jun saaj naxch’aj li xaqxookil tz’ak

13–19 noviembre

Santiago

“B’aanuhomaq li naxye li aatin, ut ink’a’ chik’ojlaaq eech’ool ka’ajwi’ rik’in rab’inkil”

Sa’ li hu kixtz’iib’a laj Santiago wankeb’ naab’aleb’ li na’leb’ li naru neke’rosob’tesiheb’ li kok’al nakatzoleb’. Taaqe li musiq’ej re xk’uub’ankil b’ar wan li na’leb’ taawotz rik’ineb’. Eb’ li na’leb’ sa’ li tusleb’ aatin a’in naru nakate’xtenq’a.

reetalil li wotzok

Xkanab‘ankileb‘ chi wotzok

Patz’ reheb’ li kok’al naq te’xwotz jun na’leb’ re li evangelio li jultik reheb’ naq xe’xtzol rik’ineb’ lix junkab’al chiru li xamaan xnume’ malaj sa’ li Tzoleb’aal choq’ reheb’ li Kok’al sa’ li domingo xnume’. Chirix naq li junjunq chi kok’al ak xwotzok, patz’ re jun chik li ch’ina al naq tixk’os ru li xwotzman.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Santiago 1:5–6

Naru ninpatz’ re lin Choxahil Yuwa’ naq tinixtenq’a chixtzolb’al li k’a’ru yaal.

Tenq’aheb’ li kok’al nakatzoleb’ chixtawb’al ru naq naru neke’xsik’ li qaChoxahil Yuwa’ re xtawb’aleb’ xna’leb’. Naq te’xb’aanu te’osob’tesiiq chi nim naq neke’wan xpatz’omeb’ ch’a’aj.

Kok’ k’anjel naru chi b’aanumank

• Tenq’aheb’ li kok’al chixyeeb’al k’iila sut li ch’ol aatin “Wi wank junaq eere yoo chi majelo’k xna’leb’, chixtz’aamaq re li Dios” (Santiago 1:5). Chan ru naq naqayeheb’ li qapatz’om re li Dios? Chan ru naq nokoxsume?

• K’ut li jalam-uuch Li xb’een k’utb’esink (Hu reheb’ li Jalam-uuch re li Evangelio, 90), malaj k’ut li video “La Primera Visión de Jose Smith” (ChurchofJesusChrist.org). Ch’olob’ naq chirix rilb’al Santiago 1:5, laj Jose Smith kimusiq’aak xpatz’b’al re li qaChoxahil Yuwa’ xtenq’ankil rik’in jun lix patz’om (chi’ilmanq Jose Smith—Resilal 1:1–20). Ye lix nawom aach’ool naq li Dios naxsumeheb’ li tij, ut ch’olob’ xyaalal naq eb’ li kok’al naru neke’tijok chiru naq wankeb’ xpatz’om. Kanab’eb’ li kok’al chixyiib’ankileb’ xjalam-uuch laj Jose Smith naq yoo chirilb’al Santiago 1:5 ut naq yoo chi tijok chiru li qaChoxahil Yuwa’.

Santiago 3:1–13

Naru nin’aatinak rik’in chaab’ilal.

Jo’ kixch’olob’ xyaalal laj Santiago, li xtzolb’al xyeeb’aleb’ ka’ajwi’ k’a’aq re ru chaab’il reheb’ li qas qiitz’in tooxtenq’a chi wulak jo’ li Jesukristo (chi’ilmanq Santiago 3:2).

Kok’ k’anjel naru chi b’aanumank

• K’ut jun xjalam-uuch li k’a’ru ki’ ut jun re li k’a’ru k’a. Tenq’aheb’ li kok’al chixtawb’al ru naq li qaChoxahil Yuwa’ naxpatz’ qe naq taqoksi li ru’uj qaq’ re xyeeb’aleb’ ki’il aatin (malaj chaab’ileb’) ut ink’a’ re xyeeb’aleb’ k’ahil aatin (malaj ink’a’ chaab’il) (chi’ilmanq Santiago 3:10). Tenq’aheb’ chixk’oxlankileb’ li k’a’aq re ru chaab’il naru naqaye reheb’ li qas qiitz’in.

• K’e reheb’ li junjunq chi kok’al xjalam-uuch jun kristiaan yoo chi aatinak. Patz’ reheb’ li kok’al naq te’xchap chi kutankil naq laa’at taaye k’a’ru chaab’il naru naqab’aanu rik’in li ru’uj qaq’ (maare xyeeb’al li yaal, b’antioxink, ut xyeechi’inkil qatenq’), ut naq te’xkub’si naq laa’at taaye k’a’ru ink’a’ us taqaye (maare yehok tik’ti’, xhob’b’aleb’ li qas qiitz’in, ut ink’a’ ab’ink chiru qana’ qayuwa’).

