« 2–8 nō ’Ātopa. Ephesia: ‘’Ei faʼaau i te feiā mo’a’ », Mai, pe’e mai—nō te Paraimere : Faufa’a ’Āpī 2023 (2022)
« 2–8 nō ’Ātopa. Ephesia », Mai, pe’e mai—nō te Paraimere : 2023
2–8 nō ’Ātopa
Ephesia
« ’Ei fa’aau i te feiā mo’a »
’A taiʼo ai ’oe i te Episetole i tō Ephesia, e feruri i te mau parau tumu tā ’oe e nehenehe e ha’apāpū nō te haʼamaitaʼi i tā ’oe mau pīahi. E pāpaʼi i te mau manaʼo atoʼa e tupu mai i roto i tō ’oe feruriraʼa ’a taiʼo ai ’oe.
Tītau i te mana’o
E ani i te mau tamariʼi ʼia tiʼa mai i niʼa i te hōʼē rēni. Ma te ha’amata i mua i te rēni, ’a horo’a i te tamari’i tāta’itahi i te hō’ē taime nō te fa’a’ite mai i te mea nō ni’a i te ’evanelia tāna i ha’api’i mai ’aita i maoro a’e nei, i roto i te hō’ē tuatāpapara’a pāpa’ira’a mo’a a te ’utuāfare, i te Paraimere, ’aore rā i te tahi atu vāhi.
Ha’api’i i te ha’api’ira’a tumu : Te mau tamari’i ’āpī
E tiʼa i te mau melo o te ʼĒkālesia ʼia riro ʼei hoa ʼe ’ei « tino huira’atira. »
ʼUa riro ānei tā ’oe mau pīahi ’ei « tamari’i ʼeʼē » ʼaore rā ’ei « tino huira’atira » i te tahi ʼe te tahi ʼe i te tahi atu mau melo o te pāroita ? E tauturu ia rātou ’ia hāro’aro’a ē noa atu tō rātou ta’a-’ē-raʼa, tē tauturu nei te Faʼaora ia tātou ’ia hōʼē ʼe ’ia here i te tahi ’e te tahi.
Te mau ’ātivite e au
-
E tuʼu i te hōʼē hōhoʼa nō te Faʼaora i rōpū i te piha. E ani i te mau tamariʼi ’ia tiʼa i te mau tufaʼa rau o te piha nō te faʼahōhoʼa i te mau « taʼata ʼeʼē » ʼaore rā te mau « purutia. » E tauturu ia rātou ’ia hāro’aro’a ē, te aura’a o teie mau ta’o, o te mau ta’ata ïa ’aita tātou i mātau. ’Ia taiʼo anaʼe ’oe i te Ephesia 2:19, e ani ia rātou ʼia nuʼu atu i pīha’i iho i te hōhoʼa o te Mesia ē tae roa atu ʼua piri ʼāmui atu rātou. E parau atu ia rātou ē, ’ia fātata ana’e tātou i te Faʼaora, e nehenehe tātou e hōʼē ’ei « tino huira’atira » ’aore rā ’ei hoa.
-
E ʼimi i te mau hōhoʼa nō te mau tamariʼi nā te ara, ʼe e huna atu i te reira nā roto i te piha. E tuʼu i te hōʼē hōhoʼa nō te Faʼaora i mua i te piha. E ani i te mau tamariʼi ʼia ’āpitipiti ia rātou mai te mau misiōnare ’e ’ia ’imi, te tahi i muri i te tahi, i te hō’ē hoho’a nō te « ta’ata ʼeʼē » nō te tuʼu atu i pīha’i iho i te hōhoʼa o te Faʼaora. E tauturu ia rātou ’ia hāro’aro’a ē, ’ia bāpetizo-anaʼe-hia te taʼata, e riro mai rātou ʼei tuhaʼa nō tō tātou ʼufuāfare ʼĒkālesia, ʼaore rā te « ’utuāfare o te Atua. » Nāhea tātou e tauturu ai i te taʼata tei tae ʼāpī mai ’ia ’ite ē, tē fāriʼi-poupou-hia nei ʼoia ?
