« 6–12 nō Novema. Hebera 7–13 : ‘’Ei tahu’a rahi nō te mau mea maitata’i a muri nei’ », Mai, pe’e mai—nō te Paraimere : Faufa’a ’Āpī 2023 (2021)
« 6–12 nō Novema. Hebera 7–13 », Mai, pe’e mai—nō te Paraimere : 2023
Melchizedek Blesses Abram [Tē ha’amaita’i nei Melehizedeka ia Aberama], nā Walter Rane. Hōro’a a te tahu’a ha’anihi
6–12 nō Novema
Hebera 7–13
« ’Ei tahu’a rahi nō te mau mea maitata’i a muri nei »
’A taiʼo faʼahou ai ’oe ʼe ’a feruri ai i teie faʼanahoraʼa, e haʼapaʼo maitaʼi i te mau muhumuhuraʼa tā ’oe e fāriʼi nō niʼa i tā ’oe mau pīahi. E tauturu mai te Vārua ia ’oe ʼia ʼimi i te mau parau poroʼi nō rātou i roto i te Hebera 7–13.
Tītau i te mana’o
E ani i te mau tamariʼi ’ia fa’a’ite mai i te mau mea tā rātou ʼe tā tō rātou mau ʼutuāfare i rave nō te haʼapiʼi i te ʼevanelia i te fare. E ani ia rātou ʼia faʼaʼite mai i te tahi o tā rātou mau ’ohipa au roa a’e nō niʼa i te haʼapiʼiraʼa i te ʼevanelia ʼe tō rātou ʼutuāfare.
Ha’api’i i te ha’api’ira’a tumu : Te mau tamari’i ’āpī
E tauturu te autahu’ara’a ia tātou nā roto i te mau rāveʼa rau.
E nehenehe te Hebera 7:1–6 e hōroʼa mai i te hōʼē rāveʼa nō te faʼaʼite atu i te mau tamariʼi i te mau haʼamaitaʼiraʼa nō te autahuʼaraʼa.
Te mau ’ātivite e au
-
’A fa’ata’a poto noa ē, ’o vai ’o Aberahama, ’e ’a fa’a’ohipa i muri iho i te Hebera 7:1–6 nō te ha’api’i ē, ’ua ’aufau Aberahama i te tuha’a ’ahuru ia Melehizedeka (hi’o ato’a ’Īritira’a a Iosepha Semita, Genese 14:36–40 [i roto i te Parau hi’u o te Bibilia]). E tātara atu ē ʼua mau Melehizedeka i te autahuʼaraʼa, ʼoia hoʼi te mana o te Atua, ʼe ʼua faʼaʼohipa ’o Melehizedeka i te reira nō te haʼamaitaʼi ia Aberahama. E au paha te mau tamariʼi i te haʼuti i te ʼāʼamu nā roto i te mau tauihaʼa ’ōhie, mai te hōʼē korōna ʼe te hōʼē vehi rata nō te tuhaʼa ʼahuru.
-
E ani i te hōʼē taeaʼe tei mau i te Autahuʼaraʼa a Aarona ʼe Melehizedeka e haere mai i roto i te piha haʼapiʼiraʼa ʼe ’ia parau i te mau tamariʼi ’ua nāhea rātou i te faʼaʼohiparaʼa i te autahuʼaraʼa nō te haʼamaitaʼi ia vetahi ʼē. E faʼaʼite i muri iho i te mau tamariʼi i te mau hōhoʼa rau nō te mau fa’atōro’ara’a i te autahuʼaraʼa (mai te mau hōhoʼa 103–8 i roto i te Buka hōho’a nō te ’evanelia). E tauturu i te mau tamariʼi ʼia faʼataʼa mai e aha te autahuʼaraʼa tei tītauhia nō te fa’atōro’ara’a tātaʼitahi ʼe e hōroʼa i te reira hōhoʼa nā te taʼata tei mau i te reira iho autahuʼaraʼa e tāpeʼa.
Te faʼaroʼo ’o te ti’aturira’a ïa i te mau mea ’aore e ʼite-mata-hia e tātou.
