“2–8 octubre. Efesios: “Re xtz’aqob’resinkileb’ ru laj santil paab’anel,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“2–8 octubre. Efesios,” Kim, Taaqehin—Choq’ re li Tzoleb’aal reheb’ li Kok’al: 2023
2–8 octubre
Efesios
“Re xtz’aqob’resinkileb’ ru laj santil paab’anel”
Naq nakatzol li hu reheb’ laj Efeso, k’oxla b’ar wan reheb’ li na’leb’ taak’ut re rosob’tesinkileb’ li kok’al li nakatzoleb’. Tz’iib’a a’ yaal li na’leb’ nachal sa’ laa k’a’uxl naq yookat chirilb’al ru.
Xkanab’ankileb’ chi wotzok
Ye reheb’ li kok’al naq te’xtzolob’ rib’ sa’ jun li tzol. Tikib’ rik’in li xb’eenil sa’ li tzol, ut k’e xhoonal chixjunileb’ chixwotzb’al k’a’ru xtzol chirix li evangelio chiru lix tzolb’aleb’ li loq’laj hu jo’ junkab’al, sa’ li Tzoleb’aal reheb’ li Kok’al, malaj sa’ junaq chik na’ajej.
Xk’utb’al li tzol’leb’: Kok’al toj ka’ch’ineb’ xyu’am
Eb’ li komon re li Iglees tento te’wanq jo’ ramiiweb’ rib’ ut “rech tenamitileb’ rib’.”
Eb’ li kok’al sa’ laa tzoleb’aal ma chanchaneb’ li “ab’l” malaj chanchaneb’ “rech tenamitileb’ rib’ ” chirib’ileb’ rib’ ut rik’ineb’ li komon sa’ li teep? Tenq’aheb’ chixtawb’al ru naq us ta wankeb’ qajalanil, li Kolonel nokoxtenq’a chi wank sa’ junajil ut chixraab’al qib’ chiqib’il qib’.
Kok’ k’anjel naru chi b’aanumank
-
K’e jun xjalam-uuch li Kolonel sa’ xyi li tzoleb’aal. Ye reheb’ li kok’al naq te’xaqliiq sa’ jalan jalanq na’ajej re li tzoleb’aal re reetalinkileb’ li “ab’l” ut eb’ li “yal aj numel.” Tenq’aheb’ chixtawb’al ru naq eb’ li aatin a’an neke’raj xyeeb’al li kristiaan maji’ naqanaw ru. Naq yookat chixyaab’asinkil Efesios 2:19, patz’ reheb’ naq te’nach’oq rik’in lix jalam-uuch li Kristo toj reetal naq xaqxooqeb’ chixjunileb’. Ye reheb’ naq wi nokonach’ok rik’in li Kolonel, naru nokowan sa’ junajil rik’ineb’ li qas qiitz’in jo’ “qech tenamitil qib’,” malaj qamiiw qib’.
-
Sik’eb’ xjalam-uuch kok’al re jalan jalanq tenamit, ut muqeb’ sa’ li tzoleb’aal. K’e jun xjalam-uuch li Kolonel chi uub’ej sa’ li tzoleb’aal. Patz’ reheb’ li kok’al naq te’xjunaji rib’ sa’ ka’kab’il jo’ misioneereb’ ut naq te’xk’e xhoonaleb’ chixtawb’al xjalam-uuch jun li “ab’l” li naru neke’xk’e chixk’atq lix jalam-uuch li Kolonel. Tenq’aheb’ chixtawb’al ru naq eb’ li kristiaan li neke’kub’e xha’ neke’ok jo’ xcha’al li qajunkab’al sa’ li iglees, malaj lix “junkab’al li Dios.” Chan ru naru naqatenq’a li ani toj ak’ re taareek’a naq k’ulb’il chi chaab’il?
Li qaChoxahil Yuwa’ naraj naq tin’ab’inq chiruheb’ lin na’ inyuwa’.
Naq yookat chirilb’al Efesios 6:1–3, k’oxla chan ru naru nakatenq’aheb’ li kok’al chixtawb’al ru k’a’ut naq aajel ru naq te’ab’inq chiruheb’ lix na’ xyuwa’.
Kok’ k’anjel naru chi b’aanumank
-
Yaab’asi Efesios 6:1 sa’ li tzoleb’aal, malaj tenq’a jun li ch’ina al chixyaab’asinkil. Tenq’aheb’ chixk’oxlankil li hoonal b’ar wi’ xe’ab’in chiruheb’ lix na’ xyuwa’. Patz’ reheb’ naq te’xye chan ru xe’osob’tesiik naq xe’ab’in, ut k’a’ru xe’reek’a naq xe’ab’in. K’a’ut naq aajel ru ab’ink chiruheb’ li qana’ qayuwa’?
