9–15 octubre

Filipenses; Kolosenses

“Chixjunil ninkuy xnumsinkil sa’ xk’ab’a’ li nak’ehok xkawub’ inch’ool”

Il Filipenses ut Kolosenses rik’ineb’ li kok’al nakatzoleb’ sa’ laa k’a’uxl. Sik’ aamusiq’ankil chirix xk’utb’al chiruheb’ li na’leb’ wan sa’ li hu a’an.

Xkanab’ankileb’ chi wotzok

Patz’ reheb’ li kok’al k’a’ru xe’xb’aanu chiru li xamaan re xyu’aminkil li xe’xtzol sa’ li tzoleb’aal sa’ li xamaan xnume’. Maare taapatz’ reheb’ chan ru naq xe’xye’ li ruq’eb’ re li ani xraj ru jun li ramiiw.

Xk’utb’al li tzol’leb’: Kok’al toj ka’ch’ineb’ xyu’am

Filipenses 1:3–4; Kolosenses 1:3, 9

Eb’ laj jolominel re li Iglees nikine’xra ut neke’tijok chiwix.

Laj Pablo junelik kixtikib’eb’ lix hu rik’in xyeeb’al xrahom choq’ reheb’ li komon re li Iglees ut rik’in xyeeb’al reheb’ naq natijok chirixeb’ a’an. K’oxla chan ru taatenq’aheb’ li kok’al chixtawb’al ru naq neke’rahe’ xb’aaneb’ laj jolominel re li Iglees.

Kok’ k’anjel naru chi b’aanumank

• Yaab’asi Filipenses 1:3–4 ut Kolosenses 1:3, 9, ut patz’ reheb’ li kok’al naq te’xq’alu li ruq’eb’ ut te’xxulub’ lix jolomeb’ rajlal sut naq te’rab’i li aatin tij ut tijok. Ch’olob’ naq li apostol aj Pablo kitijok chirixeb’ li komon re li Iglees, jo’ ajwi’ neke’tijok li qajolominel re li Iglees chiqix laa’o sa’eb’ li kutan a’in.

• K’ut jun xjalam-uuch li Jesukristo, ut yaab’asiheb’ junjunq li raqal b’ar wi’ a’an kitijok chirix li ras riitz’in (chi’ilmanq Lukas 22:32; 3 Nefi 19:21, 23). K’a’ru kixpatz’ li Jesus naq kitijok chirixeb’ li ras riitz’in?

• Tenq’aheb’ li kok’al chixyeeb’al xk’ab’a’eb’ junjunq aj jolominel reheb’ sa’ li Iglees, jo’eb’ li awa’b’ej re li Tzoleb’aal reheb’ li Kok’al, li obiisp, ut li Awa’b’ej re li Iglees. Ch’olob’ naq eb’ laj jolominel a’an neke’xpatz’ re li qaChoxahil Yuwa’ naq taarosob’tesiheb’ li kok’al ut naq tixtenq’aheb’ chi wank sa’ tiikilal. K’oxla xyeeb’al reheb’ li kok’al k’a’ru nakaye laa’at naq nakattijok chirixeb’.

Filipenses 4:4, 8

Naru nasaho’ inch’ool rik’in li Qaawa’.

Laj Pablo kixwaklesiheb’ xch’ool laj santil paab’anel chi saho’k xch’ooleb’, us ta neke’xk’ul ch’a’ajkil yale’k ut laj Pablo ajwi’ wan chaq sa’ li tz’alam. Chan ru taatenq’aheb’ li kok’al chirilb’al naq xtaaqenkil li Jesukristo naxk’e xsahil qach’ool?

Kok’ k’anjel naru chi b’aanumank

• Patz’ reheb’ li kok’al naq te’ab’inq chi us naq laa’at taawil Filipenses 4:4 re te’xtaw jun aatin naka’sutiman. Patz’ reheb’ li kok’al naq te’xk’ut chawu k’a’ru neke’xb’aanu naq neke’saho’ xch’ool. Ye reheb’ li kok’al k’a’ut naq “nasaho’ aach’ool rik’in li Qaawa’ ”—k’a’ut naq li Jesukristo naxk’e xsahil aach’ool. Kanab’eb’ li kok’al naq te’xwotz k’a’ru neke’reek’a chirix li Jesus.

• K’uteb’ k’a’aq re ru malaj jalam-uuch li te’reetali li nakatxtenq’a “chi saho’k aach’ool rik’in li Qaawa’ ” (Filipenses 4:4), maare eb’ lix yo’ob’tesihom, jun li santil ochoch, lix waklijik chi yo’yo, malaj jun li junkab’al. Kanab’eb’ li kok’al chixk’eeb’aleb’ xhoonal re xsik’b’al ru jun li jalam-uuch malaj k’a’aq re ru, ut ye reheb’ k’a’ut naq a’an naxk’e xsahil aach’ool. Patz’ reheb’ naq te’xwotz k’a’ru natenq’ank reheb’ a’an chixsahob’resinkil xch’ooleb’ rik’in li Qaawa’.

