“25–31 diciembre. Apokalipsis 15–22: “Ani taaq’axoq u, taareechani chixjunil a k’a’aq re ru a’in,” ” Kim, Taaqehin—Choq’ re li Tzoleb’aal reheb’ li Kok’al: Li Ak‘ Chaq’rab’ 2023 (2021)
“25–31 diciembre. Apokalipsis 15–22,” Kim, Taaqehin—Choq’ re li Tzoleb’aal reheb’ li Kok‘al: 2023
Li junelikil tenamit, xb’aan laj Keith Larson
25–31 diciembre
Apokalipsis 15–22
“Ani taaq’axoq u, taareechani chixjunil a’ k’a’aq re ru a’in”
Naq yooqat chixkawresinkil aawib’ re k’utuk, jultika laa numsihom xak’ul naq xatzol Apokalipsis 15–22 aajunes malaj rik’in laa junkab’al. K’a’ru li mas xwulak sa’ laa ch’ool? K’a’ru li na’leb’ xak’ul? Chijultiko’q aawe naq chixjunileb’ li kok’ k’anjel neke’yeeman sa’ li tusleb’ aatin a’in naru neke’oksiman choq’ reheb’ chixjunil li kok’al a’ yaal jarub’ chihab’ reheb’.
Xkanab’ankileb’ chi wotzok
Patz’ reheb’ li kok’al naq te’xwotz k’a’ut naq neke’raj wulak wi’chik rik’in li qaChoxahil Yuwa’. Sa’ chixjunil li tzolok, tenq’aheb’ chixtawb’al li k’a’ru naru neke’xb’aanu re xkawresinkileb’ rib’ re q’ajk rik’in a’an.
Xk’utb’al li tzol’leb’: Kok’al toj ka’ch’ineb’ xyu’am
Naru ninnima ru li Qaawa’ rik’in li b’ichank.
Eb’ laj santil paab’anel sa’ Apokalipsis 15:2–4 ke’b’ichan re xnimankil ru li Dios xb’aan lix chaab’ilal. K’a’ruheb’ li b’ich re nimank-u li neke’ru chixtenq’ankileb’ li kok’al chixk’utb’al xrahomeb’ choq’ re li qaChoxahil Yuwa’ ut li Jesukristo?
Kok’ k’anjel naru chi b’aanumank
-
Naq yooqat chixyaab’asinkil Apokalipsis 15:2–4, patz’ reheb’ li kok’al naq te’reek’asi rib’ jo’ chanru naq yookeb’ chixwajb’al li arpa malaj chixb’eresinkil jun li coro. K’a’ru naqeek’a naq nokob’ichan chirix li Jesus?
-
Patz’ reheb’ li kok’al naq te’xye k’a’ruheb’ li b’ich chirix li qaChoxahil Yuwa’ ut li Jesukristo li mas neke’wulak chiruheb’. B’ichahomaq junjunqeb’ re a’an, ut tenq’aheb’ li kok’al chixtawb’al ru k’a’ru neke’xk’ut li b’ich chiqu chirix li qaChoxahil Yuwa’ ut li Kolonel.
Naq ninsik’ ru li k’a’ru us, naru ninkawresi wib’ choq’ re li xkab’ xk’ulunik li Jesukristo.
Chan ru taatenq’aheb’ li kok’al chixtawb’al ru naq li xkab’ xk’ulunik li Qaawa’ a’anaq jun hoonal re sahil ch’oolej choq’ qe laa’o wi naqapaab’eb’ lix taqlahom li Jesus?
Kok’ k’anjel naru chi b’aanumank
-
Patz’ reheb’ li kok’al ma wulajenaqeb’ sa’ junaq sumlaak. Chan ru xe’xnumsi? Kʼaʼut naq ebʼ li kristiaan jwal saheb’ xch’ool sa’ li sumlaak? K’ut xjalam-uuch li xkab’ xk’ulunik li Kolonel li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut yaab’asi Apokalipsis 19:7. Ch’olob’ naq “lix sumlajik li Karneer” nareetali li xkab’ xk’ulunik li Jesukristo. K’a’ut naq taasaho’q qach’ool naq taak’ulunq wi’chik li Kolonel? Tenq’aheb’ li kok’al chixjuntaq’eetankil li sahil ch’oolej re li sumlaak rik’in li sahil ch’oolej re lix sutq’ijik li Kolonel.
-
Wotz rik’ineb’ li kok’al k’a’ut naq nakawoyb’eni rik’in sahil ch’oolejil li xk’ab’ xk’ulunik li Jesus. Naru ajwi’ nekeb’icha jun li b’ich chirix li xkab’ xk’ulunik li Qaawa’, maare “Naq taak’ulunq li Kolonel” (B’ichleb’aal choq’ reheb’ li Kok’al, 46–47).
