeb’ a’an. Naru ajwi’ teeb’icha jun li b’ich li naxye k’a’ut naq li Jesus kichal sa’ ruchich’och’, maare “Kixtaqla li Ralal” (B’ichleb’aal choq’ reheb’ li Kok’al, 20–21). Ye lix nawom aach’ool chirix li Jesukristo ut li xb’aanuhom choq’ aawe.
Xk’utb’al li tzol’leb’: Kok’al ak ninqeb’
Mateo 1:18–25; 2:1–12; Lukas 1:26–38; 2:1–20
Li Jesukristo kik’ulun sa’ ruchich’och’ jo’ jun k’uula’al.
Chan ru taatenq’aheb’ li kok’al chixjayalinkileb’ rib’ rik’in li Jesukristo sa’ li Ralankil a’in?
Kok’ k’anjel naru chi b’aanumank
-
Patz’ re jun li ch’ina al naq taaril li kik’ulman naq kiyo’la li Kolonel sa’ Mateo 1:18–25; 2:1–12; Lukas 1:26–38; 2:1–20). Patz’ reheb’ lix komoneb’ li kok’al naq te’xk’e xhoonaleb’ chixyiib’ankileb’ xjalam-uuch chiru li pizarron li neke’xch’olob’ li loq’laj hu. K’a’ru neke’xk’ut chiqu li seraq’ a’an chirix li Jesukristo?
-
Patz’ reheb’ li kok’al naq te’xtz’iib’a chiru kok’ hu li naru neke’xb’aanu li taatenq’anq reheb’ chixjayalinkil rib’eb’ rik’in li Kolonel chiru lix kutankileb’ li Ralankil. (Naru te’xtaw xna’leb’eb’ rik’in li video “Nuevas de gran gozo: El nacimiento de Jesucristo” sa’ ChurchofJesusChrist.org.) Patz’ reheb’ naq te’xwotz li k’a’ru xe’xtz’iib’a. B’oqeb’ li kok’al chixk’amb’aleb’ li kok’ hu sa’ rochocheb’ ut naq rochb’eeneb’ lix junkab’al te’xb’aanu li xe’xtz’iib’a.
-
B’ichahomaqeb’ li b’ich re Ralankil chirix li Kolonel (chi’ilmanq B’ichleb’aal choq’ reheb’ li Kok’al, 22–32; Eb’ li B’ich, 123–133), ut patz’ reheb’ li kok’al naq te’xwotz li ch’ol aatin jwal nawulak chiruheb’ sa’ li b’ich.
Sa’ xk’ab’a’ li Jesukristo naru ninwan wi’chik rik’in lin Choxahil Yuwa’ sa’ jun kutan.
Chan ru taatenq’aheb’ li kok’al chixnumsinkil wi’chik li xe’xtzol chiru li chihab’ a’in ut chixtawb’al ru k’a’ut naq neke’raj ru li Jesukristo sa’ lix yu’ameb’?
Kok’ k’anjel naru chi b’aanumank
-
Tz’iib’a Ani li Jesukristo? chiru jun li hu ut K’a’ut naq kichal sa’ li ruchich’och’? chiru jun chik li hu; chirix a’an k’eheb’ li hu sa’ jalan jalanq na’ajej sa’ li tzoleb’aal. Patz’ re li junjunq chi kok’al naq tixyaab’asi jun reheb’ li raqal a’in sa’eb’ li loq’laj hu: Mateo 16:15–16; Jwan 3:16; 1 Nefi 10:4; Mosiah 3:8; Alma 7:10–13; 3 Nefi 27:14–15. Patz’ reheb’ li kok’al naq sa’eb’ li raqal neke’ril te’xsik’ xsumenkileb’ li wiib’ chi patz’om wankeb’ sa’ li tzoleb’aal. Patz’ reheb’ naq te’xtz’iib’a lix sumenkileb’ chiruheb’ perel hu ut naq te’xlatzeb’ chixk’atq li patz’om. Chan ru naru naqak’ut li qab’antioxihom xb’aan li xb’aanuhom li Jesukristo choq’ qe?
-
Patz’ reheb’ li kok’al naq te’xtz’iib’a chiru li pizarron chixjunileb’ li k’ab’a’ej malaj li nak’ab’a’in wi’ li Jesus li naru neke’jultiko’ reheb’ (chi’ilmanq li K’utul Raqal reheb’ li Loq’laj Hu, “Jesukristo”). K’a’ru neke’xk’ut chiqu li k’a’b’a’ej a’an chirix li Jesukristo ut lix k’anjel? K’a’ut naq naqaj ru li Jesukristo sa’ li qayu’am? Re xtenq’ankileb’ chixsumenkil li patz’om a’an, k’ut li video “Por qué necesitamos un Salvador—Un mensaje de Navidad acerca de nuestro Salvador Jesucristo” (ChurchofJesusChrist.org).
Xb’oqb’aleb’ chi tzolok sa’ kab’l
Waklesiheb’ xch’ool li kok’al chixtawb’al us ta yal jun ajwi’ chan ru naru neke’k’anjelak chiru jun kristiaan malaj neke’nach’ok rik’in li Jesukristo sa’ li Ralankil a’in.
Xkawresinkil qib’ jo’ aj k’utunel
Patz’ reheb’ li kok’al naq te’xwotz k’a’ru yookeb’ chixtzolb’al. Eb’ li kok’al k’a’jo’ naq naru neke’xchaab’ilob’resi lix junkab’aleb’. Waklesiheb’ xch’ool li kok’al nakatzoleb’ chixwotzb’al rik’ineb’ lix junkab’al k’a’ru xe’xtzol sa’ li Tzoleb’aal choq’ reheb’ li Kok’al. (Chi’ilmanq Li k’utuk jo’ li Kolonel, 30.)