eb’ li misioneer ixq yookeb’ chi aatinak rik’in jun saaj winq

16–22 octubre

1 ut 2 Tesalonicenses

“Re xtz’aqob’resinkil jo’nimal chik naraj lee paab’aal”

Wi ink’a’ naqatz’iib’a li na’leb’ naqak’ul rik’in li Musiq’ej, naru nasach sa’ qach’ool. K’a’ru nakatreek’asi li Musiq’ej chixtz’iib’ankil naq nakawil 1 ut 2 Tesalonicenses?

Tz’iib’a li nakak’oxla

Sa’ Tesalonika, ke’xye naq laj Pablo ut laj Silas “ke’xpo’ xch’ool chixjunil li ruchich’och’ ” (Hechos 17:6). Ke’josq’o’ junjunq aj jolominel sa’ xyanqeb’ laj Judio, ut eb’ laj jolominel a’in ke’xpoqoqi li tenamit chirixeb’ (chi’ilmanq Hechos 17:1–10). Xb’aan a’an, kiyehe’ re laj Pablo ut laj Silas naq te’elq chaq sa’ Tesalonika. Laj Pablo kichal xk’a’uxl chirixeb’ li toja’ xe’paab’an sa’ Tesalonika, ut chirix li rahob’tesink yookeb’ chixk’ulb’al, a’ut ink’a’ kiru chi sutq’iik re rula’aninkileb’. “Laa’in ajwi’ ink’a’ chik xinkuy,” kixtz’iib’a laj Pablo, “ut xintaqla laj Timoteo re rab’inkil resil lee paab’aal.” Ut laj Timoteo, laj tenq’anel chiru laj Pablo li yoo chaq chi k’anjelak rochb’een sa’ Tesalonika, “chaab’il resil lee paab’aal ut lee rahom xk’am chaq” (1 Tesalonicenses 3:5–6). Jo’kan ajwi’, eb’ laj santil paab’anel sa’ Tesalonika ke’wan “choq’ aj k’utul chaab’il b’e chiruheb’ chixjunil laj paab’anel” (1 Tesalonicenses 1:7), ut kipuukan resil lix paab’aleb’ toj sa’eb’ li najtil tenamit. Naru naqak’e reetal chan ru xk’ojla xch’ool laj Pablo naq kixk’e reetal naq lix k’anjel sa’ xyanqeb’ “moko xkanaak ta chi maak’a’ rajb’al” (1 Tesalonicenses 2:1). A’b’anan laj Pablo kixnaw naq us ta wankeb’ chi paab’ank, a’an ink’a’ naraj naxye naq junelik te’wanq chi jo’kan, ut kixxuwa naq te’ruuq chi jalb’ehiik xb’aaneb’ li b’alaq’il aj k’utunel sa’ xyanqeb’ laj santil paab’anel (chi’ilmanq 2 Tesalonicenses 2:2–3). Li esil kixtaqla reheb’ a’an, ut qe laa’o, a’an naq ink’a’ taqakanab’ “xtz’aqob’resinkil jo’ nimal chik naraj li qapaab’aal,” ut naq “q’axal wi’chik toorahoq” (chi’ilmanq 1 Tesalonicenses 3:10; 4:10).

reetalil li tzolok aajunes

Li na’leb’ re xtzolb’aleb’ li loq’laj hu aajunes

1 Tesalonicenses 1–2

Eb’ lix tzolom li Kristo neke’k’anjelak chiruheb’ li kristiaan chi anchaleb’ xch’ool ut xrahomeb’.

Sa’ 1 Tesalonicenses, li aatin kixye laj Pablo naxk’ut chan ru lix k’oxlahom jo’ ajwi’ lix sahil xch’ool li ani xq’axtesi rib’ chi tz’aqal re k’anjelak chiruheb’ li ralal xk’ajol li Dios. Sa’eb’ li wiib’ ch’ol sa’ xtiklajik 1 Tesalonicenses, taataweb’ li aatin ut li ch’ol aatin li neke’xk’ut lix b’aanuhomeb’ lix tzolomeb’ li Qaawa’. Jo’ jun eetalil, k’a’ru nakatzol sa’ 1 Tesalonicenses 1:5–8; 2:1–13 chirix k’anjelak chiru li Qaawa’?

