“27 noviembre–3 diciembre. 1–3 Jwan; Judas: “Li Dios a’an rahok,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“27 noviembre–3 diciembre. 1–3 Jwan; Judas,” Kim, Taaqehin—Choq’ reheb’ li komon ut li junkab’al: 2023
Li tz’aqal rahok, xb’aan laj Del Parson
27 noviembre–3 diciembre
1–3 Jwan; Judas
“Li Dios a’an rahok”
Naq nakawileb’ lix hu laj Jwan ut laj Judas, sik’ li musiq’anb’il na’leb’ chirix xk’utb’al aarahom choq’ re li Dios. Tz’iib’aheb’ li musiq’anb’il na’leb’ a’an, ut b’aanuheb’.
Tz’iib’a li nakak’oxla
Naq laj Jwan ut laj Judas ke’xtz’iib’a lix hu, ak wan chik li tzol’leb’ po’b’il li ki’ok chixk’amb’aleb’ naab’aleb’ laj santil paab’anel sa’ li q’etok paab’ank. Ke’wan b’alaq’il aj tzolonel li ke’xye naq maare moko yaal ta naq kichal li Jesukristo “sa’ li tz’ejwalej” (chi’ilmanq 1 Jwan 4:1–3; 2 Jwan 1:7). K’a’ru taaruuq chixb’aanunkil jun aj k’anjel sa’ li Iglees chiru li na’leb’ a’in? Li apostol aj Jwan kisumen naq kixye lix nawom chirix li Kolonel: “A’in li naqak’ut xyaalal, li kiwan chalen chaq sa’ xtiklajik, li qab’ihom, li qilom rik’in li qu, li xqaka’ya ut xqach’e’ rik’ineb’ li quq’, li Aatin re li yu’am” (1 Jwan 1:1 jo’ jaltesinb’il ru xb’aan laj Jose Smith). Chirix a’an laj Jwan ki’aatinak chirix li rahok: lix rahom li Dios choq’ qe ut li rahom naqeek’a laa’o choq’ re a’an ut choq’ reheb’ chixjunil li ralal xk’ajol. Chirix chixjunil, laj Jwan kiril chixjunil a’an. A’an kireek’a lix rahom li Kolonel sa’ tib’elej (chi’ilmanq Jwan 13:23; 20:2), ut kiraj naq eb’ laj santil paab’anel te’reek’a ajwi’ li rahom a’an. Lix yehom ut xk’utum laj Jwan chirix li rahok toj jwal aajeleb’ ajwi’ ru sa’eb’ li qakutankil, naq li paab’aal chirix li Jesukristo wech’inb’il rix ut li po’b’il k’utum natam. Rilb’aleb’ lix hu laj Jwan naru nokoxtenq’a chixnumsinkil li yale’k chi anchal qach’ool “sa’ li rahok maak’a’ li xiw, li tz’aqal rahok narisi li xiw” (1 Jwan 4:18).
Li na’leb’ re xtzolb’aleb’ li loq’laj hu aajunes
Li Dios a’an li saqenk, ut li Dios a’an rahok.
Wi ta taasik’ jun malaj wiib’ aatin re xch’olob’ankil xyaalal li Dios, k’a’ raj ru li aatin a’an? Sa’eb’ lix hu, laj Jwan kiroksiheb’ li aatin “saqenk” ut “rahok” (chi’ilmanq 1 Jwan 1:5; 2:8–11; 3:16, 23–24; 4:7–21). Naq nakawil lix b’eenileb’ xhu laj Jwan, tz’il rix li kixk’ul laj Jwan rik’in li saqenk ut lix rahom li Kolonel. Jo’ eetalil, tz’il rix li kixtzol laj Jwan sa’eb’ lix k’utum li Jesus li neke’tawman sa’ Jwan 3:16–17; 12:35–36, 46; 15:9–14; 19:25–27. Ma nakataw xjuntaq’eetil li k’utum a’an rik’in li naxk’ut 1 Jwan chirix li saqenk ut lix rahom li Dios? K’a’ru li xak’ul laa’at li xk’ut chawu naq li Dios a’an saqenk ut rahok?
“Wi naqara qib’ chiqib’il qib’, li Dios nawan qik’in.”
Jo’kan ajwi’ taak’e reetal naq li aatin “wank rajlal” malaj “yalok q’e” najultikaman sa’ chixjunil lix hu laj Jwan. Sik’eb’ li aatin a’an, naq yooqat chirilb’al 1 Jwan 2–4 ut 2 Jwan. K’a’ru naraj naxye “wank rajlal” malaj “yalok q’e” rik’in li Dios ut sa’ lix tzol’leb’? (chi’ilmanq 2 Jwan 1:9). K’a’ru naraj naxye choq’ aawe naq li Dios “wank” aawik’in?
Naru ninwan jo’ li Jesukristo.
Ma chanchan q’axal ch’a’aj choq’ aawe li ajom re wank jo’ li Kristo? K’oxla li raatin laj Jwan re xwaklesinkil aach’ool: “Ex inkok’al, chexwanq rik’in li Kristo chi junelik re naq, jo’q’e tixk’ut rib’, chiwanq xkawub’ qach’ool … ut jo’q’e taak’utunq a’an, chanchanaqo ajwi’ li Dios” (1 Jwan 2:28; 3:2). K’a’ru nakataw sa’ 1 Jwan 2:24–3:3 li naxk’e xkawil aach’ool ut naxk’ojob’ aach’ool jo’ xtzolom li Jesukristo? Naq nakatzoleb’ lix hu laj Jwan, sik’eb’ chik li na’leb’ malaj aatin li te’tenq’anq aawe sa’ xyalb’al aaq’e chi wank jo’ li Kristo.
