Li b’an re Galahad, xb’aan li xAnnie Henrie

30 octubre–5 noviembre

Hebreos 1–6

Li Jesukristo, “xyo’leb’aal li kolb’a-ib’ ”

Wi nakatz’iib’aheb’ li musiq’ejil na’leb’ nakak’ul, tatxtenq’a chixk’eeb’al reetal li k’a’ru naraj xk’utb’al chawu li Santil Musiq’ej. Wi nakak’anjela li musiq’ejil na’leb’, a’an naxk’ut laa paab’aal naq tz’aqal yaaleb’ li na’leb’ a’an.

Tz’iib’a li nakak’oxla

Chiqajunil wan k’a’ru tento taqaq’axtesi re xk’ulb’al lix evangelio li Jesukristo—li k’a’ru ink’a’ us k’aynaqo chixb’aanunkil, li k’a’ru paab’anb’il li moko yaal ta, li wank sa’ komonil rik’in ani ink’a’ us, malaj jalan chik li na’leb’. Choq’ reheb’ laj Gentil sa’ xtiklajik chaq li Iglees li jalaak ch’oolej a’an xtz’eqtaanankileb’ li jalanil Dios. Choq’ reheb’ laj Hebreo (a’eb’ laj Judio), kich’a’ajko’ chiruheb’ li xjalb’aleb’ xch’ool, maare jwal ch’a’aj. Eb’ a’an ak wank k’a’ru paab’anb’il xb’aaneb’ ut li na’leb’ kanab’anb’il reheb’ chalen najter, jo’ xloq’oninkil li tz’aqal Dios ut li raatineb’ lix profeet chalen chaq k’iila mil chihab’. A’ut eb’ li apostol ke’xk’ut naq lix chaq’rab’ laj Moises ak tz’aqlojenaq ru rik’in li Jesukristo, ut naq ak wan jun li chaq’rab’ taqenaq wi’chik xwankil choq’ reheb’ laj paab’anel. Naq eb’ laj Hebreo te’xk’ulub’a li Kristianil, ma taa’ajmanq raj ru naq te’xkanab’ lix najteril na’leb’, ut li esilal chirix lix tenamiteb’? Li hu reheb’ laj Hebreo kixsik’ xsumenkileb’ li patz’om a’in rik’in xk’utb’al naq wan xwankil lix chaq’rab’ laj Moises, eb’ li profeet, ut eb’ li k’ojob’anb’il k’anjel, a’b’anan nim wi’chik xwankil li Jesukristo (chi’ilmanq Hebreos 1:1–4; 3:1–6; 7:23–28). Relik chi yaal, chixjunileb’ li na’leb’ a’in neke’xjayali ut neke’xch’olob’ xyaalal li Jesukristo jo’ Ralal li Dios, ut jo’ li Mesias li yeechi’inb’il chaq reheb’ laj Judio, ut li yookeb’ chaq chiroyb’eninkil.

Li jalok ch’oolej, jo’ sa’ najter kutan jo’ anajwan, a’an xk’eeb’al li Jesukristo jo’ xyi li qapaab’aal ut li qayu’am. Naraj naxye xchaqb’al qib’ rik’in li yaal ut xtz’eqtaanankil li nanajtob’resink qe rik’in, xb’aan naq a’an “xyo’leb’aal li junelikil kolb’a-ib’ choq’ reheb’ li neke’paab’ank re” (Hebreos 5:9).

Li na’leb’ re xtzolb’aleb’ li loq’laj hu aajunes

Ani kitz’iib’ank re li hu reheb’ laj Hebreo?

Wankeb’ laj tzolonel li neke’xye naq maare maawa’ laj Pablo li kitz’iib’ank re li hu reheb’ laj Hebreo. Jalan wi’ lix k’uub’ankil li hu Hebreos rik’in li jun ch’ol chik chi hu tz’iib’anb’il xb’aan laj Pablo, ut sa’ junjunq reheb’ li najteril tz’iib’ahom, ink’a’ nak’utun ani kitz’iib’ank re. A’b’anan, rik’in naq li na’leb’ yeeb’il sa’ Hebreos naxk’am rib’ rik’in li jun ch’ol chik xk’utum laj Pablo, eb’ laj Santil Paab’anel sa’ Roso’jikeb’ li Kutan, jo’ chanru lix na’leb’eb’ laj Kristiano chalen najter, neke’xk’ulub’a naq laj Pablo kitenq’an chixtz’iib’ankil li hu a’in.

