« 23–29 nō ’Ātopa. 1 ’e 2 Timoteo ; Tito ; Philemona : ‘’Ei ha’apa’ora’a rā ’oe nā tei fa’aro’o ra’ », Mai, pe’e mai—nō te Paraimere : Faufa’a ’Āpī 2023 (2021)
« 23–29 nō ’Ātopa. 1 ’e 2 Timoteo ; Tito ; Philemona », Mai, pe’e mai—nō te Paraimere : 2023
23–29 nō ’Ātopa
1 ’e 2 Timoteo ; Tito ; Philemona
« ʼEi ha’apa’ora’a rā ʼoe nā tei faʼaroʼo ra »
’Ua ha’api’i Paulo ē « Te mau parau mo’a ato’a i pāpa’ihia ra… ’ei fa’a’ite mai i te parauti’a ra » (2 Timoteo 3:16). ’A tuatāpapa ai ’oe i teie mau ’episetole, ’a feruri nāhea te reira e fa’auru ai i te mau tamari’i ’ia ora ma te parauti’a.
Tītau i te mana’o
E ani i te mau tamariʼi ’ia paraparau mai nō niʼa i te tahi ta’ata ’o tei riro maita’i ʼei « haʼapaʼoraʼa nā tei faʼaroʼo ra » nō rātou. E aha tā rātou e rave nei nō te riro ʼei hiʼoraʼa maitaʼi nō vetahi ʼē ?
Ha’api’i i te ha’api’ira’a tumu : Te mau tamari’i ’āpī
Tē arataʼi nei te mau ʼepisekōpo i te pāroita ʼei tāvini nā te Atua.
ʼUa haʼapiʼi Paulo ia Timoteo ʼe ia Tito i te faufaʼa rahi o te mau ʼepisekōpo. Nāhea ’oe e haʼapiʼi ai i te mau tamariʼi e aha tā te ʼepisekōpo e rave nei ? (’Ua tū’ati ri’i te ti’ara’a peresideni ʼāmaʼa i te ti’ara’a ʼepisekōpo.)
Te mau ’ātivite e au
-
E pāpaʼi i te hōʼē hōhoʼa ʼōhie nō tō ’oe ʼepisekōpo i niʼa i te tāpura . E ani i te mau tamari’i ’ia fa’a’ite mai i te tahi mau mea tā rātou i ’ite nō ni’a i te ʼepisekōpo. Mai te aha tōna huru ? E aha tāna ’ohipa ? Nāhea ʼoia i te haʼamaitaʼi i te pāroita ? (E ’ite ’oe i te tahi mau huru o te hōʼē ʼepisekōpo i roto i te 1 Timoteo 3:1–2 ʼe Tito1:7–9.) ’A faʼaʼite mai ai te mau tamariʼi i tō rātou mau manaʼo, e pāpaʼi i te reira i niʼa i te mau ʼapi parau ʼe e vaiiho i te mau tamariʼi ’ia tuʼu atu i te reira i niʼa i te tāpura i pīha’i iho i te hōhoʼa.
-
Pāpa’i i te mau hōpoi’a a te hō’ē episekōpo i ni’a i te mau ’api parau—mai te tauturura’a i te mau tamari’i ’e te feiā ’āpī i roto i te pāroita, te fāri’ira’a i te tuha’a ’ahuru ’e te mau ō ha’apaera’a mā’a, te hōro’ara’a i te mau pi’ira’a, te uiuira’a i te mau melo ’e te tauturura’a i te feiā nava’i ’ore. E tuʼu atu i teie mau ʼapi parau i roto i te hōʼē ʼāuʼa, ʼe e ani i te tamari’i tātaʼitahi ’ia rave mai i te hōʼē ʼapi parau. I muri iho e tauturu i te tamariʼi ʼia haʼuti ta’ata ora mai i teie mau hōpoi’a ’e ’o ’oe. E faʼaʼite i tō ’oe ʼiteraʼa pāpū ē ʼua piʼihia tō ’oe ʼepisekōpo e te Atua.
