“6–12 noviembre. Hebreos 7–13: “Lix yuwa’il aj tij re li sahilal chalel,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“6–12 noviembre. Hebreos 7–13,” Kim, Taaqehin—Choq’ reheb’ li komon ut li junkab’al: 2023
Laj Melkisedek narosob’tesi laj Abram, xb’aan laj Walter Rane. Xmaatan aj yiib’ahom re
6–12 noviembre
Hebreos 7–13
“Lix yuwa’il aj tij re li sahilal chalel”
Naq yookat chirilb’al Hebreos 7–13, naru naq taak’ul li na’leb’ rik’in li Santil Musiq’ej. K’oxla chan ru nakatru chixtz’iib’ankil; maare naru taatz’iib’a sa’ li tusleb’ aatin a’in, chireheb’ li perel sa’eb’ laa loq’laj hu, malaj sa’ li junaq li hu.
Tz’iib’a li nakak’oxla
Eb’ laj santil paab’anel, us ta tiikeb’ chi paab’ank, wan naq “neke’hob’e’ ut neke’rahob’tesiik,” ut naru neke’laj xkawileb’ xch’ool (chi’ilmanq Hebreos 10:32–38). Laj Pablo kixnaw naq eb’ laj Judio li ke’ok sa’ li Kristianil yookeb’ chixk’ulb’al xnimal li rahob’tesink sa’ xk’ab’a’ lix ak’ paab’aaleb’. Re xwaklesinkileb’ xch’ool re te’kanaaq chi tiik sa’ lix nawomeb’ xch’ool, kixjultika reheb’ xk’ihaleb’ li chaab’il aj paab’anel li wanjenaqeb’ sa’ resil lix tenamiteb’: laj Abel, laj Enok, laj Abraham, li xSarah, laj Jose, laj Moises—“numtajenaq xk’ihaleb’ ” li ke’xch’olob’ xyaalal naq tz’aqal yaal li k’a’ru kixyeechi’i li Dios, ut naq us royb’eninkil (chi’ilmanq Hebreos 11; 12:1). Li resileb’ li chaab’il aj paab’anel wan ajwi’ choq’ aawe. Li paab’aal a’in eechaninb’il xb’aan chixjunileb’ li neke’ril li Jesus jo’ “li nayoob’ank ut nab’eresink re lix paab’aal toj reetal toxtz’aqloq ru” (Hebreos 12:2). Sa’ xk’ab’a’ a’an, naq laj tza naraj naq “taqakanab’ xpaab’ankil,” laa’o nokoru chi “jilok chi anchal qach’ool, chi anchal qapaab’aal” (Hebreos 10:22, 38). Choq’ qe laa’o, jo’ choq’ reheb’ laj santil paab’anel najter, li Jesukristo a’an “yuwa’il aj tij re li sahilal chalel” (Hebreos 9:11).
Li na’leb’ re xtzolb’aleb’ li loq’laj hu aajunes
Li Tijonelil re Melkisedek nak’amok inb’e rik’in li Jesukristo.
Chiru k’iila cient chihab’, eb’ laj Judio ke’k’anjelak rik’in li tijonelil reheb’ laj Levita, a’an li Tijonelil re Aaron yeeb’il re. A’ut rik’in lix tz’aqalil lix evangelio li Jesukristo kichal lix k’ojob’ankil wi’chik li Tijonelil re Melkisedek, li naxyeechi’i li osob’tesink q’axal nim wi’chik ru. K’a’ru nakatzol chirix li Tijonelil re Melkisedek sa’ Hebreos 7? Chi wanq sa’ aach’ool naq li rajom li tz’iib’anb’il hu a’in—jo’ ajwi’ li re chixjunileb’ li loq’laj hu—a’an xkab’lankil li paab’aal chirix li Jesukristo, naru nakajuch’ li raqal li naxch’olob’ xyaalal a’an.
A’in junjunq li na’leb’ naru nakataw:
-
JJS, Hebreos 7:3, 21: Eb’ li k’ojob’anb’ileb’ sa’ li Tijonelil re Melkisedek “k’eeb’ileb’ chanchan li Ralal li Dios,” ut wankeb’ choq’ “aj tij chi junelik.”
