23–29 octubre

1 ut 2 Timoteo; Tito; Filemon

“Chayal aaq’e chixk’amb’al xb’eheb’ laj paab’anel”

Laj Pablo kixk’ut naq “li Santil Hu nak’anjelak … re xtzolb’aleb’ … sa’ li tiikilal” (2 Timoteo 3:16). Naq nakatzoleb’ li hu a’in, k’oxla chan ru naq te’xtenq’aheb’ li kok’al chi wank sa’ tiikilal.

Xkanab’ankileb’ chi wotzok

Patz’ reheb’ li kok’al naq te’aatinaq chirix ani li nawan jo’ chaab’il “aj k’amol xb’eheb’ laj paab’anel” choq’ reheb’ a’an. K’a’ru yookeb’ chixb’aanunkil re wank jo’ jun chaab’il aj k’amol xb’eheb’ li ras riitz’ineb’?

Xk’utb’al li tzol’leb’: Kok’al toj ka’ch’ineb’ xyu’am

1 Timoteo 3:1–2; Tito 1:7–9

Eb’ li obiisp neke’xb’eresi li teep jo’ xmoos li Dios.

Laj Pablo kixk’ut chiru laj Timoteo ut laj Tito naq aajeleb’ ru li obiisp. Chan ru taak’ut chiruheb’ li kok’al k’a’ru naxb’aanu li obiisp? (Jun awa’b’ej re li uq’ej chanchan ajwi’ jun li obiisp.)

Kok’ k’anjel naru chi b’aanumank

• Yiib’ chiru li pizarron jun xjalam-uuch laa obiisp. Patz’ reheb’ li kok’al naq te’xye k’a’ru neke’xnaw chirix li obiisp. Chan ru a’an? K’a’ru naxb’aanu? Chan ru narosob’tesi li teep? (Sa’ 1 Timoteo 3:1–2 ut Tito 1:7–9 neke’yeeman chan ru tento taawanq jun li obiisp.) Naq eb’ li kok’al te’xwotz lix na’leb’eb’, tz’iib’aheb’ chiru kok’ hu ut kanab’eb’ li kok’al chixk’eeb’al chiru li pizarron chixk’atq li jalam-uuch.

• Tz’iib’aheb’ lix k’anjel li obiisp chiruheb’ kok’ hu—xtenq’ankileb’ li kok’al ut eb’ li saaj sa’ li teep, xk’ulb’al li lajetqil ut li mayej re kuyuk sa’, k’ehok b’oqb’il k’anjel, raatinankileb’ li komon, ut xtenq’ankileb’ li wankeb’ rajb’al ru. K’eheb’ li kok’ hu sa’ jun li sek’, ut patz’ reheb’ li kok’al naq te’xxok jun. Chirix a’an tenq’aheb’ li kok’al chixb’aanunkileb’ li k’anjel a’an aawik’in. Ch’olob’ xyaalal naq laa obiisp b’oqb’il xb’aan li Dios.

• Patz’ reheb’ li kok’al naq te’xyiib’ jun xjalam-uuch li obiisp naq yoo chi k’anjelak chiruheb’ li komon re lix teep. Ye reheb’ naq wi neke’raj naru te’xk’e lix jalam-uucheb’ re li obiisp jo’ jun b’antioxihom choq’ re a’an. K’a’ru naru naqab’aanu re xtenq’ankil a’an?

“Maa’ani chitz’eqtaananq aawe sa’ xk’ab’a’ laa saajilal, chayal b’an aaq’e chixk’amb’al xb’eheb’ laj paab’anel” (1 Timoteo 4:12).

1 Timoteo 4:12

Naru nikinwan jo’ “aj k’amol xb’eheb’ laj paab’anel.”

K’a’ru naru nakab’aanu re xwaklesinkileb’ xch’ool li kok’al chi wank jo’ “aj k’amol xb’eheb’ laj paab’anel”?

Kok’ k’anjel naru chi b’aanumank

• B’icha rik’ineb’ li kok’al “Jo’ ninb’aanu, chab’aanu laa’at” (B’ichleb’aal choq’ reheb’ li Kok’al, 147). B’oqeb’ li kok’al chixtaaqenkil li eek’asink-ib’ nakab’aanu laa’at. Kanab’eb’ li kok’al chixk’eeb’aleb’ xhoonal re xb’eresinkileb’ lix komoneb’ sa’ li tzoleb’aal re xtaaqenkileb’ li eek’asink-ib’ te’xb’aanu ajwi’ eb’ a’an. Yaab’asi 1 Timoteo 4:12, ut patz’ reheb’ li kok’al k’a’ru naru te’xb’aanu re wank jo’ chaab’il aj k’amol xb’eheb’ li ras riitz’in.