-
E ani i te mau tamariʼi ’ia pāpa’i i te hō’ē hoho’a nō te ʼepisekōpo tē tāvini ra i te mau melo nō te pāroita. E parau atu ē, e hōroʼa i tā rātou mau hōhoʼa i te ʼepisekōpo ra nō te haʼamāuruururaʼa iāna. E aha tā tātou e nehenehe e rave nō te tauturu iāna ?
« ’Eiaha roa ’ei ta’ata e vahavaha mai i tō ’āpīra’a na ; ’ei ha’apa’ora’a rā ’oe nā tei fa’aro’o ra » (1 Timoteo 4:12).
E nehenehe au e riro « ʼei haʼapa’oraʼa nā tei faʼaroʼo. »
E aha tā ’oe e nehenehe e rave nō te faʼauru i te mau tamariʼi ’ia riro « ʼei haʼapa’ora’a nā tei faʼaroʼo » ?
Te mau ’ātivite e au
-
E taiʼo i te 1 Timoteo 4:12, ʼe e ani i te mau tamariʼi e aha tā rātou e nehenehe e rave nō te riro ʼei hiʼoraʼa maitaʼi nō vetahi ʼē.
-
E faʼaʼite atu i te hōʼē ’ohipa i tupu ē ’ua tāmata ’oe i te riro ʼei ha’apa’ora’a maitaʼi nō te tahi ʼaore rā i te taime ’a riro ai te tahi taʼata ʼei ha’apa’ora’a maitaʼi nō ’oe (e parau ato’a paha nō ni’a i tā ’oe mau pīahi). E ani i te mau tamari’i ’ia riro ’ei ha’apa’ora’a maita’i nō te mau melo o tō rātou ’utuāfare ’e nō te mau hoa.
E tauturu te mau pāpa’ira’a mo’a iāʼu ʼia ha’api’i i te parau mau.
Mai te mea e tauturu ’oe i te mau tamariʼi ʼia haʼapiʼi i te here i te mau pāpaʼiraʼa moʼa, e haʼamaitaʼi ïa te mau ha’api’ira’a i roto i te mau pāpa’ira’a mo’a i tō rātou orara’a i roto i te mau matahiti i muri nei.
Te mau ’ātivite e au
-
E faʼaʼite i te tahi mau pāpaʼiraʼa moʼa ʼe e tauturu i te mau tamariʼi ’ia haʼamātau atu i te reira nā roto i te faʼaʼiteraʼa ia rātou i te mau ʼapi upoʼo parau o te Biblia, te Buka a Moromona, te Ha’api’ira’a Tumu ʼe te mau Fafaura’a, ʼe te Buka Poe Taoʼa Rahi. E ani i te hōʼē tamariʼi ’ia tāpeʼa i teie mau buka ’a taiʼo ai ’oe i te 2 Timoteo 3:15–17. E parau i te mau tamari’i nō te aha ’oe e here ai i te mau pāpa’ira’a mo’a, ’e e vaiiho i te mau tamari’i ’ia fa’a’ite mai i tō rātou mau mana’o.
-
E ani i te mau tamariʼi ’ia paraparau mai nō niʼa i tā rātou taoʼa faufaʼa rahi roa. E aha tā rātou e rave i teie taoʼa ? Nāhea rātou i te rave i te reira ? E vaiiho ia rātou, te tahi i muri i te tahi, ’ia tāpeʼa i te mau pāpaʼiraʼa moʼa ʼe ʼia huri ma te haʼapaʼo maitaʼi i te mau ʼapi. Nō te aha tātou e fa’a’ohipa ai i te mau pāpaʼiraʼa moʼa ? Nō te aha tātou e haʼapaʼo maitaʼi i te reira ? E fa’a’ite pāpū ē, tē vai ra i roto i te mau pāpa’ira’a mo’a te mau parau mau tā tō tātou Metua i te ao ra e hina’aro ’ia ’ite tātou.
