“2–8 octubre. Efesios: “Re xtz’aqob’resinkileb’ ru laj santil paab’anel,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“2–8 octubre. Efesios,” Kim, Taaqehin—Choq’ reheb’ li komon ut li junkab’al: 2023
2–8 octubre
Efesios
“Re xtz’aqob’resinkileb’ ru laj santil paab’anel”
Ma nakawil chan ru naq lix hu laj Pablo reheb’ laj Efesio na’aatinak chirix li aatin na’ab’iman sa’ li jolomil ch’utub’aj-ib’?
Tz’iib’a li nakak’oxla
Naq kiwulak li evangelio aran Efeso, “maaka’ch’in li mululij-ib’ ” (Hechos 19:23) kiwan sa’ xyanqeb’ laj Efesio. Eb’ laj yiib’anel ch’iich’ li neke’yiib’ank re kok’ ochoch ch’iich’ choq’ re jun pak’b’il dios ke’xk’oxla naq xb’aan li Kristianil te’oso’q lix trab’aaj, ut sa’ junpaat “k’a’jo’ naq ke’josq’o’k, … ut li tenamit q’axal ke’xtzukle rib’ lix k’a’uxleb’ ” (chi’ilmanq Hechos 19:27–29). K’oxla chan ru li wank jo’ ak’ aj paab’anel sa’ li evangelio naq yoo chi k’ulmank a’an. Naab’aleb’ laj Efesio ke’xk’ul ut ke’xyu’ami li evangelio sa’ xyi li “mululij-ib’ ” a’in (Hechos 19:40), ut laj Pablo kixye reheb’ naq “li Kristo a’an li qatuqtuukilal” (Efesios 2:13–14). Li aatin a’in, jo’ ajwi’ li raatin laj Pablo naq “chixjunil li k’ahink, josq’il, po’ok ch’oolej, choqink, majewank, isinb’ilaq taxaq eerik’in” (Efesios 4:31), toj wankeb’ xwankil sa’ li kutan a’in, jo’ chanru ajwi’ sa’ najter kutan. Choq’ reheb’ laj Efeso, jo’ ajwi’ choq’ qe laao, li wankilal re xyalb’al aawu rik’in li maa’usilal nachal rik’in “lix nimal xwankil li Qaawa’ ” (chi’ilmanq Efesios 6:10–13).
Li na’leb’ re xtzolb’aleb’ li loq’laj hu aajunes
Li Dios kixsik’ wu, malaj kinixk’ojob’ chi junxilaj, re xb’aanunkil junaq k’anjel arin sa’ li ruchich’och’.
Laj Pablo kixye naq eb’ laj santil paab’anel “sik’b’ileb’ ru chi junxilaj jo’ chanru ki’alaak sa’ xch’ool li Dios … rub’elaj xk’ojlajik li ruchich’och’,” re te’wanq choq’ xtenamit. A’b’anan, jo’ kixye li Awa’b’ej Henry B. Eyring, a’in moko naraj ta xyeeb’al “naq li Dios ak xye chi junxilaj aniheb’ li tixkol ut kixtaqla li evangelio choq’ reheb’, ut naq li jun siireb’ chik li ink’a’ xe’rab’i maawa’eb’ li “sik’b’ileb’ ru.” … Lix na’leb’ li Dios jwal nim wi’chik xrahom ut xtiikilal. Li qaYuwa’ naraj xch’utub’ankil ut rosob’tesinkil chixjunil lix junkab’al” (“Xch’utub’ankil lix junkab’al li Dios,” Jolomil ch’utub’aj-ib’ re abril 2017). Chixjunileb’ li ralal xk’ajol li Dios neke’ru chixk’ulb’al li evangelio ut lix k’ojob’anb’il k’anjel, sa’ xk’ab’a’ li k’anjel nab’aanuman choq’ reheb’ li kamenaq sa’eb’ li santil ochoch.
