“11–17 diciembre. Apokalipsis 6–14: “Xe’xq’ax ru sa’ xk’ab’a’ lix kik’el li Karneer,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2021)
“11–17 diciembre. Apokalipsis 6–14,” Kim, Taaqehin—Choq’ re li Tzoleb’aal reheb’ li Kok‘al: 2023
Jalam-uuch xb’aan laj Eric Johnsen: Li Nimla Ch’utam, xb’aan laj Robert T. Barrett; xjalam-uucheb’ li chahim nachal rik’in li Agencia Espacial Europea
11–17 diciembre
Apokalipsis 6–14
“Xe’xq’ax ru sa’ xk’ab’a’ lix kik’el li Karneer”
Naq yooqat chirilb’al Apokalipsis 6–14, k’oxlaheb’ li kok’al nakatzoleb’. Li Santil Musiq’ej naru tatxtenq’a chixk’eeb’aleb’ reetal li yaal aajelaqeb’ ru choq’ reheb’ a’an.
Xkanab’ankileb’ chi wotzok
K’uteb’ li jalam-uuch li tixjultika reheb’ li kok’al li k’a’ru toje’ xe’xtzol sa’ li rochocheb’ malaj sa’ li Tzoleb’aal reheb’ li Kok’al. Patz’ reheb’ li kok’al naq te’xye k’a’ru neke’xnaw chirixeb’ li jalam-uuch.
Xk’utb’al li tzol’leb’: Kok’al toj ka’ch’ineb’ xyu’am
Li Jesukristo nikinixtenq’a chi wank chi saq wu.
Laj Jwan kiril naab’aleb’ li kristiaan saqeb’ xt’ikr “xe’xsaqob’resi sa’ lix kik’el li Karneer” (raqal 14). K’oxla chan ru naq li k’utb’esinb’il matk’ a’an naru naxtenq’aheb’ li kok’al chixtawb’al ru naq aajel ru li saqob’resiik xb’aan lix tojb’al rix li maak kixb’aanu li Jesukristo.
Kok’ k’anjel naru chi b’aanumank
-
K’ut chiruheb’ li kok’al li saqi t’ikr (malaj xjalam-uuch a’an) ut xjalam-uuch li Jesus. Yaab’asi Apokalipsis 7:9, 13–14 choq’ reheb’ li kok’al, ut patz’ reheb’ naq te’xk’ut chiruq’eb’ li jalam-uuch ut li t’ikr rajlal sut naq te’rab’i li aatin saq. Ch’olob’ naq li saqi t’ikr nareetali li saqob’resinb’il ru ut naxjultika qe naq li Jesukristo naru nokoxsaqob’resi chiruheb’ li ink’a’ us naqab’aanu.
-
K’ut chiruheb’ li kok’al jun ch’uyul saqi t’ikr malaj perel chi hu, ut kanab’eb’ chixtz’ajninkil ru rik’in jun tz’iib’leb’ malaj rik’in ch’och’. Ch’olob’ naq li xq’etb’aleb’ li taqlahom, a’an chanchan naq tz’aj li qat’ikr. K’ut jun xjalam-uuch li Jesus sa’ Getsemani (maare Hu reheb’ li Jalam-uuch re li Evangelio, 56), k’uula li tz’aj aj t’ikr malaj hu, ut k’ut chiruheb’ jun li saq ru. Ch’olob’ xyaalal naq li Jesukristo naru naxsaqob’resi qu.
-
B’ichahomaq jun li b’ich chirix li kub’iha’, maare “Naq nakub’e lin ha’ ” (B’ichleb’aal choq’ reheb’ li Kok’al, 53), ut ch’olob’ xyaalal naq li Jesus nokoxtenq’a chixsaqob’resinkil qu naq nakub’e qaha’.
Xink’ut inpaab’aal chirix li Jesukristo sa’ li yu’am naq maji’ nikinyo’la.
Sa’ li pleetik sa’ choxa, eb’ li alal k’ajolb’ej tiikeb’ chixpaab’ankil li Dios ke’xq’ax ru laj Satanas rik’in “li aatin xe’xye chi yaal” ut naq ke’xk’ut xpaab’aaleb’ chirix li Jesukristo (Apokalipsis 12:11). Toj neke’xb’aanu a’an anajwan.
Kok’ k’anjel naru chi b’aanumank
-
Re xtenq’ankileb’ li kok’al chixtawb’al ru li naraj naxye xtaaqenkil lix b’aanuhom jun kristiaan, sik’ ru jun ch’ina al re naq a’anaq laj “jolominel,” ut b’oqeb’ lix komoneb’ li kok’al chixtaaqenkil rik’in xb’aanunkil li k’a’ru tixb’aanu a’an. Chirix a’an kanab’eb’ jalaneb’ chik li kok’al chi wank jo’ aj jolominel. Yaab’asi Apokalipsis 12:7–11 choq’ reheb’ li kok’al, ut ch’olob’ naq rub’elaj naq kooyo’la, xqasik’ chaq ru xtaaqenkil li Jesus ut ink’a’ laj Satanas.