-
Hebreos 7:11: Li tijonelil reheb’ laj Levita ink’a’ naxyeechi’i li k’a’ru “tz’aqal re ru,” jo’kan naq li Tijonelil re Melkisedek kixk’ul xna’aj (chi’ilmanq Tzol’leb’ ut Sumwank 84:18–22).
-
Hebreos 7:20–21: Li Tijonelil re Melkisedek nak’ulman rik’in jun li “xaqab’anb’il aatin ut sumwank” (chi’ilmanq Tzol’leb’ ut Sumwank 84:33–44).
K’a’ru li osob’tesink xak’ul xb’aan li Tijonelil re Melkisedek ut li “k’ojob’anb’il k’anjel” li wankeb’ rik’in? (Tzol’leb’ ut Sumwank 84:20). Chan ru nakaxtenq’a li Tijonelil re Melkisedek chi chalk rik’in li Kristo?
Chi’ilmanq ajwi’ Alma 13:1–13; Tzol’leb’ ut Sumwank 121:36–46; Temas del Evangelio,“El Sacerdocio de Melquisedec,” topics.ChurchofJesusChrist.org; K’utul Raqal reheb’ li Loq’laj Hu, “Melkisedek”; Russell M. Nelson, “Li musiq’ejil b’ihomal,” Jolomil ch’utub’aj-ib’ re octubre 2019; Dallin H. Oaks, “Li Tijonelil re Melkisedek ut eb’ li laaw,” Jolomil ch’utub’aj-ib’ re abril 2020.
Eb’ li k’ojob’anb’il k’anjel sa’ najter kutan ut sa’ li kutan a’in neke’k’amok b’e rik’in li Kristo.
Eb’ laj Hebreo li ke’ril ru li hu a’in najter neke’xnaw ru li loq’laj muheb’aal ut eb’ li k’ojob’anb’il k’anjel li yeeb’ileb’ resil xb’aan laj Pablo. A’ut wankeb’ li ink’a’ neke’xtaw ru naq lix yaalalileb’ li k’ojob’anb’il k’anjel a’in, a’an xk’utb’al xyaalal lix mayej li Jesukristo re xtojb’al rix li maak.
Sa’ najter kutan kiwan jun ninq’e rajlal chihab’, lix kutankil lix tojb’al rix maak, naq li taqenaqil aj tij na’ok chaq sa’ li na’ajej q’axal sant sa’ li santil ochoch re Jerusalen, ut naxmayeja jun chib’aat malaj jun karneer re xtojb’al rixeb’ xmaak Israel.
Naq nakawil lix yehom laj Pablo chirix li k’ojob’anb’il k’anjel, sik’eb’ li k’utleb’ ut li eetalil li te’tenq’anq aawe chixtawb’al ru chi us lix k’anjel li Jesukristo re xtojb’al rix li maak.
Li k’ojob’anb’il k’anjel nokotz’aqon wi’ sa’ li qakutankil jalaneb’ sa’ lix kutankil laj Pablo, a’b’an li rajom juntaq’eet. Chan ru naq li k’ojob’anb’il k’anjel sa’ li qakutankil naxch’olob’ xyaalal li Jesukristo?
Re xtzolb’al chik li na’leb’ chirixeb’ li najteril k’ojob’anb’il k’anjel reheb’ laj Judio, ut eb’ li eetalil li wankeb’ chi sa’, che’ilmanq li video “El tabernáculo” ut “El sacrificio y la Santa Cena” (ChurchofJesusChrist.org).
Rik’in li paab’aal, aajel ru xkanab’ankil qib’ chiru lix yeechi’ihom li Dios.
Wi taapatz’manq raj aawe, k’a’ru xyaalalil li paab’aal, k’a’ raj ru taaye? Li Hermana Anne C. Pingree kixtenq’a rib’ rik’in Hebreos 11 re xch’olob’ankil li aatin a’in: “Li musiq’ejil seeb’al re toch’ok ch’oolej re li yeechi’ihom na’ile’ “chi najt” maare ink’a’ taak’ulmanq sa’ li yu’am a’in” (“Mirando de lejos lo prometido,” Liahona, noviembre 2003, 14).
