« ថ្ងៃទី ១៣–១៩ ខែ វិច្ឆិកា ។ យ៉ាកុប ៖ ‹ ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១៣–១៩ ខែ វិច្ឆិកា ។ យ៉ាកុប » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ១៣–១៩ ខែ វិច្ឆិកា
យ៉ាកុប
« ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្ដាប់ប៉ុណ្ណោះ »
នៅក្នុង សំបុត្ររបស់យ៉ាកុប មានសេចក្តីពិតជាច្រើនដែលអាចផ្តល់ពរជ័យដល់កុមារដែលបងប្អូនបង្រៀន ។ សូមធ្វើតាមព្រះវិញ្ញាណដើម្បីកំណត់ថា តើសេចក្តីពិតមួយណាដែលបងប្អូននឹងចែកចាយជាមួយពួកគេ ។ គំនិតយោបល់នៅក្នុងគម្រោងមេរៀននេះអាចជួយបាន ។
អញ្ជើញឲ្យចែកចាយ
សូមអញ្ជើញកុមារឲ្យចែកចាយគោលការណ៍ដំណឹងល្អមួយ ដែលពួកគេចងចាំពីការរៀនជាមួយក្រុមគ្រួសាររបស់ពួកគេអំឡុងសប្តាហ៍មុន ឬការរៀនមកពីអង្គការបឋមសិក្សារបស់ពួកគេកាលពីថ្ងៃអាទិត្យមុន ។ បន្ទាប់ពីកុមារម្នាក់ចែកចាយរួច សូមអញ្ជើញឲ្យកុមារផ្សេងទៀតនៅក្នុងថ្នាក់សង្ខេបអ្វីដែលបានចែកចាយ ។
បង្រៀនគោលលទ្ធិ ៖ កុមារតូចៗ
ខ្ញុំអាចទូលសូមដល់ព្រះវរបិតាសួគ៌ឲ្យជួយខ្ញុំ ឲ្យរៀនអ្វីដែលពិត ។
សូមជួយកុមារដែលបងប្អូនបង្រៀនឲ្យយល់ថា ពួកគេអាចងាកបែរទៅរកព្រះវរបិតាសួគ៌ដើម្បីទូលសូមប្រាជ្ញាបាន ។ ការធ្វើបែបនេះនឹងផ្តល់ពរដល់ពួកគេយ៉ាងមហិមា នៅពេលពួកគេប្រឈមមុខនឹងសំណួរពិបាកៗ ។
សកម្មភាពដែលអាចធ្វើបាន
-
សូមជួយកុមារឲ្យនិយាយសាឡើងវិញនូវឃ្លា « បើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ » ( យ៉ាកុប ១:៥ ) ។ តើយើងសួរសំណួរដល់ព្រះដោយរបៀបណា ? តើទ្រង់ឆ្លើយតបដល់យើងយ៉ាងដូចម្ដេច ?
