“4–10 diciembre. Apokalipsis 1–5: “Li Karneer, chiwanq taxaq xnimal xloq’al ut xkawilal,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“4–10 diciembre. Apokalipsis 1–5,” Kim, Taaqehin—Choq’ re li Tzoleb’aal reheb’ li Kok’al: 2023
4–10 diciembre
Apokalipsis 1–5
“Li Karneer, chiwanq taxaq xnimal xloq’al ut xkawilal”
Li hu Apokalipsis maare ch’a’ajaq xtawb’al ru choq’ reheb’ li kok’al, a’b’an wankeb’ ajwi’ li tzol’leb’ aajel ru, xchaq’al ru, ut moko ch’a’aj ta xtawb’al ru.
Xkanab’ankileb’ chi wotzok
Patz’ reheb’ li kok’al naq te’xwotz k’a’ raj ru te’reek’a wi ta te’ril li Jesukristo sa’ jun k’utb’esinb’il matk’. Patz’ reheb’ naq te’xye yalaq k’a’ru neke’xnaw chirix lix k’utb’esinb’il matk’ laj Jwan chirix li Jesus sa’ li hu Apokalipsis.
Xk’utb’al li tzol’leb’: Kok’al toj ka’ch’ineb’ xyu’am
Naru nink’e chi k’utunk lix saqen li Kolonel.
Sa’ Apokalipsis 1:20, li Kolonel kixjuntaq’eeta lix Iglees rik’in jun li kandeel. Tenq’aheb’ li kok’al chixtawb’al ru naq naru neke’xk’e chi saqeno’k lix saqen li Kolonel naq te’xyu’ami lix k’utum.
Kok’ k’anjel naru chi b’aanumank
-
K’ut chiruheb’ li kok’al xjalam-uuch k’a’ru naxk’e li saqen, maare li bombiiy, li kandeel, ut li saq’e. Naq taayaab’asi “Li wuqub’ chi chahim a’aneb’ lix anjel li wuqub’ chi iglees” (Apokalipsis 1:20), patz’ reheb’ li kok’al naq te’xk’ut chi ruq’eb’ xjalam-uuch li saqen li yeeb’il sa’ li raqal a’in. Tenq’aheb’ li kok’al chixtz’ilb’al rix chan ru naq laa’o, jo’ komon sa’ lix Iglees li Jesus, naru toowanq jo’ xsaqenk li kandeel—qayehaq, naq naqab’aanu li chaab’il chiruheb’ li qas qiitz’in.
-
B’ichahomaq jun li b’ich chirix xk’eeb’al li saqen reheb’ li qas qiitz’in, maare “Kristo taaraj naq tinlemtzʼunq” (B’ichleb’aal choq’ reheb’ li Kok’al, 38–39). Wotz chan ru naq nakawileb’ li kok’al chixyu’aminkil lix evangelio li Jesukristo ut chi wank jo’ saqen chiruheb’ li ras riitz’in. Wotz chan ru naq li wank jo’ saqen chiruheb’ laa was aawiitz’in nakatxtenq’a chireek’ankil naq nach’ wankat rik’in li qaChoxahil Yuwa’ ut li Jesukristo.
Naru ninb’oq li Jesukristo sa’ lin yu’am.
Lix jaljookil ru aatin li Jesus naq yoo chixtoch’b’al li okeb’aal naru naxtenq’aheb’ li kok’al chixtawb’al ru naq a’an naraj wank chi nach’ rik’ineb’ a’an.
Kok’ k’anjel naru chi b’aanumank
-
Naq taayaab’asi Apokalipsis 3:20, k’ut xjalam-uuch li Jesukristo chiru li okeb’aal re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li kok’al naq te’xk’oxla naq li Jesus yoo chixtoch’b’al rokeb’aal li rochocheb’. Kanab’eb’ chixyeeb’al k’a’ raj ru te’xb’aanu.
-
Patz’ reheb’ li kok’al naq te’xseraq’i aawe hoonal b’ar wi’ xe’royb’eni naq jun kristiaan jwal xe’raj rilb’al ru xwulak sa’ li rochocheb’. K’a’ru xe’reek’a naq yookeb’ chiroyb’eninkil naq li kristiaan a’an tixtoch’ raj li okeb’aal? K’a’ raj ru taak’ulmanq wi ta ink’a’ taqakanab’ chi ok li kristiaan a’an? Yaab’asi Apokalipsis 3:20, ut kanab’eb’ li kok’al chixchapb’al lix jalam-uuch li Jesus ut chixk’oxlankil naq neke’xtoch’ jun okeb’aal. Eb’ lix komoneb’ li kok’al sa’ li tzoleb’aal naru neke’xk’oxla naq neke’xte li okeb’aal. K’a’ru naru naqab’aanu re naq li Jesus taawanq chi nach’ qik’in, us ta ink’a’ nokoru chirilb’al?
