« ថ្ងៃទី ៦–១២ ខែ វិច្ឆិកា ។ ហេព្រើរ ៧–១៣ ៖ ‹ សម្ដេចសង្ឃខាងឯសេចក្តីល្អដែលត្រូវមក › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )
« ថ្ងៃទី ៦–១២ ខែ វិច្ឆិកា ។ ហេព្រើរ ៧–១៣ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ម៉ិលគីស្សាដែកប្រសិទ្ធពរដល់អាប់រ៉ាម វ៉លធើរ រ៉េន ។ អំណោយរបស់វិចិត្រករ
ថ្ងៃទី ៦–១២ ខែ វិច្ឆិកា
ហេព្រើរ ៧–១៣
« សម្ដេចសង្ឃខាងឯសេចក្តីល្អដែលត្រូវមក »
នៅពេលបងប្អូនមើល ហើយពិចារណាអំពីគម្រោងមេរៀននេះ សូមយកចិត្តទុកដាក់លើការបំផុសគំនិតដែលបងប្អូនទទួលបាន អំពីកុមារដែលបងប្អូនបង្រៀន ។ ព្រះវិញ្ញាណនឹងជួយបងប្អូនឲ្យរកឃើញសារលិខិតសម្រាប់ពួកគេនៅក្នុង ហេព្រើរ ៧–១៣ ។
អញ្ជើញឲ្យចែកចាយ
សូមជួយកុមារឲ្យចែកចាយអ្វីដែលពួកគេ និងក្រុមគ្រួសាររបស់ពួកគេធ្វើដើម្បីរៀនដំណឹងល្អនៅឯគេហដ្ឋាន ។ សូមអញ្ជើញពួកគេឲ្យចែកចាយបទពិសោធន៍ដែលពួកគេចូលចិត្ត ដែលមានក្នុងការរៀនដំណឹងល្អជាមួយក្រុមគ្រួសាររបស់ពួកគេ ។
បង្រៀនគោលលទ្ធិ ៖ កុមារតូចៗ
បព្វជិតភាពអាចជួយយើងតាមរបៀបជាច្រើន ។
ហេព្រើរ ៧:១–៦ អាចផ្ដល់ឱកាសមួយដើម្បី បង្ហាញដល់កុមារនូវពរជ័យទាំងឡាយនៃបព្វជិតភាព ។
សកម្មភាពដែលអាចធ្វើបាន
-
សូមពន្យល់ដោយសង្ខេបៗថា តើអ័ប្រាហាំជានរណា ហើយបន្ទាប់មកប្រើ ហេព្រើរ ៧:១–៦ ដើម្បីបង្រៀនថា អ័ប្រាហាំបានបង់ដង្វាយមួយភាគក្នុងដប់ទៅម៉ិលគីស្សាដែក( សូមមើល ការបកប្រែដោយយ៉ូសែប ស្ម៊ីធ លោកុប្បត្តិ ១៤:៣៦–៤០ [ នៅក្នុងជំនួយការសិក្សា ] ) ។ សូមពន្យល់ថា ម៉ិលគីស្សាដែកកាន់បព្វជិតភាពដែលជាអំណាចរបស់ព្រះ ហើយម៉ិលគីស្សាដែកបានប្រើបព្វជិតភាពដើម្បីប្រសិទ្ធពរដល់អ័ប្រាហាំ ។ កុមារអាចរីករាយនឹងការសម្ដែងរឿងដោយប្រើវត្ថុក្រដាស ដូចជាមកុដ និងស្រោមសំបុត្រដង្វាយមួយភាគក្នុងដប់ ។
-
សូមអញ្ជើញអ្នកកាន់បព្វជិតភាពអើរ៉ុន និងម៉ិលគីស្សាដែក ឲ្យមកក្នុងថ្នាក់ រួចប្រាប់កុមារអំពីរបៀបដែលពួកគាត់បានប្រើបព្វជិតភាពដើម្បីផ្ដល់ពរដល់មនុស្សដទៃ ។ បន្ទាប់មក សូមបង្ហាញកុមារនូវរូបភាពនៃពិធីបរិសុទ្ធបព្វជិតភាពផ្សេងៗ ( ឧទាហរណ៍ សូមមើល រូបភាព ទំព័រ ១០៣–៨ នៅក្នុង សៀវភៅរូបភាពដំណឹងល្អ ) ។ សូមជួយកុមារឲ្យកំណត់ថា តើបព្វជិតភាពណាមួយដែលតម្រូវឲ្យមានសម្រាប់ពិធីបរិសុទ្ធនីមួយៗ រួចហុចរូបភាពនោះទៅអ្នកដែលកាន់បព្វជិតភាពនោះឲ្យកាន់ ។