• Jultika wi’chik li esil kixk’e laj Santiago sa’ Santiago 3:1–13 rik’in xb’ichankil sa’ komonil jun li b’ich chirix li chaab’ilal, maare “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83).

Santiago 5:7–11

Re xk’ulb’al li rosob’tesihom li Dios, tento taawanq qakuyum.

Wan naq li kuyum ch’a’aj b’ayaq, ut k’a’jo’ wi’chik choq’ reheb’ li kok’al. K’e reetal chan ru naru nakawoksi li na’leb’ kixk’e laj Santiago re xtenq’ankileb’ li kok’al nakatzoleb’ chixtzolb’al kuyuk.

Kok’ k’anjel naru chi b’aanumank

• Tenq’aheb’ li kok’al chixjultikankileb’ hoonal b’ar wi’ tento ke’royb’eni k’a’ruhaq li jwal xe’raj. Wotz jun aanumsihom laa’at naq x’ajman ru laa kuyum. Ch’olob’ naq royb’eninkil k’a’ruhaq naqaj chi ink’a’ nokowech’in, a’an li kuyuk nayeeman re.

• K’os ru Santiago 5:7 rik’ineb’ laa waatin, ut k’ut xjalam-uuch jun iyaj malaj jun li ch’ina che’. K’a’ut naq naqaj ru li kuyuk naq naqak’eheb’ chi k’iik li che’? K’a’ raj ru taak’ulmanq wi ta naqayu’ roq’ li ch’ina che’ re xk’eeb’al chi k’iik sa’ junpaat? Naru ajwi’ tat-aatinaq rik’ineb’ li kok’al chirix li kuyuk choq’ reheb’ li qas qiitz’in ut choq’ qe qajunes qib’. Ch’olob’ xyaalal naq li Dios naru tooxtenq’a chixtzolb’al kuyuk.

• Wotz li seraq’ chirix laj Job, li nayeeman sa’ Santiago 5:11jo’ jun eetalil re li kuyuk (chi’ilmanq “Jobsa’ Eb’ li Esilal sa’ li Najter Chaq’rab’ malaj li video sa’ ChurchofJesusChrist.org). Chan ru ki’osob’tesiik laj Job xb’aan naq ki’ab’in?

reetalil li k’utuk

Xk’utb’al li tzol’leb’: Kok’al ak ninqeb’

Santiago 1:5–6

Lin Choxahil Yuwa’ tinixtenq’a chixtzolb’al li yaal wi ninsik’ lix tenq’.

Eb’ li kok’al nakatzoleb’ ka’ajwi’ wiib’ oxib’ chihab’ toj kok’eb’ chiru laj Jose Smith naq kiril Santiago 1:5 ut kireek’a naq tento tixsik’ li qaChoxahil Yuwa’ sa’ li tijok. K’e reetal chan ru naru nakatenq’aheb’ li kok’al nakatzoleb’ chixkab’lankil lix paab’aaleb’ naq li Dios tixtenq’aheb’ naq te’raj ru xna’leb’.

Kok’ k’anjel naru chi b’aanumank

• Patz’ reheb’ li kok’al naq te’xseraq’i li seraq’ chirix li xb’een k’utb’esink re laj Jose Smith rik’ineb’ ajwi’ li raatin a’an (chi’ilmanq Jose Smith—Resilal 1:5–19; chi’ilmanq ajwi’ li video “La Primera Visión de Jose Smith” sa’ ChurchofJesusChrist.org). Chan ru naq kitenq’aak laj Jose naq kiril Santiago 1:5? Tenq’aheb’ li kok’al chixk’oxlankil jalaneb’ chik kristiaan sa’eb’ li loq’laj hu li ke’xk’ul xsumenkil lix tijeb’, maare laj Nefi (chi’ilmanq 1 Nefi 11:1–6) ut li riitz’in laj Jared (chi’ilmanq Eter 2:18–3:9). B’ar wankeb’ junjunq li k’a’aq re ru naru neke’qapatz’ re li qaChoxahil Yuwa’ sa’ jun li tij?

• Il ru rik’ineb’ li kok’al Jose Smith—Resilal 1:10–14. Patz’ reheb’ li kok’al naq te’xtaw k’a’ru kixb’aanu laj Jose re xk’ulb’aleb’ xsumenkil lix patz’om. Chan ru naru naqataaqe lix b’aanuhom laj Jose naq wanqeb’ qapatz’om?

Santiago 1:22–27; 2:14–26

“Li paab’aal, wi maak’a’ xb’aanuhom, relik chi yaal a’an kamenaq.”

