Li Kristo najultikan aatin sa’ li ruchich’och’ reheb’ li musiq’ej, xb’aan laj Robert T. Barrett

20–26 noviembre

1 ut 2 Pedro

“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”

Naq yookat chirilb’aleb’ lix hu laj Pedro, naru naq taak’ul aamusiq’ankil. Tz’iib’a naq “toj wan li musiq’ej” aawik’in (Tzol’leb’ ut Sumwank 76:80) re naq taataw chi tz’aqal re ru li naxk’ut li Dios.

Tz’iib’a li nakak’oxla

Ka’ch’in chik chirix lix waklijik chi yo’yo, li Kolonel kixye jun li profeetil aatin li maare kichal wi’ xk’a’uxl laj Pedro. Kixye naq laj Pedro taakamq xb’aan lix paab’aal, k’amb’ilaq “b’ar wi’ ink’a’ taaraj xik … , rik’in a’in kixye xyaalal chan ru naq taakamsiiq re xnimankil xloq’al li Dios” (Jwan 21:18–19). Moqon, naq laj Pedro kixtz’iib’aheb’ lix hu, kixnaw naq taanach’oq chaq xkamsinkil: “Ninnaw naq chi seeb’ tinq’ajq tinsutq’iiq, jo’ tz’aqal xk’utb’esi chiwu li Qaawa’ Jesukristo” (2 Pedro 1:14). A’b’anan sa’ li raatin laj Pedro maak’a’ li xiw chi moko li rahil ch’oolejil. Kixye b’an reheb’ laj santil paab’anel naq “k’a’jo’ xsahil eech’ool, us ta toj texrahob’tesiiq chiru jarub’aq kutan rik’in k’iila pay xyalb’al rix lee paab’aal.” Kixye reheb’ naq “li paab’aal li naxkuy li yale’k” tixk’am sa’ “xnimankil lee k’ab’a’, jo’ ajwi’ lee loq’al ut lee roxloq’inkil sa’ lix k’utb’esinkil rib’ li Jesukristo,” ut tixk’am chaq “lee kolb’al” (1 Pedro 1:6–7, 9). Ch’olch’o naq lix paab’aal laj Pedro kixk’ojob’eb’ xch’ool li najteril aj santil paab’anel a’an, jo’ naxk’ojob’eb’ xch’ool laj santil paab’anel sa’ li kutan a’in, xb’aan naq laa’o ajwi’ “yooko chi tz’aqonk sa’ lix rahilal li Kristo, re naq sa’ lix k’utb’esinkil rib’ lix nimal xloq’al, k’a’jo’aq ajwi’ xsahil sa’ qach’ool” (1 Pedro 4:13).

Li na’leb’ re xtzolb’aleb’ li loq’laj hu aajunes

1 Pedro 1:3–9; 2:19–24; 3:14–17; 4:12–19

Naru nintaw xsahil inch’ool sa’ xkutankil li yale’k wix ut li rahilal.

Sa’ li hoonal chirix naq kik’ehe’ chiru krus li Jesukristo, a’an jwal ch’a’aj wank jo’ jun aj Kristiano, ut li xb’een xhu laj Pedro naxch’olob’ a’an. Sa’eb’ li kaahib’ ch’ol sa’ xtiklajik, taak’e reetaleb’ li aatin ut li ch’ol aatin li neke’aatinak chirixeb’ li ch’a’ajkilal: rahob’tesiik, yalb’a-ix, ch’i’ch’i’iik, xam re yale’k, ut eb’ li ch’a’ajkilal (chi’ilmanq 1 Pedro 1:6; 2:19; 4:12–13). A’b’anan, natawman ajwi’ li aatin re sahil ch’oolejil—maare naru taatz’iib’aheb’ reetalil. Naq nakawil 1 Pedro 1:3–9; 2:19–24; 3:14–17; ut 4:12–19, k’a’ru naxk’e aayo’onihom naq naru taataw li sahil ch’oolejil, us ta sa’ xyanqeb’ li ch’a’ajkilal?

