Balm of Gilead [Rā’au i Gileada], nā Annie Henrie

30 nō ’Ātopa–5 nō Novema

Hebera 1–6

Iesu Mesia, te « tumu nō te ora mure ʼore »

E aha te mau parau mau tā ’oe e ’ite nei i roto i te Hebera 1–6 i faʼauru ia ’oe ʼia haʼapiʼi atu i te mau tamariʼi ? E haʼapaʼo maitaʼi atu i te mau muhumuhuraʼa a te Vārua ’o tē tae mai ’a faʼaineine ai ’oe, ʼe a ara i te pāpaʼi i te reira.

Tītau i te mana’o

ʼUa fāriʼi ānei te mau tamariʼi i te aniraʼa i te hopeʼa o te ha’api’ira’a nō te hepetoma i maʼiri aʼenei ’ia ʼimi i te hōʼē ʼīrava e nehenehe ia rātou ʼia faʼaʼite mai ? Mai te mea ē ’ē, e hōroʼa atu ia rātou i te hō’ē taime nō te faʼaʼite mai i te reira. Mai te mea ʼaita, e tauturu ia rātou ʼia feruri i te tahi mea tā rātou i haʼapiʼi mai roto mai i te mau pāpaʼiraʼa moʼa ’aita i maoro a’e nei, ’o tā rātou e fa’a’ite mai.

Ha’api’i i te ha’api’ira’a tumu : Te mau tamari’i ’āpī

Hebera 1:1–10 ; 2:8–10, 17–18

Tē tiʼaturi nei au ia Iesu Mesia.

E nehenehe teie mau ʼīrava e tauturu i te mau tamariʼi ʼia haʼapiʼi rahi atu ā nō niʼa ia Iesu Mesia ʼe ʼia haʼapūʼai i tō rātou tā’amura’a iāna.

Te mau ’ātivite e au

• ’Imi i te tahi mau parau mau nō ni’a ia Iesu Mesia i roto i te Hebera 1:1–10 ; 2:8–10, 17–18, ’e ’a pāpa’i i te reira i ni’a i te mau ’api parau iti. ’A huna i te mau ’api parau nā roto i te piha, ’e ’a ani i te mau tamari’i ’ia ’imi i te reira. E tauturu atu i te mau tamari’i ʼia taiʼo i te mau parau mau tei pāpaʼihia i niʼa i te mau ʼapi parau, ʼe e paraparau e aha te auraʼa o teie mau parau mau. Mai te mea e tītauhia, e faʼataʼa atu ē ’ua piʼihia Iesu te Tamaiti a te Atua nō te mea ’o tō tātou Metua i te ao ra te metua nō tōna vārua ʼe nō tōna tino.

• ’A fa’a’ite i te hō’ē hōho’a nō te Fa’aora, ’e ’a fa’a’ite nō te aha ’oe i māuruuru ai nōna. E vaiiho i te tamari’i tāta’itahi ’ia rave i te hō’ē taime nō te tāpe’a i te hōho’a ’e ’ia fa’a’ite mai nō te aha ’oia i māuruuru ai ia Iesu Mesia.

Hebera 3:8

Tē hina’aro nei tō tātou Metua i te ao ra ’eiaha tātou e « faʼaetaʼeta i tō [tātou] ʼāʼau. »

Tē fa’ata’a mai nei te Hebera 3 i te parau nō te mau tamariʼi a ’Īserā’ela tei faʼaʼetaʼeta i tō rātou ʼāʼau ʼe tei pātoʼi i te mau haʼamaitaʼiraʼa a te Fatu. E riro teie ’ei faʼaararaʼa ia tātou pāʼātoʼa ʼeiaha ʼia faʼaʼetaʼeta i tō tātou ʼāʼau.