Tē hina’aro nei tō tātou Metua i te ao ra ’ia faʼaroʼo vau i tōʼu nā metua.
ʼIa taiʼo anaʼe ’oe i te Ephesia 6:1–3, e feruri i te mau rāveʼa e nehenehe ai ’oe ʼia tauturu i te mau tamariʼi ’ia hāro’aro’a nō te aha e mea faufaʼa ʼia faʼaroʼo i tō rātou mau metua.
Te mau ’ātivite e au
-
E taiʼo i te Ephesia 6:1 i te mau pīahi, ʼaore rā e tauturu i te hōʼē o te mau tamariʼi ʼia taiʼo i te reira. E tauturu ia rātou ʼia feruri i te mau taime ’a faʼaroʼo ai rātou i tō rātou mau metua. E ani ia rātou ’ia fa’a’ite mai e mea nāhea tō rātou ha’amaita’ira’ahia nō te ha’apa’ora’a i te parau, ’e e aha tā rātou i fāri’i ’a ha’apa’o ai rātou. Nō te aha e mea faufa’a ’ia faʼaroʼo i tō tātou mau metua ?
-
E hīmene ʼāmui i te hīmene nō niʼa i te haʼapaʼo, mai te hīmene « Je veux obéir » » (Chants pour les enfants, 71). E vaiiho i te mau tamari’i, te tahi i muri mai i te tahi, ’ia fa’a’ite mai i te mea tā tō rātou metua e ani nei ia rātou ’ia rave, ’e e ani ia rātou ’ia ha’uti mai i te reira.
-
E fa’a’ite i te hō’ē hōho’a nō Iesu Mesia e bāpetizohia ra (hi’o Buka hōho’a nō te ’evanelia, N°35),’e e fa’a’ite e mea nāhea tō te Fa’aora ha’apa’ora’a i te parau a tō tātou Metua i te ao ra i tōna bāpetizora’ahia (hi’o 2 Nephi 31:6–7). E faʼaʼite atu i te hōʼē ’ohipa i tupu ē ’ua faʼaroʼo ’oe i tō ’oe mau metua ʼe ’ua haʼamaitaʼihia ’oe. Nō te aha tō tātou Metua i te ao ra e hinaʼaro ai ʼia fa’aro’o tātou i tō tātou nā metua ?
E nehenehe te ha’ana tama’i a te Atua e pāruru iā’u i te ’ino.
E nāhea ’oe ’ia tauturu i te mau tamariʼi ʼia hāro’aro’a ē, te raveraʼa i te mea parautiʼa e au ïa mai te ʼōʼomoraʼa i te haʼana tamaʼi ?
Te mau ’ātivite e au
-
E faʼaʼite i te hōhoʼa nō te hōʼē taʼata e ’ahu ra i te haʼana tamaʼi, mai te hōhoʼa i roto i te ʼapi ’ātivite nō teie hepetoma ʼaore rā i roto i te arata’i ha’api’ira’a nō teie hepetoma i roto i te Mai, pe’e mai—nō te taʼata hō’ē ʼe te ’utuāfare. ’A haʼapoto ai ’oe i te Ephesia 6:10–18, e faʼaʼite atu i te mau tamariʼi e nāhea terā tuha’a ’e terā tuha’a o te haʼana tamaʼi i te pāruru i te mau tuha’a rau o te tino. (Hiʼo « The ha’ana tāma’i tā’āto’a o te Atua », Friend, Tiunu 2016, 24–25.)
-
E hōpoi mai e rave rahi taoʼa i roto i te piha ha’api’ira’a ’o tē faʼahōhoʼa i te mau tuhaʼa nō te haʼana tamaʼi tei faʼahitihia i roto i te Ephesia 6:14–17 (ʼei hiʼoaraʼa, te tāupoʼo ʼaore rā te pāruru), ʼaore rā e hāmani pāpie i te mau tuha’a faufa’a o te ha’ana. E vaiiho i te mau tamariʼi, te tahi i muri i te tahi, ’ia ʼōʼomo i te « haʼana tamaʼi. » Tauturu ia rātou ’ia māramarama e nāhea tātou i te ’ō’omo i te ha’ana tama’i a te Atua (’ei hi’ora’a, nā roto i te tuatāpapara’a i te mau pāpa’ira’a mo’a, te tāvinira’a ia vetahi ’ē, te purera’a, te ha’apa’ora’a ’e tē vai atu ra). E āparau nāhea te ravera’a i teie mau mea i te pāruru ia tātou i te ’ino.