• Wotz jun aanumsihom b’ar wi’ laa’at xayal wank jo’ jun chaab’il aj k’amol b’e choq’ re jun kristiaan malaj b’ar wi’ naq ani chik xwan jo’ jun chaab’il aj k’amol b’e choq’ aawe (maare a’aneb’ ajwi’ li kok’al sa’ laa tzoleb’aal). B’oqeb’ li kok’al chi wank jo’ chaab’il aj k’amol b’e choq’ reheb’ lix junkab’al ut li ramiiw.

2 Timoteo 3:14–17

Eb’ li loq’laj hu tine’xtenq’a chixtzolb’al li yaal.

Wi naru taatenq’aheb’ li kok’al chixraab’aleb’ li loq’laj hu, li na’leb’ sa’eb’ li loq’laj hu taarosob’tesiheb’ lix yu’am chiru naab’al chihab’.

Kok’ k’anjel naru chi b’aanumank

• K’e chi kutankil jun ch’uut li loq’laj hu, ut tenq’aheb’ li kok’al chixnawb’aleb’ ru rik’in xk’utb’al chiruheb’ li perel re xjolomil aatin re li Santil Hu, re lix Hu laj Mormon, re li Tzol’leb’ ut Sumwank, ut re li Q’ol Nim Xtz’aq. Patz’ re jun li ch’ina al naq tixchapeb’ li tasal hu a’an naq yooqat chixyaab’asinkil 2 Timoteo 3:15–17. Ye reheb’ li kok’al k’a’ut naq nakaraheb’ li loq’laj hu, ut kanab’eb’ li kok’al chixwotzb’al li neke’reek’a.

• Patz’ reheb’ li kok’al naq te’aatinaq chirix jun k’a’aq re ru wan reheb’ jwal aajel ru choq’ reheb’. K’a’ru neke’xb’aanu rik’in? Chan ru neke’ril malaj neke’xk’uula? Kanab’eb’ chixk’eeb’al xhoonaleb’ re xchapb’aleb’ li loq’laj hu ut xb’alq’usinkileb’ li perel rik’in oxloq’. K’a’ru aj-e naqoksiheb’ li loq’laj hu? K’a’ut naq tento te’qoksi rik’in oxloq’? Ch’olob’ xyaalal naq wan sa’eb’ li loq’laj hu li yaal li naraj li qaChoxahil Yuwa’ naq taqanaw.

• Tenq’aheb’ li kok’al chixk’oxlankileb’ eek’asink-ib’ li te’xk’am rib’ rik’ineb’ li b’ich chirixeb’ li loq’laj hu, maare “Tintzol, tink’oxla, tintijoq” (B’ichleb’aal choq’ reheb’ li Kok’al, 66).

Xk’utb’al li tzol’leb’: Kok’al ak ninqeb’

1 Timoteo 4:12

Naru nikinwan jo’ “aj k’amol xb’eheb’ laj paab’anel.”

Laj Timoteo toj saaj chaq re taawanq raj jo’ aj jolominel re li Iglees, a’b’an laj Pablo kiraj xk’eeb’al chixnaw naq toj chi jo’kan naru nawan jo’ jun chaab’il aj k’amol b’e. Naru nakawaklesi xch’ooleb’ li kok’al chi wank jo’ chaab’il aj k’amol xb’eheb’ li ras riitz’in.

Kok’ k’anjel naru chi b’aanumank

• Ilomaq 1 Timoteo 4:12, ut patz’ reheb’ li kok’al naq te’xtaw waqib’ chi na’leb’ kixye laj Pablo li neke’tenq’ank qe chi wank jo’ “aj k’amol xb’eheb’ laj paab’anel.” K’eheb’ li kok’al chi ka’kab’il, ut patz’ re li junjunq chi ch’uut naq te’xk’oxla jun hoonal b’ar wi’ naru neke’wan jo’ chaab’il aj k’amol b’e. Patz’ reheb’ naq te’xk’utb’esi li hoonal a’an choq’ reheb’ lix komon sa’ li tzoleb’aal.

• Patz’ reheb’ li kok’al ma taawulaq raj chiruheb’ xwotzb’al resil junaq numsihom b’ar wi’ xe’xyal wank jo’ jun chaab’il aj k’amol b’e choq’ reheb’ li ras riitz’in. Ye reheb’ chan ru naq a’aneb’ neke’wan jo’ aj k’amol b’e choq’ aawe ut chan ru nakawil laa’at naq yookeb’ chi wank jo’ chaab’il aj k’amol b’e choq’ reheb’ li ras riitz’in.

1 Timoteo 6:7–12

Li junelikil b’ihomal jwal nim xloq’al chiru li tumin.

Li ruchich’och’ jwal naxra li tumin ut li k’a’ru naloq’man rik’in tumin. Chan ru taatenq’aheb’ li kok’al chixkanab’ankil li rilob’aaleb’ ut lix rahomeb’ rik’in li qaChoxahil Yuwa’ ut rik’in li Jesukristo?