Us ta maajun ak xaqab’anb’il re xk’ulb’al malaj re ink’a’ xk’ulb’al li kole’k, rik’in li na’leb’ k’utb’esinb’il sa’ roso’jikeb’ li kutan, nak’ute’ chiqu naq wankeb’ li ralal xk’ajol li Dios li “ke’k’ojob’aak chi junxilaj,” naq maji’ neke’yo’la, re xb’aanunkil lix k’anjel li Dios arin sa’ li ruchich’och’. Naq nakawil Efesios 1 ut Temas del Evangelio, “Preordenación” (topics.ChurchofJesusChrist.org), k’oxla chan ru naq li yaal a’an naru chatenq’ankil.
Li Dios “tixxaqab’ li Kristo chixjolominkil chixjunil li wank.”
K’a’ut naq li qakutankil yeeb’il re “lix k’ojlajik lix tz’aqalil ru li kutan”? K’a’ru naraj naxye “xxaqab’ankil li Kristo chi xjolomil chixjunil”? Naq yookat chixk’oxlankileb’ li ch’ol aatin a’in, il ru eb’ li raqal a’in: Efesios 4:13; 2 Nefi 30:7–8; Tzol’leb’ ut Sumwank 110:11–16; 112:30–32; 128:18–21. Maare musiq’anb’ilaqat chixtz’iib’ankil k’a’ru nakak’oxla chirixeb’ li ch’ol aatin a’in.
Chi’ilmanq ajwi’ Elder David A. Bednar, “Xxaqab’ankil li Kristo chi xjolomil chixjunil,” Jolomil ch’utub’aj-ib’ re octubre 2018.
Efesios 2:19–22; 3:1–7; 4:11–16
Li Iglees wan chi k’ojob’anb’il sa’ xb’eeneb’ li apostol ut li profeet, ut li Jesukristo wan sa’ xnimal ru pek sa’ xxuk.
Jo’ chanru naxye sa’ Efesios 2:19–22; 3:1–7; 4:11–16, k’a’ut naq wankeb’ qik’in li apostol ut profeet? K’oxlan chirixeb’ li raatin li apostol ut li profeet li xawab’i sa’ li jolomil ch’utub’aj-ib’. Chan ru naq lix k’utumeb’ naxtz’aqob’resi ru li tz’iib’anb’il xb’aan laj Pablo? Jo’ eetalil, chan ru naq li raatineb’ a’an xatxtenq’a re naq ink’a’ “k’amb’ilaqat xb’aan li iq’ yalaq b’ar xb’aan k’a’aq re ru chi na’leb’il”?
Chan ru naq li Jesukristo wan sa’ xnimal ru pek sa’ xxuk li Iglees? Chan ru naq a’an wan choq’ xnimal ru pek sa’ xxuk laa yu’am?
Chi’ilmanq ajwi’ Hechos 4:10–12.
Li Jesukristo a’an li xnimal ru pek re li Iglees.
Xtaaqenkil lix b’aanuhom li Kolonel naru chixkawob’resinkil li wank sa’ lin junkab’al.
Naq nakawil Efesios 5:21–6:4, k’oxla chan ru naq li na’leb’ re li raqal a’in naru chixkawob’resinkil li wank sa’ laa junkab’al.
Aajel ru xk’eeb’al reetal naq li raatin laj Pablo sa’ Efesios 5:22–24 kitz’iib’aman jo’ chanru li na’leb’ sa’ li tenamit ut sa’ li kutan kiwan wi’. Eb’ li apostol ut li profeet sa’ li kutan a’in neke’xk’ut naq eb’ li winq moko ninqeb’ ta wi’chik xwankil chiruheb’ li ixq, ut naq li b’eelomej ut li ixaqilb’ej tento te’wanq “jo’ rochb’eeneb’ rib’ chi junaqikeb’ xwankil,” (chi’ilmanq “Li Junkab’al: Jun jek’inb’il aatin choq’ re li ruchich’och’,” ChurchofJesusChrist.org). Toj naru nakataw aana’leb’ sa’ Efesios 5:25–33. Jo’ jun eetalil, chan ru naq li Kristo naxk’ut lix rahom choq’ reheb’ laj santil paab’anel? K’a’ru naraj xyeeb’al naq li b’eelomej ut li ixaqilb’ej tento wanqeb’ sa’ aatin chirib’ileb’ rib’, jo’ rochb’eeneb’ rib’? K’a’ru li na’leb’ nakatzol li taak’anjelaq choq’ aawe laa’at sa’eb’ li raqal a’in?