-
សូមបង្ហាញរូបភាពនៃ ការនិមិត្តដំបូង ( សៀវភៅរូបភាពដំណឹងល្អ ល.រ. ៩០ ) ឬ បង្ហាញវីដេអូ « Joseph Smith’s First ChurchofJesusChrist.orgVision » ) ។ សូមពន្យល់ពីរបៀបដែលការអាន យ៉ាកុប ១:៥ បានបំផុសគំនិតឲ្យយ៉ូសែប ស្ម៊ីធ ទូលសូមជំនួយពីព្រះវរបិតាសួគ៌ ដើម្បីឆ្លើយនឹងសំណួររបស់លោក ( សូមមើល យ៉ូសែប ស្ម៊ីធ—ប្រវត្តិ ១:១–២០ ) ។ សូមចែកចាយទីបន្ទាល់របស់បងប្អូនថា ព្រះឆ្លើយតបការអធិស្ឋាន ហើយថ្លែងទីបន្ទាល់ថា កុមារអាចអធិស្ឋានទៅកាន់ទ្រង់ នៅពេលពួកគេមានសំណួរ ។ សូមឲ្យកុមារគូររូបយ៉ូសែប ស៊្មីធ កំពុងអាន យ៉ាកុប ១:៥ និងអធិស្ឋានទៅកាន់ព្រះវរបិតាសួគ៌ ។
ខ្ញុំអាចនិយាយពាក្យល្អៗ ។
ដូចយ៉ាកុបបានថ្លែងទីបន្ទាល់ ការរៀននិយាយតែពាក្យសម្តីល្អៗដល់អ្នកដទៃ នឹងជួយពួកយើងឲ្យក្លាយកាន់តែដូចជាព្រះយេស៊ូវគ្រីស្ទ ( សូមមើល យ៉ាកុប ៣:២ ) ។
សកម្មភាពដែលអាចធ្វើបាន
-
សូមបង្ហាញរូបភាពពីអ្វីមួយដែលផ្អែម និងអ្វីដែលមានរសជាតិជូរ ។ សូមជួយកុមារឲ្យយល់ថា ព្រះវរបិតាសួគ៌បង្គាប់ឲ្យយើងប្រើអណ្តាតរបស់យើងដើម្បីនិយាយពាក្យផ្អែមល្ហែម ( ឬល្អៗ ) ហើយមិនមែនពាក្យជូរចត់ ( ឬមិនល្អ ) នោះទេ ( សូមមើល យ៉ាកុប ៣:១០ ) ។ សូមជួយពួកគេឲ្យគិតអំពីគំរូនៃរឿងល្អៗដែលយើងអាចនិយាយទៅកាន់មនុស្សដទៃបាន ។
-
សូមឲ្យកុមារម្នាក់ៗនូវរូបគំនូរសាមញ្ញមួយអំពីបុគ្គលម្នាក់ដែលកំពុងនិយាយ ។ សូមអញ្ជើញកុមារឲ្យលើករូបនោះឡើង នៅពេលបងប្អូននិយាយអ្វីមួយល្អដែលយើងអាចនិយាយបានដោយប្រើពាក្យសម្តីរបស់យើង ( ដូចជា ការប្រាប់ការពិត ការសរសើរ និងការផ្ដល់ជំនួយដល់នរណាម្នាក់ ) ហើយសូមដាក់រូបនោះចុះ នៅពេលបងប្អូននិយាយអ្វីមួយដែលយើងមិនគួរនិយាយជាមួយនឹងអណ្តាតរបស់យើង ( ដូចជា ការនិយាយកុហក ការជេរប្រមាថអ្នកដទៃ និងការជំទាស់មិនគោរពតាមឪពុកម្តាយ ) ។
-
សូមពង្រឹងសារលិខិតរបស់ យ៉ាកុប ៣:១–១៣ តាមរយៈការច្រៀងជាមួយគ្នានូវបទចម្រៀងអំពីការមានចិត្តល្អ ដូចជាបទ « ចិត្តល្អចាប់ផ្តើមនឹងខ្ញុំ » ( សៀវភៅចម្រៀងកុមារ ទំព័រ ៨៣ ) ។
ការទទួលពរជ័យរបស់ព្រះតម្រូវឲ្យមានចិត្តអត់ធ្មត់ ។
ចិត្តអត់ធ្មត់ពុំកើតមកដោយឯកឯងជានិច្ចនោះឡើយ ជាពិសេសសម្រាប់កុមារ ។ សូមគិតអំពីរបៀបដែលបងប្អូនអាចប្រើប្រាស់ការទូន្មានរបស់យ៉ាកុប ដើម្បីជួយកុមារដែលបងប្អូនបង្រៀនឲ្យរៀនមានចិត្តអត់ធ្មត់ ។