Noa atu ē, ’aita tātou e ’ite ra i tō tātou Metua i te ao ra ’e ia Iesu Mesia, e nehenehe rā tātou e fa’ahotu i te fa’aro’o i roto ia rāua e i tā rāua mau fafaura’a, ma te pe’e i te mau hi’ora’a o te mau ta’ata ha’apa’o maita’i tei fa’a’itehia i roto i te Hebera 11.
Te mau ’ātivite e au
-
E pia i te hōʼē hōhoʼa nō Iesu. E tuʼu haere i roto i te piha e rave rahi taoʼa nō te faʼahōhoʼa i « te mau ha’apāpūra’a » ē, e mea mau ʼoia, noa atu eʼita e nehenehe ia tātou ʼia ʼite mata atu iāna (mai te mau pāpaʼiraʼa moʼa, te hōhoʼa nō te ʼOrama Mātāmua ʼe te hōhoʼa nō te fenua nei). E ani i te mau tamariʼi ’ia ʼimi i te mau taoʼa,ʼe ’ia faʼaʼite mai e nāhea te taoʼa tātaʼitahi i te tauturu ia tātou ’ia faʼaroʼo ē, tē ora nei Iesu.
-
E ’āfaʼi mai i te hōʼē haʼapūvaʼivaʼi mata’i i hāmanihia i te pāpie, ʼe e vaiiho i te mau tamariʼi, te tahi i muri i te tahi, ’ia ʼite i te haʼapūvaʼivaʼi ’ia pupuhi i te mataʼi i niʼa i tō rātou mata. E parau atu ’ia rātou ē eʼita e nehenehe ia rātou ʼia ʼite mata atu i te mataʼi, e nehenehe rā tā tātou e ʼite i te reira. ʼOia atoʼa, eʼita e nehenehe ia tātou ’ia ʼite mata atu i tō tātou Metua i te ao ra ʼe ia Iesu Mesia, e nehenehe rā tā tātou e ʼite i tō rāua here ʼe ʼia tiʼaturi ē, tē ora mau nei rāua.
-
E faʼaʼite atu i te ʼāʼamu nō te hō’ē ta’ata ’aore ra hau atu, tei fa’ahitihia i roto i te Hebera 11:4–32. E nehenehe ato’a ’oe e ’ite mai i te mau ā’amu nō ni’a i teie mau ta’ata i roto i Te mau ’ā’amu o te Faufa’a Tahito. E aha tā teie mau taʼata i rave nō te faʼaʼite e faʼaroʼo tō rātou i te tahi mea tei ʼore i ʼite-mata-hia e rātou ? E faʼaʼite i te tahi mau haʼamaitaʼiraʼa tā ’oe i fāriʼi nō tō ’oe faʼaroʼo.
E tauturu tō tātou Metua i te ao ra ʼe Iesu Mesia ia tātou ʼe e ʼore roa rāua e faʼaruʼe ia tātou.
E aha te mau tāmataraʼa e nehenehe i te mau tamariʼi e faʼaruru atu ? Nāhea te poroʼi o te Hebera13:5–6 e tauturu ai ia rātou ?
Te mau ’ātivite e au
-
E taiʼo faʼahou i te tahi mau ʼāʼamu o te Faufaʼa ʼĀpī tā te mau tamariʼi i haʼapiʼi mai i teie matahiti, i te tauturura’a te Faʼaora i te ta’ata, mai te taime ’a faʼaora ai ʼoia i te taʼata hāpepa (hiʼo ’ia Luka 5:18–26) ʼaore rā te faʼaʼamuraʼa e 5 000 taʼata (hiʼo ia Mataio 14:15–21). E tauturu i te mau tamariʼi ’ia haʼapiʼi mai i te pereota « ’O te Fatu tōʼu tauturu » (Hebera 13:6).
-
E ani i te mau tamariʼi ’ia pāpa’i i te hōʼē hōhoʼa nō te hōʼē taime ’a tāmāhanahana ai te hō’ē ta’ata ia rātou i tō rātou riʼariʼara’a. E taiʼo i te Hebera13:5–6 ia rātou, ʼe e faʼaʼite pāpū atu ē, e tauturu mai tō tātou Metua i te ao ra ia tātou ʼe e ʼore roa ʼoia e faʼaruʼe ia tātou. E tauturu i te mau tamariʼi ʼia tāpūpū i te mau māfatu pāpie tano noa te ’ā’ano nō te tāpoʼi i te mau hōhoʼa. E aha te tahi mau mea ’o tē tauturu ia tātou ’ia piri atu ā i tō tātou Metua i te ao ra ? E pāpaʼi i te tahi o teie mau mea i niʼa i te mau māfatu.