Ha’api’i i te ha’api’ira’a tumu : Te mau tamari’i pa’ari a’e
’Ua « hō’ē ato’a rā tō ’outou ’oire ’e te feia mo’a » i roto i te fare o te Atua.
E pūaihia te mau tamariʼi ’ia roa’a ana’e tō tātou mau hoa maitaʼi i roto i te ʼevanelia. Nāhea ’oe e tauturu ai ia rātou ’ia faʼatupu i te mau auhoaraʼa maitaʼi aʼe i te tahi ’e te tahi ?
’Ua « hō’ē ato’a rā » tātou ʼe te feiā moʼa o te Atua.
Te mau ’ātivite e au
-
E taiʼo ʼāmui i te Ephesia 2:19 ʼe e tāu’aparau i te auraʼa ’ia riro ’ei taʼata ʼeʼē ʼaore rā e purutia. E faʼaʼite atu i te hōʼē ’ohipa i tupu ’ua huru feruri ’oe e taʼata ʼeʼē ’e ’aore rā e purutia, ’e ʼua tauturu mai te tahi taʼata ’ia ’ite ē ’ua fāri’i-poupou-hia ’oe. E ani i te mau tamari’i ’ia fa’a’ite mai i teie huru ’itera’a i tupu i ni’a ia rātou. E aha tā tātou e nehenehe e rave ʼia riro tātou ʼei « hō’ē ato’a rā » ʼeiaha rā ʼei taʼata ʼeʼē ? Tē vai ra ānei te mau tamariʼi i roto i tā ’oe piha ’o tē ʼore e tae pinepine mai nei, pēnei aʼe tē mana’o ra rātou ē, mai te mau taʼata ʼeʼē rātou ? E tauturu i te mau tamariʼi ’ia haere mai ma te hōʼē faʼanahoraʼa nō te tauturu i taua mau melo ra ’ia ’ite rātou ē, tē fāriʼi-poupou-hia nei rātou ʼe ’ua herehia rātou.
-
Nō te tauturu i te mau tamari’i ’ia ha’apūai i tō rātou tā’amura’a i te tahi ʼe te tahi, e pāpaʼi i te tahi mau uiraʼa i niʼa i te tāpura ’o tē turaʼi ia rātou ’ia faʼaʼite i te tahi mea nō niʼa ia rātou iho, mai teie te huru I nāfea tā ’oe pure i te pāhonora’ahia mai ? ʼaore rā E aha te mea e au-roa-hia e ’oe ’ia rave ʼe tō ’oe ʼutuāfare ? E vāhi ’apipiti i te mau tamariʼi, ʼe e ani ia rātou ʼia ui i te tahi ʼe te tahi i teie mau uiraʼa. E aha tā rātou i ha’api’i mai nō niʼa i te tahi ʼe te tahi ?
Tē hina’aro nei tō tātou Metua i te ao ra iā’u ’ia fa’aro’o ʼe ’ia faʼatura i tōʼu nā metua.
E feruri i te mau rāveʼa e tauturu ’oe i te mau tamariʼi ’ia hāro’aro’a nō te aha e mea faufaʼa ʼia faʼaroʼo i tō rātou mau metua.
Te mau ’ātivite e au
-
E ani i te mau tamariʼi ʼia taiʼo rātou iho i te Ephesia 6:1–3 ʼe ʼia ʼimi i te mau pereota faufaʼa rahi nō rātou. E ani ia rātou ’ia faʼaʼite mai i teie mau pereota ʼe nō te aha rātou i manaʼo ai e mea faufaʼa teie mau pereota.