• Ilomaq Filipenses 4:8, ut tenq’aheb’ li kok’al chixk’oxlankil k’a’aq re ru naxk’ul rib’ rik’in li nach’olob’aman sa’ li raqal (chi’ilmanq ajwi’ Eb’ lix Raqalil li Paab’aal 1:13). Patz’ reheb’ li kok’al naq te’xyiib’ xjalam-uucheb’ li k’a’aq re ru a’an.

Kolosenses 1:23; 2:6–7

Lin paab’aal tento naq “chapchooq xxe’ ” rik’in li Jesukristo.

Wi eb’ li kok’al neke’xkab’la lix yu’ameb’ ut lix paab’aaleb’ sa’ xb’een li Kolonel, te’ruuq chixkuyb’aleb’ lix kaq-sut-iq’ li yu’am.

Kok’ k’anjel naru chi b’aanumank

• K’ut jun xjalam-uuch li che’ li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naq yooqat chixyaab’asinkileb’ li ch’ol aatin aajeleb’ ru sa’ Kolosenses 1:23; 2:6–7 (malaj k’ut li video “Torbellinos espirituales” sa’ ChurchofJesusChrist.org). K’a’ raj ru tixk’ul li che’ a’in wi ta jun li kaq-sut-iq’ taawulaq ut li che’ maak’a’aq raj xkawil xe’? Kanab’eb’ li kok’al chi xaqliik ut chixk’oxlankil naq a’aneb’ jun li che’ li wankeb’ xq’unil xe’ sa’ jun li kaq-sut-iq’, ut chirix a’an jun li che’ wan xkawil xe’. Ch’olob’ xyaalal naq xpaab’ankil li Jesukristo nokoxtenq’a chi wank jo’ jun li che’ wan xkawil xe’. Toja’ naq taqakuy li musiq’ejil “kaq-sut-iq,” a’ ajwi’ li aaleek ut li ch’a’ajkilal.

• Patz’ re jun li ch’ina al naq tixyiib’ jun xjalam-uuch li che’ chiru li pizarron. Patz’ reheb’ li kok’al naq te’xk’e xk’ab’a’eb’ junjunq li k’a’aq re ru naru neke’xb’aanu re wank “chi chapcho xxe’ ” rik’in li Jesukristo. Rajlal naq jun li ch’ina al tixye jun na’leb’, patz’ re naq tixk’e jun li xe’ sa’ li jalam-uuch.

Xk’utb’al li tzol’leb’: Kok’al ak ninqeb’

Filipenses 4:4–13

Wi wan inpaab’aal chirix li Jesukristo, naru nawan xsahil inch’ool us ta wankin sa’ ch’a’ajkil hoonal.

Laj Pablo kixnumsi k’iila yale’k, a’b’an kiwan chi sa xch’ool xb’aan naq kiwan xpaab’aal chirix li Jesukristo.

Laj Pablo kixnumsi k’iila yale’k, a’b’an kiwan chi sa xch’ool xb’aan naq kiwan xpaab’aal chirix li Jesukristo.

• Patz’ reheb’ li kok’al naq te’xk’oxla naq wankeb’ sa’ tz’alam, jo’ li apostol aj Pablo kiwan chaq naq kixtz’iib’a li hu choq’ reheb’ laj Filipenses. Il Filipenses 4:4–13 rik’ineb’ li kok’al, ut patz’ reheb’ naq te’xtaw li aatin a’in: “chexsaho’q,” “xsaho’k sa’ inch’ool,” “tuqtuukil usilal,” ut “chi k’ojk’o inch’ool.” K’a’ut naq laj Pablo kiwan xsahil xch’ool ut kireek’a tuqtuukilal naq kiwan chaq sa’ tz’alam? Chirix a’an, patz’ reheb’ li kok’al naq te’xtaw li aatin “Qaawa’,” “Dios,” ut “Kristo” sa’eb’ li raqal. Tenq’aheb’ chixtawb’al ru naq lix paab’aal laj Pablo chirix li Jesukristo kixk’e xsahil xch’ool.

• Patz’ reheb’ li kok’al naq tate’xtenq’a chixtz’aqob’resinkil ruheb’ li ch’ol aatin jo’ a’in: “Naru ninwan sa’ li q’ojyin ru a’b’an ninru chi ilok wi wan jun li . Naru ninwan chirix kab’l chiru tiqwal saq’e a’b’an naru naweek’a li iq’ wi wan jun lin . Naru neke’wan inhoonal ch’a’aj ru a’b’an naru naweek’a sahil ch’oolejil wi .” K’a’ru naxye Filipenses 4:4–13 naq naru taqab’aanu re xtawb’al xsahil qach’ool? Patz’ reheb’ li kok’al naq te’xwotz li b’ich malaj raqal chirix li Jesus li neke’xtenq’aheb’ chi saho’k sa’ xyi li cha’a’ajkilal.