Ka’ajwi’ li Jesukristo k’ulub’ej chi wank jo’ aj Kolol we.
Laj Jwan kixtzol sa’ lix k’utb’esinb’il matk’ naq ka’ajwi’ li Jesukristo (eetalinb’il xb’aan jun li karneer) kiru chi wank jo’ li qaKolonel ut chixk’eeb’al chi uxmank lix k’uub’anb’il na’leb’ li Yuwa’b’ej (eetalinb’il xb’aan jun li tasal hu tz’aptz’o).
Kok’ k’anjel naru chi b’aanumank
-
Rub’elaj li tzolok, lan rix jun Hu reheb’ li Jalam-uuch re li Evangelio rik’in hu malaj k’aam. Oksi junjunqeb’ li ch’ol aatin aajeleb’ ru sa’ Apokalipsis 5:1–10 re xch’olob’ankil lix k’utb’esinb’il matk’ laj Jwan. K’ut chiruheb’ li kok’al li tasal hu, ut ye reheb’ naq ka’ajwi’ naru neke’xte li tasal hu wi neke’xtaw lix jalam-uuch li Jesus xamuq sa’ li tzoleb’aal. Naq te’xtaw li jalam-uuch, te li tasal hu ut wotz rik’ineb’ li kok’al eb’ li jalam-uuch wankeb’ sa’ li tasal hu li te’reetaliheb’ li rosob’tesihom lix tojb’al rix li maak xb’aan li Jesukristo (maare li santil ochoch, li kub’iha’, ut li junkab’al). Ch’olob’ xyaalal naq ka’ajwi’ li Kolonel naru chi k’ehok re a’an chi uxmank.
-
K’os ru li k’utb’esinb’il matk’ yeeb’il resil sa’ Apokalipsis 5:1–10, ut patz’ reheb’ li kok’al naq te’xk’utb’esi li xe’reek’a laj Jwan ut xkomoneb’ chik li kristiaan chiru jalan jalanq xcha’al li k’utb’esinb’il matk’. Naru neke’xb’aanu rib’ naq yookeb’ chi yaab’ak naq maa’ani naru chi tehok re li tasal hu, malaj chi saho’k naq li Kolonel kixte.
Xk’utb’al li tzol’leb’: Kok’al ak ninqeb’
Wi k’eek’o inch’ool sa’ lix evangelio li Kolonel, tink’ul ninqi osob’tesink sa’ choxa.
K’a’ru naraj naxye naq “moko kehat ta chi moko tiqat”? K’oxla chan ru taatenq’aheb’ li kok’al re naq ink’a’ te’wanq chi jo’kan—re b’an te’wanq chi k’eek’o xch’ooleb’ rik’in li Kolonel ut lix evangelio.
Kok’ k’anjel naru chi b’aanumank
-
Ilomaq Apokalipsis 3:5, 12, 21, ut ch’olob’ k’a’ru naraj naxye yalaq aatin li ink’a’ neke’xtaw ru li kok’al. K’a’ru naraj naxye “q’axok-u”? Patz’ reheb’ li kok’al naq te’xyiib’ xjalam-uuch jun reheb’ li osob’tesink yeechi’inb’il sa’eb’ li raqal, ut naq te’xk’ut chiru li tzoleb’aal.
-
Ilomaq Apokalipsis 3:15–16. Patz’ reheb’ li kok’al naq te’xye k’a’aq re ru li jwal chaab’il naq toj tiq (maare li kaalt) malaj naq ke (maare li helado). Chan ru naq li wank chi moko keho ta ut moko tiqo ta chirix li Kolonel naru tixrameb’ li osob’tesink yeechi’inb’ileb’ sa’eb’ li raqal 5, 12, ut 21?