-
E tauturu i te mau tamariʼi ’ia faʼanaho i te mau ʼohipa e tano i te mau hīmene nō niʼa i te mau pāpaʼiraʼa moʼa, mai te hīmene « Quand je lis l’Ecriture sainte » (Chants pour les enfants, 66).
Ha’api’i i te ha’api’ira’a tumu : Te mau tamari’i pa’ari a’e
E nehenehe au e riro « ʼei haʼapa’oraʼa nā tei faʼaroʼo ra. »
E mea ʼāpī roa Timoteo ’ei taʼata faʼatere o te ʼĒkālesia, ʼua hinaʼaro rā Paulo ʼia ʼite ʼoia ē, e nehenehe ’oia ʼia riro noa ā ʼei hiʼoraʼa maitaʼi. E nehenehe ’oe e fa’auru i te mau tamari’i ’ia fa’a’ite i te mau hi’ora’a maita’i nō te feiā ’ati a’e ia rātou.
Te mau ’ātivite e au
-
E taiʼo ʼāmui i te 1 Timoteo 4:12, ʼe e ani i te mau tamariʼi ’ia ʼimi e ono rāveʼa tā Paulo i parau e nehenehe tātou e riro « ʼei haʼapaʼoraʼa nā tei faʼaroʼo ra. » E vāhi ’āpitipiti i te mau tamari’i ’e ’a ani i te ’āpiti tātaiʼtahi ’ia feruri i te tahi hiʼoraʼa e nehenehe ai rātou e riro ʼei hiʼoraʼa maitaʼi nō tei faʼaroʼo ra. E ani ia rātou ’ia haʼuti ta’ata ora mai i tō rātou hiʼoraʼa i mua i te mau pīahi.
-
E ani i te mau tamariʼi mai te mea e hinaʼaro rātou e faʼaʼite mai i te mau taime ’a tamata ai rātou i te riro ʼei hiʼoraʼa maitaʼi nō vetahi ʼē. E parau atu ia rātou e mea nāhea rātou i te rirora’a ʼei hiʼoraʼa nō tei faʼaroʼo ra ’e e mea nāhea tō ’oe ʼiteraʼa i tō rātou hiʼoraʼa maitaʼi nō vetahi ʼē.
E mea faufa’a a’e te mau mea mure ore i te moni.
Te tuu nei tō te ao nei i te moni i te ti’ara’a mātāmua roa, ’e te mau mea tā te moni e nehenehe e ho’o mai. Nāhea e ti’a ai ia ’oe ’ia tauturu i te mau tamari’i ’ia tāpe’a noa i tō rātou tūtonura’a ’e tō rātou here i ni’a i tō tātou Metua i te ao ra ’e ia Iesu Mesia ?
Te mau ’ātivite e au
-
E ani i te mau tamariʼi ’ia parau mai e aha tā rātou e hoʼo mai ʼahani nā rātou te tāʼātoʼaraʼa o te moni i te ao nei. E tai’o i te 1 Timoteo 6:7–12 ’e te mau tamari’i, ’e e ani ia rātou ’ia ha’apoto mai i te mea tā Paulo i ha’api’i ia Timoteo nō ni’a i te moni. E ani i muri iho i te mau tamariʼi ʼia taiʼo faʼahou i te mau ’īrava 11–12 ma te ’imi i te mau mea tā Paulo i parau ē, ’ua hau a’e te faufaʼa i te moni.
-
E hōhora atu i te hōhoʼa nō te mau mea nō teie nei ao (mai te moni, te mau haʼuti, ʼaore rā te faʼaʼoaʼoaraʼa) ʼe te mau mea mure ʼore (mai te mau ʼutuāfare ʼaore rā te mau hiero). E ani i te mau tamariʼi ’ia faʼataʼa i te mau hōhoʼa i roto i nā ha’aputura’a e piti—te mau mea ’o tē tāpiri atu ia tātou i te Mesia ʼe te mau mea e nehenehe e faʼahahi ʼē atu ia tātou i te Mesia mai te mea e rahi aʼe tō tātou here i te reira i iāna. Nō te aha « te nounou moni i riro ai… te tumu o te mau ’ino ato’a » ? Nāhea te fa’atumura’a i ni’a ia Iesu Mesia i te fa’a’oa’oa ia tātou ?
