“4–10 diciembre. Apokalipsis 1–5: “Li Karneer, chiwanq taxaq xnimal xloq’al ut xkawilal,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“4–10 diciembre. Apokalipsis 1–5,” Kim, Taaqehin—Choq’ reheb’ li komon ut li junkab’al: 2023
4–10 diciembre
Apokalipsis 1–5
“Li Karneer, chiwanq taxaq xnimal xloq’al ut xkawilal”
K’oxla xtz’iib’ankileb’ laa patz’om chirix li k’a’ru nakawil sa’ Apokalipsis. Chirix a’an, sik’ xsumenkileb’ laa patz’om, malaj tat-aatinaq chirix rik’in jun komon sa’ laa junkab’al, malaj sa’eb’ li tzoleb’aal re li Iglees.
Tz’iib’a li nakak’oxla
Ma xch’a’ajko’ chawu jun sutaq xch’olob’ankil k’a’ru xaweek’a naq xak’ul chi kaw li Musiq’ej? Wan naq li aatinob’aal re wulaj wulaj moko tz’aqal ta re xch’olob’ankil xyaalal li musiq’ejil eek’ahom ut na’leb’. Maare xb’aan a’in naq laj Jwan kiroksi li chaq’al ru eetalil ut aatin re xyeeb’al resil li nimla k’utb’esink kixk’ul. Kiru raj kixye naq kiril li Jesukristo, a’b’anan re qatenq’ankil chixtawb’al ru li k’a’ru kireek’a, kixye xyaalal li Kolonel rik’in aatin jo’ a’in: “Lix sa’ ru kama’ li raq’ xam,” “sa’ re na’elk jun jutz’ ch’iich’ ka’pak’al xq’esnal,” ut “lix naq’ ru kama’ li saq’e naq nalemtz’unk chi k’a’jo’ xtiqwal” (Apokalipsis 1:14–16). Naq yookat chirilb’al ru li hu Apokalipsis, yal aaq’e chixtawb’al li esil kiraj laj Jwan naq taatzol ut taaweek’a, us ta ink’a’ nakataweb’ ru chixjunileb’ li eetalil. K’a’ut naq kixjuntaq’eeta li jar ch’utam re li Iglees rik’in lix na’aj li xam, laj Satanas rik’in jun nimla k’anti’, ut li Jesukristo rik’in jun karneer? Ink’a’ na’ajman ru naq taataw ru chixjunileb’ li eetalil sa’ li hu Apokalipsis re taanaweb’ xnimal li na’leb’ li wankeb’ chi sa’, ut li q’axal nim a’an a’in: li Jesukristo ut eb’ li neke’taaqenk re te’numtaaq sa’ xb’eeneb’ li awa’b’ejihom reheb’ li winq ut re laj Satanas.
Li na’leb’ re xtzolb’aleb’ li loq’laj hu aajunes
Lix matk’ laj Jwan chirix lix k’uub’anb’il na’leb’ li qaChoxahil Yuwa’ re xkolb’aleb’ li ralal xk’ajol.
Ch’a’aj xtawb’al ru li hu Apokalipsis, a’ut mich’inan aach’ool. Lix yeechi’ihom laj Jwan tixk’e aakawilal chixyalb’al aaq’e: “Osob’tesinb’ileb’ chixjunileb’ li neke’ilok ru, ut eb’ li neke’ab’ink re ut neke’xtaw ru li aatin re li profeetil yehom a’in, ut neke’xpaab’ li k’a’aq re ru tz’iib’anb’il chi sa’, xb’aan naq taanach’oq chaq xhoonal lix k’ulunik li Qaawa’ ” (JJS, Apokalipsis 1:3, tiqb’il xkawil li aatin).
Jun na’leb’ re xtzolb’al Apokalipsis a’an xsik’b’al chan ru naxk’am rib’ rik’in li k’uub’anb’il na’leb’ re li kolb’a-ib’. Maare tate’xtenq’a li raqal a’in:
-
Sa’eb’ li Ch’ol 5 ut 12 yeeb’il resil naab’al li na’leb’ chirix li yu’am naq maji’ nokoyo’la.
