“16–22 octubre. 1 ut 2 Tesalonicenses: “Re xtz’aqob’resinkil jo’nimal chik naraj lee paab’aal,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“16–22 octubre. 1 ut 2 Tesalonicenses” Kim, Taaqehin—Choq’ re li Tzoleb’aal reheb’ li Kok’al: 2023
16–22 octubre
1 ut 2 Tesalonicenses
“Re xtz’aqob’resinkil jo’nimal chik naraj lee paab’aal”
Naq nakawil 1 ut 2 Tesalonicenses rik’in tijok ut rik’in xk’oxlankileb’ li kok’al, taataweb’ li na’leb’ tento te’xtaw ru.
Xkanab’ankileb’ chi wotzok
Ma xab’oqeb’ li kok’al chiru li tzolok sa’ li xamaan xnume’ chixk’anjelankil li k’a’ru xe’xtzol? Kanab’eb’ li kok’al chiroksinkil wiib’ oxib’ k’asal sa’ li tzolok re li xamaan a’in chixwotzb’aleb’ lix numsihomeb’.
Xk’utb’al li tzol’leb’: Kok’al toj ka’ch’ineb’ xyu’am
Wi nintaaqeheb’ lix taqlahom li Dios, kawresinb’ilaqin choq’ re li xkab’ xk’ulunik li Jesukristo.
Ink’a’ naqanaw jo’q’e taasutq’iiq li Kolonel sa’ ruchich’och’. A’b’an naru taqoyb’eni ut taqakawresi qib’ choq’ re lix k’ulunik.
Kok’ k’anjel naru chi b’aanumank
-
B’oq jun na’b’ej chixwotzb’al sa’ junpaat chan ru xwan choq’ re a’an royb’eninkil lix yo’lajik lix k’uula’al. Yaab’asi 1 Tesalonicenses 5:2–3, ut ye reheb’ li kok’al naq li Jesukristo taachalq wi’chik sa’ li ruchich’och’, a’b’an maa’ani nanawok re jo’q’e tz’aqal, jo’ jun li na’b’ej ink’a’ naxnaw jo’q’e tz’aqal taayo’laaq lix k’uula’al.
-
Patz’ reheb’ li kok’al naq te’xseraq’i xnumsihomeb’ b’ar wi’ xe’xkawresi rib’ re xik chi b’eek malaj re junaq k’anjel. K’a’ru xe’xb’aanu re xkawresinkileb’ rib’? K’am jun li maleet malaj jun li b’oolx, ut kanab’eb’ li kok’al chixk’oxlankil naq yookeb’ chixk’eeb’al chi sa’ li na’ajman choq’ re li b’eek chi najt. Rik’in li junjunq k’a’aq re ru neke’xk’oxla, tenq’aheb’ li kok’al chixk’oxlankil ajwi’ jun na’leb’ re xkawresinkil qib’ choq’ re lix sutq’ijik li Jesukristo.
-
Yaab’asi 1 Tesalonicenses 5:6 choq’ reheb’ li kok’al, ut ch’olob’ naq wi ink’a’ yooko chixkawresinkil qib’ choq’ re naq li Jesus taak’ulunq wi’chik, a’an chanchan ta wi’ naq warenaqo ut ink’a’ kawresinb’ilaqo chixk’ulb’al. Patz’ reheb’ li kok’al naq te’xk’oxla naq yookeb’ chi wark. Ch’olob’ naq wi naqakawresi qib’, a’an chanchan naq aj-ooko ut yooko chiroyb’eninkil. Ye reheb’ naq te’ajq.
-
B’ichahomaq jun li b’ich chirix li xkab’ xk’ulunik li Qaawa’, maare “Naq taakʼulunq li Kolonel” (B’ichleb’aal choq’ reheb’ li Kok’al, 46–47).
Laj Pablo kixk’ut naq taak’ulmanq jun li q’etok paab’ank naq maji’ nak’ulun wi’chik li Jesukristo.
Rik’in xnumik li hoonal, li Iglees kixk’ojob’ li Jesukristo kit’ane’ sa’ q’etok paab’ank, li naraj naxye naq lix wankilal li tijonelil ut eb’ li na’leb’ re li evangelio ke’isiik sa’ li ruchich’och’. Laj Pablo kixye rik’in profeetil aatin naq li q’etok paab’ank a’in, malaj li “xtz’eqtaanankil li paab’ank,” taak’ulmanq naq maji’ nak’ulun wi’chik li Kolonel.