Chi’ilmanq ajwi’ K’utul Raqal reheb’ li Loq’laj Hu, “Pablo, eb’ lix hu.”

Hebreos 1–5

Li Jesukristo a’an “xjalam u lix Diosilal” li qaChoxahil Yuwa’.

Naab’al reheb’ laj Judio ch’a’aj choq’ reheb’ xk’ulub’ankil li Jesukristo jo’ li Ralal li Dios. K’e reetal chan ru naq li tz’iib’anb’il hu choq’ reheb’ laj Hebreo naxch’olob’ xyaalal a’an. Jo’ eetalil, naq nakawil li oob’ ch’ol sa’ xtiklajik li hu, maare us raj taatz’iib’a chi tustu eb’ lix k’ab’a’, lix wankil, lix chaab’ilal, ut lix k’anjel li Jesukristo li tz’iib’anb’ileb’ aran. K’a’ru neke’xk’ut li na’leb’ a’in chawu chirix li Kolonel? K’a’ru neke’xk’ut chawu chirix laa Choxahil Yuwa’?

Chan ru naq li aatin a’in xb’aan li Elder Jeffrey R. Holland nakatxtenq’a chixtawb’al ru li k’a’ru k’utb’il sa’eb’ li ch’ol a’in? “Li Jesus … kichal re xchaab’ilob’resinkil li rilomeb’ li winq chirix li Dios, ut chixtz’aamankil chiruheb’ naq te’xra lix Choxahil Yuwa’ jo’ chanru naq raab’ileb’ xb’aan a’an, ut jo’ chanru naq a’an junelik tixraheb’. … Chi jo’kan, rik’in xk’eeb’al tzakemq reheb’ li te’tz’okaaq, rik’in xk’irtesinkileb’ li yaj, rik’in xch’iilankileb’ laj ka’pak’al-u, rik’in xtz’aamankil naq chiwanq li paab’aal—rik’in a’in li Kristo yoo chixk’utb’al li b’e rik’in li Yuwa’b’ej” (“La grandiosidad de Dios,” Liahona, noviembre 2003, 72).

Hebreos 2:9–18; 4:12–16; 5:7–8

Li Jesukristo kixkuy xnumsinkil chixjunil li k’a’aq re ru, re naq taaruuq chixtawb’al ru li ninnumsi ut tinixtenq’a naq ninnumsi rahilal.

Ma nakaweek’a naq nakatru chi “jilok chi tuqtu aach’ool rub’el roq li wan wi’ li usilal” ut taasik’ li uxtaan? (Hebreos 4:16). Jun esil li natawman sa’ li hu reheb’ laj Hebreo, a’an naq us ta wan qamaak ut qamajelal, naru li jilok rik’in li Dios, ut naru xk’ulb’al li rusilal. K’a’ru nakataw sa’ Hebreos 2:9–18; 4:12–16; 5:7–8 li naxkawob’resi laa ch’ool naq li Jesukristo tatxtenq’a rik’ineb’ li ch’a’ajkilal nakak’ul sa’ li yu’am a’in? K’oxla xtz’iib’ankil sa’ jun li hu li k’a’ru nakak’oxla ut nakaweek’a chirix li k’a’ru xb’aanu li Kolonel choq’ aawe.

Chi’ilmanq ajwi’ Mosiah 3:7–11; Alma 7:11–13; 34; Matthew S. Holland, “Li maatan q’axal nim re li Alalb’ej,” Jolomil ch’utub’aj-ib’ re noviembre 2020.

Hebreos 3:7–4:11

Li rosob’tesihom li Dios wan choq’ reheb’ li “ink’a’ neke’kawob’resink re lix ch’ooleb’.”

Rik’in xyeeb’al resileb’ li najter aj Israelita, laj Pablo kiraj xq’unb’esinkileb’ xch’ool laj Judio naq ink’a’ te’xb’aanu li k’a’ru ke’xb’aanu lix xe’ xtooneb’—a’an xtz’eqtaanankil li rosob’tesihom li Dios xb’aan xmaak’a’il li paab’aal. (Naru nakawil ru li esilal li kixye resil laj Pablo sa’ Numeros 14:1–12, 26–35.)