K’oxlan chirixeb’ li hoonal b’ar wi’ tatruuq chi k’anjelak chiru li Dios ut chiruheb’ li ralal xk’ajol. K’a’ru nakataw sa’eb’ li raqal a’in li nakatxmusiq’a chi chaab’ilo’k sa’ laa k’anjel? Naru nakapatz’ aawib’ chirixeb’ li patz’om nakataw, maare “Ma naweetali li k’a’aq re ru ninnaw?” (chi’ilmanq 1 Tesalonicenses 1:7).

1 Tesalonicenses 3:7–13; 4:1–12

“Chextamq ut chexnujaq rik’in li rahok”

Laj Pablo kisaho’ xch’ool rik’in lix sahileb’ xch’ool laj santil paab’anel aj Tesalonika (chi’ilmanq 1 Tesalonicenses 3:7–9). A’b’an kiraj ajwi’ naq “te’numtaaq chi us” sa’ sahilal (1 Tesalonicenses 4:1). Nak nakawil 1 Tesalonicenses 3:7–13; 4:1–12, k’oxla chan ru naru “tatnumtaaq chi jwal naab’al” sa’ musiq’ej (1 Tesalonicenses 4:10). Jo’ jun eetalil, ke’ reetal naq laj Pablo kiroksiheb’ li aatin jo’ “santilal” ut “santob’resinb’il.” K’a’ru nakatzol sa’eb’ li raatin laj Pablo chirix lix yaalalil li aatin a’an? Chan ru naru nakatxtenq’a li Kolonel chi wulak chi jwal sant ut chi jwal santob’resinb’il?

Chi’ilmanq ajwi’ K’utul Raqal reheb’ li Loq’laj Hu, “Sant,” “Santob’resink.”

1 Tesalonicenses 4:16–18; 5:1–10; 2 Tesalonicenses 1:4–10

Wi chaab’ilin chi paab’ank ut wankin chi aj’o wu, tinwanq chi kawresinb’il choq’ re li xkab’ xk’ulunik li Kolonel.

Sa’ 1 Tesalonicenses 5:1–10, laj Pablo kiroksi junjunq li jaljookil ru aatin re k’utuk chirix li kutan naq taasutq’iiq li Jesus sa’ li ruchich’och’. Naq nakatzoleb’ li jaljookil ru aatin a’in, k’oxla xtz’iib’ankil li musiq’anb’il na’leb’ li nachal aawik’in chirix li xkab’ xk’ulunik li Jesukristo.

• “Junaq aj elq’ chi q’eq”:

• “Xrahil li alank sa’ xb’een li ixq”:

• Xkomoneb’ chik li jaljookil ru aatin nakataw:

K’a’ chik ru li na’leb’ nakatzol sa’ 1 Tesalonicenses 4:16–18; 5:1–10; 2 Tesalonicenses 1:4–10? K’a’ru eek’asinb’ilat chixb’aanunkil re yo’lek ut re xkawresinkil aawib’ choq’ re li xkab’ xk’ulunik li Kolonel?

Chi’ilmanq ajwi’ D. Todd Christofferson, “Xkawresinkil qib’ choq’ re lix sutq’ijik li Qaawa’,” Jolomil ch’utub’aj-ib’ re abril 2019.

2 Tesalonicenses 2

Kiyeeman resil chi junxilaj naq taawanq jun li q’etok paab’ank, malaj jun xkanab’ankil li yaal.

Rik’in li nimla rahob’tesink yookeb’ chixk’ulb’al, naab’al reheb’ laj santil paab’anel aj Tesalonika neke’xk’oxla naq ak nach’ wan li xkab xk’ulunik li Kolonel. A’b’anan laj Pablo kixnaw naq chi maji’aq taasutq’iiq li Jesukristo sa’ li ruchich’och’, taawanq jun li q’etok paab’ank—jun po’ok ch’oolej, malaj jun “xtz’eqtaanankil li paab’aal” (chi’ilmanq 2 Tesalonicenses 2:1–4). Naru taataw chik aana’leb’ chirix li nimla q’etok paab’aal—jo’ ajwi’ aab’antioxihom chirix lix k’ojob’ankil wi’chik li evangelio—rik’in xtz’ilb’aleb’ rix li raqaleb’ a’in:

• Eb’ li raqal sa’ li Santil Hu li ke’xye xyaalal chi junxilaj naq taawanq jun q’etok paab’ank: Isaias 24:5; Amos 8:11–12; Mateo 24:4–14; 2 Timoteo 4:3–4.