-
E ani i te mau tamariʼi ’ia ’imi ’e ’ia ’āparau mai nō ni’a i te tahi mau taʼata i roto i te mau pāpaʼiraʼa moʼa tei faʼaroʼo ʼe tei faʼatura i tō rātou mau metua, mai te Faʼaora (hiʼo Luka 2:42–52), Ruta (hiʼo Ruta 1), ʼaore rā Nephi (hiʼo 1 Nephi 3:1–8). Nō te aha e mea faufa’a ’ia faʼaroʼo ʼe ’ia faʼatura i tō tātou mau metua ?
-
E hōroʼa i te tamariʼi tātaʼitahi i te hōʼē ʼapi parau ma te tāʼo faʼatura i niʼa roa. E tuatāpapa i te auraʼa o taua tāʼo ra. E ani i te mau tamariʼi ʼia pāpaʼi ʼaore rā ʼia pāpa’i hoho’a i niʼa i tā rātou mau ʼapi parau i te tahi mea ’o tā rātou e rave nō te fa’a’ite ē, tē faʼatura nei rātou i tō rātou nā metua.
E nehenehe te ha’ana tama’i a te Atua e pāruru iā’u i te ’ino.
’Ia taiʼo anaʼe ’oe i te Ephesia 6:10–18, e feruri i te tahi o te mau ʼati pae vārua e faʼaruruhia nei e te mau tamariʼi, ’e nāhea ’oe e tauturu ai ’ia haʼapūai i te mau tamariʼi i mua i te reira mau ʼati.
Te mau ’ātivite e au
-
’Ia taiʼo anaʼe te hōʼē tamariʼi i te Ephesians 6:10–18, e ani i te tahi atu tamariʼi ’ia pāpaʼi ’aore rā, ’ia pāpa’i hoho’a i niʼa i te tāpura i te mau tuhaʼa o te haʼana tamaʼi tei faʼahitihia. Nō te aha e mea faufaʼa te hōʼē haʼana tamaʼi i roto i te hōʼē ʼaroraʼa ? Nāhea e nehenehe ai ia tātou ’ia ʼōʼomo i te haʼana tamaʼi pae vārua i te mau mahana atoʼa ?
-
E fa’aue i te tamariʼi tātaʼitahi ʼia pāpaʼi hoho’a ’e ’ia tāpaʼo i te hōʼē tuhaʼa o te haʼana tamaʼi tei fa’ata’ahia i roto i te Ephesia 6:14–17. Nāhea teie mau tuhaʼa o te ha’ana tama’i i te pāruru ia tātou i te ’ino ? E aha tā te Fatu i fafau mai i te feiā ’o tē ʼōʼomo i te haʼana tamaʼi a te Atua ?(hi’o Ephesia 6:13). E aha te auraʼa e « pātoʼi i te ʼenemi i te mahana ʼino ra » ?
Fa’aitoito i te ha’api’ira’a i te fare
E ani i te mau tamariʼi ’ia hiʼo atu i teie hepetoma i te tahi taʼata ’o tē manaʼo ē, e taʼata ʼeʼē ʼoia. E tītau atu ia rātou ʼia rave i te tahi mea nō te haere atu e tauturu i taua taʼata ra.
Ha’amaita’i i tā tātou ha’api’ira’a
Tauturu i te mau tamari’i ’āpī ’ia raupā i te ’ite nā roto mai i te mau pāpa’ira’a mo’a. E nehenehe te mau tamari’i ’āpī e ha’api’i nā roto mai i te mau pāpa’ira’a mo’a, e tītauhia rā ia rātou ’ia rōtahi i ni’a i te hō’ē noa iho ’īrava ’e ’aore rā, hō’ē noa a’e pereota tumu. E nehenehe ’oe e ani i te mau tamari’i ’ia ti’a i ni’a ’ia fa’aro’o ana’e rātou i te hō’ē ta’o ’e ’aore rā, te hō’ē pereota ta’a ’ē. (Hi’o Ha’api’ira’a mai tā te Fa’aora, 25–26.)