Te mau ’ātivite e au

• ’Āfa’i mai i roto i te piha ha’api’ira’a te hō’ē tao’a e ’ote i te pape (mai te hō’ē rimu ’aore rā te hō’ē ’ahu pu’a) ’e hō’ē mea pa’ari (mai te hō’ē ’ōfa’i). E ani i te mau tamariʼi ʼia tāpeʼa i te mau taoʼa ʼe ʼia faʼaʼite mai i te huru o te mau taoʼa. E tuʼu maʼa tōpata pape i niʼa i te taoʼa tātaʼitahi, ʼe e faʼaʼite atu ē, e mea tomo maita’i a’e te pape i roto i te tao’a ’ote, i te ʼōfaʼi. E tātara atu ē, e tiʼa i tō tātou ʼāʼau ’ia marū ʼeiaha ’ia paʼari ’ia nehenehe ia tātou ʼia fariʼi i te mau parau mau a tō tātou Metua i te ao ra i roto i tō tātou ʼāʼau.

• E tāpū i te tahi hoho’a māfatu i roto i te mātēria marū, mai te ʼahu, ʼe te mātēria paʼari aʼe, mai te ʼāfata parau. ’A ’āparau ’e te mau tamari’i i te ta’a-’ē-ra’a i rotopu i te ’ā’au marū ’e te ’ā’au ’eta’eta. ’A fa’a’ite i te tahi hi’ora’a nō roto mai i te mau pāpa’ira’a mo’a nō te mau ta’ata ’ā’au marū ’aore rā te mau ta’ata ’ā’au ’eta’eta, mai ia Nephi, Lamana ’e Lemuela (1 Nephi 2:16–19) ; Paulo (Te ʼOhipa 9:1–22) ʼaore rā Iosepha Semita (Iosepha Semita—ʼĀʼamu 1:11–20). ’A faʼaʼite ai ’oe i te mau hiʼoraʼa, e ani i te mau tamariʼi ’ia toro i te rima i ni’a i te ʼāʼau marū ʼaore rā, te ʼāʼau ʼetaʼeta.

’Ua « parauhia Aarona e te Atua » (Hebera 5:4). Moses Calls Aaron to the Ministry [Tē pi’i nei Mose ia ’A’arona i roto i te tāvinira’a], nā Harry Anderson

Hebera 5:4

Nā te Atua i pi’i te mau taʼata tei mau i te autahuʼaraʼa.

ʼUa riro te Hebera 5:4 ’ei ʼīrava faufaʼa rahi nō te mea te haʼamāramarama mai nei te reira ē, e ti’a i te mau taʼata tei mau i te autahuʼaraʼa ’ia pi’ihia e te Atua. Mai te reira ato’a nō te mau ta’ata ato’a tei pi’ihia ’ia tāvini i roto i te ’Ēkālesia a te Fatu.

Te mau ’ātivite e au

• E taiʼo i te Hebera 5:4 i te mau tamariʼi. E ani i te hō’ē taea’e tei mau i te autahu’ara’a ’ia fa’ata’a mai e aha te autahu’ara’a. E nehenehe ato’a tāna e fa’a’ite e nāhea ’oia i te tāvini ia vetahi ’ē ’a rave ai oia i tāna mau hōpoi’a. ’A ani ato’a i te hō’ē tuahine i roto i te pāroita ’ia fa’a’ite mai i tōna ’itera’a ’a fa’ata’ahia ai ’oia i te hō’ē pi’ira’a i roto i te ’Ēkālesia. ’A fa’aitoito iāna ’ia fa’a’ite mai e mea nāhea tō te Fatu ha’amaita’ira’a iāna i te mana nō te rave fa’aoti i tōna pi’ira’a.

• E tauturu i te mau tamari’i ’ia tāmau ’ā’au i te hīro’a fa’aro’o pae. E faʼaʼite i tō ’oe ʼiteraʼa pāpū ē, te mau taʼata tei piʼihia nō te rave i te ʼohipa a te Atua, e mau ta’ata ïa tei pi’ihia e te Atua nā roto i te heheuraʼa.

Ha’api’i i te ha’api’ira’a tumu : Te mau tamari’i pa’ari a’e

Hebera 1:1–10 ; 2:8–10, 17–18

Tē tiʼaturi nei au ia Iesu Mesia.