-
Sa’eb’ li ch’ol 6–11, 13–14, 16–19 yeeb’il resil li yu’am a’in ut li k’a’ru xk’ulman sa’ li ruchich’och’.
-
Sa’eb’ li Ch’ol 2–3, 15, 20–22 yeeb’il resil li raqb’a-aatin ut li loq’al wan choq’ reheb’ li tiikeb’ xch’ool.
Naq yooqat chirilb’al ru, patz’ aawib’, “K’a’ru naxk’ut chiwu a’in chirix lix k’uub’anb’il na’leb’ li Dios? K’a’ru naxb’aanu li Dios re intenq’ankil chi numtaak sa’ xb’een li ink’a’ us re naq tinsutq’iiq rik’in? K’a’ru lix yeechi’ihom choq’ reheb’ li tiikeb’ xch’ool?”
Maare us ajwi’ xnawb’al naq Tzol’leb’ ut Sumwank 77 naxch’olob’ junqaq reheb’ li eetalil neke’tawman sa’ Apokalipsis. Jo’kan ajwi’, li jaltesinb’il ru xb’aan laj Jose Smith naxch’olob’ naab’al li na’leb’ re Apokalipsis.
Chi’ilmanq ajwi’ K’utul Raqal reheb’ li Loq’laj Hu, “Jwan,” “K’utb’esinb’il chiru laj Jwan.”
Li Jesukristo a’an li yo’yookil Ralal li yo’yookil Dios.
Li xb’een ch’ol re Apokalipsis naxk’ut naq li Jesukristo kixk’ut rib’ chiru laj Jwan sa’ jun li matk’. Naru nakatz’iib’a chixjunil li naxye li ch’ol a’an chirix li Jesukristo, jo’ ani a’an, k’a’ru naxb’aanu a’an choq’ qe, ut chan ru a’an.
Junqaq li na’leb’ taatzol neke’chal rik’ineb’ li eetalil. K’oxla li tixk’ut raj chawu li Qaawa’ chirix a’an rik’ineb’ eetalil. Jo’ jun eetalil, k’e reetal naq li Kolonel naxk’ab’a’in ajwi’ “li Alfa ut li Omega” ut “li ak wan chaq ut li chalel.” K’a’ut naq eb’ li k’ab’a’ej a’in wankeb’ xloq’al? K’a’ru neke’xk’ut li k’ab’a’ej a’in chawu chirix li Kolonel?
Li Jesukristo naxnaw wu ut tinixtenq’a chixq’axb’al ru lix yalb’al wix.
Li raatin li Kolonel sa’ Apokalipsis 2–3 naxk’ut naq a’an naxtaw ru lix chaab’ilaleb’ ut lix ch’a’ajkilaleb’ li junjunq chi teep sa’ li Iglees sa’ xkutankil laj Jwan. Kixnima ru xyalb’aleb’ xq’e laj santil paab’anel ut jo’kan ajwi’ kixye reheb’ li tento te’xkanab’ xb’aanunkil. K’a’ru nakatzol chirix li sahil ch’oolej ut li tijleb’ naxk’e li Kolonel?
Li Kolonel naxtaw ajwi’ ru laa k’ulum ut laa majelal, ut a’an naraj aatenq’ankil. K’e reetal li yeechi’ink naxb’aanu choq’ reheb’ li neke’el chi uub’ej. K’a’ru nawulak chawu chirix li yeechi’ink a’in? K’a’ru naraj li Qaawa’ naq laa’at taasach xwankil? K’a’ru naru taab’aanu re naq taak’ul lix tenq’?
Ka’ajwi’ li Jesukristo kiru chixk’eeb’al chi uxmank lix k’uub’anb’il na’leb’ li qaChoxahil Yuwa’.