-
B’ichahomaq jun li b’ich chirix li yu’am naq maji’ nokoyo’la, maare “Sa’ li choxa chaq kinwan” malaj “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 139, 86–87). Yeheb’ patz’om jo’ “K’a’ru kik’ulman chaq sa’ choxa naq maji’ nokoyo’la?” ut “K’a’ru kiqasik’ ru xb’aanunkil?” (Chi’ilmanq ajwi’ “Xtikib’ankil: Lix k’uub’anb’il na’leb’ li qaChoxahil Yuwa’ ” sa’ Eb’ li Esilal sa’ li Ak’ Chaq’rab’, 1–5, malaj li video sa’ ChurchofJesusChrist.org.)
Li evangelio kik’ojob’aak wi’chik sa’ li qakutankil.
Laj Jwan kitz’iib’ak chirix jun li anjel li tixk’am “li chaab’il esilal li maak’a’ roso’jik” (Apokalipsis 14:6). Li aatinak chirix Apokalipsis 14:6–7 naxk’e aahoonal chixch’olob’ankil xyaalal lix k’ojlajik wi’chik lix evangelio li Jesukristo sa’ li qakutankil.
Kok’ k’anjel naru chi b’aanumank
-
K’ut chiruheb’ li kok’al jun xjalam-uuch laj Moroni naq na’aatinak rik’in laj Jose Smith naq taayaab’asi Apokalipsis 14:6 (chi’ilmanq Hu reheb’ li Jalam-uuch re li Evangelio, 91). Ye reheb’ li kok’al naq te’xk’ut chiruq’eb’ li anjel sa’ li jalam-uuch. Wotz’ rik’ineb’ li seraq’ chirix li rula’anihom laj Moroni (chi’ilmanq “Ch’ol 3: Li anjel Moroni ut eb’ li perel ch’iich’ oor,” sa’ Eb’ li Esilal sa’ li Tzol’leb’ ut Sumwank, 13–17, malaj li video sa’ ChurchofJesusChrist.org).
-
Patz’ reheb’ li kok’al naq te’xk’utb’esi li seraq’ naq laj Moroni narula’ani laj Jose Smith (chi’ilmanq Jose Smith—Resilal 1:29–35). Tenq’aheb’ chixyeeb’al junjunq li osobʼtesink naqakʼul b’antiox re naq k’ojob’anb’il wi’chik lix evangelio li Jesukristo. Ye lix nawom aachʼool chirix lix k’ojob’ankil wi’chik li evangelio.
Xk’utb’al li tzol’leb’: Kok’al ak ninqeb’
Li evangelio naru nikinixtenq’a chixq’axb’al ru li aaleek.
Li sib’ kimoymoyin ru li iq’ sa’ Apokalipsis 9:2 naru najuntaq’eetaman rik’in li aaleek (chi’ilmanq 1 Nefi 12:17).
Kok’ k’anjel naru chi b’aanumank
-
Yiib’eb’ xjalam-uuch li saq’e ut jun li choql q’ojyin ru, ut seteb’. Patz’ reheb’ li kok’al naq te’ril Apokalipsis 9:2 ut 1 Nefi 12:17, ut tz’iib’a sa’ li choql moymoy ru k’a’ru nareetali li sib’ malaj li b’ook nayeeman sa’eb’ li raqal a’an. K’e li choql q’ojyin ru chiru li pizarron, ut patz’ reheb’ li kok’al naq te’xye k’a’ru li aaleek neke’xnumsi li kok’al sa’ lix chihab’eb’ a’an. Chirix a’an k’e li saq’e chiru li pizarron ut ye reheb’ naq te’xyeheb’ li k’anjeleb’aal naxk’e qe li qaChoxahil Yuwa’ re xq’axb’aleb ru lix q’ojyinal li ruchich’och’.
-
Chan ru naru naqatenq’aheb’ li qas qiitz’in li neke’tawman sa’ li q’ojyin sa’ musiq’ej? Re xtenq’ankileb’ li kok’al chi k’oxlak chirix li patz’om a’an, k’ut lix raqik li video “Elegir la luz” (ChurchofJesusChrist.org). Chan ru naru toowanq jo’ li kristiaan kitenq’ank re laj alinanel sa’ b’aqlaq ch’iich’?
Xink’ut inpaab’aal chirix li Jesukristo sa’ li yu’am naq maji’ nikinyo’la.