សេចក្តីជំនឿគឺជាការជឿទៅលើអ្វីដែលយើងមិនអាចមើលឃើញ ។
ទោះបីជាយើងមិនអាចមើលឃើញព្រះវរបិតាសួគ៌ និងព្រះយេស៊ូវគ្រីស្ទក្តី ក៏យើងអាចអភិវឌ្ឍសេចក្តីជំនឿលើទ្រង់ទាំងទ្វេ និងសេចក្តីសន្យារបស់ទ្រង់ ដោយការធ្វើតាមគំរូរបស់ប្រជាជនដែលស្មោះត្រង់ដែលបានពិពណ៌នានៅក្នុង ហេព្រើរ ១១ បានផងដែរ ។
សកម្មភាពដែលអាចធ្វើបាន
-
សូមដាក់តាំងរូបភាពព្រះយេស៊ូវ ។ សូមដាក់វត្ថុបីបួននៅក្នុងបន្ទប់រៀនដែលតំណាងឲ្យ « ភស្ដុតាង » ដែលអះអាងថាពិតជាមានទ្រង់ប្រាកដមែន ទោះជាយើងពុំអាចមើលឃើញទ្រង់ក្ដី ( ដូចជាព្រះគម្ពីរ រូបភាពការនិមិត្តដំបូង និងរូបភាពផែនដី ) ។ សូមអញ្ជើញកុមារឲ្យតម្រៀបរូបភាព រួចចែកចាយជាមួយពួកគេអំពីរបៀបដែលរូបភាពនីមួយៗជួយយើងឲ្យមានសេចក្ដីជំនឿថា ព្រះយេស៊ូវមានព្រះជន្មរស់ ។
-
សូមយកកង្ហារក្រដាសមួយមក ហើយសូមឲ្យកុមារប្តូរវេនគ្នាអង្គុយឲ្យខ្យល់កង្ហារបក់មកលើមុខរបស់ពួកគេ ។ សូមបង្រៀនពួកគេថា យើងពុំអាចមើលឃើញខ្យល់ទេ ប៉ុន្តែយើងអាចទទួលអារម្មណ៍ដឹងអំពីខ្យល់ ។ ស្រដៀងគ្នានេះដែរ យើងពុំអាចមើលឃើញព្រះវរបិតាសួគ៌ និងព្រះយេស៊ូវគ្រីស្ទទេ ប៉ុន្តែយើងអាចទទួលអារម្មណ៍ពីសេចក្ដីស្រឡាញ់របស់ទ្រង់ទាំងទ្វេ ហើយមានសេចក្ដីជំនឿថាពិតជាមានទ្រង់ទាំងទ្វេប្រាកដមែន ។
-
សូមចែកចាយដំណើររឿងរបស់មនុស្សម្នាក់ ឬច្រើនដែលបានលើកឡើងនៅក្នុង ហេព្រើរ ១១:៤–៣២ ។ បងប្អូនក៏អាចរកឃើញដំណើររឿងអំពីប្រជាជនទាំងនេះនៅក្នុង ដំណើររឿងព្រះគម្ពីរសញ្ញាចាស់ ផងដែរ ។ តើមនុស្សទាំងនេះបានធ្វើអ្វីខ្លះ ដើម្បីបង្ហាញថាពួកគេមានសេចក្ដីជំនឿលើអ្វីមួយដែលពួកគេពុំអាចមើលឃើញ ? សូមចែកចាយពរជ័យមួយចំនួន ដែលបងប្អូនបានទទួលដោយសារតែសេចក្ដីជំនឿរបស់បងប្អូន ។
ព្រះវរបិតាសួគ៌ និងព្រះយេស៊ូវគ្រីស្ទនឹងជួយយើង ហើយមិនទុកយើងចោលឡើយ ។
តើការសាកល្បងណាខ្លះ ដែលកុមារកំពុងជួបប្រទះ ? តើសារលិខិតនៅក្នុង ហេព្រើរ ១៣:៥–៦ អាចនឹងជួយពួកគេតាមរបៀបណា ?