-
Patz’ reheb’ li kok’al naq te’xwotz li neke’xb’aanu re xkawresinkileb’ rib’ re xik sa’ li iglees rajlal domingo. K’a’ut naq naqab’aanu li k’a’aq re ru a’an rub’elaj naq tooxik sa’ li iglees? K’a’ut naq tento taqakawresi qib’ choq’ re li xkab’ xk’ulunik li Kristo? Sa’ li perel re kok’ k’anjel re li xamaan a’in, kanab’eb’ li kok’al chixyiib’ankil xjalam-uuch li naru neke’xb’aanu re xkawresinkileb’ rib’ choq’ re li xkab’ xk’ulunik li Qaawa’.
Apokalipsis 21:1, 3–4, 22–27; 22:1–2
Lin Choxahil Yuwa’ naraj naq tinwanq rik’in a’an sa’ li choxahil awa’b’ejihom.
Sa’eb’ li wiib’ ch’ol sa’ xraqik li hu Apokalipsis, laj Jwan kiroksi chaq’al ru aatin re xch’olob’ankil li choxahil awa’b’ejihom li te’reechani li tiikeb’ xch’ool.
Kok’ k’anjel naru chi b’aanumank
-
Tenq’aheb’ li kok’al chixyiib’ankil xjalam-uuch li toon che’ chiru li pizarron li nayeeman resil sa’ Apokalipsis 22:2. Ch’olob’ naq li che’ a’an, a’an li che’ re li yu’am ut naq li ru nareetali lix rahom li Dios (chi’ilmanq 1 Nefi 11:21–22). K’e reheb’ li kok’al kok’ hu setb’il jo’ ru ki’il q’een, ut patz’ reheb’ naq te’xyiib’ jun jalam-uuch chiru li taatenq’anq reheb’ chireek’ankil lix rahom li qaChoxahil Yuwa’. Ch’olob’ naq li ani neke’xra ut neke’ab’in chiru li qaChoxahil Yuwa’ te’wanq rik’in a’an sa’ li choxahil awa’b’ejihom.
-
Wotz rik’ineb’ li kok’al junjunqeb’ jalam-uuch malaj k’a’aq re ru kiroksi laj Jwan re xch’olob’ankil li choxahil awa’b’ejihom (chi’ilmanq Apokalipsis 21:1, 3–4, 22–27; 22:1–2), ut patz’ reheb’ li kok’al naq te’xyiib’eb’ xjalam-uuch li k’a’aq re ru a’an.
-
B’ichahomaq jun li b’ich naxk’ut chan ru taqakawresi qib’ re toowanq wi’chik rik’in li Dios, maare “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 86–87). Patz’ reheb’ li kok’al naq te’xk’e reetal k’a’ru naru neke’xb’aanu re wank wi’chik rik’in li qaChoxahil Yuwa’.
Xk’utb’al li tzol’leb’: Kok’al ak ninqeb’
Naq ninsik’ ru li k’a’ru us, naru ninkawresi wib’ choq’ re li xkab’ xk’ulunik li Jesukristo.
Chan ru taatenq’aheb’ li kok’al nakatzoleb’ chixtawb’al ru naq li xkab’ xk’ulunik li Jesukristo a’an jun hoonal re sahil ch’oolejil choq’ reheb’ li tiikeb’ chi paab’ank?
Kok’ k’anjel naru chi b’aanumank
-
Ilomaq Apokalipsis 19:7–8, ut tenq’aheb’ li kok’al chixtawb’al ru li neke’reetali li raqal a’an—li sumlaak a’an li xkab’ xk’ulunik li Kolonel, li Karneer a’an li Kolonel, ut li rixaqil a’an li Iglees (malaj ut laa’o chiqajunilo). K’a’ raj ru naru naqab’aanu laa’o re naq kawresinb’ilaqo naq taak’ulunq wi’chik li Kolonel?
-
Tz’ilomaq rix ut k’uulahomaq sa’ eek’a’uxl Eb’ lix Raqalil li Paab’aal 1:10. Ch’olob’ naq lix raqalil li paab’aal a’an naxch’olob’ li sahil ut xninqal ru k’a’aq re ru te’k’ulmanq naq taak’ulunq wi’chik li Jesus. K’ut lix jalam-uuch li xkab’ xk’ulunik li Jesus li wan sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xyiib’ jun xjalam-uuch chan ru neke’xk’oxla naq taawanq li xkab’ xk’ulunik li Jesus.
Li Dios tixraq aatin chiwix.
Chiqajunilo tooxaqliiq chiru li Dios sa’ junaq kutan re taaraqe’q aatin chiqix. Naru nakatenq’aheb’ li kok’al chixtawb’al ru naq lix raqb’a-aatin tz’aqal tiik ut aj uxtaan.