ʼUa pāpaʼihia te Episetole i tō te Hebera nō te haʼapūai i te faʼaroʼo o te feiā moʼa nō Hebera, ia Iesu Mesia ra. E nehenehe te reira e tupu ato’a nō tā ’oe mau pīahi.

Te mau ’ātivite e au

• E faʼataʼa atu i te tamariʼi tātaʼitahi i te tahi mau ʼīrava i roto i te Hebera 1:1–10 ; 2:8–10, 17–18, ʼe e ani i te mau tamariʼi ’ia ʼimi i roto i taua mau ʼīrava ra i te mau parau mau nō niʼa ia Iesu Mesia. E vaiiho ia rātou ʼia faʼaʼite mai ʼaore rā ʼia pāpa’i atu i ni’a i te tāpura i te mea i ’itehia ia rātou. E aha atu ā tā tātou i ʼite nō niʼa ia Iesu Mesia ? E nehenehe i te mau tamariʼi ʼia ʼimi i te tahi mau manaʼo i roto i te mau hīmene mai te hīmene « ʼUa ʼite au tē ora nei tōʼu nei Fatu » (Te mau hīmene, N°69) ʼaore rā « Il envoya son Fils aimé » (Chants pour les enfants, 20–21).

• E ani i te mau tamariʼi ʼia pāpaʼi i te mau hōhoʼa nō rātou iho ʼe tō rātou mau metua. E ani ia rātou ʼia faʼaʼite mai e aha te mau mea ’ua ti’a iho ā rātou i tō rātou metua. E faʼataʼa atu ē ’ia parau anaʼe te Hebera 1:3 ē, ʼua riro Iesu Mesia « te hōhoʼa mau ïa nō [te Atua] iho », te auraʼa ra, hōʼē ā ïa tō Iesu ʼe tō tō tātou Metua i te ao ra maita’i ’e te huru. E paraparau i te mau tamari’i e nāhea te pe’era’a ia Iesu Mesia i te ha’afātata ia tātou i tō tātou Metua i te ao ra.

Hebera 3:7–19

Nō te fāriʼi i te arataʼiraʼa ʼe te mau haʼamaitaʼiraʼa a tō tātou Metua i te ao ra, ’eiaha tātou « e faʼaʼetaʼeta i tō [tātou] ʼāʼau. »

I roto i te Hebera 3, ʼua faʼaʼohipahia te ʼāʼamu o te mau ’āti ’Īseraēla i roto i te mēdēbara nō te haʼapiʼi atu i te faufaʼa nō te ’orera’a e faʼaʼetaʼeta i tō tātou ʼāʼau. Nāfea e ti’a ai ia ’oe ’ia fa’a’ohipa i teie ’ā’amu nō te ha’api’i i te mau tamari’i i roto i tā ’oe piha i teie ha’api’ira’a tumu ?

Te mau ’ātivite e au

• E ani i te mau tamariʼi ’ia feruri i te mau mea paʼari ʼe te mau mea marū. (Mai te mea e nehenehe, ’a hōpoi mai i te tahi mau hi’ora’a nō te fa’a’ite ia rātou.) E taiʼo ʼāmui i te Hebera 3:8. E aha te auraʼa te ʼetaʼeta o te ’ā’au ? Nō te aha te Atua e hinaʼaro ai ʼia marū tō tātou ʼāʼau ?

• Nā roto i tā ’oe iho mau parau, e faʼati’a atu i te ʼāʼamu o te mau tamariʼi a ’Īserā’ela i te faʼaʼetaʼetaraʼa i tō rātou ʼāʼau i te Fatu i roto i te mēdēbara (hiʼo Nūmera 14:1–12 ; Hebera 3:7–19). E ani i te mau tamariʼi ’ia ha’uti mai i te ʼāʼamu. E aha tē tupu mai te mea e faʼaʼetaʼeta tātou i tō tātou ʼāʼau i te Fatu ʼe i tāna ʼevanelia ?