សកម្មភាពដែលអាចធ្វើបាន
-
សូមមើលដំណើររឿងព្រះគម្ពីរសញ្ញាថ្មី ដែលកុមារបានរៀននៅឆ្នាំនេះអំពីព្រះអង្គសង្គ្រោះដែលបានជួយមនុស្សដទៃ ដូចជាពេលដែលទ្រង់បានប្រោសបុរសស្លាប់ដៃជើងម្នាក់ ( សូមមើល លូកា ៥:១៨–២៦ ) ឬបានប្រទានអាហារដល់មនុស្ស ៥០០០ នាក់ ( សូមមើល ម៉ាថាយ ១៤:១៥–២១ ) ។ សូមជួយកុមារឲ្យរៀនឃ្លា « ព្រះអម្ចាស់ទ្រង់ជាជំនួយខ្ញុំ » ( ហេព្រើរ ១៣:៦ ) ។
-
សូមអញ្ជើញកុមារឲ្យគូររូបភាពពីគ្រាមួយ កាលដែលមាននរណាម្នាក់បានលួងលោមចិត្តរបស់ពួកគេ នៅពេលដែលពួកគេមានការភ័យខ្លាច ។ សូមអាន ហេព្រើរ ១៣:៥–៦ ឲ្យពួកគេស្ដាប់ រួចថ្លែងទីបន្ទាល់ថា ព្រះវរបិតាសួគ៌នឹងជួយយើង ហើយមិនទុកយើងចោលឡើយ ។ សូមជួយកុមារកាត់ក្រដាសរាងបេះដូងទំហំមួយធំ ដើម្បីគ្របពីលើគំនូរដែលពួកគេបានគូរ ។ តើមានអ្វីខ្លះដែលជួយយើងឲ្យមានអារម្មណ៍កាន់តែខិតជិតព្រះវរបិតាសួគ៌ ? សូមសរសេរអ្វីទាំងនេះនៅលើរូបបេះដូង ។
-
សូមបង្រៀនកុមារនូវបទចម្រៀងអំពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទស្រឡាញ់ ហើយជួយយើង ដូចជាបទ « សូមប្រាប់កូន ឱព្រះអង្គអើយ » ( សៀវភៅចម្រៀងកុមារ ទំព័រ ៧៥ ) ។ តើយើងអាចដឹងថា ព្រះវរិបតាសួគ៌ និងព្រះយេស៊ូវគ្រីស្ទនៅជិតយើងយ៉ាងដូចម្តេច ? សូមនិយាយអំពីគ្រានៅពេលបងប្អូនបានទទួលអារម្មណ៍ថា « ព្រះអម្ចាស់ទ្រង់ជាជំនួយ [ របស់បងប្អូន ] » ។
បង្រៀនគោលលទ្ធិ ៖ កុមារធំៗ
ថ្នាក់ដឹកនាំសាសនាចក្រធ្វើតាមគំរូរបស់ព្រះអង្គង្រ្គោះ ។
តើបងប្អូនអាចប្រើខគម្ពីរទាំងនេះដើម្បីជួយកុមារឲ្យយល់ថា អស់អ្នកដែលត្រូវបានហៅឲ្យបម្រើនៅក្នុងសាសនាចក្ររបស់ព្រះអម្ចាស់គឺត្រូវមានសេចក្តី ស្មោះត្រង់ និងបម្រើអ្នកដទៃ ដូចជាទ្រង់បានធ្វើយ៉ាងដូចម្តេច ?
