“11–17 diciembre. Apokalipsis 6–14: “Xe’xq’ax ru sa’ xk’ab’a’ lix kik’el li Karneer,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)

“11–17 diciembre. Apokalipsis 6–14,” Kim, Taaqehin—Choq’ reheb’ li komon ut li junkab’al: 2023

Jalam-uuch

li Jesus xaqxo sa’ xyanqeb’ li chahim

Jalam-uuch xb’aan laj Eric Johnsen: Li Nimla Ch’utam, xb’aan laj Robert T. Barrett; xjalam-uucheb’ li chahim nachal rik’in li Agencia Espacial Europea

11–17 diciembre

Apokalipsis 6–14

“Xe’xq’ax ru sa’ xk’ab’a’ lix kik’el li Karneer”

Li Awa’b’ej Boyd K. Packer kixwotz jun na’leb’: “Wi sa’ xtiklajik choq’ eere jalan li raatinul li loq’laj hu, toj teeril ru. Ink’a’ texb’ayq chixk’eeb’al reetal lix chaq’alil ru ut li wankilal wan chi sa’ ” (“La clave para la protección espiritual,” Liahona, noviembre 2013, 27).

Tz’iib’a li nakak’oxla

K’oxla jun li ixq li “q’axal ra wank xb’aan li alank.” Anajwan, k’oxla “jun li nimla k’anti’ kaq rix, wank wuqub’ xjolom ut lajeeb’ xxukub’,” li xaqxo chiru li ixq, “re naq jo’q’e taayo’laaq lix k’uula’al, tixnuq’ raj” (Apokalipsis 12:2–4). Re xtawb’aleb’ ru li raqal a’in sa’ lix k’utb’esinb’il matk’ laj Jwan, k’e reetal naq li k’utb’esinb’il arin, a’an reetalil li Iglees ut lix awa’b’ejihom li Dios, ut li rahilal li te’nume’q wi’. Choq’ reheb’ laj santil paab’anel li yookeb’ chaq chixk’ulb’al li nimla rahob’tesink sa’ xkutankil laj Jwan, maare kich’a’ajko’k chiruheb’ xk’oxlankil naq te’xq’ax ru li maa’usilal. Ch’a’aj ajwi’ xk’oxlankil naq taqaq’ax ru sa’ li kutan wanko wi’, naq laj xik’ ilonel “nayalok rik’ineb’ laj santil paab’anel,” ut wan “xwankil sa’ xb’een chixjunileb’ lix teepal ut xtenamit li ruchich’och’ ” (Apokalipsis 13:7). A’ut sa’ roso’jik lix k’utb’esinb’il matk’ laj Jwan, k’utk’u naq li chaab’il taanumtaaq sa’ xb’een li ink’a’ us. Taat’ane’q Babilonia. Ut eb’ laj santil paab’anel te’elq “sa’ li xnimal rahilal” chi saqeb’ li raq’—ink’a’ naraj xyeeb’al naq maajun wa xtz’ajno’, a’aneb’ b’an “xe’xpuch’ li raq’eb’ ut xe’xsaqob’resi sa’ lix kik’el li Karneer” (Apokalipsis 7:14).

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Apokalipsis 6–11

Laj Jwal kiril naab’al li k’a’aq re ru kik’ulman sa’ li ruchich’och’, kiril li roso’jik li kutan.