• Eb’ li raqal sa’ li Santil Hu li neke’xk’ut naq ak yoo chi tiklaak li q’etok paab’aal sa’ xkutankil laj Pablo: Hechos 20:28–30; Galatas 1:6–7; 1 Timoteo 1:5–7

• Eb’ li aatin chirix li nimla q’etok paab’aal xb’aaneb’ li ke’raj raj xchaab’ilob’resinkil li paab’aal junxil:

  Martin Lutero: “Laa’in yal xinsik’ xchaab’ilob’resinkil li Iglees re tixk’am rib’ rik’in li Santil Hu. … Yal tinye naq li Kristianil xkanab’ wank sa’ xyanqeb’ li ani tento raj xe’xk’uula” (sa’ E. G. Schweibert, Luther and Hist Times: The Reformation from a New Perspective [1950], 590).

  Roger Williams: “Li q’etok paab’ank … q’axal naq xpo’ok, jo’kan naq ink’a’ naru nak’ira li q’etok paab’ank a’an toj reetal naq li Kristo tixtaqlaheb’ li ak’ apostol re xyiib’ankil wi’chik eb’ li iglees” (sa’ Philip Schaff, The Creeds of Christendom [1877], 851).

Chi’ilmanq ajwi’ 2 Nefi 28; Temas del Evangelio, “Apostasía,” topics.ChurchofJesusChrist.org.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

1 Tesalonicenses 3:9–13.K’a’ru naxtoch’ aach’ool chirix li k’a’ru kireek’a laj Pablo choq’ reheb’ lix komon? Chan ru naru “toonumtaaq rik’in rahok rik’ineb’ li qas qiitz’in”? (raqal 12).

1 Tesalonicenses 4:13–18.K’a’ru chi aatinul chirix li wakliik chi yo’yo naxch’anab’ laa ch’ool?

1 Tesalonicenses 5:14–25.Naq yooqex chirilb’al li raatin laj Pablo sa’ 1 Tesalonicenses 5:14–25, b’oqeb’ li komon re laa junkab’al chixsik’b’al junaq li ch’ol aatin li te’raj xtz’ilb’al rix. Sik’ chan ru taak’e li ch’ol aatin sa’ laa wochoch b’ar wi’ te’ruuq chirilb’al chixjunileb’ re te’naq sa’ xch’ooleb’. Jo’ eetalil, chi junjunqal naru neke’xsik’ malaj neke’xyiib’ jalam-uuch li neke’xk’ut li ch’ol aatin xe’xsik’ ru.

2 Tesalonicenses 3:13.Ma naqeek’a naq wan naq “nokotitz’ chixb’aanunkil li us”—maare naq ch’a’aj chiqu li k’a’ru na’ajman re wank choq’ tzolom? K’a’ru naru chiqatenq’ankil naq naqeek’a chi jo’kan? (Chi’ilmanq Galatas 6:9; Tzol’leb’ ut Sumwank 64:33.) Chan ru naru taqatenq’a qib’ chiqib’il qib’ naq nak’ulman a’in?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Chinwanq raj jo’ li Jesus,” B’ichleb’aal choq’ reheb’ li Kok’al, 40–41.

Xkawresinkil aawib’ chi tzolok

Sik’ li k’utb’esinb’il na’leb’ wulaj wulaj. “K’iila sut li k’utb’esinb’il na’leb’ nachal “chi junjunqil li raqal” (2 Nefi 28:30), ink’a’ sa’ jun chalik. … Maak’oxla li [tzolok chirix li evangelio] jo’ jun k’anjel taak’e xhoonal chixb’aanunkil, a’b’anan jo’ jun k’anjel junelik yookat chixb’aanunkil” (Li k’utuk jo’ li Kolonel, 12).

li Kristo sa’eb’ li choql

Li Kristo chi waklijenaq chi yo’yo, xb’aan laj Robert T. Barrett