Chi’ilmanq ajwi’ Moroni 7:48; Tzol’leb’ ut Sumwank 88:67–68; Scott D. Whiting, “Li wank jo’ chanru a’an,” Jolomil ch’utub’aj-ib’ re octubre 2020.
Ma yaal naq “Li Dios maajun sut ki’ile’ xb’aan anihaq”?
JJS, 1 Jwan 4:12 naxye naq “maajun winq x’ilok re li Dios jun sutaq, ka’ajeb’ wi’ li neke’paab’an” (chi’ilmanq ajwi’ Jwan 6:46; 3 Jwan 1:11). Eb’ li loq’laj hu neke’xye resil junjunq sut naq li Dios Yuwa’b’ej kixk’ut rib’ chiru anihaq li tiik chi paab’ank, ut chiru ajwi’ laj Jwan (chi’ilmanq Apokalipsis 4; chi’ilmanq ajwi’ Hechos 7:55–56; 1 Nefi 1:8; Tzol’leb’ ut Sumwank 76:23; Jose Smith—Resilal 1:16–17).
Naq nink’anjela lin paab’aal chirix li Jesukristo ut ninyo’la wi’chik, naru ninq’ax ru li ruchich’och’.
Naq nakawil 1 Jwan 5, sik’ li k’a’ru tento taqab’aanu re xq’axb’al ru li ruchich’och’ ut xk’ulb’al li junelik yu’am. K’a’ru xyaalalil xq’axb’al ru li ruchich’och’ sa’ laa yu’am? Naru taataw xsumenkil li patz’om a’in, ut xkomon chik li na’leb’, sa’ li raatin li Elder Neil L. Andersen, “Numtaak sa’ xb’een li ruchich’och’ ” (Jolomil ch’utub’aj-ib’ re abril 2017).
“Kab’lanqex sa’ xb’een tz’aqal lee loq’laj paab’aal.”
K’aru naxk’ut Judas 1:10–19 chirixeb’ li neke’pleetik rik’in li Dios ut lix k’anjel? K’a’ru nakatzol sa’eb’ li raqal 20–25 chirix xch’olankinkil laa paab’aal rik’in li Jesukristo?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
1 Jwan 2:8–11.Re xtenq’ankileb’ li wankeb’ sa’ laa junkab’al chixk’oxlankil lix k’utum laj Jwan, ch’utub’omaq eerib’ sa’ jun warib’aal chi chupchu li saqen, re naq eb’ li komon naru te’reek’a chan ru li “b’eek sa’ q’ojyin” chiru li “b’eek sa’ saqen.” Chan ru naq li xik’ ilok nokoxk’e chi b’eek sa’ q’ojyin ut chi tichk’ok? Chan ru naq xraab’al qib’ chiqib’il qib’ naxk’am chaq li saqenk sa’ li qayu’am?
-
1 Jwan 3:21–22.K’a’ru wan sa’eb’ li raqal a’in li naxnimob’resi lix “kawub’ qach’ool” chirix li Dios, ut chirix naq nokoru chixk’ulb’al xsumenkil li qatij?
Naq naqapaab’eb’ lix taqlahom li Dios, nokoxtenq’a chixq’axb’al ru li ruchich’och’.
-
1 Jwan 5:2–3.Ma wankeb’ li taqlahom li “aaleb’,” malaj ch’a’aj xpaab’ankil? Chan ru naq li qarahom choq’ re li Dios naxjal li k’a’ru naqeek’a chirixeb’ lix taqlahom?
-
3 Jwan 1:4.K’a’ru naraj naxye “b’eek sa’ li yaal”? Naru nakawoksi li hoonal a’an re xyeeb’al reheb’ li komon sa’ laa junkab’al chan ru aawilomeb’ chi b’eek sa’ li yaal ut lix sahil aach’ool naxk’e a’an. Naru neke’xtz’iib’a malaj neke’xyiib’ xjalam-uuch li yaal xe’xtzol re te’xk’e chiru li tz’ak ut te’xyiib’ jun li b’e b’ar wi’ li junkab’al taaruuq chi b’eek.
-
Judas 1:3–4.Ma wankeb’ li musiq’ejil rahilal li “xe’xch’ik rib’ ” sa’ li qayu’am ut sa’ li qajunkab’al? (Judas 1:4). Chan ru naru taqataaqe li raatin laj Judas naq “taqayal qaq’e chixkolb’al rix li paab’aal” ut taqayal qu rik’ineb’ li rahilal a’in? (Judas 1:3). K’a’ru naru taqab’aanu re naq “taawanq qik’in li uxtaanal, li tuqtuukilal, ut li rahok chi numtajenaq” sa’ li qajunkab’al? (Judas 1:2).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “B’ar wi’ rahok nawan,” B’ichleb’aal choq’ reheb’ li Kok’al, 76–77.
Xkawresinkil aawib’ chi tzolok
Taw lix rahom li Dios. Li Elder M. Russell Ballard kixye, “Li evangelio a’an jun evangelio re rahok—rahok choq’ re li Dios ut choq’ re li qas qiitz’in” (“El amor de Dios y sus creaciones,” Liahona, julio 1988, 58). Naq nakawileb’ ru li loq’laj hu, k’e reetal lix rahom li Dios.
B’ehen wochb’een, xb’aan laj Greg K. Olsen