9–15 octubre

Filipenses; Kolosenses

“Chixjunil ninkuy xnumsinkil sa’ xk’ab’a’ li nak’ehok xkawub’ inch’ool”

Ma xwan naq xanumsi wi’chik li musiq’anb’il na’leb’ xatz’iib’a naq yookat chixtzolb’al li Ak’ Chaq’rab’? Maare us raj xnumsinkil wi’chik li musiq’anb’il na’leb’ xak’ul.

Xtz’iib’ankil li nakak’oxla

Laj Pablo kixtz’iib’a lix hu reheb’ laj Filipenses ut reheb’ laj Kolosenses naq kiwan sa’ tz’alam aran Roma. A’ut sa’eb’ li hu a’in wan jun kawil ch’oolej li ink’a’ mas na’ilman rik’in junaq li wan sa’ tz’alam. Laj Pablo mas wi’chik ki’aatinak chirix li sahil ch’oolejil, li sahilal, ut li b’antioxink, chiru li kixtz’iib’a chirixeb’ li ch’a’ajkilal ut lix yalb’al rix: “Napuktesiman resil li Kristo,” chan, “a’in nasaho’k wi’ inch’ool, ut taasaho’q ajwi’ chi junelik” (Filipenses 1:18). Ut “us ta maa’anihin chaq sa’ eeyanq chi winqilal, a’b’an sa’ musiq’ej wankin eerik’in; k’a’jo’ naq ninsaho’k chirilb’al … lix kawilal lee paab’aal chirix li Kristo” (Kolosenses 2:5). Ch’olch’o naq “li tuqtuukil usilal li nachal rik’in li Dios,” li kixk’ul laj Pablo sa’ xyi lix ch’a’ajkilal, “naxq’ax ru chixjunil li na’leb’ ” (Filipenses 4:7), ut a’an kik’ulman chi yaal. Sa’ xyi li qach’a’ajkilal laa’o, naru naqeek’a li tuqtuukilal a’in, ut “junelik toosaho’q rik’in li Qaawa’ ” (Filipenses 4:4). Laa’o, jo’ laj Pablo, naru naqakanab’ qib’ chi tz’aqal chiru li Jesukristo, “li naqataw wi’ qakolb’al” (Kolosenses 1:14). Naru naqaye, jo’ laj Pablo, “Chixjunil ninkuy xnumsinkil sa’ xkab’a’ li Kristo li nak’ehok xkawub’ inch’ool” (Filipenses 4:13; chi’ilmanq ajwi’ Kolosenses 1:11).

Li na’leb’ re xtzolb’aleb’ li loq’laj hu aajunes

Filipenses 2:5–11; Kolosenses 1:12–23

Lin paab’aal k’ojob’anb’il sa’ xb’een li Jesukristo.

Li Awa’b’ej Russell M. Nelson kixye naq sa’ xsik’b’aleb’ li raqal sa’ li loq’laj hu li neke’aatinak chirix li Jesukristo, a’in jwal kitoch’e’ xch’ool ut kireek’a naq a’an “jun jalanil winq!” (“Roksinkil lix wankil li Jesukristo sa’ li qayu’am,” Jolomil ch’utub’aj-ib’ re abril 2017). Naru taataaqe lix b’aanuhom naq nakawil Filipenses ut Kolosenses (chi’ilmanq tz’aqal Filipenses 2:5–11; Kolosenses 1:12–23). K’a’ru nakatzol chirix li Kolonel? Chan ru naq eb’ li yaal a’in naru nakate’xtenq’a chi wulaj jo’ “jun jalanil winq” malaj ixq?

Filipenses 2:12–13

Ma naru naqak’ul li qakolb’al rik’in li qak’anjel?

Wankeb’ li neke’xk’oxla naq li aatin “chekanjela lee kolb’a-ib’ ” (Filipenses 2:12) naraj naxye naq nokokole’ ka’ajwi’ rik’in xyalb’al qaq’e. Wankeb’ chik neke’roksi lix k’utum laj Pablo, “kolb’ilex xb’aan rusilal li Dios sa’ xk’ab’a’ li paab’aal” (Efesios 2:8), re xk’eeb’al chi nawe’k naq ink’a’ na’ajman junaq k’anjel re kole’k. A’b’anan, sa’eb’ li loq’laj hu, ut sa’eb’ lix tz’iib’ahom laj Pablo, k’utb’il chi saqen ru naq na’ajman ru li rusilal li Jesukristo jo’ ajwi’ li qak’anjel laa’o re taaruuq taqak’ul li qakolb’al. Ut us ta nokok’anjelak re xkulb’al li qakolb’al, “a’ li Dios li na’eek’asink eere” (Filipenses 2:13; chi’ilmanq ajwi’ Filipenses 1:6; 2 Nefi 25:23; K’utul Raqal reheb’ li Loq’laj Hu, “Usilal”).

Filipenses 3:4–14

Lix evangelio li Jesukristo naxk’e reeqaj chixjunil li mayej naqak’e.

Laj Pablo kixmayeja naab’al naq kixjal xch’ool re xpaab’ankil lix evangelio li Jesukristo, jo’ lix taqenaqil wanjik sa’ xtenamiteb’ laj Judio jo’ aj Fariseo. Sa’ Filipenses 3:5–14, sik’ li k’a’ru kixk’ul laj Pablo rik’in naq kiwan xch’ool chixk’eeb’al li mayej choq’ re li evangelio. K’a’ru kireek’a chirix li mayejak kixb’aanu?