• E ani i te mau tamariʼi ʼia taiʼo i te Mataio 13:15 ; Hebera 3:15 ; Mosia 11:29 ; ’e Mose 6:27. E ani ia rātou ’ia pāpaʼi atu i niʼa i te tāpura i te mau tuhaʼa o te tino tei faʼahitihia i roto i teie mau ʼīrava. E aha te auraʼa te parau te tariʼa turi, te matapō, ʼe te ʼāʼau ʼetaʼeta i te pae vārua ? Nāhea tātou e pāpū ai ē ʼua ineine tō tātou tariʼa, tō tātou mata, ʼe tō tātou ʼāʼau i te ’ite i te reo o te Vārua ?

Hebera 5:1–4

Nā te Atua i pi’i te mau taʼata tei mau i te autahuʼaraʼa.

Tē hōroʼa mai nei te Hebera 5 i te hō’ē rāve’a nō te mātutu nō ni’a i te autahuʼaraʼa—te mana ’e te ha’amanara’a nō te rave i te ’ohipa i te iʼoa o te Atua—ʼe nāhea te reira e fariʼihia ai.

Te mau ’ātivite e au

• E faʼaʼite i te hōhoʼa Moses Gives Aaron the Priesthood Te hōroʼa nei Mose i te Autahuʼaraʼa ia ’A’arona (Buka hōho’a nō te ’evanelia, N°15) ʼa taiʼo ai te hōʼē tamariʼi i te Hebera 5:4. E fa’ata’a ē, ’ua pi’ihia te Autahu’ara’a a Aarona i te i’oa o Aarona. E tauturu i te mau tamariʼi ʼia feruri i te mau ʼohipa tā te mau taʼata tei mau i te Autahuʼaraʼa a Aarona e rave (mai te bāpetizoraʼa, te haʼamaitaʼiraʼa ʼe te ʼōpereraʼa i te ʼōroʼa, ʼe te aniraʼa ia vetahi ʼē ’ia haere mai i te Mesia ra ; hi’o Te Ha’api’ira’a Tumu ’e te mau Fafaura’a 20:46–48, 59).

• E tauturu i te mau tamariʼi ʼia feruri i te mau rāveʼa rau e fāriʼi ai te ta’ata i te ha’amanara’a. ’Ei hiʼoraʼa, nāhea te hōʼē ʼorometua haʼapiʼi, te taote, ʼaore rā te faʼatere poritita e fāri’i ai i te ha’amanara’a ? E mea nāhea te Atua i te hōroʼa i tāna ha’amanara’a ? E ani i te mau tamariʼi ’ia feruri i teie uiraʼa, ʼa taiʼo ai rātou i te Hebera 5:4 ʼe te pae ʼo te hīroʼa faʼaroʼo. E tauturu i te mau tamari’i ’ia feruri i te mau ta’ata i roto i te pāroita tei mau i te ha’amanara’a nō ’ō mai i te Atua ra—tae noa atu i te feiā tei mau i te autahu’ara’a, ’oia ato’a te mau tāne ’e te mau vahine tei fa’ata’ahia nō te tāvini i roto i te mau pi’ira’a ta’a ’ē.

Fa’aitoito i te ha’api’ira’a i te fare

E ani i te mau tamariʼi ’ia fa’a’ite i tō te ʼutuāfare, i te taime nō te pō ʼutuāfare, i te hōʼē pāpaʼiraʼa moʼa, te hōʼē hīmene ʼaore rā ’ātivite tā rātou i haʼapiʼi mai i roto i te piha haʼapiʼiraʼa i teie mahana.

Ha’amaita’i i tā tātou ha’api’ira’a

E nehenehe te mau tamariʼi ʼia ʼite i te fa’aurura’a a te Vārua. E ha’api’i i te mau tamari’i ē, te mau mana’o nō te hau, nō te here ’e nō te tāmāhanahana tā rātou e fāri’i, ’ia ’āparau ana’e rātou ’e ’aore rā, ’ia hīmene ana’e rātou nō ni’a ia Iesu Mesia ’e tāna ’evanelia, nō roto mai ïa i te Vārua Maita’i.