Filipenses 4:8

Naru “nink’oxla” li k’a’ru tz’aqal yaal, maak’a’ xb’alaq’, ut saq’ ru.

Wan naq eb’ li kok’al neke’tawman chiru li k’a’ru ink’a’ us ut tz’aj. Laa’at naru nakatenq’aheb’ chixsik’b’al li k’a’ru nawaklesin aamej ut li saq ruhil na’leb’.

Kok’ k’anjel naru chi b’aanumank

• Patz’ re jun li ch’ina al naq tixyaab’asi Filipenses 4:8, ut eb’ lix komon te’xsik’eb’ aatin sa’ Eb’ lix Raqalil li Paab’aal 1:13 li juntaq’eeteb’. Patz’ re jun naq tixtz’iib’aheb’ li aatin a’an chiru li pizarron. Patz’ reheb’ li kok’al k’a’ru neke’raj xyeeb’al li aatin a’an, ut tenqa’aheb’ wi ink’a’ neke’xnaw. K’a’ut naq tento “taawanq sa’ qach’ool” li k’a’aq re ru a’an? Chan ru naru “neke’qasik’eb’ ” a’an?

• Patz’ reheb’ li kok’al naq te’xye k’a’aq re ru neke’xk’ul rib’ rik’in li natawman sa’ Filipenses 4:8. Patz’ reheb’ naq te’xtz’iib’a k’a’aq re ru te’ril chiru li xamaan a’in li naxk’ul rib’ rik’ineb’ li ch’olob’ank a’an. Waklesiheb’ xch’ool chixk’amb’al lix tusumeb’ sa’ li Tzoleb’aal reheb’ li Kok’al chiru li xamaan jun chik ut chixwotzb’al li k’a’ru xe’xtaw.

Kolosenses 1:23; 2:6–7

Lin paab’aal tento naq “chapchooq xxe’ ” rik’in li Jesukristo.

Laj tza naxyal xq’unob’resinkil li qapaab’aal rik’in li aaleek ut b’alaq’il tzol’leb’. Chan ru taawaklesiheb’ xch’ool li kok’al chixkawob’resinkil lix paab’aaleb’ chirix li Kolonel re naq “kaw xaqxooqeb’ chi oyb’enink sa’ xk’ab’a’ li evangelio”? (Kolosenses 1:23).

Kok’ k’anjel naru chi b’aanumank

• Patz’ reheb’ li kok’al naq te’xyiib’eb’ jalam-uuch neke’reetaliheb’ li yaal neke’tawman sa’ Kolosenses 1:23; 2:6–7. Kanab’eb’ chixwotzb’aleb’ lix jalam-uuch sa’ li tzoleb’aal ut chixch’olob’ankileb’ li yaal neke’reetali lix jalam-uucheb’.

• K’ut li video “Torbellinos espirituales.” B’ar wan junjunqeb’ li aaleek ut lix b’alaq’il aj tzol’leb’ li ruchich’och’ sa’eb’ li kutan a’in li naru naxq’unob’resi li qapaab’aal? Waklesi xch’ooleb’ li kok’al chixtz’iib’ankil jun k’anjel te’xb’aanu re xkawob’resinkileb’ lix paab’aal re naq “xaqxooqeb’ xxe’ ” (Kolosenses 2:7) rik’in li Jesukristo. Patz’ reheb’ naq te’xk’e a’an b’ar te’ril wulaj wulaj.

Xb’oqb’aleb’ chi tzolok sa’ kab’l

B’oqeb’ li kok’al chixwotzb’al rik’ineb’ lix junkab’al li xe’xtzol chirix li Jesukristo. Naru neke’roksi li perel re kok’ k’anjel re li xamaan a’in malaj jun li raqal sa’eb’ li loq’laj hu li xe’ril ru sa’ li tzoleb’aal sa’ li kutan a’in.

Xkawresinkil qib’ jo’ aj k’utunel

Eb’ li kok’al chixjunil neke’raj xnawb’al ut neke’tzolok rik’in li k’a’ru ak’ ut jalan jalanq. Oksiheb’ kok’ k’anjel li te’tenq’anq reheb’ chixjunileb’ li kok’al chireek’asinkileb’ rib’, chiroksinkileb’ chixjunil lix junxaqalileb’, ut chixyalb’aleb’ ak’ k’a’aq re ru. Wankeb’ li na’leb’ naru nakate’xtenq’a sa’ “Xkomon chik li k’anjeleb’aal re xtzolb’aleb’ li kok’al” sa’ xtiklajik li hu a’in. (Chi’ilmanq ajwi’ Li k’utuk jo’ li Kolonel, 25–26.)