ʼUa hōroʼa mai tō tātou Metua i te ao ra ia tātou i te mau pāpaʼiraʼa moʼa nō te tauturu ia tātou ʼia fa’ata’a i te parau mau i te hape.
’A haʼapiʼi ai ’oe i te mau tamariʼi nō niʼa i te mau pāpaʼiraʼa moʼa, e ʼimi i te mau rāveʼa nō te faʼaitoito ia rātou ʼia ʼite i tō rātou iho mau ʼiteraʼa pūai ’e te parau a te Atua.
Te mau ’ātivite e au
-
E ani i te mau tamari’i ’ia tai’o i te 2 Timoteo 3:15–17. Fa’a’ite i te mau hōho’a nō ni’a i te ā’amu nō roto mai i nā pāpa’ira’a mo’a e maha, ’e e ani i e rave rahi tamari’i ’ia mā’iti i te hō’ē hōho’a ’e ’ia fa’ati’a mai i te ’ā’amu. (E nehenehe e ’itehia ia ’oe te mau hōho’a i roto i te Buka hōho’a nō te ’evanelia ’e i roto i te mau mātēria o te Mai, pe’e mai.) E ani i te mau tamari’i ’ia fa’a’ite mai i te tahi atu mea tā rātou i ’ite nō ni’a i taua buka pāpa’ira’a mo’a ra. Nāhea te mau pāpaʼiraʼa moʼa « i te haʼapaʼari ia [tātou] ē tae roa atu i te fa’aorara’a » ?
-
E fa’a’ite i te hō’ē ’īrava pāpa’ira’a mo’a auhia ’e ’aore rā, hō’ē ’ohipa i tupu ’a tauturu ai te mau pāpa’ira’a mo’a ia ’oe ’ia patu i tō ’oe fa’aro’o i tō tātou Metua i te ao ra ’e ia Iesu Mesia. ’A ani i te mau tamari’i ’ia fa’a’ite mai i te hō’ē o tā rātou iho ’īrava au roa.
-
E ani i te hōʼē tamariʼi ’ia tai’o i te Moroni 10:4–5. E aha tā Moroni i fafau mai i roto i teie mau ʼīrava ? E ani i te mau tamariʼi e aha tā rātou i rave nō te fāri’i i te ʼiteraʼa pāpū ē, e parau mau te mau pāpaʼiraʼa moʼa. E ani ia rātou ’ia tai’o ’aore rā ’ia fa’aro’o tāmau noa i te mau pāpa’ira’a mo’a ’e ’ia ani i te Atua e parau mau ānei te reira.
Fa’aitoito i te ha’api’ira’a i te fare
E ani i te mau tamariʼi ’ia faʼaʼite i tō rātou mau ʼutuāfare e aha tā rātou i haʼapiʼi mai nō niʼa i te mau pāpaʼiraʼa moʼa ʼe ʼia ʼimi i te hōʼe ʼīrava tā rātou e nehenehe e faʼaʼite atu i te mau pīahi i te hepetoma i muri nei (ma te tautururaʼa a tō rātou mau metua, ’ia hinaʼarao-anaʼe-hia).
Ha’amaita’i i tā tātou ha’api’ira’a
E faʼatano i te mau ʼātivite nō te pāhono i te mau hinaʼaro. ʼEiaha e faʼariro i teie mau faʼanahoraʼa ʼei arataʼiraʼa fa’ahepohia, ’ia faʼaʼohipa rā i te reira ʼei puna manaʼo nō te faʼatupu i tō ’oe iho fa’aurura’a ’a feruri ai ’oe i te mau hinaʼaro o tā ’oe mau pīahi. E nehenehe ’oe e faʼatano i te mau ʼātivite nō te haʼapiʼi i te mau tamariʼi nō te mau fāito matahiti atoʼa.