2–8 nō ’Ātopa

Ephesia

« ’Ei fa’aau i te feiā mo’a i te ’ohipa ra »

Tē ’ite ra ānei ’outou i te mau tū’atira’a i roto i te mau poro’i i te ’āmuira’a rahi ’e te ’episetole a Paulo i tō Ephesia ?

Pāpa’i i te mau mana’o e tae mai

I te pararera’a te ’evanelia i Ephesia, e ’ere « te ti’arepu […] i te mea iti » (Te ’Ohipa 19:23) i rotopū i tō Ephesia. Nō te feiā rima’ī i reira e hāmani i te vāhi mo’a nō te tahi ruahine ’ētene, ’ua hi’o rātou i te ha’apa’ora’a keresetiano ’ei fa’ataupupura’a i tā rātou ’imira’a faufa’a, ’āria « ’ī a’era rātou i te riri […] ’Ua ’ārepurepu atu ra taua ’oire ato’a ra » (hi’o Te ’Ohipa 19:27–29). E feruri na ’āhani e melo fa’afāriu ’āpī ’outou i terā taime. E rave rahi ta’ata nō Ephesia tei fāri’i ’e tei ha’apa’o i te ’evanelia i roto i te reira « mea rahi ’auē » (Te ’Ohipa 19:40), ’e ’ua ha’apāpū atu Paulo ia rātou ē, ’o « te Mesia […] tō tātou hau » (Ephesia 2:13–14). E au ē tāna mau parau ’e tāna anira’a « ’ia ha’apae-roa-hia te māmahu ’ore, ’e te ’iriā, ’e te riri, ’e te ’āvau ’e te fa’a’ino, ’e te tāiroiro, ’eiaha roa ato’a ïa » (Ephesia 4:31) e mea tano ’e te mea tāmāhanahana i teienei mai i terā ra tau. Nō tō Ephesia, ’e nō tātou tāta’itahi ho’i, e noa’a mai te pūai nō te fa’aruru i te ’ati « i te Fatu, ’e i tōna ra pūai rahi » (hi’o Ephesia 6:10–13).

Mau mana’o nō tā’u iho tuatāpapara’a pāpa’ira’a mo’a

Ephesia 1:4–11, 17–19

’Ua mā’iti te Atua iā’u, ’aore rā ’ua fa’atōro’a-ātea-hia vau, ’ia rave au i te tahi mau hōpoi’a i ni’a i te fenua nei.

’Ua parau Paulo nō te feiā mo’a ’ei ta’ata tei « ha’apa’o-ātea-hia » e te Atua ’e tei « [mā’itihia] hou teie nei ao ra » nō te riro ’ei ta’ata nōna. Terā rā tē parau nei te peresideni Henry B. Eyring ē, e ’ere roa ïa « ’ua fa’aoti ātea te Atua ’o vai tāna mau tamari’i tāna e fa’aora ma te hōro’a atu i te ’evaneila ia rātou, ’e ’o rātou tei ’ore roa atu i fa’aro’o i te ’evanelia ’aita ïa rātou i ‘mā’itihia’ […] [Tērā rā] e mea hau atu te here ʼe te tiʼa o te ʼōpuaraʼa a te Atua. E hinaʼaro rahi tō tō tātou Metua i te ao ra i te haʼaputuputu ʼe i te haʼamaitaʼi i te tāʼātoʼaraʼa o tōna ʼutuāfare » (Haʼaputuputuraʼa i te ʼutuāfare o te Atua », Liahona, Mē 2017, 20–21). E nehenehe te tā’āto’ara’a o te mau tamari’i a te Atua e fāri’i i te ’evanelia ’e tō te reira mau ’ōro’a maoti te ’ohipa e ravehia ra nō te feiā i pohe, i roto i te mau hiero mo’a.

Noa atu ā ’aita hō’ē i ha’apa’o-ātea-hia e fa’aorahia ’aore rā ’aita, tē ha’api’i nei te heheura’a i teie nei ’anotau ē, tē vai ra te ta’ata tei mā’itihia ’aore rā tei « fa’atōro’a-ātea-hia » i roto i te ao hou te tāhuti nei nō te amo i te tahi mau hōpoi’a i ni’a i te fenua nei. ’Ia tai’o ’oe i te Ephesia 1 ’a feruri e nāhea teie parau mau i te tano i ni’a i a ’oe.