សកម្មភាពដែលអាចធ្វើបាន
-
សូមជួយកុមារឲ្យសរសេរអ្វីៗដែលពួកគេដឹងអំពីអ្នកដឹកនាំដ៏អស្ចារ្យពីររូបដែលជា អ័ប្រាហាំ និងម៉ិលគីស្សាដែក ។ ពួកគេអាចរកឃើញជំនួយនៅក្នុង ហេព្រើរ ៧:១–៤; អ័ប្រាហាំ ១:១–២ និង ការបកប្រែដោយ យ៉ូសែប ស្ម៊ីធ លោកុប្បត្តិ ១៤:២៥–៤០ ( នៅក្នុងឧបសម្ព័ន្ធព្រះគម្ពីរប៊ីប ) ។ តើគុណសម្បត្តិដូចព្រះគ្រីស្ទណាខ្លះដែលបុរសទាំងពីររូបនេះមាន ដែលបានជួយពួកលោកឲ្យគោរពដល់បព្វជិតភាព ?
-
សូមឲ្យកុមារអាន ហេព្រើរ ៧:១–២ រួចស្វែងរកមុខងារនានាដែលត្រូវបានប្រើ ដើម្បីពិពណ៌នាអំពីម៉ិលគីស្សាដែក ។ តើមុខងារទាំងនេះរំឭកយើងអំពីព្រះយេស៊ូវគ្រីស្ទយ៉ាងដូចម្ដេច ? សូមជួយពួកគេឲ្យគិតអំពីរបៀបដែលព្រះយេស៊ូវគឺជា « ស្តេចនៃសេចក្តីសុខសាន្ត » ។ សូមអញ្ជើញពួកគេឲ្យនិយាយអំពីអ្នកកាន់បព្វជិតភាពដទៃទៀត ដែលជាឧទាហរណ៍នៃការធ្វើតាមព្រះអង្គសង្រ្គោះផងដែរ ។
-
សូមចែកចាយបទពិសោធន៍មួយ ដែលសេចក្តីជំនឿរបស់បងប្អូននៅលើព្រះអង្គសង្រ្គោះត្រូវបានពង្រឹង ដោយសារតែការបម្រើរបស់អ្នកកាន់បព្វជិតភាពដ៏សុចរិត ។ សូមជួយកុមារឲ្យគិតពីរបៀបដែលបព្វជិតភាពបានផ្តល់ពរជ័យដល់ពួកគេ ។
ព្រះវរបិតាសួគ៌ប្រទានរង្វាន់ដល់អស់អ្នកដែលមានសេចក្តីជំនឿ ។
ហេព្រើរ ១១ មាននូវឧទាហរណ៍ជាច្រើននៃមនុស្សដែលមានពរ នៅពេលពួកគេបានធ្វើសកម្មភាពដោយសេចក្ដីជំនឿ ។ តើដំណើររឿងណាមួយដែលនឹងជាការបំផុសគំនិត និងមានប្រយោជន៍ខ្លាំងបំផុតដល់កុមារដែលបងប្អូនបង្រៀន ?