Kok’ k’anjel naru chi b’aanumank
-
Tz’iib’a chiru li pizarron: Chan ruhaq li kutan re li raqb’a-aatin sa’ roso’jik? Patz’ reheb’ li kok’al naq te’xsik’ xsumenkil li patz’om a’an sa’ Apokalipsis 20:12–13 ut sa’ “Raqb’a-aatin sa’ roso’jik” sa’ li K’utul Raqal reheb’ li Loq’laj Hu. K’a’ru ak kixb’aanu li Kolonel re naq li kutan re li raqb’a-aatin sahil kutanaq choq’ we? (chi’ilmanq Eb’ lix Raqalil li Paab’aal 1:3–4). K’a’ru naru naqab’aanu laa’o re naq sahil kutanaq choq’ qe?
Jalam-uuchli Jesus rik’ineb’ li kristiaan sa’ li saqen sa’ xnim ut li kristiaan sa’ li aak’ab’ sa’ xtz’eLi raqb’a-aatin sa’ roso’jik, xb’aan laj John Scott
-
K’am sa’ li tzoleb’aal jun diario li taareetali “xhuhil li yu’am” (Apokalipsis 20:12), b’ar wi’ xatz’iib’a junjunq reheb’ lix chaab’ilal ut lix chaab’il b’aanuhom li Kristo nakawil rik’ineb’ li kok’al sa’ laa tzoleb’aal. Yaab’asi chiruheb’ li kok’al li xatz’iib’a, ut patz’ reheb’ naq te’xye lix chaab’ilal li Kristo neke’ril rik’in xkomoneb’ li kok’al. Wotz lix nawom aach’ool naq li Jesukristo nokoxtenq’a chi wulak jo’ a’an ut naxkawresi li b’e tooruuq wi’ chixjalb’al qak’a’uxl ut chixq’axb’al ru li maak.
Apokalipsis 21:1, 3–4, 22–27; 22:1–2, 17
Lin Choxahil Yuwa’ naraj naq tinwanq rik’in a’an sa’ li choxahil awa’b’ejihom.
Naq nakawil li raatin laj Jwan chirix li choxahil awa’b’ejihom sa’ Apokalipsis 21–22, k’a’ru naxtoch’ laa ch’ool? K’a’ru nakaweek’a naq taawotz rik’ineb’ li kok’al nakatzoleb’?
Kok’ k’anjel naru chi b’aanumank
-
Patz’ reheb’ li kok’al naq te’xsik’ sa’eb’ li raqal a’in junjunqeb’ li aatin malaj ch’ol aatin kiroksi laj Jwan re xch’olob’ankil li choxahil awa’b’ejihom: Apokalipsis 21:1, 3–4, 22–27; 22:1–2. Kanab’eb’ chixsik’b’al ru jun na’leb’ sa’eb’ li raqal a’in li te’raj xyiib’ankil sa’ jalam-uuch. Chirix a’an naru neke’aatinak chirixeb’ lix jalam-uuch sa’ li tzoleb’aal. Waklesiheb’ xch’ool chixk’utb’al lix jalam-uucheb’ reheb’ lix junkab’al sa’ kab’l.
-
Ilomaq Apokalipsis 22:17, ut ch’olob’ naq li ixaqilb’ej li naxye “Chalqat,” a’an ajwi’ li Iglees. Jo’ komon sa’ li Iglees, ani chi aj-u naqaj xb’oqb’aleb’ li kristiaan chi “chalk”? (chi’ilmanq Moroni 10:30–33). K’a’ aj-e naq maare “taachaqiq re” li kristiaan sa’ qasutam? B’ar wankeb’ junjunq li chaab’il na’leb’ re xb’oqb’aleb’ li kristiaan chi “chalk”?
Xb‘oqb‘aleb‘ chi tzolok sa‘ kab‘l
Re xtenq’ankileb’ li kok’al chixkawresinkileb’ rib’ re rilb’al ru lix Hu laj Mormon sa’ li chihab’ jun chik, b’oqeb’ chixpatz’b’al re junaq komon sa’eb’ lix junkab’al malaj re junaq ramiiweb’ naq tixwotz jun raqal malaj jun seraq’ jwal nawulak chiru sa’ lix Hu laj Mormon.
Xkawresinkil qib’ jo’ aj k’utunel
K’ut chiruheb’ li kok’al naq te’xtz’iib’aheb’ li na’leb’ neke’xk’ul. Wi eb’ li kok’al neke’xtzol xtz’iib’ankil li na’leb’ neke’xk’ul, te’tenq’aaq xb’aan a’an chixnawb’al ru ut chixtaaqenkil li Musiq’ej. Re naq te’xtz’iib’a li na’leb’ neke’xk’ul, eb’ li kok’al naru neke’xjuch’ li raqal sa’eb’ li loq’laj hu malaj naru neke’xtz’iib’a kok’ na’leb’ sa’eb’ lix hu. (Chi’ilmanq Li k’utuk jo’ li Kolonel, 30.)