Kok’ k’anjel naru chi b’aanumank
-
Chirix rilb’al 2 Tesalonicenses 2:3 rik’ineb’ li kok’al, yiib’omaq jun nimla kab’l rik’ineb’ kok’ sek’ malaj kok’ kaaxukuut. Ye reheb’ li kok’al naq eb’ li kok’ sek’ malaj eb’ li kaaxukuut neke’reetali xcha’alil li Iglees tz’aqal yaal li aajeleb’ ru, jo’eb’ li na’leb’ re li evangelio, li tijonelil, li tz’ape’k sa’ junajil sa’ li santil ochoch, ut eb’ li profeet. Chirix naq laj Pablo ut eb’ lix komoneb’ chik li apostol ke’kam, eb’ li k’a’aq re ru a’an ke’sach, ut li Iglees tz’aqal yaal ink’a’ kitawman sa’ li ruchich’och’ chiru k’iila chihab’. Patz’ re jun li ch’ina al naq tixt’an li nimla kab’l, ut ch’olob’ naq a’an kik’ab’a’iman li Q’etok Paab’ank malaj “xtz’eqtaanankil li paab’ank.” Naq li Jesukristo kixxaqab’ wi’chik lix Iglees, kik’ab’a’iman li K’ojob’ank wi’chik.
-
K’e chi kutankil jun lix Hu laj Mormon ut xjalam-uuch li profeet ut jun li santil ochoch. Patz’ reheb’ li kok’al naq te’xye “Q’etok Paab’ank” naq taamuqeb’ li k’a’aq re ru sa’ jun li b’oolx, ut “K’ojob’ank wi’chik” naq taawisiheb’ wi’chik.
-
B’ichahomaqeb’ li b’ich neke’xk’ut li yaal ke’isiik chiru xhoonalil li Q’etok Paab’ank ut ke’k’ojob’aak wi’chik sa’eb’ li qakutan, maare “Lix Iglees li Jesukristo,” “Tz’aqal tijonelil xk’ojob’aman chi ak’il,” ut “Sa’ li santil ochoch” (B’ichleb’aal choq’ reheb’ li Kok’al, 48, 60, 99).
Xk’utb’al li tzol’leb’: Kok’al ak ninqeb’
Wi nintaaqeheb’ lix taqlahom li Dios, kawresinb’ilaqin choq’ re li xkab’ xk’ulunik li Jesukristo.
Li na’leb’ kixk’e laj Pablo naru tooxtenq’a chi wank chi kawresinb’ilaqo choq’ re li nimla kutan naq li Kolonel taak’ulunq wi’chik sa’ li ruchich’och’.
Kok’ k’anjel naru chi b’aanumank
-
Patz’ re jun li ch’ina al naq tixyaab’asi 1 Tesalonicenses 5:1–6 ut lix komoneb’ li kok’al te’ril ajwi’ ru chi ch’anch’o. Chirix li junjunq chi raqal, patz’ re jun li ch’ina al naq tixk’os ru li k’a’ru naxk’oxla naq naxye li raqal. Maare taawaj xch’olob’ankil naq “lix kutankil li Qaawa’ ” naraj naxye li xkab’ xk’ulunik li Jesukristo. K’a’ut naq li xkab’ xk’ulunik li Qaawa’ najuntaq’eetaman rik’in jun aj elq’ sa’ q’ojyin malaj jun li ixq li ak ok re chi yo’laak xk’uula’al?
-
Ye reheb’ li kok’al naq te’xk’oxla naq li Kolonel taarula’ani li tzoleb’aal sa’ junaq hoonal chiru li kutan a’in. Chan ru naru naqakawresi qib’ choq’ re li rula’anihom? Tenq’aheb’ li kok’al chixk’oxlankil li k’a’ru naru naqab’aanu re xkawresinkil qib’ choq’ re li kutan naq li Jesukristo taaq’ajq chaq. Naru naqajal qak’a’uxl, nokokuyuk maak, naqachaab’ilob’resi li qawanjik rik’in li qajunkab’al, naqataaqe li profeet, naqasik’ xwanjik li Santil Musiq’ej qik’in, ut naqapaab’eb’ li qasumwank. Waklesiheb’ xch’ool li kok’al chixsik’b’al ru jun k’a’aq re ru te’xb’aanu re xkawresinkileb’ rib’ re xk’ulb’al li Kolonel sa’ lix k’ulunik.
Laj Pablo kixk’ut naq taak’ulmanq jun li q’etok paab’ank naq maji’ nak’ulun wi’chik li Jesukristo.