Ephesia 1:10

« E ’āmui [te Atua] i te mau mea ato’a i te Mesia ra ».

I tō ’oe mana’o nō te aha i parauhia ai tō tātou nei tau te « tu’ura’a parau i te hopera’a mau o te mau tau ra » ? E aha te aura’a te « ’āmui[ra’a] i te mau mea ato’a i te Mesia ra » ? ’A feruri ai ’oe i teie mau parau, ’a tai’o i te mau ’īrava i muri nei : Ephesia 4:13 ; 2 Nephi 30:7–8 ; Te Ha’api’ira’a Tumu ’e te mau Fafaura’a 110:11–16 ; 112:30–32 ; 128:18–21. E tae mai paha te fa’aurura’a ’ia pāpa’i i tā ’oe iho tātarara’a nō teie mau parau.

Hi’o ato’a Elder David A. Bednar, « ʼĀmui i te mau mea ato’a i te Mesia ra », Liahona, Nov. 2018, 21–24.

Ephesia 2:19–22 ; 3:1–7 ; 4:11–16

’Ua niuhia te ’Ēkālesia i ni’a i te mau ’āpōsetolo ’e te mau peropheta, ’e ’o Iesu Mesia te tihi rahi.

’Ia au i tei pāpa’ihia i roto i te Ephesia 2:19–22 ; 3:1–7 ; 4:11–16, nō te aha e mau peropheta ’e e mau ’āpōsetolo tō tātou ? ’A feruri i te mau a’ora’a a te mau peropheta ’e te mau ’āpōsetolo tā ’oe i fa’aro’o i roto i te ’āmuira’a rahi. E nāhea tā rātou mau ha’api’ira’a i te fa’atupu i te mau ’ōpuara’a tā Paulo i fa’ahiti ? ’Ei hi’ora’a, ’ua nāhea teie mau ha’api’ira’a i te tauturura’a ia ’oe « ’ia ’ore […] ’ia ’āueue noa i te mata’i ra, i terā parau, i terā parau » ?

Mai te aha te huru e ’ōfa’i tihi Iesu Mesia nō te ’Ēkālesia ? Mai te aha te huru e ’ōfa’i tihi ’oia nō tō ’oe orara’a ?

Hi’o ato’a Te ’Ohipa 4:10–12.

’O Iesu Mesia te tihi rahi o te ’Ēkālesia.

Ephesia 5:21–6:4

E nehenehe te pe’era’a i te hi’ora’a o te Fa’aora e ha’apa’ari i te mau tā’amura’a i roto i te ’utuāfare.

’Ia tai’o ’oe i te Ephesia 5:21–6:4, ’a feruri e nāhea te a’o i roto i teie mau ’īrava e nehenehe ai e ha’apūai i te mau tā’amura’a i roto i te ’utuāfare.

E mea faufa’a ’ia ha’apāpū ē, te mau parau a Paulo i roto i te Ephesia 5:22–24, ’ua pāpa’ihia ïa mai te au i te mau peu i terā ra tau. Tē ha’api’i nei te mau peropheta ’e te mau ’āpōsetolo i teie nei tau ē, ’aita te mau tāne i ni’a atu i te mau vahine ’e ’ua riro rāua e « mau hoa ’aifāito » (hi’o « Te ’utuāfare : E Poro’i i tō te Ao Nei », ChurchofJesusChrist.org). Noa atu rā, e nehenehe ā e ’ite mai i te parau a’o tano i roto i te Ephesia 5:25–33. ’Ei hi’ora’a, e nāhea te Mesia i te fa’a’ite i tōna here i te feiā mo’a ? E aha tō te reira fa’ahope’ara’a i ni’a i te huru te mau hoa fa’aipoipo, ’ei hoa ’aifāito, e rave te tahi i te tahi ? E aha te mau poro’i tā ’oe e ’ite ra e tano nō ’oe i roto i teie mau ’īrava ?

Ephesia 6:10–18

E tauturu te ha’ana tama’i a te Atua i te pāruru ia tātou i te ’ino.