Chan ru taatenq’aheb’ li kok’al chixk’eeb’al reetal chan ru naq neke’xk’am rib’ li neke’xpaab’ ut li neke’xb’aanu?

Kok’ k’anjel naru chi b’aanumank

• K’ut chiruheb’ li kok’al jun li pook maak’a’ xbateriiy, jun li tz’iib’leb’ li maak’a’ ru’uj, malaj yalaq k’a’ru maak’a’ chik aj-e malaj “kamenaq.” Patz’ reheb’ li kok’al naq te’ril Santiago 2:14–17. Chan ru naq eb’ li k’a’aq re ru a’an neke’reetali li yaal wankeb’ sa’ li raqal a’an?

• Patz’ re jun raqal reheb’ li kok’al naq te’ril Santiago 1:22–27 sa’ xch’ooleb’, ut lix komoneb’ chik naq te’ril 2:14–26. Chirix a’an, patz’ reheb’ naq te’xwotz li naru neke’xb’aanu re xk’utb’al naq neke’xb’aanu li naxye li aatin. Chan ru naq neke’xpaab’ lix sumwank re li kub’iha’? Ma neke’xnaw ru jun kristiaan yaj malaj li wan xjunes li naru te’rula’ani? Chan ru naru te’k’anjelaq chiruheb’ lix junkab’al? Naru ajwi’ nakajultika reheb’ li aatin xe’rab’i chiru li ch’utam re li loq’laj wa’ak sa’ li ch’utam anajwan. Chan ru naru naq laa’aqo aj b’aanuhom re li naxye li aatin?

laj Abraham natijok chirix lix muheb’aal t’ikr

“Laj Abraham kixpaab’ li Dios” (Santiago 2:23). Laj Abraham sa’ li helhookil ch’och’ Mamre, xb’aan laj Grant Romney Clawson

Santiago 3:1–13

Naru ninsik’ ru aatinak rik’in chaab’ilal.

Li k’a’ru naqaye chiqib’il qib’ chanchan naq maak’a’ aj-e, a’b’an jo’ kixch’olob’ laj Santiago, naru naxb’aanu xnimal xk’anjel, chi chaab’il malaj chi yib’ ru.

Kok’ k’anjel naru chi b’aanumank

• Ma wan ani sa’ li teep, maare jun reheb’ li kok’al nakatzoleb’, li nak’anjelak rik’ineb’ kawaay malaj li naxnaw b’ayaq chirixeb’ li jukub’? Naru nakapatz’ re naq tixk’e xna’leb’ chirixeb’ lix k’utum laj Santiago sa’ Santiago 3:3–4 chirix roksinkileb’ aatin rik’in chaab’ilal. Malaj, laa’at naru nakayeheb’ laa k’a’uxl. K’a’ru naqatzol chirix xb’eresinkil li ru’uj qaq’ rik’ineb’ li eetalil a’an?

• Patz’ reheb’ li kok’al naq te’ril Santiago 3:1–13 ut te’xyiib’ xjalam-uuch li k’a’aq re ru te’xtaw li naxk’ut chan ru roksinkil chi us li ru’uj qaq’. K’eheb’ xhoonal re xwotzb’al lix jalam-uucheb’ ut li k’a’ru xe’xtzol. B’ichahomaq jun li b’ich chirix roksinkil chaab’il aatin, maare “A’ li chaab’il aatin chiqaye” (Eb’ li B’ich, 148).

• Chirix xnumsinkil wi’chik Santiago 3:1–13 sa’ komonil, numsihomaq wi’chik li k’a’ru k’ojob’anb’il chirix li aatinak sa’ Choq’ re Xkawilaleb’ li Saaj ([hu, 2022], 12). Tenq’aheb’ li kok’al chixk’eeb’al jun meta re te’xchaab’ilob’resi chan ru neke’raatinaheb’ li ras riitz’in, ut waklesiheb’ xch’ool chixpatz’b’al re li qaChoxahil Yuwa’ naq tixtenq’aheb’.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al xyu’aminkil chiru li xamaan a’in li xe’xtzol sa’ li tzolok, maare te’xye jun patz’om chiru li qaChoxahil Yuwa’ sa’ xtijeb’ malaj te’xyal wank rik’in kuyuk. Patz’ reheb’ naq te’xwotz lix numsihomeb’ sa’ li tzolok chal re.

Xkawresinkil qib’ jo’ aj k’utunel

Tenq’aheb’ li kok’al chi wank chi aj aj. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (Li k’utuk jo’ li Kolonel, 25).

perel re kok’ k’anjel: naru ninwan rik’in rahok rik’ineb’ li was wiitz’in