Li kolb’a-ib’ aq’ej re li Dios nikinxkol chiru li maa’usilal.
Naq nakawil Efesios 6:10–18, k’oxla k’a’ut naq laj Pablo kixk’e xk’ab’a’ li junjunq cha’al re li kolb’a-ib’ aq’ej jo’ chanru wankeb’ aran. K’a’ru nakatxkol wi’ li xtiqib’ankil aawib’ rik’in “chixjunil lix k’anjeleb’aal li Dios”? K’a’ru naru nakab’aanu re xk’eeb’al chawix chi tz’aqal li junjunq cha’al re li kolb’a-ib’ aq’ej?
Chi’ilmanq ajwi’ 2 Nefi 1:23; Tzol’leb’ ut Sumwank 27:15–18.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Efesios 1:10.Re k’utuk chirix li raqal a’in, li Elder David A. Bednar kiroksi jun eetalil rik’in li k’aam (chi’ilmanq “Xxaqab’ankil li Kristo chi xjolomil chixjunil”). Naru taak’ut jun li k’aam chiruheb’ li komon re laa junkab’al, ut taak’eheb’ chixchapb’al ut chirilb’al naq yooqat chixwotzb’al xraqalil li raatin li Elder Bednar. Chan ru naq li Dios naxch’utub’ chixjunil li k’a’aq re ru rik’in li Kristo? Chan ru naq osob’tesinb’ilo xb’aan li ch’utub’ank a’in?
-
Efesios 2:4–10; 3:14–21.B’oqeb’ li komon sa’ li junkab’al chixwotzb’al jo’q’e xe’reek’a lix rahom ut li ruxtaan li Dios ut li Jesukristo, jo’ yeeb’il resil sa’eb’ li raqal a’in.
-
Efesios 2:12–19.Maare taawulaq chiruheb’ li kok’al sa’ laa junkab’al xyiib’ankileb’ li tz’ak rik’in sok, malaj k’a’aq chik re ru wan sa’ laa wochoch, ut xrumb’al wi’chik. Laj Pablo na’aatinak chirix li “ramleb’ ” rik’ineb’ laj Gentil ut laj Judio; k’a’ru li ramleb’ najachok reheb’ li kristiaan anajwan? Chan ru naq li Jesukristo xt’aneb’ li ramleb’ a’an? Chan ru naxk’e chi’uxmank “naq taqak’am qib’ sa’ usilal rik’in li Dios? (raqal 16).
-
Efesios 6:10–18.Maare eb’ li wankeb’ sa’ laa junkab’al te’ruuq chixyiib’ankil lix “k’anjeleb’aal li Dios” rik’in li k’a’aq re ru wan sa’ kab’l. Li video “Toda la armadura de Dios” (ChurchofJesusChrist.org) naru tixtenq’aheb’ li komon chixtawb’al xyaalal li kolb’a-ib’ aq’ej a’in, ut naru te’xtaw ajwi’ li na’leb’ sa’ “Toda la armadura de Dios” (Liahona, junio 2016, 70–71). Chan ru naq li junjunq cha’al re li kolb’a-ib’ aq’ej naxkol qix sa’ musiq’ej? K’a’ru naru taqab’aanu re xtenq’ankil qib’ “chixtiqib’ankil qib’ rik’in chixjunil lix k’anjeleb’aal li Dios” (Efesios 6:11) wulaj wulaj?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Xyo’onihom laj Israel,” Eb’ li B’ich, 167.
Xkawresinkil aawib’ chi tzolok
Kanab’ li Musiq’ej chixk’amb’al aab’e sa’ li tzolok. Ab’in chiru li Musiq’ej naq naxk’am aab’e rik’in li k’a’ru tento taatzol wulaj wulaj, us ta nakatxk’am sa’ jun na’leb’ li ink’a’ xak’oxla xtzolb’al.
Xtiqib’ankil qib’ rik’in lix k’anjeleb’aal li Dios naru naxkol rix li qamusiq’.