’Ia tai’o ’oe i te Ephesia 6:10–18, e feruri nō te aha Paulo i topa ai te i’oa o te mau tuha’a ha’ana tama’i mai tāna i rave. E pāruru mai « te ha’ana tama’i ato’a a te Atua ra » i te aha ? E aha tā ’oe e nehenehe e rave nō te ’ahu hope roa atu ā i te tuha’a tāta’itahi o te ha’ana tama’i, i te mau mahana ato’a ?

Hi’o ato’a 2 Nephi 1:23 ; Te Ha’api’ira’a Tumu ’e te mau Fafaura’a 27:15–18.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Ephesia 1:10.Nō te ha’api’i i te ta’ata i teie ’īrava, ’ua fa’a’ohipa Elder David A. Bednar i te hi’ora’a nō te hō’ē taura (hi’o « ’Āmui i te mau mea ato’a i te Mesia ra »). E nehenehe e fa’a’ite i te mau melo nō te ’utuāfare i te hō’ē taura, ’e e vaiiho ia rātou ’ia tāpe’a i te reira ’e ’ia hi’opo’a i te reira ’a fa’ahiti ai ’outou i te tahi mau tuha’a nō te a’ora’a a Elder Bednar. Tē nāhea ra te Atua i te ’āmui i te mau mea ato’a i te Mesia ra ? E aha tā tātou mau ha’amaita’ira’a maoti teie ’āmuira’a ?

Ephesia 2:4–10 ; 3:14–21.E ani i te mau melo o te ’utuāfare ’ia fa’a’ite mai i te tahi ’ohipa i tupu nō rātou, ’e ’ua putapū rātou i te here ’e te aroha o te Atua ’e o Iesu Mesia, mai tei fa’a’itehia i roto i teie mau ’īrava.

Ephesia 2:12–19.E au paha i tō ’outou ’utuāfare ’ia hāmani i te hō’ē patu ma te tahi tūru’a ’aore rā te tahi mau tao’a e vai ra i te fare ’a vāvahi atu ai i te reira. ’Ua fa’ahiti Paulo i te parau nō te « patu » i rotopū i te mau ’Ētene ’e te mau ’āti Iuda, e aha te mau huru patu e fa’ata’a ’ē nei i te ta’ata i teie mahana ? ’Ua nāhea Iesu Mesia i te « huri ho’i i raro » i teie mau patu ? E nāhea ’oia i te « fa’afaite [ia tātou] i te Atua » ? (’īrava 16).

Ephesia 6:10–18.E nehenehe te ’utuāfare e hāmani i tāna iho « ha’ana tama’i a te Atua » ma te fa’a’ohipa i te mau tauiha’a i te fare. E nehenehe te video « The Armour of God [Te ha’ana tama’i a te Atua] » (ChurchofJesusChrist.org) e tauturu i te ’utuāfare ’ia fa’ahi’o i te mau melo nō te ’utuāfare i teie ha’ana tama’i. E nāhea te tuha’a tāta’itahi o te ha’ana tama’i i te pāruru ia tātou i te pae vārua ? E nāhea tātou nō te tauturu i te tahi ’e te tahi ’ia « ’ahu i te ha’ana tama’i ato’a a te Atua » (Ephesia 6:11), i te mau mahana ato’a ?

Nō te mau mana’o hau atu nō te ha’api’ira’a i te mau tamari’i, ’a hi’o te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Hīmene tei mana’ohia : « Ti’aturira’a nō Ziona », Te mau hīmene, N°161.

Ha’amaita’i i tā’u iho tuatāpapara’a pāpa’ira’a mo’a

E vaiiho i te Vārua ’ia arata’i i tā ’oe tuatāpapara’a. E vai ara i te Vārua e arata’i ia ’oe i te mau mea tei tītauhia ia ’oe ’ia ha’api’i i te mahana tāta’itahi, noa atu ā te reira, e arata’i ia ’oe i te tuatāpapara’a i te hō’ē tumu parau ’aita ’oe i ’ōpua i te ha’amatara’a.

Nā te ’ahura’a i te ha’ana tama’i a te Atua e pāruru ia tātou i te pae vārua.