-
Ha’api’i i te mau tamari’i i te hō’ē hīmene nō ni’a i te huru tō tātou Metua i te ao ra ’e Iesu e here ’e e tauturu nei ia tātou, mai te hīmene « Dis-moi Seigneur » (Chants pour les enfants, 75). Nāhea tātou e ’ite ai ē, tei pīha’i iho tō tātou Metua i te ao ra ’e ’o Iesu Mesia ia tātou ? ’A paraparau nō ni’a i te hō’ē taime ’a ’ite ai ’oe ē, « ’O te Fatu [tō ’oe] tauturu. »
Ha’api’i i te ha’api’ira’a tumu : Te mau tamari’i pa’ari a’e
E pe’e te feiā fa’atere o te ’Ēkālesia i te Fa’aora.
Nāhea ’oe ʼia faʼaʼohipa i teie mau ʼīrava nō te tauturu i te mau tamariʼi ʼia taʼa ē, te feiā tei pi’ihia nō te tāvini i roto i te ’Ēkālesia a te Fatu, e ti’a ia rātou ’ia fa’aro’o ’e ’ia tāvini ia vetahi ’ē mai iāna i nā reira ?
Te mau ’ātivite e au
-
E tauturu i te mau tamariʼi ’ia tāpura i te mau mea tā rātou i ʼite nō niʼa i nā ta’ata fa’atere rahi e piti, ’o Aberahama ʼe ’o Melehizedeka. E ʼitehia ia rātou te tauturu i roto i te Hebera 7:1–4 ; te Aberahama 1:1–2 ; ʼe te ʼĪritiraʼa a Iosepha Semita, Genese 14:25–40 (i roto i te parau hi’u o te Bibilia). E aha te mau tāpaʼo mai tō te Mesia i mauhia e teie nā taʼata tei tauturu ia rāua ’ia faʼatura i te autahuʼaraʼa ?
-
E ani i te mau tamariʼi ’ia taiʼo i te Hebera 7:1–2 ʼe e ’imi i te mau tiʼaraʼa tei faʼahitihia nō te faʼaʼite ’o vai ’o Melehizedeka. E mea nāhea teie mau tiʼaraʼa i te faʼahaʼamanaʼo ia tātou ia Iesu Mesia ? E tauturu ia rātou ʼia feruri i te mau ’ohipa i reira Iesu i te rirora’a ʼei « Ariʼi nō te hau. » E ani ia rātou ’ia parau mai nō ni’a i te tahi atu mau taʼata tei mau i te autahuʼaraʼa, tei riro atoʼa ’ei hiʼoraʼa nō te peʼeraʼa i te Faʼaora.
-
E fa’a’ite i te hō’ē ’ohipa i tupu ē ’ua ha’apūaihia tō ’oe fa’aro’o i te Fa’aora maoti te tāvinira’a a te hō’ē ta’ata parauti’a tei mau i te autahu’ara’a. E tauturu i te mau tamari’i ’ia feruri i te mau mea i ha’amaita’i ai te autahu’ara’a ia rātou.
E ʼutuʼa maita’i tō te feiā e fa’aro’o i tō tātou Metua i te ao ra .
Tē vai nei e rave rahi hiʼoraʼa i roto i te Hebera 11 nō te mau taʼata tei haʼamaitaʼihia ’a ’ohipa ai rātou ma te faʼaroʼo. E aha te mau ʼāʼamu ’o tē faʼauru rahi a’e, ʼaore rā ’o tē tauturu rahi a’e i tā ’oe mau pīahi ?