-
Chiru li pizarron, tz’iib’a luulu, ut junjunq chik li aatin li neke’raj ajwi’ xyeeb’al a’an, maare maak’a’ xch’ool re xb’aanunkil, maak’a’ naraj, malaj yal wan chi kama’an. Oksiheb’ li aatin a’an re xtenq’ankileb’ li kok’al chixtawb’al ru k’a’ut naq li Qaawa’ ink’a’ naraj naq tookanaaq chi luulu. B’ar wankeb’ li aatin naru naqak’oxla li neke’xch’olob’ li naraj li Qaawa’ xyeeb’al chiqix? Wotz k’a’ut naq nakawaj xk’eeb’al chixjunil aach’ool rik’in li Kolonel, ut patz’ reheb’ li kok’al naq te’xwotz ajwi’ xna’leb’eb’.
Naru ninsik’ ru xk’ulub’ankil li Jesukristo chi wank sa’ lin yu’am.
Chan ru taatenq’aheb’ li kok’al nakatzoleb’ chixteeb’al li raameb’ ut lix yu’ameb’ choq’ re lix wankil li Jesukristo?
Kok’ k’anjel naru chi b’aanumank
-
Naq taayaab’asi Apokalipsis 3:20, k’ut xjalam-uuch li Jesukristo chiru li okeb’aal re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Re xtenq’ankileb’ li kok’al chixtawb’al ru li naraj naxye li jalam-uuch, b’oqeb’ chi k’anjelak sa’ ka’kab’il re xsumenkileb’ li patz’om jo’eb’ a’in: K’a’ut naq li Jesus yoo chixtoch’b’al li okeb’aal? K’a’ut naq maak’a’ xteeb’al li okeb’aal chirix? K’a’ru naraj naxye xk’ulub’ankil li Jesus sa’ li qayu’am?
-
Patz’ reheb’ li kok’al naq te’xtz’iib’a chiru li pizarron jalan jalanq chan ru “xteeb’al li okeb’aal” chiru li Jesus. Sa’ xyanqeb’ a’an naru nawan li k’anjelak chiruheb’ li qas qiitz’in, rilb’aleb’ ru li loq’laj hu, xpaab’ankileb’ li sumwank noko’ok wi’ naq nakub’e qaha’, ut tz’aqonk sa’ li loq’laj wa’ak.
Ka’ajwi’ li Jesukristo k’ulub’ej chi wank jo’ aj Kolol we.
Li k’utb’esinb’il matk’ yeeb’il resil sa’ Apokalipsis 5 kixk’ut naq ka’ajwi’ li Jesukristo k’ulub’ej ut kawresinb’il chixb’aanunkil lix tojb’al rix li maak ut qakolb’al chiru li maak.
Kok’ k’anjel naru chi b’aanumank
-
Patz’ reheb’ li kok’al naq te’xseraq’i aawe jun hoonal b’ar wi’ xe’raj ru naq jun kristiaan tixb’aanu k’a’ruhaq li ink’a’ xe’ru chixb’aanunkil xjuneseb’. Patz’ reheb’ naq te’ril Apokalipsis 5:1–10 ut naq te’xsik’ li k’a’ru x’ajman ru chi b’aanumank ut ka’ajwi’ jun li kristiaan kiru chixb’aanunkil (ch’olob’ naq li Karneer a’an li Jesukristo ut naq li tasal hu nareetali lix k’uub’anb’il na’leb’ li Dios). K’a’ru kixb’aanu li Jesus choq’ qe li maa’ani chik naru chi b’aanunk re?
-
Patz’ reheb’ li kok’al naq te’xsik’ jun li b’ich li naxch’olob’ xyaalal li Jesukristo (maare “Kristo, li tuulan xyo’la,” Eb’ li B’ich, 114). K’a’ru naxk’ut raatinul li b’ich chirix li Jesukristo? Chan ru naq li b’ich a’an chanchanaq li b’ich re loq’onink nab’ichaman chirix li Jesukristo sa’ Apokalipsis 5:9–10?
Xb’oqb’aleb’ chi tzolok sa’ kab’l
B’oqeb’ li kok’al chixwotzb’al rik’ineb’ lix junkab’al chan ru naru neke’xb’oq lix musiq’ahom li Kolonel sa’eb’ li rochoch.
Xkawresinkil qib’ jo’ aj k’utunel
Waklesiheb’ xch’ool chi oxloq’ink. Jun na’leb’ aajel ru sa’ li oxloq’ink a’an xk’oxlankil li qaChoxahil Yuwa’ ut li Jesukristo. Naru nakajultika reheb’ li kok’al naq te’oxloq’inq rik’in xb’ichankil malaj xtz’uyinkil jun li b’ich malaj rik’in xk’utb’al jun xjalam-uuch li Jesus.