Li b’an re Galahad, xb’aan li xAnnie Henrie

30 octubre–5 noviembre

Hebreos 1–6

Li Jesukristo, “xyo’leb’aal li kolb’a-ib’ ”

K’a’ru li yaal nakataweb’ sa’ Hebreos 1–6 li nakaweek’a naq taak’ut chiruheb’ li kok’al? K’e reetal li musiq’anb‘il na‘leb‘ nakak’ul rik‘in li Musiq’ej naq nakakawresi aawib’, ut tz’iib’aheb’.

Xkanab’ankileb’ chi wotzok

Ma xe’xk’ulub’a li kok’al li b’oqb’al sa’ xraqik li tzolok sa’ li xamaan xnume’ re xtawb’al jun raqal sa’ li loq’laj hu li naru te’xwotz? Wi jo’kan, k’e xhoonaleb’ chixwotzb’al. Wi ink’a’, tenq’aheb’ chixk’oxankil jun na’leb’ toje’ xe’xtzol sa’ li loq’laj hu li naru te’xwotz.

Xk’utb’al li tzol’leb’: Kok’al toj ka’ch’ineb’ xyu’am

Hebreos 1:1–10; 2:8–10, 17–18

Laa’in ninpaab’ li Jesukristo

Eb’ li raqal a’in naru neke’xtenq’aheb’ li kok’al chixtzolb’al xkomon xna’leb’eb’ chirix li Jesukristo ut chixkawob’resinkil lix wanjikeb’ rik’in a’an.

Kok’ k’anjel naru chi b’aanumank

• Taweb’ li na’leb’ chirix li Jesukristo sa’ Hebreos 1:1–10; 2:8–10, 17–18, ut tz’iib’aheb’ chiru kok’ hu. Muqeb’ li hu sa’ li tzoleb’aal, ut patz’ reheb’ li kok’al naq te’xtaweb’. Tenq’aheb’ li kok’al chirilb’aleb’ li na’leb’ tz’iib’anb’ileb’ chiruheb’ li kok’ hu, ut tz’ilomaq rix k’a’ru naraj xyeeb’al li na’leb’ a’an. Wi na’ajman ru, ch’olob’ naq li Jesus nak’ab’a’iman li Ralal li Dios xb’aan naq li qaChoxahil Yuwa’ a’an lix yuwa’ lix musiq’ jo’ ajwi’ lix junxaqalil.

• K’ut jun xjalam-uuch li Kolonel, ut ye k’a’ut naq nakatb’antioxin chirix a’an. K’e xhoonaleb’ li kok’al chixchapb’al li jalam-uuch ut chixyeeb’al k’a’ut naq neke’b’antioxin chirix li Jesukristo.

Hebreos 3:8

Li qaChoxahil Yuwa’ naraj naq “moko taqakawob’resi ta li qach’ool.”

Hebreos 3 naxye resil naq eb’ laj Israelita ke’xkawob’resi li raameb’ ut ke’xtz’eqtaana li rosob’tesihom li Qaawa’. A’an ajwi’ jun li q’usuk choq’ qe laa’o chiqajunilo re naq ink’a’ taqakawob’resi li qaam.

Kok’ k’anjel naru chi b’aanumank

• K’am sa’ li tzoleb’aal jun k’a’aq re ru naxtz’ub’ li ha’ (mare jun esponja malaj jun t’ikr) ut jun k’a’aq re ru kaw (maare jun li pek). Patz’ reheb’ li kok’al naq te’xch’e’ li k’a’aq re ru a’an ut te’xye chan ru na’eek’aman. K’e junjunq tz’uqul li ha’ chiruheb’ li k’a’aq re ru, ut ye naq li ha’ na’ok chi us sa’ li k’a’aq re ru naxtz’ub’ li ha’ chiru li pek. Ch’olob’ naq li qaam tento naq q’unaq ut ink’a’ kawaq re naq tooruuq chixk’ulub’ankil lix yaal ut lix rahom li qaChoxahil Yuwa’.

• Set jun li aamej chiru t’ikr malaj jalan chik k’a’aq re ru q’un, ut jun chik rik’in karton malaj jalan chik k’a’aq re ru kaw. Aatinan rik’ineb’ li kok’al chirix xjalanil li q’unil aamej ut li kawil aamej. Wotz wiib’ oxib’ li eetalil sa’eb’ li loq’laj hu chirixeb’ li kristiaan li q’uneb’ xch’ool malaj kaweb’ xch’ool, maare laj Nefi, laj Laman, ut laj Lemuel (1 Nefi 2:16–19); laj Pablo (Hechos 9:1–22); malaj laj Jose Smith (Jose Smith—Resilal 1:11–20). Naq yooqat chixwotzb’aleb’ li junjunq chi eetalil, patz’ reheb’ li kok’al naq te’xk’ut chiruq’eb’ li q’unil aamej malaj li kawil aamej.