Naru nakawil li raatin li Awa’b’ej Russell M. Nelson “Li sahil ch’oolejil ut li kole’k sa’ musiq’ejil” (Jolomil ch’utub’aj-ib’ re octubre 2016) ut taasik’ lix juntaq’eetil li kixk’ut laj Pedro ut li kixk’ut li Awa’b’ej Nelson. K’a’ru wan sa’ li k’uub’anb’il na’leb’ re li kolb’a-ib’ ut lix evangelio li Jesukristo li naxk’e xsahil aach’ool?

Chi’ilmanq ajwi’ Ricardo P. Giménez, “Xtawb’al muheb’aal chiruheb’ li kaq-sut-iq re li yu’am,” Jolomil ch’utub’aj-ib’ re abril 2020.

1 Pedro 3:18–20; 4:1–6

Li evangelio jultikanb’il chiruheb’ li kamenaq re naq taaruuq taaraqe’q aatin chirixeb’ chi tiik.

Sa’ junaq kutan, li junjunq chi kristiaan taawanq chi xaqxo chiru li raqleb’aal aatin ut “toxe’xq’axtesi lix yehom xb’aanuhomeb’ chiru li yo’oon wan chaq chi raqok aatin sa’ xb’eeneb’ li yo’yookeb’ ut li kamenaqeb’ ” (1 Pedro 4:5). Chan ru naq li Dios taaruuq chi raqok aatin chi tiik sa’ xb’eeneb’ chixjunil li tenamit, us ta jalan jalanq naq kik’eeman chiruheb’ xk’ulb’al ut xpaab’ankil li evangelio? K’e reetal chan ru naq li kixk’ut laj Pedro sa’ 1 Pedro 3:18–20; 4:6 natenq’an chixsumenkil li patz’om a’an. Chan ru naq eb’ li raqal a’in neke’xkawob’resi laa paab’aal chirix xtiikal ru xna’leb’ li Dios?

Re xtawb’al chik aana’leb’ chirix li tzol’leb’ a’in, naru taatz’il rix Tzol’leb’ ut Sumwank 138, jun k’utb’esink kixk’ul li Awa’b’ej Joseph F. Smith naq yoo chaq chixk’oxlankil lix tz’iib’ahom laj Pedro. K’a’ru chik li yaal kixtzol li Awa’b’ej Smith?

Chi’ilmanq ajwi’ Temas del Evangelio, “Bautimo por los muertos,” topics.ChurchofJesusChrist.org.

2 Pedro 1:1–11

Rik’in lix wankil li Jesukristo, naru nintz’aqonk sa’ lix yu’am li Dios.

Ma wan naq nakak’oxla naq ink’a’ naru li wank jo’ li Jesukristo, ut xtawb’al lix na’leb’ a’an? Li Elder Robert D. Hales kixye li aatin a’in chirix xk’ulb’al lix na’leb’ li Kristo: “Eb’ lix na’leb’ li Kolonel … kemb’ileb’ rib’ chirib’ileb’ rib’, li jun rik’in li jun chik, ut neke’k’anjelak sa’ komonil. Sa’ jalan chik aatin, ink’a’ naru taqak’ul junaq xna’leb’ li Kristo chi ink’a’ taqak’ul ut taqeek’asi jalan chik. Naq li jun naxk’ul xmetz’ew, naab’aleb’ chik neke’xk’ul ajwi’ ” (“Li wulak jo’ xtzolom li Qaawa’ Jesukristo,” Jolomil ch’utub’aj-ib’ re abril 2017).

Li junjunq chi chaab’ilal re li Kristo li naqak’ul nokoxtenq’a chixkemb’al jun musiq’ejil t’ikr re wank choq’ tzolom.

Naq nakawil 2 Pedro 1:1–11, tz’il rix li na’leb’ “re li choxahil wanjik” li na’ab’iman sa’eb’ li raqal a’in. Jo’ laa nawom, chan ru naq “kemb’ileb’ rib’ chirib’ileb’ rib’ ” lix na’leb’, jo’ naxye li Elder Hales? Chan ru naq li na’leb’ neke’xkab’la rib’ chirib’ileb’ rib’? K’a’ chik ru nakatzol sa’eb’ li raqal a’in chirix li wulak jo’ li Kristo?