Kok’ k’anjel naru chi b’aanumank

• Patz’ reheb’ li kok’al naq te’aatinaq chirix li te’xloq’ raj wi ta wanqeb’ mas naab’al xtumineb’. Il 1 Timoteo 6:7–12 rik’ineb’ li kok’al, ut patz’ reheb’ naq te’xk’os ru li kixk’ut laj Pablo re laj Timoteo chirix li tumin. Chirix a’an, patz’ reheb’ li kok’al naq te’ril wi’chik li raqal 11–12 re xsik’b’al li k’a’ru mas aajel wi’chik ru chiru li tumin jo’ kixye laj Pablo.

• K’eheb’ chi kutankil xjalam-uucheb’ li k’a’aq re ru re ruchich’och’ (maare li tumin, b’atz’uul, malaj numsib’aal hoonal) ut reheb’ li junelikil k’a’aq re ru (jo’eb’ li junkab’al malaj eb’ li santil ochoch). Patz’ reheb’ li kok’al naq te’xtuseb’ li jalam-uuch sa’ wiib’ ch’uut—k’a’aq re ru nokoxnach’ob’resi rik’in li Dios ut k’a’aq re ru naru nokoxnajtob’resi chiru li Kristo wi jwal neke’qara wi’chik chiru li Kristo. K’a’ut naq “lix xe’ chixjunil li maa’usilal a’an li xrahinkil ru li tumin”? Chan ru naq xjayalinkil qib’ rik’in li Jesukristo naxk’e xsahil qach’ool?

2 Timoteo 3:14–17

Li qaChoxahil Yuwa’ kixk’eheb’ qe li loq’laj hu re qatenq’akil chixnawb’al ru li yaal ut li ink’a’ yaal.

Naq yookat chixtzolb’aleb’ li kok’al chirixeb’ li loq’laj hu, sik’ chan ru naru nakawaklesiheb’ xch’ool chixsik’b’aleb’ xnumsihom ajwi’ a’aneb’ rik’in li raatin li Dios.

Kok’ k’anjel naru chi b’aanumank

• Patz’ reheb’ li kok’al naq te’ril 2 Timoteo 3:15–17. K’uteb’ li jalam-uuch li te’reetali jun seraq’ wan sa’eb’ li junjunq chi hu reheb’ li loq’laj hu, ut patz’ reheb’ li kok’al naq te’xsik’ ru jun jalam-uuch ut naq te’xye li seraq’. (Naru nakataweb’ li jalam-uuch sa’ Hu reheb’ li Jalam-uuch re li Evangelio ut sa’ Kim, Taaqehin.) Patz’ reheb’ li kok’al naq te’xwotz k’a’ chik ru neke’xnaw chirix li loq’laj hu a’an. Chan ru naq eb’ li loq’laj hu “neke’xk’e qana’leb’ li nak’amok sa’ li kolb’a-ib’?”

• Wotz jun raqal re li loq’laj hu nawulak chawu malaj jun aanumsihom naq li loq’laj hu xatxtenq’a chixnimob’resinkil aapaab’aal chirix li qaChoxahil Yuwa’ ut li Jesukristo. Patz’ reheb’ li kok’al naq te’xwotz jun raqal nawulak chiruheb’ malaj jun xnumsihomeb’.

• Patz’ re jun li ch’ina al naq tixyaab’asi Moroni 10:4–5. K’a’ru kixyeechi’i laj Moroni sa’eb’ li raqal a’an? Patz’ reheb’ li kok’al chan ru xe’xtaw xnawom xch’ooleb’ naq eb’ li loq’laj hu tz’aqal yaaleb’. Patz’ reheb’ naq te’rileb’ malaj te’rab’iheb’ li loq’laj hu chi kok’ aj xsa’, ut naq te’xpatz’ re li Dios ma yaaleb’.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’aleb’ li k’a’ru xe’xtzol chirixeb’ li loq’laj hu ut naq te’xtaw jun li raqal sa’ li loq’laj hu li naru neke’xwotz sa’ li tzoleb’aal sa’ li xamaan chal re (rik’in xtenq’eb’ lix na’eb’ ut xyuwa’eb’, wi na’ajman ru).

Xkawresinkil qib’ jo’ aj k’utunel

Oksiheb’ li kok’ k’anjel re xb’aanunkil li ajb’il ru. Sa’ xna’aj rilb’aleb’ li tusleb’ aatin a’in jo’ na’leb’ tento taataaqe, oksiheb’ jo’ jun xyo’leb’aal na’leb’ li taatenq’anq aawe re taak’ul aamusiq’ankil naq nakak’oxla li rajomeb’ ru li kok’al nakatzoleb’. Eb’ li kok’ k’anjel naru neke’oksiman re xtzolb’aleb’ li kok’al a’ yaal jarub’ chihab’ wan reheb’.