K’oxla k’a’ru xyaalalil li paab’aal choq’ aawe laa’at naq nakak’oxlaheb’ li na’leb’ sa’ Hebreos 11. K’a’ru nakatzol chirix li paab’aal rik’in lix b’aanuhomeb’ li ani yeeb’ileb’ resil sa’ li ch’ol a’in? (Chi’ilmanq ajwi’ Eter 12:6–22.)
K’a’ru li yeechi’ihom nakawil “chi najt”? Chan ru taak’ut chiru li Qaawa’ naq nakapaab’eb’ ut nakak’ulub’a li yeechi’ihom a’an? (Hebreos 11:13).
Chi’ilmanq ajwi’ Alma 32:21, 26–43; Jeffrey R. Holland, “Sumo sacerdote de los bienes venideros,” Liahona, enero 2000, 42–45; Temas del Evangelio, “Fe en Jesucristo,” topics.ChurchofJesusChrist.org.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Hebreos 10:32–36.Naru taapatz’ reheb’ li komon sa’ li junkab’al naq te’xwotz jun hoonal naq ke’reek’a naq “xe’xk’ul lix kutanob’resinkil” rik’in li yaal. Chan ru naq eb’ li k’ulum a’in nokohe’xtenq’a re naq “kawaq qach’ool sa’ li qapaab’aal” sa’ xkutankil lix yalb’al qix malaj naq xkab’ rix qach’ool?
-
Hebreos 11.Chan ru naru taatenq’aheb’ li komon sa’ laa junkab’al re te’xtaw xna’leb’ rik’ineb’ li chaab’il b’aanuhom li yeeb’ileb’ resil sa’ Hebreos 11? Maare te’raj xb’aanunkil jun k’utb’esink chirixeb’ li esilal li yeeb’ileb’ resil aran. Naru nakanumsi rilb’al junqaq reheb’ li seraq’ a’an sa’ Eb’ li Esilal sa’ li Najter Chaq’rab’. Malaj ut naru tex’aatinaq sa’ junkab’al chirix xkomoneb’ chik li chaab’il kristiaan li nawb’ileb’ ru eeb’aan—maare jun lee xe’ eetoon, jun aj b’eresinel sa’ li Iglees, malaj ani nekenaw ru sa’ lee tenamit. Naru ajwi’ nekeb’icha junaq li b’ich chirix li paab’aal, maare “Li paab’aal” (B’ichleb’aal choq’ reheb’ li Kok’al, 50).
-
Hebreos 12:2.Jo’ chanru naxye li raqal a’in, k’a’ut naq li Jesus kiwan xch’ool chixnumsinkil li rahilal ut li kamk chiru li krus? K’a’ru naxk’ut a’in chiqu chiqajunilo chirix xkuyb’al lix yalb’al qix? Li Awa’b’ej Russell M. Nelson kixk’e junjunq li chaab’il na’leb’ chirix li jun raqal a’in sa’ li raatin, “Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016.
-
Hebreos 12:5–11.K’a’ut naq li Qaawa’ nokoxtij ut nokoxq’us? Sa’eb’ li raqal a’in, chan ru naril li tijleb’ li Qaawa’ sa’ li raqal a’in? Chan ru naq eb’ li raqal a’in neke’xjal chan ru naq laa’o tooq’usuq, malaj naq taqak’ul li q’use’k?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Li paab’aal,” B’ichleb’aal choq’ reheb’ li Kok’al, 50.
Xkawresinkil qib’ jo’ aj k’utunel
Oksi li b’ich re xb’oqb’al chaq li Musiq’ej ut re xtzolb’al li tzol’leb’. Li Xb’eenil Awa’b’ejil ke’xye, “Li b’ichank k’a’jo’ naq wan xwankil [chiqeek’asinkil re too’ok] sa’ xnimal chik li musiq’ejil wank” (“Xtikib’ankil xb’aan li Xb’eenil Awa’b’ejil,” Eb’ li B’ich, x). Maare jun li b’ich chirix li paab’aal, maare “Xaqxo toowanq” (Eb’ li B’ich, 164), chaab’ilaq xb’ichankil sa’ aatinak sa’ komonil chirix Hebreos 11.
Eb’ li eetalil ut eb’ li k’ojob’anb’il k’anjel sa’ li najter santil ochoch ke’xk’ut chaq xk’anjel li Jesukristo.