Sa’ eb’ li ch’ol a’in, taawil resil jun li hu tz’aptz’o rik’in wuqub’ chi tz’apleb’. Maare taapatz’ aawib’ k’a’ru naraj naxye a’in, jo’ neke’xb’aanu naab’al. Jo’ kixb’aanu li profeet aj Jose Smith. Li Qaawa’ kixk’ut chiru laj Jose Smith naq li hu a’an ut lix tz’apb’al neke’reetali “lix wanjik li ruchich’och’ sa’ li yu’am a’in” ut li junjunq chi tz’apleb’ nareetali jun mil chihab’ (chi’ilmanq Tzol’leb’ ut Sumwank 77:6–7). Maare taawaj xtzolb’al li taak’ulmanq sa’ xb’een toj sa’ xkaa li tz’apleb’ re lix matk’ laj Jwan yeeb’il chi k’osb’il ru sa’ waqxaqib’ raqal (Apokalipsis 6:1–8). Li oxib’ raqal chik neke’xch’olob’ li ro’ tz’apleb’ (eb’ li raqal 9–11). Li taak’ulmanq sa’ eb’ li wiib’ chik chi tz’apleb’ natawman sa’ xraqik li hu Apokalipsis. Sa’ jalan chik aatin, li rajom lix matk’ laj Jwan a’an li roso’jikeb’ li kutan: eb’ li qakutan. Naq yooqat chirilb’al ru, k’oxla k’a’ut naq chaab’il xnawb’al li kixtz’iib’a laj Jwan chirix roso’jikeb’ li kutan.

Naq yooqat chirilb’al lix profeetil aatin laj Jwan chirix li taak’ulmanq, k’oxlaheb’ li patz’om ut eetalil a’in.

Il Apokalipsis 7 chi wank sa’ aach’ol li k’anjel re xch’utub’ankil Israel. K’a’ru nachal sa’ laa k’a’uxl chirix li k’anjel a’in? (chi’ilmanq ajwi’ Tzol’leb’ ut Sumwank 77:8–11). K’a’ru nakatzol sa’eb’ li raqal 13–17 chirix li Jesukristo ut li ani neke’chal rik’in a’an?
K’a’ru neke’xk’ut li ch’ol 8; 9; ut 11 chirix li taak’ulmanq sa’ roso’jikeb’ li kutan? (chi’ilmanq ajwi’ Tzol’leb’ ut Sumwank 77:12–13, 15). Chan ru taqakawresi qib’ sa’ musiq’ejil rik’in li taak’ulmanq?
Apokalipsis 10 na’aatinak chirix jun li ch’ina hu naxq’axtesi jun li anjel re laj Jwan ut naxtaqla chixtzekankil. K’a’ru nareetali a’in (chi’ilmanq Tzol’leb’ ut Sumwank 77:14).

Apokalipsis 12–13

Li pleet saʼ choxa toj yoo chi pleetimank saʼ li ruchichʼochʼ.

Ink’a’ mas naqanaw chirix li pleet sa’ choxa, a’ut yeeb’il xka’ch’inal li aatin chirix sa’ Apokalipsis 12:7–11. Naq nakawileb’ li raqal a’an, k’oxla aawib’ jo’ aj tz’aqonel sa’ li nimla pleet a’an naq maji’ natikla li ruchich’och’. K’a’ru nakatzol chirix li xq’axb’al ru laj Satanas (chi’ilmanq li raqal 11).

Li pleet li kitikla chaq sa’ choxa toj napleetiman sa’ li ruchich’och’, ut laj Satanas toj wan xch’ool re “xpleetinkileb’ li wankeb’ xnawom chirix li Jesukristo” (Apokalipsis 12:17). Chan ru naq laj Satanas naxk’e li pleet sa’eb’ li kutan a’in, jo’ yeeb’il sa’ Apokalipsis 13? Chan ru naq “lix kik’el li Karneer” ut “li aatin xaye chi yaal” (Apokalipsis 12:11) toj yoo chatenq’ankil sa’ li pleet a’an?

Chi’ilmanq ajwi’ 1 Nefi 14:12–14; Moroni 7:12–13; Moises 4:1–4; Tzol’leb’ ut Sumwank 29:36–37; Temas del Evangelio, “Guerra en los cielos,” topics.ChurchofJesusChrist.org.

Apokalipsis14:6–7

“Kiwil jun chik li anjel … wan chaq rik’in jun li chaab’il esilal li maak’a’ roso’jik”

Jun xtz’aqlojik ru li profeetil aatin sa’eb’ li raqal a’in kik’ulman naq laj Moroni kixk’ut rib’ chiru laj Jose Smith ut kixk’ut chiru li hu li kixjaltesi ru ut kixpuktesi jo’ lix Hu laj Mormon. Sa’ li hu a’an wan li “li chaab’il esilal li maak’a’ roso’jik” li taqlanb’ilo chixpuktesinkil “rik’ineb’ li wankeb’ sa’ ruchich’och’ jo’ ajwi’ rik’ineb’ chixjunil li amaq’ ut tenamit, yalaq chan re ru neke’ilok ut neke’aatinak” (Apokalipsis 14:6).