K’oxla chan ru naq Hebreos 3:7–4:11 naru chatenq’ankil. Re xb’aanunkil a’in, naru taak’oxlaheb’ li patz’om jo’ a’in:

• Chan ru naq eb’ laj Israelita ke’xtik ru li Dios (chi’ilmanq Hebreos 3:8–11). K’a’ru nak’ulman naq kawob’resinb’il qach’ool?

• Jo’q’e xinkanab’ inch’ool chi kawob’resiik? Ma wankeb’ li osob’tesink li naraj li Dios xk’eeb’al we, a’ut ink’a’ yookin chixk’ulb’al xb’aan xmaak’a’il inpaab’aal?

• K’a’ru naru tinb’aanu re naq q’unaq ut tuulanaq inch’ool? (chi’ilmanq Eter 4:15; Proverbios 3:5–6; Alma 5:14–15).

Chi’ilmanq ajwi’ 1 Nefi 2:16; 15:6–11; Jakob 1:7–8; Alma 12:33–36; Neill F. Marriott, “Xq’axtesinkil li qach’ool re li Dios,” Jolomil ch’utub’aj-ib’ re noviembre 2015.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Hebreos 1:8–9.Chan ru naq li Jesus kixk’ut naq naxra li tiikilal, ut naq xik’ naril li maa’usilal? Wi wan rajom li qach’ool li ink’a’ us, k’a’ru naru taqab’aanu re xjalb’al?

Hebreos 2:1–4.Ma naru nakak’oxla jun ch’ina k’anjeleb’aal naru taawoksi re xtenq’ankil laa junkab’al chixtawb’al ru k’a’ru xyaalalil chapok chi kaw chiruheb’ li na’leb’ li xqab’i? Maare naru taak’ut a’in rik’in jun li ch’ina k’anjeleb’aal li ch’a’aj xchapb’al. Chan ru naq xchapb’al li k’anjeleb’aal a’in, chanchan xyalb’al qaq’e chixnimob’resinkil lix nawom qach’ool? Chan ru naru naqak’e reetal naq li “k’a’ru xqab’i” ink’a’ nasach chiqu ut “taqajalb’ehi qib’ ” ut ink’a’ chik tooruuq chi sutq’iik? (raqal 1).

Hebreos 2:9–10.Re aatinak chirix li ch’ol aatin “aj k’amol b’e sa’ li kolb’a-ib’,” naru teetz’il rix k’a’ru naxb’aanu jun aj k’amol b’e. K’a’ru naraj naxye kolb’a-ib’? Chan ru naq li Jesukristo wan choq’ aj k’amol b’e choq’ qe laa’o, ut choq’ re li qakolb’al?

Hebreos 5:1–5.Eb’ li raqal a’in naru nakate’xtenq’a chixtawb’al ru k’a’ru naraj naxye b’oqb’il xb’aan li Dios malaj xb’aan junaq li wan li wankilal rik’in. Rik’in li k’a’ru kixb’aanu li Kristo, k’a’ru naru naqatzol chirix xk’ulb’al ut xb’aanunkil li qab’oqb’al?

“Ut maa’ani naru tixchap li loq’laj k’anjel a’in choq’ re xjunes rib’ ka’aj b’an wi’ li b’oqb’il xb’aan li Dios jo’ laj Aaron” (Hebreos 5:4). Laj Moises naxb’oq laj Aaron sa’ li k’anjel, xb’aan laj Harry Anderson

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Rajlal nawaj aawu,” Eb’ li B’ich, 53.

Xkawresinkil aawib’ chi tzolok

Jalan jalanq li na’leb’ naru nakawoksi. Ink’a’ na’ajman ru naq junelik taatzoleb’ li loq’laj hu chi juntaq’eet ru; naru taayal jalan jalanq li na’leb’ re tzolok. Re xtawb’al junjunq li na’leb’, naru taawil “Li na’leb’ re xchaab’ilob’resinkil lix tzolb’aleb’ li loq’laj hu aajunes” sa’ xtiklajik li hu a’in.

Xsaqenkil li ruchich’och’, xb’aan laj Walter Rane