Chirix a’an, k’oxla laa wanjik jo’ tzolom. K’a’ru xamayeja choq’ re lix evangelio li Jesukristo? K’a’ru li xak’ul? Ma wan chik li mayej nakaweek’a naq toj tento taak’e re tatwanq choq’ chaab’il tzolom chiru li Kolonel?

Chi’ilmanq ajwi’ 3 Nefi 9:19–20; Tzol’leb’ ut Sumwank 58:2–5; Taylor G. Godoy, “Jun kutan chik,” Jolomil ch’utub’aj-ib’ re abril 2018.

Filipenses 4:1–13

Naru nintaw xsahil inch’ool rik’in li Kristo, maak’a’ naxye k’a’ru nink’ul.

Lix yu’am laj Pablo naxk’ut xyaalal li na’leb’ yeeb’il xb’aan li Awa’b’ej Russell M. Nelson: “Naq naqajayali li qayu’am rik’in … li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut sa’ xk’ab’a’ a’an” (“Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016).

Naq nakawil ru Filipenses—ut mas wi’chik li ch’ol 4—sik’eb’ li aatin li naru nakate’xtenq’a chixtawb’al li sahil ch’oolejil, maak’a’ naxye k’a’ru taak’ul sa’ laa yu’am. Jo’q’e xak’ul “li tuqtuukil usilal li nachal rik’in li Dios” naq yookat chixnumsinkil li ch’a’ajkilal? (raqal 7). Jo’q’e xataw aakawilal sa’ “xk’ab’a’ li Kristo” re xb’aanunkil li k’a’ru ch’a’aj? (raqal 13). K’a’ut naq aajel ru wank chi “k’ojk’o qach’ool” sa’ chixjunil li naqak’ul? (raqal 11). Chan ru naq xyu’aminkil li chaab’ilal sa’ li raqal 8 tatxtenq’a chixtawb’al li sahil ch’oolejil, maak’a’ naxye k’a’ru taak’ul?

Chi’ilmanq Alma 33:23; Dieter F. Uchtdorf, “Agradecidos en cualquier circunstancia,” Liahona, mayo 2014, 70–77.

Kolosenses 3:1–17

Eb’ lix tzolom li Jesukristo “neke’ak’ob’resiik” naq neke’xyu’ami lix evangelio.

Chan ru nakanaw naq li Jesukristo yoo chatenq’ankil re tatwulaq jo’ jun “ak’ winq [malaj ixq]”? Jun na’leb’ re xk’eeb’al reetal a’an xtz’ilb’al rix Kolosenses 3:1–17 ut xtz’iib’ankil chi tustu eb’ lix na’leb’, lix k’oxlahom, ut lix b’aanuhom jun li “q’eel winq,” ut chirix a’an xtz’iib’ankil chi tzoltzo lix na’leb’, lix k’oxlahom, ut lix b’aanuhom jun li “ak’ winq.”

Tz’iib’a chan ru naq yoo chajalb’al li Kolonel, re tatruuq chixnumsinkil wi’chik moqon, ut xk’oxlankil chan ru naq yookat chi usaak.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Filipenses.Eb’ laa junkab’al maare te’xk’e reetal naq k’iila sut natawman li aatin sa, xsahil, malaj saho’k sa’ li hu Filipenses. Rajlal sut naq nekerileb’ li aatin a’in, naru texkanaaq aran re aatinak chirix li k’a’ru kixye laj Pablo chirix xtawb’al xsahil li qach’ool.

Filipenses 2:14–16.Chan ru naq nokoru chi “lemtz’unk jo’ li chahim sa’ ruchich’och’ ”?

Filipenses 4:8.Eb’ laa komon naru te’xk’oxla li k’a’aq re ru naru “taawanq sa’ eech’ool,” jo’ yeeb’il sa’ li raqal a’in (chi’ilmanq ajwi’ Eb’ lix Raqalil li Paab’aal 1:13). Chan ru naq taa’osob’tesiiq laa junkab’al rik’in xpaab’ankil li na’leb’ kixk’e laj Pablo?

Kolosenses 1:23; 2:7.Maare texruuq chirilb’aleb’ ru sa’ junkab’al li raqal a’in chi chunchu chirix jun toon li che’, malaj naq yookex chirilb’al xjalam-uuch jun toon che’ (jo’ li wan sa’ li tusleb’ aatin a’in). K’a’ru xyaalal naq “xe’inb’ilex” ut “kaw xaqxookex” rik’in li Kristo? Chan ru naru taqatenq’a qib’ chixkawob’resinkil li qamusiq’ejil xe’il?

Kolosenses 2:2–3.Maare taawulaq chiru laa junkab’al xnujob’resinkil jun “xna’a’j li b’ihomal” rik’in k’a’aq re ru li te’reetali “li b’ihomal” ut “li ninqi b’ihomal re nawom” li naqataweb’ sa’ li evangelio.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li Kristo wan choq’ rey!,” Eb’ li B’ich, 33.

Xkawresinkil qib’ jo’ aj k’utunel

Yu’ami lix nawom aach’ool. “Nakak’ut k’a’ruhat laa’at,” kixk’ut li Elder Neal A. Maxwell. “Chan ru wankat mas wi’chik taajultikamanq … chiru jun yaalil na’leb’ xak’ut sa’ jun li tzolok” (sa’ Li k’utuk jo’ li Kolonel, 13).

Laj Pablo kixk’ut naq tento taawanq li qapaab’aal chi “xe’inb’il” rik’in li Jesukristo (Kolosenses 2:7).