Laj Aaron “kib’oqe’ xb’aan li Dios” (Hebreos 5:4). Laj Moises naxb’oq laj Aaron sa’ li k’anjel, xb’aan laj Harry Anderson

Hebreos 5:4

Eb’ laj k’amol re li tijonelil b’oqb’ileb’ xb’aan li Dios.

Aajel ru li raqal Hebreos 5:4 xb’aan naq naxch’olob’ naq eb’ laj k’amol re li tijonelil tento naq b’oqb’ileb’ xb’aan li Dios. Yaal ajwi’ a’an choq’ re yalaq ani li b’oqb’il chi k’anjelak sa’ lix Iglees li Qaawa’.

Kok’ k’anjel naru chi b’aanumank

• Yaab’asi Hebreos 5:4 choq’ reheb’ li kok’al. Patz’ re jun li nak’amok re li tijonelil naq tixch’olob’ li tijonelil. Naru ajwi’ tixye chan ru nak’anjelak chiru li ras riitz’in naq naxb’aanu li teneb’anb’il sa’ xb’een. Patz’ ajwi’ re jun li ixq sa’ li teep naq tixye resil naq xk’ojob’aak sa’ jun b’oqok sa’ li Iglees. Waklesi xch’ool chixwotzb’al chan ru naq li Qaawa’ narosob’tesi rik’in li wankilal chixb’aanunkil lix b’oqb’al.

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin re li ro’ xraqalil li paab’aal. Ch’olob’ xyaalal naq eb’ li kristiaan b’oqb’ileb’ chixk’eeb’al chi uxmank lix k’anjel li Dios b’oqb’ileb’ xb’aan a’an rik’in k’utb’esinb’il na’leb’.

Xk’utb’al li tzol’leb’: Kok’al ak ninqeb’

Hebreos 1:1–10; 2:8–10, 17–18

Laa’in ninpaab’ li Jesukristo

Li hu choq’ reheb’ laj Hebreo kitz’iib’aman re xkawob’resinkil lix paab’aaleb’ laj santil p’aab’anel aj Hebreo chirix li Jesukristo. Naru ajwi’ naxb’aanu a’an rik’ineb’ li kok’al nakatzoleb’.

Kok’ k’anjel naru chi b’aanumank

• K’e re li junjunq chi kok’al wiib oxib’ li raqal re Hebreos 1:2–10; 2:8–10, 17–18, ut patz’ reheb’ li kok’al naq te’xxsik’ sa’eb’ li raqal a’an li yaal chirix li Jesukristo. Kanab’eb’ chixwotzb’al malaj chixtz’iib’ankileb’ chiru li pizarron li k’a’ru neke’xtaw. K’a’ chik ru naqanaw chirix li Jesukristo? Eb’ li kok’al naru neke’xtaw li na’leb’ sa’eb’ li b’ich, maare “Ninnaw naq yo’yo inKolonel” (Eb’ li b’ich, 77) malaj “Kixtaqla li Ralal” (B’ichleb’aal choq’ reheb’ li Kok’al, 20–21).

• Patz’ reheb’ li kok’al naq te’xyiib’eb’ xjalam-uucheb’ a’an rik’ineb’ lix na’ xyuwa’eb’. Patz’ reheb’ naq te’xwotz lix juntaq’eetalileb’ rik’ineb’ lix na’ xyuwa’eb’. Ch’olob’ naq yeeb’il sa’ Hebreos 1:3 naq li Jesukristo a’an “xrepom li xnimal xloq’al ut xjalam u li Dios,” ut a’an naraj naxye naq li Jesus ut li qaChoxahil Yuwa’ juntaq’eeteb’ xseeb’al ut xchaab’ilaleb’. Tz’il rix rik’ineb’ li kok’al chan ru naq xtaaqenkil li Jesukristo nokoxnach’ob’resi rik’in li qaChoxahil Yuwa’.

Hebreos 3:7–19

Re xk’ulb’al lix b’eresihom ut li rosob’tesihom li qaChoxahil Yuwa’, tento naq “ink’a’ taqakawob’resi qach’ool.”