Te mau ’ātivite e au
-
E ani i te mau tamariʼi ’ia pāpa’i i niʼa i te tāpura i te mau mea tā rātou i haʼapiʼi nō niʼa i te faʼaroʼo, i roto i te Hebera 11:1–3, 6. E hōroʼa i te tamariʼi tātaʼitahi i te iʼoa o te tahi taʼata tei faʼahitihia i roto i te Hebera 11, ʼe e ani atu ia rātou ’ia taiʼo mai i te mau ʼīrava i tūʼatihia i taua taʼata ra. E ani ia rātou ’ia faʼaʼite mai i te mau tāpaʼo nō niʼa i terā taʼata, ʼia nehenehe i te tahi atu mau tamariʼi ’ia ʼite ʼo vai ra. Nāhea teie mau taʼata i te faʼaʼiteraʼa i te faʼaroʼo, ’e nāhea tō tātou Metua i te ao ra i te haʼamaitaʼira’a ia rātou ? (Nō te hōhoʼa nō teie mau taʼata, e hiʼo i te tufaʼa o te Faufaʼa Tahito nō te Buka hōho’a nō te ’evanelia.)
-
I muri aʼe i te taiʼoraʼa i te tahi hiʼoraʼa nō te haʼapaʼo i roto i te Hebera 11, e ani i te mau tamariʼi ʼia pāpaʼi nō niʼa i te hōʼē taʼata tā rātou i ʼite tei faʼaʼite i tōna faʼaroʼo. E ani i te mau tamari’i e rave rahi ʼia fa’a’ite mai i tō rātou mau hiʼoraʼa i tō te piha ha’api’ira’a.
E aʼo te Fatu i te feiā tāna e here nei.
E nehenehe teie mau ʼīrava e tauturu i te mau tamariʼi ’ia ʼite ē, e fa’atītī’aifaro tō tātou Metua i te ao ra ia rātou, nā reira ato’a tō rātou mau metua, ʼe te tahi atu mau taʼata, nō tō rātou ho’i here ia rātou ʼe tō rātou hinaʼaro ʼia ’apo mai rātou i te haʼapiʼira’a mai roto mai i tā rātou mau hape.
Te mau ’ātivite e au
-
E taiʼo ʼāmui i te Hebera 12:5–11, ʼe e ani i te mau tamariʼi ʼia ʼimi i te mau tumu tō tātou Metua i te ao ra e aʼo nei ia tātou (faʼa’āfaro ʼaore rā e ha’api’i i te auraro i te ture). E aha tā teie e haʼapiʼi mai nei ia tātou nō te tumu e aʼo atoʼa ai te mau metua i te fenua nei i tā rātou mau tamariʼi ? Nāhea tātou ʼia pāhono atu i te aʼo here ?
-
E faʼaʼite i te hiʼoraʼa nō te mau taʼata i roto i te mau pāpaʼiraʼa moʼa tei aʼohia e te Fatu ʼe tei tātarahapa (ʼei hiʼoraʼa, e hiʼo i te 1 Nephi 16:25–27 ; Etera 2:13–15). Nō te aha rātou e mau hiʼoraʼa maitaʼi nō te mau parau tumu i roto i te Hebera 12:5–11 ?
-
I muri aʼe i te taiʼoraʼa i te Hebera 12:5–11, e ani i te mau tamariʼi ʼia pāpaʼi i te tahi mau mea tā rātou e tāmata i te haʼamanaʼo ’ia aʼo-anaʼe-hia rātou nō tā rātou mau hape.
Fa’aitoito i te ha’api’ira’a i te fare
E ani i te mau tamari’i ’ia pāpa’i ’aore rā, ’ia pāpa’i hōho’a i te tahi mea tā rātou i ’apo mai i roto i te piha ha’api’ira’a. E faʼaitoito ia rātou ʼia fa’a’ohipa i te reira nō te fa’a’ite i te mea tā rātou i ha’api’i mai ’e tō rātou ’utuāfare.
Ha’amaita’i i tā tātou ha’api’ira’a
E fa’a’ohipa i te mau ’api ’ātivite. ’A fa’a’ī ai te mau tamari’i i te mau ’api ’ātivite i roto i te taime haʼapiʼiraʼa, ’a fa’a’ohipa i te reira taime nō te hi’o fa’ahou i te mau parau tumu o te ha’api’ira’a.