K’a’ru nakatzol chirix li qaChoxahil Yuwa’ sa’ Apokalipsis 4 ut chirix li Jesukristo sa Apokalipsis 5? K’oxla chan ru naq chiqajunilo xqataw ru naq li Jesukristo (li “Karneer”) kiru chixk’eeb’al chi uxmank lix k’uub’anb’il na’leb’ li qaChoxahil Yuwa’ (li Kolonel taaruuq “chixteeb’al li hu ut xjitb’al li wuqub’ chi eetalil” [Apokalipsis 5:5]). K’a’ut naq ka’ajwi’ li Jesukristo kiru chixb’aanunkil a’in? Chan ru naq nakatru chixk’utb’al laa paab’aal chirix a’an jo’ laa Kolonel?
Chi’ilmanq ajwi’ Job 38:4–7; Tzol’leb’ ut Sumwank 77:1–7.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Apokalipsis 1:20.K’a’ut naq li Jesus kixjuntaq’eeta lix Iglees rik’ineb’ xna’aj li xam? (chi’ilmanq Mateo 5:14–16). B’ichahomaq junaq li b’ich li na’aatinak chirix li wank jo’ saqenk sa’ xna’aj jun li xam, maare “Lemtz’un” (B’ichleb’aal choq’ reheb’ li kok’al, 96).
-
Apokalipsis 2–3.B’aanuhomaq jo’ raj xpatz’man re laj Jwan naq tixk’e jun esil re laa junkab’al, chanchan li kixk’e reheb’ li iglees sa’ xkutankil a’an. K’a’ raj ru tixye naq us? Chan raj ru texruuq chi usaak?
-
Apokalipsis 3:15–16Chirix rilb’aleb’ li raqal, laa junkab’al naru neke’ruk’ chi lulu li k’a’aq re ru sa ruk’b’al chi tiq malaj chi ke. K’a’ru naraj naxye wank chi lulu sa’ musiq’ej?
-
Apokalipsis 3:20.K’ut xjalam-uuch li Kolonel naq natoch’ok li okeb’aal (chi’ilmanq sa’ xraqik li tusleb’ aatin a’in) naq laa junkab’al yooq chirilb’al Apokalipsis 3:20. K’a’ut naq li Jesus natoch’ok sa’ li okeb’aal ut ink’a’ yal na’ok? Eb’ li komon re laa junkab’al naru neke’tz’aqon chixtoch’b’al junaq li okeb’aal. Ut li jun siireb’ chik te’xye junqaq li na’leb’ li tooxk’am “chixteeb’al li okeb’aal” chiru li Kolonel ut xkanab’ankil chi ok. Chan raj ru taqeek’a naq li Kolonel taachalq sa’ li qochoch?
-
Apokalipsis 4:10–11.K’a’ru naraj naxye li xloq’oninkil li qaChoxahil Yuwa’? K’a’ru naqanaw chirix a’an li nokoxk’am chixloq’oninkil?
-
Apokalipsis 5:6, 12–13.K’a’ut naq li Jesus nak’ab’a’iik “li Karneer”? K’a’ru naxk’ut chiqu li k’ab’a’ej a’an chirix a’an?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Kristo, li tuulan xyo’la,” Eb’ li B’ich, 114.
Xkawresinkil qib’ jo’ aj k’utunel
Kanab’eb’ chi patz’ok. Eb’ li patz’om neke’xk’ut naq eb’ li komon sa’ laa junkab’al wankeb’ xch’ool chi tzolok, ut neke’xk’ut chawu chan ru naq yookeb’ chixk’ulb’al li k’a’ru yookeb’ chixtzolb’al. K’ut chiru laa junkab’al chan ru xtawb’al xsumenkil li patz’om sa’eb’ li loq’laj hu. (Chi’ilmanq Li k’utuk jo’ li Kolonel, 25–26.)
Kanab’ chi ok, xb’aan laj Greg K. Olsen