សកម្មភាពដែលអាចធ្វើបាន
-
សូមជួយឲ្យកុមារគិតអំពីគ្រានានា ដែលពួកគេត្រូវតែរង់ចាំអ្វីមួយដែលពួកគេពិតជាចង់បាន ។ សូមចែកចាយបទពិសោធន៍ នៅពេលបងប្អូនត្រូវរង់ចាំ ។ សូមពន្យល់ថា ការរង់ចាំអ្វីមួយដែលយើងចង់បានដោយគ្មានការរអ៊ូរទាំ ហៅថាការមានចិត្តអត់ធ្មត់ ។
-
សូមសង្ខេប យ៉ាកុប ៥:៧ ជាពាក្យសម្តីផ្ទាល់របស់បងប្អូន ហើយបង្ហាញរូបភាពគ្រាប់ពូជ ឬកូនឈើតូចៗ ។ ហេតុអ្វីយើងត្រូវអត់ធ្មត់ នៅពេលយើងដាំដើមឈើ ? តើនឹងមានអ្វីកើតឡើង ប្រសិនបើយើងព្យាយាមទាញកូនឈើតូចៗនោះដើម្បីឲ្យវាលូតលាស់បានលឿននោះ ? បងប្អូនក៏អាចនិយាយជាមួយកុមារអំពីអត្ថន័យនៃការមានចិត្តអត់ធ្មត់ជាមួយអ្នកដទៃ និងខ្លួនរបស់យើងផងដែរ ។ សូមថ្លែងទីបន្ទាល់ថា ព្រះអាចជួយយើងឲ្យរៀនដើម្បីមានចិត្តអត់ធ្មត់បាន ។
-
សូមចែកចាយដំណើររឿងរបស់យ៉ូប ដែលបានលើកឡើងនៅក្នុង យ៉ាកុប ៥:១១ ជាឧទាហរណ៍ពីការមានចិត្តអត់ធ្មត់ ( សូមមើល « យ៉ូប » នៅក្នុង ដំណើររឿងព្រះគម្ពីរសញ្ញាចាស់ ឬវីដេអូដូចគ្នានេះ ChurchofJesusChrist.orgVision » ) ។ តើយ៉ូបបានទទួលពរជ័យ ដោយសារការមានចិត្តអត់ធ្មត់យ៉ាងដូចម្ដេច ?
បង្រៀនគោលលទ្ធិ ៖ កុមារធំៗ
ព្រះវរបិតាសួគ៌នឹងជួយខ្ញុំឲ្យរៀនពីសេចក្តីពិត ប្រសិនបើខ្ញុំស្វែងរកជំនួយពីទ្រង់ ។
កុមារដែលបងប្អូនបង្រៀនមានអាយុតិចជាងយ៉ូសែប ស្ម៊ីធតែពីរបីឆ្នាំប៉ុណ្ណោះ នៅពេលលោកអាន យ៉ាកុប ១:៥ និងត្រូវបានបំផុសគំនិតឲ្យទៅរកព្រះវរបិតាសួគ៌ក្នុងការអធិស្ឋាន ។ សូមពិចារណាពីរបៀបដែលបងប្អូនអាចជួយកុមារដែលបងប្អូនបង្រៀនឲ្យស្ថាបនាសេចក្តីជំនឿរបស់ពួកគេថា ព្រះនឹងជួយពួកគេ នៅពេលពួកគេខ្វះប្រាជ្ញា ។
សកម្មភាពដែលអាចធ្វើបាន
-
សូមឲ្យកុមារប្រាប់បងប្អូននូវដំណើររឿងនៃការនិមិត្តដំបូងរបស់យ៉ូសែប ស្ម៊ីធ ជាពាក្យសម្តីរបស់ពួកគេផ្ទាល់ ( សូមមើល យ៉ូសែប ស្ម៊ីធ—ប្រវត្តិ ១:៥–២០ សូមមើលផងដែរវីដេអូ « Joseph Smith’s ChurchofJesusChrist.orgVision » ) ។ តើការអាន យ៉ាកុប ១:៥ ជួយយ៉ូសែបយ៉ាងដូចម្តេច ? សូមជួយកុមារឲ្យគិតពីឧទាហរណ៍ផ្សេងទៀតពីបុគ្គលនៅក្នុងព្រះគម្ពីរដែលបានទទួលចម្លើយចំពោះការអធិស្ឋានរបស់ពួកលោក ដូចជា នីហ្វៃ ( សូមមើល នីហ្វៃទី១ ១១:១–៦ ) និងបងប្រុសរបស់យ៉ារេឌ ( សូមមើល អេធើរ ២:១៨–៣:៩ ) ។ តើមានអ្វីខ្លះដែលយើងអាចទូលសួរព្រះវរបិតាសួគ៌ក្នុងការអធិស្ឋានបាន ?