Wi eb’ li kok’al neke’xtaw ru naq lix Iglees li Jesukristo ut lix evangelio ke’isiman sa’ li ruchich’och’ chiru li Nimla Q’etok Paab’ank, te’xtaw ru chi us k’a’ut naq aajel ru naq kiwan jun K’ojob’ank wi’chik.
Kok’ k’anjel naru chi b’aanumank
-
Patz’ re jun reheb’ li kok’al nax tixyaab’asi 2 Tesalonicenses 2:1–3. Jo’ chanru neke’xye li raqal a’an, k’a’ru tento naq kik’ulman naq maji’ nawulak lix “kutankil li Qaawa’,” li naraj naxye li xkab’ xk’ulunik li Qaawa’? K’a’ru naraj naxye li ch’ol aatin “xtz’eqtaanankil li paab’ank”? K’e reetal chi us naq eb’ li kok’al neke’xtaw ru naq a’an naraj naxye li Nimla Q’etok Paab’ank, li kik’ulman chirix naq ke’kam lix apostol li Kolonel. Naru taak’ut li na’leb’ wan sa’ “Q’etok paab’ank” sa’ li K’utul Raqal reheb’ li Loq’laj Hu.
-
Tenq’aheb’ li kok’al chixtz’iib’ankil chiru li pizarron junjunq reheb’ li yaal ut li osob’tesihom naqak’ul sa’ xk’ab’a’ li evangelio. Isiheb’ chi junjunqal, ut patz’ reheb’ li kok’al chan raj ru naq jalanaq lix yu’ameb’ wi ta maak’a’eb’ li yaal a’an. Ch’olob’ naq eb’ li yaal a’an ke’sach sa’ li Nimla Q’etok Paab’ank. K’a’ut naq aajel ru naq lix Iglees li Jesukristo kik’ojob’aman wi’chik sa’ li ruchich’och’ sa’ roso’jikeb’ li kutan a’in? Patz’ reheb’ li kok’al naq “te’xk’ojob’ wi’chik” malaj te’xtz’iib’aheb’ wi’chik li yaal ut li osob’tesihom chiru li pizarron.
Li qaChoxahil Yuwa’ naraj naq tintrab’ajiq.
Chan ru taatenq’aheb’ li kok’al chirilb’al li trab’aaj jo’ jun osob’tesihom, ut ink’a’ jo’ k’a’ru ink’a’ raj taqaj xb’aanunkil?
Kok’ k’anjel naru chi b’aanumank
-
Patz’ reheb’ li kok’al naq te’xk’e xhoonaleb’ chirilb’aleb’ li raqal sa’ 2 Tesalonicenses 3:7–13 re xsik’b’al li ch’a’ajkilal yookeb’ chaq chixnumsinkil laj santil paab’anel. K’a’ut naq li qaChoxahil Yuwa’ naraj naq tootrab’ajiq? K’a’ raj ru taak’ulmanq wi ta ink’a’ taqatzol trab’ajik chi kaw? Kanab’eb’ li kok’al chixk’eeb’al xhoonaleb’ chixk’utb’esinkileb’ kok’ trab’aaj, ut eb’ lix komon li kok’al te’xq’ehi k’a’ru yookeb’ chixb’aanunkil.
-
Patz’ reheb’ li kok’al naq te’xseraq’i jun hoonal b’ar wi’ xe’k’anjelak chi kaw sa’ junaq k’anjel, k’uub’anb’il k’anjel, malaj meta. K’a’ru xe’reek’a naq xe’raqe’? K’a’ru naraj naxye “mextitz’ chixb’aanunkil li us”? (2 Tesalonicenses 3:13). K’a’ru nokoxtenq’a chi kuyuk naq ch’a’aj li k’anjel?
Xb’oqb’aleb’ chi tzolok sa’ kab’l
Patz’ reheb’ li kok’al naq te’xye re jun li komon sa’ lix junkab’aleb’ malaj re jun li ramiiw k’a’ut naq neke’xb’antioxi naq li evangelio wan sa’ li ruchich’och’ anajwan (li perel re kok’ k’anjel re li xamaan a’in naru naxk’eheb’ xna’leb’).
Xkawresinkil qib’ jo’ aj k’utunel
Tenq’aheb’ lix na’ xyuwa’eb’ li kok’al. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chan ru taatenq’aheb’ lix na’ xyuwa’ sa’ lix k’anjeleb’ li aajel ru” (Li k’utuk jo’ li Kolonel, 25).