Eb’ li kok’al nakatzoleb’ wankeb’ sa’ li ruchich’och’ xb’aan naq ke’wan xpaab’aal chirix li Jesukristo sa’ li yu’am naq maji’ neke’yo’la ut ke’xsik’ ru xtaaqenkil.
Kok’ k’anjel naru chi b’aanumank
-
Ilomaq Apokalipsis 12:7–11, ut tz’iib’aheb’ chiru li pizarron li aatin nimla k’anti’, pleetik sa’ choxa, kute’k taq’a, aatin ke’xye chi yaal, ut Karneer. Patz’ reheb’ li kok’al naq te’xk’oseb’ ru li raqal a’an rik’in roksinkileb’ li aatin wankeb’ chiru li pizarron. K’a’ru naqatzol sa’eb’ li raqal a’an chirix li Jesukristo (li Karneer)? K’a’ru naqatzol chirix li k’a’ru kiqasik’ ru sa’ li qayu’am naq maji’ nokoyo’la?
-
K’e oxib’ li juch’ chiru li pizarron, ut tz’iib’aheb’ li aatin a’in jo’ xjolomil li na’leb’: Rub’elaj li yu’am a’in, Chiru li yu’am a’in, ut Sa’ li wiib’. Kawresiheb’ kok’ hu tz’iib’anb’ilaqeb’ wi’ li yaal chirix li yu’am naq maji’ nokoyo’la ut li yu’am sa’ ruchich’och’, maare Wan qajunxaqalil, Maak’a’ qajunxaqalil, Wanko b’ar wi’ wan li Dios, Wanko sa’ jun yalok q’e rik’in laj Satanas, Naqak’anjela qapaab’aal chirix li Jesukristo, ut Naqataaqe lix k’uub’anb’il na’leb’ li Dios. Kanab’eb’ li kok’al chixk’eeb’al xhoonaleb’ re xsik’b’al ru jun li ch’ina hu ut xsik’b’al ru b’ar reheb’ li juch’ nakana. Wotz naq nakak’oxla naq eb’ li kok’al naru naq toj yooqeb’ chixk’utb’al xpaab’aaleb’ chirix li Kristo.
Jo’ xkomon lix k’ojob’ankil wi’chik li evangelio, taajultikamanq li evangelio sa’ chixjunil li ruchich’och’.
Eb’ li kok’al nakatzoleb’ naru neke’tenq’an chixjultikankil li evangelio chiru “chixjunil li amaq’ ut tenamit, yalaq chan re ru neke’ilok ut neke’aatinak” (Apokalipsis 14:6).
Kok’ k’anjel naru chi b’aanumank
-
Patz’ reheb’ li kok’al naq te’ril Apokalipsis 14:6–7 ut naq te’xtz’iib’a chiru li pizarron li aatin malaj ch’ol aatin li nawulak chiruheb’ sa’eb’ li raqal a’an. Patz’ reheb’ naq te’xye k’a’ut naq xe’xsik’ ru li aatin malaj ch’ol aatin a’an. Ch’olob’ naq eb’ li raqal a’in neke’aatinak chirix lix k’ojob’ankil wi’chik li evangelio sa’ li qakutankil. Patz’ reheb’ chan ru naq naru neke’tz’aqon sa’ xjultikankil li evangelio chiru li ruchich’och’.
-
Patz’ reheb’ li kok’al naq te’ril Apokalipsis 14:7 ut naq te’xk’os ru li raatin li anjel choq’ re li ruchich’och’. Malaj patz’ reheb’ naq te’xyiib’ jun jalam-uuch li taareetali li raatin li anjel. K’a’ru naru taqawotz chirix lix evangelio li Jesukristo rik’ineb’ li qas qiitz’in?
Xb’oqb’aleb’ chi tzolok sa’ kab’l
Tenq’aheb’ li kok’al chixtz’iib’ankil jun aatin malaj ch’ol aatin li tixjultika reheb’ li xe’xtzol sa’ li tzoleb’aal anajwan. Patz’ reheb’ naq te’xk’ut lix tz’iib’ahomeb’ chiru jun kristiaan sa’ rochocheb’, ut naq te’xwotz k’a’ru xe’xtzol.
Xkawresinkil qib’ jo’ aj k’utunel
K’ut li tzol’leb’ rik’ineb’ li b’ich. Li b’ichank rik’ineb’ li kok’al naru tixk’e xkawilal li tzol’leb’ yookat chixk’utb’al sa’ li loq’laj hu. Re xtawb’al xkomon chik li na’leb’, chi’ilmanq “Roksinkileb’ li b’ich re xk’utb’al li tzol’leb’ ” sa’ li raqal k’ab’a’inb’il “Xch’olob’ankil li hoonal re b’ichank ut li k’anjel reheb’ li kok’al sa’ li ch’utam re li loq’laj wa’ak” sa’ xraqik li hu a’in.