សកម្មភាពដែលអាចធ្វើបាន
-
សូមអញ្ជើញកុមារឲ្យធ្វើបញ្ជីមួយនៅលើក្តារខៀន នូវអ្វីៗដែលពួកគេបានរៀនអំពីសេចក្តីជំនឿ នៅក្នុង ហេព្រើរ ១១:១–៣, ៦ ។ សូមផ្ដល់ដល់កុមារនូវឈ្មោះនរណាម្នាក់ដែលមានចែងនៅក្នុង ហេព្រើរ ១១ រួចអញ្ជើញពួកគេឲ្យអានខគម្ពីរទាំងឡាយដែលទាក់ទងនឹងបុគ្គលនោះ ។ សូមឲ្យពួកគេចែកចាយតម្រុយអំពីបុគ្គលនោះ ដើម្បីឲ្យកុមារដទៃទៀតអាចទាយថា តើបុគ្គលនោះជានរណា ។ តើមនុស្សទាំងនេះបានបង្ហាញសេចក្ដីជំនឿដូចម្ដេច ហើយតើព្រះវរបិតាសួគ៌បានប្រទានរង្វាន់ដល់ពួកគេយ៉ាងដូចម្ដេច ? ( សម្រាប់រូបភាពរបស់បុគ្គលទាំងនេះ សូមមើល ផ្នែកនៃព្រះគម្ពីរសញ្ញាចាស់ នៃ សៀវភៅរូបភាពដំណឹងល្អ ) ។
-
បន្ទាប់ពីបានអានអំពីគំរូដ៏ស្មោះត្រង់ខ្លះៗនៅក្នុង ហេព្រើរ ១១ សូមឲ្យកុមារសរសេរអំពីបុគ្គលម្នាក់ដែលពួកគេស្គាល់ ជាអ្នកដែលបានបង្ហាញសេចក្ដីជំនឿ ។ សូមអញ្ជើញកុមារបីបួននាក់ឲ្យចែកចាយឧទាហរណ៍របស់ពួកគេជាមួយសិស្សក្នុងថ្នាក់ ។
ព្រះអម្ចាស់ទ្រង់វាយផ្ចាលអ្នកទាំងឡាយដែលទ្រង់ស្រឡាញ់ ។
ខគម្ពីរទាំងនេះអាចជួយកុមារឲ្យយល់ថា ព្រះវរបិតាសួគ៌ ឪពុកម្ដាយរបស់ពួកគេ និងមនុស្សដទៃកែតម្រូវពួកគេ ដោយសារតែពួកគាត់ស្រឡាញ់ពួកគេ ហើយចង់ឲ្យពួកគេរៀនចេញពីកំហុសរបស់ខ្លួន ។
សកម្មភាពដែលអាចធ្វើបាន
-
សូមអាន ហេព្រើរ ១២:៥–១១ ទាំងអស់គ្នា រួចឲ្យកុមារស្វែងរកមូលហេតុដែលព្រះវរបិតាសួគ៌ទ្រង់វាយផ្ចាលយើង ( កែតម្រូវ ឬលត់ដំយើង ) ។ តើការណ៍នេះបង្រៀនយើងអ្វីខ្លះ អំពីមូលហេតុដែលឪពុកម្ដាយលើផែនដីក៏ត្រូវកែតម្រូវកូនៗរបស់ខ្លួនដែរនោះ ? តើយើងគួរតែឆ្លើយតបទៅនឹងការកែតម្រូវពេញដោយក្ដីស្រឡាញ់នេះយ៉ាងដូចម្ដេច ?
-
សូមចែកចាយគំរូនៃមនុស្សនៅក្នុងព្រះគម្ពីរ ដែលត្រូវបានវាយផ្ចាលដោយព្រះអម្ចាស់ ហើយបានប្រែចិត្ត ( ឧទាហរណ៍ សូមមើល នីហ្វៃទី១ ១៦:២៥–២៧; អេធើរ ២:១៣–១៥ ) ។ តើពួកគេគឺជាគំរូល្អនៃគោលការណ៍នៅក្នុង ហេព្រើរ ១២:៥–១១ យ៉ាងដូចម្ដេច ?
-
បន្ទាប់ពីបានអាន ហេព្រើរ ១២:៥–១១ ហើយ សូមអញ្ជើញកុមារឲ្យសរសេររឿងពីរបី ដែលពួកគេនឹងព្យាយាមចងចាំ នៅពេលពួកគេត្រូវបានកែតម្រូវលើកំហុសរបស់ពួកគេ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យសរសេរ ឬគូររូបភាពនៃអ្វីមួយដែលពួកគេបានរៀននៅក្នុងថ្នាក់ ។ សូមលើកទឹកចិត្តពួកគេឲ្យប្រើប្រាស់សំណេរ ឬរូបភាពនោះដើម្បីចែកចាយអ្វីដែលពួកគេបានរៀនជាមួយក្រុមគ្រួសាររបស់ពួកគេ ។
ការកែលម្អការបង្រៀនរបស់យើង
ប្រើទំព័រសកម្មភាព ។ នៅពេលកុមារកំពុងអនុវត្តនៅលើទំព័រសកម្មភាពនៅក្នុងថ្នាក់ សូមប្រើពេលវេលានោះដើម្បីរំឭកអំពីគោលការណ៍នានាចេញពីមេរៀននេះ ។