-
B’ichahomaq jun li b’ich chirix li ab’ink, maare “Tikto tinb’aanu” (B’ichleb’aal choq’ reheb’ li Kok’al, 71). K’anab’eb’ li kok’al chixyeeb’al li k’a’ru neke’xpatz’ xna’ xyuwa’eb’ reheb’, ut patz’ reheb’ naq te’xk’utb’esi xb’aanunkil li patz’b’il.
-
K’ut jun xjalam-uuch lix kub’iha’ li Jesukristo (chi’ilmanq Hu reheb’ li Jalam-uuch re li Evangelio, 35), ut ye chan ru naq li Kolonel ki’ab’in chiru lix Choxahil Yuwa’ naq kikub’e xha’ (chi’ilmanq 2 Nefi 31:6–7). Wotz jun aanumsihom b’ar wi’ xat-ab’in chiruheb’ laa na’ aayuwa’ ut xat-osob’tesiik. K’a’ut naq li qaChoxahil Yuwa’ naraj naq too’ab’inq chiruheb’ li qana’ qayuwa’?
Li kolb’a-ib’ aq’ej re li Dios naru naxkol wix chiru li ink’a’ us.
Chan ru taatenq’aheb’ li kok’al chixtawb’al ru naq lix b’aanunkil li us a’an chanchan xk’eeb’al chirixeb’ li kolb’a-ib’ aq’ej?
Kok’ k’anjel naru chi b’aanumank
-
K’ut xjalam-uuch jun li kristiaan li wan xkolb’a-ib’ aq’ej chirix, jo’ li wan sa’ li perel re kok’ k’anjel re li xamaan a’in malaj sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Naq yookat chixk’osb’al ru Efesios 6:10–18, k’ut chiruheb’ li kok’al chan ru naq li jalan jalanq xcha’alil li kolb’a-ib’ aq’ej naxkol li jalan jalanq xcha’alil li qajunxaqalil. (Chi’ilmanq “Toda la armadura de Dios”, Liahona, junio 2016, 70–71.)
-
K’am k’iila k’a’aq re ru sa’ li tzoleb’aal li neke’reetali lix cha’aleb’ li kolb’a-ib’ t’ikr li nayeeman sa’ Efesios 6:14–17 (maare jun li punit malaj jun li ramleb’ sa’), malaj yiib’eb’ xcha’alil li kolb’a-ib’ t’ikr chiruheb’ kok’ hu. Kanab’eb’ li kok’al chixk’eeb’al chirixeb’ li “kolb’a-ib’ aq’ej.” Tenq’aheb’ chixtawb’al ru chan ru naqak’e chiqix li kolb’a-ib’ aq’ej re li Dios (naq naqatzoleb’ li loq’laj hu, naq nokok’anjelak chiruheb’ li qas qiitz’in, naq nokotijok, naq noko’ab’in, ut wankeb’ chik xkomon). Tz’ilomaq rix chan ru naq eb’ li k’a’aq re ru a’an neke’xkol qix chiru li maa’us.
Xk’utb’al li tzol’leb’: Kok’al ak ninqeb’
“Qech tenamitil qib’ ” sa’ lix junkab’al li Dios.
Eb’ li kok’al neke’kawob’resiik naq wankeb’ xchaab’il amiiw sa’ li evangelio. Chan ru taatenq’aheb’ chi ok jo’ chaab’il amiiw chirib’ileb’ rib’?
“Qech tenamitil qib’ ” rik’ineb’ laj santil paab’anel re li Dios.
Kok’ k’anjel naru chi b’aanumank
-
Ilomaq Efesios 2:19, ut k’oxlanqex chirix li naraj naxye wank jo’ ab’l malaj aj numel. Wotz jun aanumsihom b’ar wi’ aaweek’ahom naq chanchanat jun ab’l malaj aj numel ut naq junaq xatxtenq’a chireek’ankil naq k’ulb’ilat ut k’ulub’ejat. Patz’ reheb’ li kok’al naq te’xwotz xnumsihomeb’ kama’an ajwi’. K’a’ru naru naqab’aanu re wulak chi wank jo’ “qech tenamitil qib’ ” ut ink’a’ wank jo’ ab’l? Ma wankeb’ li kok’al sa’ laa tzoleb’aal ink’a’ neke’wulak rajlal, maare xb’aan naq neke’reek’a naq chanchaneb’ ab’l? Tenq’aheb’ li kok’al chixk’uub’ankil chan ru te’xtenq’aheb’ li komon a’an chireek’ankil naq k’ulb’ileb’ ut raab’ileb’.