Sa’ Hebreos 3, li seraq’ chirixeb’ laj Israelita sa’ li yamyookil ch’och’ na’oksiman re xk’utb’al naq aajel ru naq ink’a’ taqakawob’resi li qaam. Chan ru taawoksi li seraq’ a’an re xk’utb’al chiruheb’ li kok’al re laa tzoleb’aal li na’leb’ a’an?

Kok’ k’anjel naru chi b’aanumank

• Patz’ reheb’ li kok’al naq te’xk’oxla k’a’aq re ru kaw ut q’un. (Wi naru, k’am junjunqeb’ re xk’utb’al chiruheb’.) Ilomaq Hebreos 3:8. K’a’ru naraj naxye wank rik’in jun aamej kawujenaq? K’a’ut naq li Dios naraj naq q’unaq li qaam?

• Rik’in tz’aqal aawaatin, wotz li seraq’ chirixeb’ laj Israelita naq ke’xkawob’resi li raameb’ chiru li Qaawa’ sa’ li yamyookil ch’och’ (chi’ilmanq Numeros 14:1–12; Hebreos 3:7–19). Kanab’eb’ li kok’al chixk’utb’esinkil li seraq’. K’a’ru taak’ulmanq wi naqakawob’resi li qaam rik’in li Qaawa’ ut lix evangelio?

• Patz’ reheb’ li kok’al naq te’ril Mateo 13:15; Hebreos 3:15; Mosiah 11:29; ut Moises 6:27. Patz’ reheb’ naq chiru li pizarron te’xyiib’ xjalam-uucheb’ xcha’alil li junxaqalil li yeeb’ileb’ sa’eb’ li raqal a’an. Sa’ musiq’ej, k’a’ru naraj naxye naq li xikej ink’a’ saqen na’ab’in, naq mutz’ uhej, ut naq kawujenaq li aamej? Chan ru naru naqanaw naq li qaxik, eb’ li qu, ut li qaam kawresinb’ileb’ re rab’inkil lix yaab’ xkux li Musiq’ej?

Hebreos 5:1–4

Eb’ laj k’amol re li tijonelil b’oqb’ileb’ xb’aan li Dios.

Hebreos 5 naxk’e jun li hoonal re xch’olob’ankil k’a’ru li tijonelil—li wankilal re k’anjelak sa’ xk’ab’a’ li Dios—ut chan ru naq nak’ulman.

Kok’ k’anjel naru chi b’aanumank

• K’ut li jalam-uuch Laj Moises naxk’e li tijonelil re laj Aaron (Hu reheb’ li Jalam-uuch re li Evangelio, 15) naq jun ch’ina al yooq chixyaab’asinkil Hebreos 5:4. Ch’olob’ naq li Tijonelil re Aaron kixk’ul xk’ab’a’ rik’in laj Aaron. Tenq’aheb’ li kok’al chixk’oxlankil li teneb’ahom neke’xb’aanu laj k’amol re li Tijonelil re Aaron (maare li kub’sink ha’, rosob’tesinkil ut xjek’inkil li loq’laj wa’ak, ut xb’oqb’aleb’ li ras riitz’in chi chalk rik’in li Kristo; chi’ilmanq Tzol’leb’ ut Sumwank 20:46–48, 59).

• Tenq’aheb’ li kok’al chixk’oxlankil li k’iila paay chan ru naq jun li winq naxk’ul xwankil. Qayehaq, chan ru naq naxk’ul xwankil jun aj k’utunel, jun aj b’anonel, malaj jun aj jolominel tenamit? Chan ru naq li Dios naxk’e lix wankilal? Patz’ reheb’ li kok’al naq te’xk’oxla li patz’om a’an naq yooqeb’ chirilb’al Hebreos 5:4 ut li ro’ xraqalil li paab’aal. Tenq’aheb’ li kok’al chixk’oxlankileb’ li kristiaan sa’ li teep li k’eeb’il reheb’ lix wankilal li Dios—jo’eb’ laj k’amol re li tijonelil, jo’eb’ ajwi’ li winq ut li ixq li neke’k’ojob’aak chi k’anjelak sa’ xb’oqb’aleb’.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz jun raqal re li loq’laj hu, jun b’ich, malaj jun ch’ina k’anjel xe’xtzol sa’ li tzoleb’aal anajwan rik’in lix junkab’aleb’ sa’ li q’ojyin re junkab’al.

Xkawresinkil qib’ jo’ aj k’utunel

Eb’ li kok’al naru neke’xnaw ru lix wankil li Musiq’ej. K’ut chiruheb’ li kok’al naq eb’ li eek’ahom re tuqtuukilal, rahok, ut q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal rik’in li Santil Musiq’ej.