Naru ajwi’ nakatz’il rix li “q’axal nim ut ch’ina-usil yeechi’ihom” li naxb’aanu li Dios rik’ineb’ lix santil paab’anel—jo’ choq’ aawe laa’at (2 Pedro 1:4). Li raatin li Elder David A. Bednar, “Li q’axal nim ut ch’ina-usil yeechi’ihom” (Jolomil ch’utub’aj-ib’ re octubre 2017), naru nakatxtenq’a chixtawb’al ru k’a’ruheb’ li yeechi’ihom a’an ut chan ru naru nak’ule’.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

1 Pedro 2:5–10.Naq nakawileb’ ru li raqal a’in sa’ junkab’al, k’oxla roksinkileb’ li pek re xtenq’ankileb’ li komon sa’ li junkab’al chixtawb’al ru li raatin laj Pedro, naq li Kolonel wan choq’ “jun li pek re rub’elankil li kab’l.” Chan ru naq wanko laa’o jo’ “yo’yookil pek,” li yoo li Dios chiroksinkil re xkab’lankil lix awa’b’ejihom? K’a’ru naqatzol rik’in laj Pedro chirix li Kolonel, ut chirix li qak’anjel sa’ lix awab’ejihom? K’a’ru xyaalalil li raatin laj Pedro choq’ re laa junkab’al?

1 Pedro 3:8–17.Chan ru naru naq “yo’oon wanqo chi junelik re xsumenkil chixjunileb’ ” li te’patz’oq chirix li qapaab’aal? Eb’ li wankeb’ sa’ laa junkab’al maare taawulaq chiruheb’ xk’utb’esinkil k’a’ru te’xb’aanu wi wan ani napatz’ok reheb’ chirix li evangelio.

1 Pedro 3:18–20; 4:6.K’a’ru naru neke’xb’aanu laa junkab’al re naq junaqeb’ rik’in lix xe’toon? Maare naru nekeninq’ehi lix chihab’eb’ lee xe’toon li ak kamenaqeb’ rik’in xyiib’ankil li tib’el wa nawulak chiruheb’, rilb’aleb’ lix jalam-uuch, malaj xwotzb’al li seraq’ chirix lix yu’ameb’. Wi naru cheru, naru ajwi’ teek’oxla xk’ulb’al li k’ojob’anb’il k’anjel sa’ xk’ab’a’ li xe’toon a’an sa’ li santil ochoch (re eetenq’ankil, okanqex sa’ FamilySearch.org).

2 Pedro 1:16–21.Sa’eb’ li raqal a’in, laj Pedro naxjultika reheb’ laj santil paab’anel li k’a’ru kixk’ul chaq sa’ xb’een li tzuul ki’ux wi’ li jaltesiik-u (chi’ilmanq ajwi’ Mateo 17:1–9). K’a’ru naqatzol sa’eb’ li raqal a’in chirix lix k’utumeb’ li profeet? (chi’ilmanq ajwi’ Tzol’leb’ ut Sumwank 1:38). K’a’ru naxk’e xkawil qach’ool chixtaaqenkil li qayo’yookil profeet anajwan?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Jun li resilal li qajunkab’al,” B’ichleb’aal choq’ reheb’ li Kok’al}, 100.

Xkawresinkil qib’ jo’ aj k’utunel

“Yo’oon wanqat junelik.” Li hoonal re k’utuk moko k’uub’k’uukeb’ ta neke’nume’ sa’ junpaat, jo’kan naq aajel ru roksinkileb’ chi us naq neke’chal. Chan ru naru taakawresi aawib’ re naq “yo’oon wanqat chi junelik” re xk’utb’al li na’leb’ chiruheb’ li komon sa’ laa junkab’al, ut taawotz “li oyb’enink li wan aawik’in” (1 Pedro 3:15) naq nawulak li hoonal re k’utuk? (Chi’ilmanq Li k’utuk jo’ li Kolonel, 16.)

Us ta maak’a’jo’ li rahob’tesiik ut li hob’e’k kixk’ul laj Pedro, a’an kiwan chi xaqxo junelik sa’ xch’olob’ankil xyaalal li Kristo.