-
សូមអាន យ៉ូសែប ស្ម៊ីធ—ប្រវត្តិ ១:១០–១៤ ជាមួយកុមារ ។ សូមអញ្ជើញកុមារឲ្យស្វែងរកអ្វីដែល យ៉ូសែប ស្ម៊ីធ បានធ្វើដើម្បីទទួលចម្លើយចំពោះសំណួររបស់លោក ។ តើយើងអាចធ្វើតាមគំរូរបស់យ៉ូសែប កាលយើងមានសំណួរដោយរបៀបណា ?
« សេចក្តីជំនឿដែលឥតមានការប្រព្រឹត្តតាម នោះឈ្មោះថាស្លាប់ហើយ » ។
តើបងប្អូននឹងជួយកុមារឲ្យឃើញអំពីទំនាក់ទំនងរវាងអ្វីដែលពួកគេជឿ និងអ្វីដែលពួកគេធ្វើដោយរបៀបណា ?
សកម្មភាពដែលអាចធ្វើបាន
-
សូមបង្ហាញកុមារនូវពិលមួយដែលគ្មានថ្ម ខ្មៅដៃមួយដែលគ្មានបណ្តូល ឬអ្វីផ្សេងទៀតដែលប្រើពុំបាន ឬ « ងាប់ » ។ សូមឲ្យកុមារអាន យ៉ាកុប ២:១៤–១៧ ។ តើវត្ថុទាំងនេះបង្ហាញសេចក្តីពិតនៅក្នុងខគម្ពីរទាំងនេះយ៉ាងដូចម្តេច ?
-
សូមអញ្ជើញកុមារមួយចំនួនឲ្យអាន យ៉ាកុប ១:២២–២៧ ដោយស្ងប់ស្ងាត់ ហើយឲ្យកុមារផ្សេងទៀតអាន ២:១៤–១៨ ។ បន្ទាប់មក សូមអញ្ជើញពួកគេឲ្យចែកចាយអ្វីដែលពួកគេអាចធ្វើបានដើម្បីបង្ហាញថា ពួកគេជាអ្នកប្រព្រឹត្តតាមព្រះបន្ទូល ។ ឧទាហរណ៍ តើពួកគេនឹងរក្សាសេចក្តីសញ្ញានៃពិធីបុណ្យជ្រមុជទឹករបស់ពួកគេយ៉ាងដូចម្តេច ? តើពួកគេស្គាល់នរណាម្នាក់ដែលឈឺ ឬឯកោដែលពួកគេអាចទៅសួរសុខទុក្ខបានដែរឬទេ ? តើពួកគេអាចបម្រើក្រុមគ្រួសារពួកគេឲ្យបានកាន់តែច្រើនយ៉ាងដូចម្តេច ? បងប្អូនក៏អាចរំឭកពួកគេអំពីពាក្យសម្តីដែលពួកគេអាចស្តាប់ឭនៅក្នុងការប្រជុំសាក្រាម៉ង់ថ្ងៃនេះផងដែរ ។ តើយើងអាចក្លាយជាអ្នកប្រព្រឹត្តតាមព្រះបន្ទូលដោយរបៀបណា ?