-
Re xtenq’ankileb’ li kok’al re te’wanq chi mas wi’chik sa’ junajil, tz’iib’aheb’ junjunq li patz’om chiru li pizarron li taak’amoq reheb’ chixwotzb’al k’a’ruhaq chirixeb’ a’an, maare Jo’q’e aak’ulum xsumenkil junaq aatij? malaj K’a’ru li jwal nawulak chawu xb’aanunkil rik’in laa junkab’al? Ch’utub’eb’ li kok’al sa’ ka’kab’il, ut b’oqeb’ chixpatz’b’aleb’ rib’ chirib’ileb’ rib’. K’a’ru xqatzol chiqix chiqib’il qib’?
Li qaChoxahil Yuwa’ naraj naq tin’ab’inq chiruheb’ ut tinwoxloq’iheb’ lin na’ inyuwa’.
K’oxla chan ru naru nakatenq’aheb’ li kok’al chixtawb’al ru k’a’ut naq aajel ru ab’ink chiruheb’ lix na’ xyuwa’.
Kok’ k’anjel naru chi b’aanumank
-
Patz’ reheb’ li kok’al naq te’ril Efesios 6:1–3 xjuneseb’ ut chixtawb’aleb’ ch’ol aatin li te’wulaq chiruheb’. Patz’ reheb’ naq te’xwotzeb’ li ch’ol aatin a’an ut k’a’ut neke’xk’oxla naq aajeleb’ ru.
-
Tenq’aheb’ li kok’al chixtawb’al ut chixwotzb’al reetalileb’ kristiaan sa’ li loq’laj hu li ke’ab’in chiru ut ke’roxloqi lix na’ xyuwa’eb’, jo’ li Kolonel (chi’ilmanq Lukas 2:42–52), li xRut (chi’ilmanq Rut 1), malaj laj Nefi (chi’ilmanq 1 Nefi 3:1–8). K’a’ut naq aajel ru ab’ink chiruheb’ ut roxloq’inkileb’ li qana’ qayuwa’?
-
Ke’ re li junjunq chi kok’al jun li perel hu b’ar wi’ tz’iib’anb’ilaq li aatin oxloq’ink. K’oxlahomaq k’a’ru naraj naxye li aatin a’an. Patz’ reheb’ li kok’al naq te’xtz’iib’a malaj te’xyiib’ jun xjalam-uuch k’a’ru naru neke’xb’aanu re xk’utb’al naq neke’roxloq’i lix na’ xyuwa’eb’.
Li kolb’a-ib’ aq’ej re li Dios naru naxkol wix chiru li ink’a’ us.
Naq yookat chirilb’al Efesios 6:10–18, k’oxla junjunq reheb’ li k’a’ru xiwxiw sa’ musiq’ej li naru neke’xtaw li kok’al ut chan ru naru nakatenq’aheb’ li kok’al chixkawresinkileb’ rib’ rik’in a’an.
Kok’ k’anjel naru chi b’aanumank
-
Naq jun li ch’ina al yooq chixyaab’asinkil Efesios 6:10–18, patz’ re jun chik li ch’ina al naq tixtz’iib’a malaj tixyiib’ xjalam-uucheb’ lix cha’al li kolb’a-ib’ aq’ej li taayeemanq chiru li pizarron. K’a’ut naq jwal aajel ru li kolb’a-ib’ aq’ej sa’ li pleet? Chan ru naru naqoksi li musiq’ejil kolb’a-ib’ aq’ej rajlal kutan?
-
K’e jun xcha’al li kolb’a-ib’ aq’ej li nach’olob’aman sa’ Efesios 6:14–17 re li junjunq chi kok’al re tixyiib’ xjalam-uuch. Chan ru naq eb’ lix cha’al li kolb’a-ib’ aq’ej a’an naru nokohe’xkol chiru li ink’a’ us? K’a’ru naxyeechi’i li Qaawa’ reheb’ li neke’roksi li kolb’a-ib’ aq’ej re li Dios? (chi’ilmanq Efesios 6:13). K’a’ru naraj naxye “teeram chiruheb’ li maa’us aj kutan”?
Xb’oqb’aleb’ chi tzolok sa’ kab’l
B’oqeb’ li kok’al chixk’eeb’al reetal chiru li xamaan a’in ma wan junaq li nareek’a naq yal ab’l. B’oqeb’ chixb’aanunkil jun k’anjel re xye’b’al li ruq’eb’ re li kristiaan a’an.
Xkawresinkil qib’ jo’ aj k’utunel
Tenq’aheb’ li kok’al toj ka’ch’ineb’ xyu’am chi tzolok sa’eb’ li loq’laj hu. Eb’ li kok’al toj ka’ch’ineb’ xyu’am naru neke’tzolok sa’eb’ li loq’laj hu, a’b’anan maare te’xtzol jun ajwi’ li raqal malaj jun ajwi’ li ch’ol aatin aajel ru. Naru nakapatz’ reheb’ li kok’al naq te’xaqliiq naq te’rab’i jun aatin malaj ch’ol aatin taaye reheb’. (Chi’ilmanq Li k’utuk jo’ li Kolonel, 25–26.)