Re tzolok chirixeb’ li anjel li ke’tz’aqon chaq sa’ lix k’ojob’ankil wi’chik li evangelio, chi’ilmanq Tzol’leb’ ut Sumwank 13; 27:5–13; 110:11–16; 128:20–21.

Chi’ilmanq ajwi’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’,” ChurchofJesusChrist.org.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Apokalipsis 7:9, 13–15.K’a’ru neke’xk’ut chiqu li raqal a’in chirix xk’eeb’al saqi aq’ej chiqix choq’ re li kub’iha’ ut reheb’ li k’ojob’anb’il k’anjel sa’ li santil ochoch?

Apokalipsis 7:14–17.Naru taakanab’eb’ li komon re laa junkab’al chixwotzb’al li reek’ahomeb’ chirix lix yeechi’ihom li Qaawa’ li wankeb’ sa’ li raqal a’in. Chan ru naq lix yeechi’ihom naru chiqatenq’ankil naq wanko “sa’ lix nimal rahilal”? (raqal 14).

Apokalipsis 12:7–11; 14:6.Maare wankeb’ li komon sa’ li junkab’al li te’raj xyiib’ankil xjalam-uuch li junjunq chi matk’ li yeeb’il resil sa’ Apokalipsis. Jo’ jun eetalil, xyiib’ankil li jalam-uuch chirix li k’a’ru natawman sa’ Apokalipsis 12 naru naxtikib’ li aatinak chirix li pleet sa’ choxa (che’ilmanq li raqal 7–11). Li jalam-uuch nareetali Apokalipsis 14:6 naru neke’tenq’an sa’ li aatinak chirix lix k’ojob’ankil wi’chik li evangelio.

Chirix rilb’al Apokalipsis 14:6 sa’ komonil, naru taak’ut xjalam-uuch li anjel aj Moroni ut jalaneb’ chik li anjel li ke’tenq’an chixk’ojob’ankil wi’chik li evangelio sa’ li qakutankil (chi’ilmanq li jalam-uuch sa’ xchoyb’al li tusleb’ aatin a’in). Maare li komon re laa junkab’al neke’wan xhoonal re te’xk’ut li jalam-uuch ut te’xwotz k’a’ut naq neke’b’antioxin naq ke’k’ulun li anjel rik’in “li chaab’il esilal li maak’a’ roso’jik” re xpuktesinkil choq’ [qe].”

Apokalipsis 12:11.K’a’ru xyaalalil “li aatin xe’xye chi yaal” sa’ li raqal a’in? Chan ru naq xch’olob’ankil lix nawom qach’ool chirix li Jesukristo nokoxtenq’a laa’o ut eb’ li qas qiitz’in chixq’axb’al ru laj Satanas?

Apokalipsis 13:11–14.K’a’ru neke’xk’oxla li komon sa’ laa junkab’al chirix li josq’ aj xul li nab’alaq’in? Chan ru naru naqanaweb’ ru ut naqatz’eqtaanaheb’ li b’alaq’il na’leb’ li naqil sa’ li ruchich’och’ anajwan?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Kawaq inch’ool,” B’ichleb’aal choq’ reheb’ li Kok’al, 85.

Xkawresinkil aawib’ chi tzolok

Sub’ laa ch’ool sa’ li loq’laj hu. Li Awa’b’ej Russell M. Nelson kixye: “Xsub’b’al eech’ool rajlal kutan sa li raatin li Dios aajel ru choq’ re eekolb’al sa’ musiq’ejil, q’axaj wi’chik sa’ li choqinb’il ruchich’och’ a’in” (“Chawab’i a’an,” Jolomil ch’utub’aj-ib’ re abril 2020). K’a’ru naraj xyeeb’al “xsub’b’al aach’ool sa’ li raatin li Dios”?