« អ័ប្រាហាំបានជឿដល់ព្រះ » ( យ៉ាកុប ២:២៣ ) ។ អ័ប្រាហាំនៅលើវាលទំនាបម៉ាមរេ ដោយ ហ្រ្គេន រ៉មនី ខ្លសិន
ខ្ញុំអាចជ្រើសរើសនិយាយពាក្យល្អៗបាន ។
ពាក្យសម្តីដែលយើងនិយាយទៅកាន់គ្នាទៅវិញទៅមក អាចហាក់ដូចជាមិនសំខាន់ ប៉ុន្តែនៅពេលយ៉ាកុបបានថ្លែងទីបន្ទាល់ នោះពាក្យសម្តីអាចប្រែជាមានឥទ្ធិពលខ្លាំងក្លា ទាំងល្អ ឬទាំងអាក្រក់ ។
សកម្មភាពដែលអាចធ្វើបាន
-
តើមាននរណាម្នាក់នៅក្នុងវួដ ឬប្រហែលមានកុមារណាម្នាក់ដែលបងប្អូនបង្រៀន ដែលធ្លាប់ធ្វើការជាមួយនឹងសត្វសេះ ឬដឹងអ្វីមួយអំពីទូកដែរឬទេ ? បងប្អូនអាចអញ្ជើញគាត់ ឬនាងឲ្យផ្តល់ការយល់ដឹងអំពីការបង្រៀនរបស់ យ៉ាកុប នៅក្នុង យ៉ាកុប ៣:៣–៤ អំពីការប្រើពាក្យល្អៗ ។ ឬសូមផ្តល់ការយល់ដឹងរបស់បងប្អូនផ្ទាល់ ។ តើយើងរៀនអ្វីខ្លះអំពីការគ្រប់គ្រងអណ្តាតយើងចេញមកពីឧទាហរណ៍ទាំងនោះ ?
-
សូមឲ្យកុមារអាន យ៉ាកុប ៣:១–១៣ ហើយគូររូបភាពនៃអ្វីមួយដែលពួកគេរកឃើញដែលបង្រៀនអំពីការគ្រប់គ្រងអណ្តាតរបស់យើង ។ សូមផ្តល់ពេលវេលាឲ្យពួកគេចែកចាយរូបភាពរបស់ពួកគេ និងអ្វីដែលពួកគេបានរៀន ។ សូមច្រៀងចម្រៀងមួយបទជាមួយគ្នា អំពីការប្រើពាក្យល្អៗ ដូចជាបទ « ចូរយើងតែងថ្លែងពាក្យល្អ » ( ទំនុកតម្កើង ល.រ. ១៤៦ ) ។
-
បន្ទាប់ពីការពិនិត្យមើល យ៉ាកុប ៣:១–១៣ ជាមួយគ្នាហើយ សូមរំឭក បទដ្ឋានសម្រាប់ការប្រើពាក្យសម្តី នៅក្នុង ដើម្បីកម្លាំងនៃយុវជន ( [ កូនសៀវភៅ ឆ្នាំ ២០២២ ] ទំព័រ ១២ ) ។ សូមជួយកុមារឲ្យដាក់គោលដៅដើម្បីកែលម្អនូវរបៀបដែលពួកគេនិយាយជាមួយគ្នា ហើយសូមលើកទឹកចិត្តពួកគេឲ្យទូលសូមព្រះវរបិតាសួគ៌ឲ្យជួយពួកគេសម្រេចគោលដៅនេះ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យធ្វើអ្វីមួយនៅសប្តាហ៍នេះ ដើម្បីអនុវត្តអ្វីដែលពួកគេបានរៀននៅក្នុងថ្នាក់ ដូចជាការអធិស្ឋានទៅព្រះវរបិតាសួគ៌កាលដែលមានចម្ងល់ ឬការព្យាយាមឲ្យកាន់តែមានចិត្តអត់ធ្មត់ ។ សូមឲ្យពួកគេចែកចាយបទពិសោធន៍របស់ពួកគេ នៅក្នុងថ្នាក់លើកក្រោយ ។
ការកែលម្អការបង្រៀនរបស់យើង
ជួយកុមារឲ្យសកម្មឡើង ។ « នៅពេលបងប្អូនបង្រៀនកុមារតូចៗ សូមអនុញ្ញាតឲ្យពួកគេសង់រូប គូររូប ផាត់ពណ៌ សរសេរ ហើយបង្កើតអ្វីមួយឡើង ។ រឿងទាំងនេះមានន័យច្រើនជាងសកម្មភាពដ៏សប្បាយរីករាយទៅទៀត—វាមានសារៈសំខាន់ណាស់នៅក្នុងការរៀនសូត្រ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។